1 KORINTUS 3:12 - JANJAI BLAU Lem Bahaso Jang Bebilai

¹² Ade de temgok gedung o neak das pondasi kunei mas, ade de makei pirok, ade de makei butau permata, ade kulo de makei kieu, dukut ke'ing atau jerami.

1 KORINTUS 3:12 ပူးပေါင်းရင်းမြစ်များ

KISAH RASUL-RASUL 20:30

Bahkan kunei antaro udi suang bakea ade tun-tun de bakea melei namen bito de coa benea. Tobo'o nea awei o kunyau tun-tun de sudo pecayo ngen Yesus jijai seset ngen temotoa tobo'o.

ROMA 16:17

Saudaro-saudaro! Uku minoi nien: Teateiba teadep tun-tun de menea perpecahan ngen kemacau kepercayaan tun ngen Tuhan. Hal o bertentangan ngen jano de sudo najea ngen udi. Ne'uakba tun-tun awei o.

1 KORINTUS 3:11

Sebab Allah suang bi mpek Yesus Kristus sebagai dodone pondasi utuk gedung o; coa ade pondasi de luyen.

1 KORINTUS 3:13

Kerjo tiep tun bakea keten be pado waktau Kristus teko igai. Sebab pado bilai o opoi bakea menea kerjo tiep-tiep tun bakea keten. Opoi bakea melei bukti baik coane kerjo o.

2 KORINTUS 2:17

Keme coa awei dau tun de mesoa utung kunei bito Allah awei barang dagangan bae. Tujuan-tujuan keme adeba benea, sebab keme nelei tugas ngen Allah. Ngen Allah suang kemliak bahwo keme semapei bito o sebagai hamba-hamba Kristus.

2 KORINTUS 4:2

Keme coa makei ca'o-ca'o de menea selek. Keme coa lok kerjo ngen ca'o licik atau menea coa benea kecek Allah. Keme melayan Allah ngen atei baik temurut kelok-Ne. Sebab o, keme minoi kute tun kemliak keme ngen baik neak lem ateine.

KOLOSE 2:8

Lokba udi teatei, jibeak sapei ade de mbujuk udi ngen falsafah-falsafah manusio de coa beguno, cuma menea udi jijai sesat. Falsafah-falsafah o iso kunei Kristus, tapi kunei pendapet manusio bae ngen kunei roh-roh penguaso dunio.

1 TIMOTIUS 6:3

Api de majea ajaran de luyen kunei o ngen coa tujau ngen ajaran de benea kunei Tuhan te Yesus Kristus, ngen ajaran agamo te,

2 TIMOTIUS 2:20

Neak lem umeak de lai ade memecem perabot. Ade de nea kunei pirok atau emas, tapi ade kulo de nea kunei kieu atau pitok. Ade de nakei utuk keperluan istimewa, ade kulo de nakei utuk keperluan biaso.

2 TIMOTIUS 3:13

dong tun jahat ngen tukang mike bakea tambeak jahat. Tobo'o mike tun luyen padahal tobo'o suang kulo keno pike.

2 TIMOTIUS 3:7

Selawei-selawei o bogoa minoi najea, tapi coa perneak ngertai de benea kunei Allah.

2 TIMOTIUS 4:3

Sebab bakea sapei waktaune tun coa lok igai temimo ajaran de benea. Sebelekne, tobo'o bakea temotoa kelokne suang, ngen melungguk dau gu'au utuk najea hal-hal de baik teni'uk tobo'o.

IBRANI 13:9

Jibeakba munyau kute mecem ajaran de seseleh semset udi. Atei ite harus kenuet ngen kebaikan atei Allah, do'oba de baik; jibeak ngen peraturan-peraturan tetang kembuk. Tun-tun de bel'o taat ngen peraturan-peraturan o coa dapet utungne.

1 PETRUS 1:7

Tujuanne adeba utuk melei bukti jano udi sungguak-sungguak pecayo ngen Tuhan jano coa. Mas de dapet usak kulo, ntes ngen opoi. Nah, imen udi adeba lebiak bego kunei mas, jijai harus ntes kulo supayo jijai murni. Ngen awei o udi bakea nujai ngen hormat serto nelkat pado bilai Yesus Kristus teko igai.

WAHYU 2:14

Tapi awei yo ade kekedau hal de Uku coa senang kunei udi: Ade pa'o tun neak antaro udi de temotoa jano de najea Bileam. Bileam majea Balak awei ipe jemrumus umat Israel moi lem duso; ngen mbujuk tobo'o utuk mbuk kembuk de sudo seniap ngen patung, menea hal-hal de cabul.

WAHYU 21:18

Tembok o nea kunei butau baiduri panden tapi kotane su'ang kunei mas murni, jeniak awei kaco.

WAHYU 3:18

Sebab o Uku melei nasihat udi supayo temukua kunei pado-Ku mas, adeba mas de murni, supayo udi jijai kayo. Nukuaba kulo keracok putiak kunei pado-Ku supayo udi makei keracok ngen temutup awok udi de beleseng ngen nyelek. Ngen mukuaba kulo ubet utuk nusep neak matainu supayo udi dapet ngeliak.