Tito 2:13 - Rapa Nui

¹³ ꞌātā ka tuꞌu rō mai te meꞌe nui-nui tiaki e tātou: he hoki iŋa haka ꞌou mai o te tātou ꞌAtua pūai ko Ietū Kiritō, kope haka eꞌa i te taŋata mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.

Tito 2:13 ပူးပေါင်းရင်းမြစ်များ

Māteo 16:27

Te Poki o te taŋata, paꞌi, e oho rō mai e ꞌana-ꞌana rō ꞌana ꞌi te pūai o tōꞌona Matuꞌa, ꞌi muri i a ia tāꞌana merahi, ꞌe e ꞌauhau rō i te taŋata, e tahi e tahi, e haka tano ki te rāua meꞌe aŋa.

Māteo 25:31

»Ka hoki mai ena te ⌊Poki o te taŋata⌋ ko ꞌAriki ꞌā e haka vari tahi rō ꞌā e te merahi taꞌatoꞌa ōꞌona, e te ꞌana-ꞌana ꞌe e te pūai o te ꞌAtua, he noho ꞌi ruŋa i tōꞌona pepe ꞌariki.

Māteo 26:64

He pāhono e Ietū: —Nā e koe ko kī ꞌā. ꞌE ꞌī a au he kī takoꞌa atu: e takeꞌa rō e kōrua i te Poki o te taŋata e noho rō ꞌā ꞌi te pāꞌiŋa mataꞌu o te ꞌAtua, i a ia te pūai taꞌatoꞌa, ꞌe i tōꞌona topa iŋa mai ꞌi ruŋa i te raŋi e tahi.

Marko 14:62

He pāhono e Ietū: —ꞌĒ-ē, ko au. ꞌE a kōrua e takeꞌa rō i te Poki o te taŋata e noho rō ꞌana ꞌi te pāꞌiŋa mataꞌu o te ꞌAtua ꞌe i tōꞌona topa iŋa mai ꞌi ruŋa i te raŋi e tahi.

Marko 8:38

»Te taŋata o te hora nei taŋata hara ꞌe ꞌina he haŋa mai. Te kope taꞌe toꞌo i a au ꞌe i tāꞌaku hāpī māꞌana ꞌo haꞌamā ꞌi te nuꞌu, a au, te Poki o te taŋata, e ko toꞌo takoꞌa i a ia māꞌaku ꞌi te hora hoki mai ōꞌoku ananake mātou ko te merahi ꞌi ruŋa i a au te pūai ꞌana-ꞌana o tōꞌoku Matuꞌa».

Aŋa o te ꞌĀpōtoro 24:15

Tōꞌoku manaꞌu pa he manaꞌu ꞌā o rāua: mo mātou he parautiꞌa mau ꞌana te ꞌAtua e haka ora rō i te taŋata mai te mate ka ai atu he taŋata aŋa i te meꞌe riva-riva ꞌo he taŋata aŋa i te meꞌe taꞌe tano.

Rōmano 15:13

Mo te ꞌAtua haka aŋi-aŋi mai e haka tano rō ꞌana i tāꞌana hōrea e ꞌata haka koa ꞌe e ꞌata haka haumārū atu i a kōrua i te nuꞌu ⌊haka moe i te manaꞌu⌋ ꞌi ruŋa i a ia, ꞌe māꞌana takoꞌa e ꞌata haka aŋi-aŋi atu, hai pūai o te ⌊Vārua Maitai⌋, e ko taꞌe aŋa a ia i tāꞌana meꞌe hōrea.

Rōmano 5:5

ꞌE, ꞌi te ꞌata pūai o te tātou manaꞌu ꞌi ruŋa i te ꞌAtua, e ꞌite nei e tātou e ko taꞌe aŋa e ia i tāꞌana meꞌe kī. Ko haka takeꞌa mai ꞌana, paꞌi, i te rahi o tōꞌona haŋa hai vaꞌai mai i te ⌊Vārua Maitai⌋ mo ŋaroꞌa e tātou i rā haŋa ꞌi roto i te māhatu.

Rōmano 8:18

Ki tōꞌoku manaꞌu, te ꞌati ꞌamo e tātou ꞌi te hora nei taꞌe ꞌā he meꞌe ki te meꞌe hopeꞌa o te nui-nui ka takeꞌa ena e tātou pe muꞌa ka oho ena.

1 Kōrinto 1:7

ꞌO ira, e tiaki nō ena kōrua ki te mahana o te hoki iŋa haka ꞌou mai o te tātou Pūꞌoko Haka Tere ko Ietū Kiritō, e ko hape mai i a kōrua e tahi meꞌe o te meꞌe taꞌatoꞌa vaꞌai e te ꞌAtua ki tāꞌana nuꞌu mo aŋa i tāꞌana aŋa.

2 Kōrinto 4:4

Te nuꞌu nei, ꞌi te taꞌe haka moe i te rāua manaꞌu ꞌi ruŋa i a Ietū, ko haka pōhāhā ꞌā i te rāua manaꞌu e Rukifero, ꞌatua o te ao nei, ꞌo aŋi-aŋi, ꞌo takeꞌa i te māꞌeha o te mōrī o te roŋo riva-riva o ruŋa i te pūai ꞌe i te nui-nui o te ⌊Kiritō⌋, ꞌāriŋa ora o te ꞌAtua.

2 Kōrinto 4:6

O te ꞌAtua kī era pē nei ē: «Ka ai te mōrī ꞌi roto i te pōhāhā», te haka māꞌeha i te mātou manaꞌu mo haka māꞌeha takoꞌa e mātou i te manaꞌu o te tētahi nuꞌu hai haka ꞌite i te pūai ꞌe i te nui-nui o te ꞌAtua takeꞌa ꞌi ruŋa i a Ietū Kiritō.

Kōrosa 1:23

Te meꞌe nō, e haka hio-hio e oho te kōrua manaꞌu ꞌi ruŋa i a Ietū ꞌe e tiaki e oho ki te meꞌe taꞌatoꞌa hōrea e te ꞌAtua mo te nuꞌu ꞌāꞌana, meꞌe i ꞌite e kōrua ꞌi te hora ŋaroꞌa era i te ⌊roŋo riva-riva o ruŋa i a Ietū⌋, roŋo haka ꞌite oho a te kona taꞌatoꞌa o te ao, ꞌe roŋo hāꞌūꞌū e au, e Pauro, mo haka ꞌite.

Kōrosa 1:27

nuꞌu ki a rāua te ꞌAtua i haŋa ai mo haka ꞌite pē nei ē: te hauhaꞌa taꞌatoꞌa o rā parautiꞌa mo te nuꞌu taꞌe hūrio takoꞌa. ꞌE rā parautiꞌa ko te meꞌe nei: a Ietū Kiritō e noho takoꞌa rō ꞌana, hai Vārua Maitai, ꞌi roto i a kōrua i te nuꞌu taꞌe hūrio. ꞌE hai noho atu ōꞌona ꞌi roto i a kōrua he ꞌite kōrua pē nei ē: pe muꞌa ka oho ena a kōrua takoꞌa ꞌi roto i tōꞌona nui-nui, te auraꞌa: i a kōrua takoꞌa tōꞌona huru riva.

Kōrosa 1:5

ꞌo te ai e tiaki takoꞌa rō ꞌana kōrua ki te meꞌe hōrea mai e ia mo tātou ꞌi te raŋi. A kōrua ko ŋaroꞌa era ꞌana o ruŋa i te meꞌe nei hora haka ꞌite atu era i te roŋo parautiꞌa o te ꞌAtua

Kōrosa 3:4

ꞌo te ai mai i a Ietū e ai ena. ꞌE hora ena ōꞌona ka hoki mai ena ki te ao nei, he ai takoꞌa a kōrua ꞌi muri i a ia ꞌi roto i tōꞌona nui-nui, te auraꞌa, he ai takoꞌa i a kōrua te huru riva ōꞌona.

2 Tētārōnika 2:16

ꞌE mā Ietū Kiritō mau ꞌā, Pūꞌoko Haka Tere o tātou, ꞌe mo te ꞌAtua, Matuꞌa o tātou, haŋa mai ꞌe vaꞌai mai hai riva rahi ōꞌona i te koa ꞌina he hopeꞌa raꞌa ꞌe i te ꞌite pē nei ē: pe muꞌa ka oho ena e vaꞌai rō mai i te meꞌe hōrea mai era e ia,

2 Tētārōnika 2:8

Ki toꞌo, ka takeꞌa iho ena e te nuꞌu i rā taŋata riri taparahi-taꞌata era mo te ꞌAtua, kope ka haka kore ena e te tātou Pūꞌoko Haka Tere hai reꞌo ōꞌona ꞌe hai ꞌana-ꞌana o tōꞌona mana ꞌi te hora ka hoki mai ena.

1 Timoteo 1:1

A au, a Pauro, ⌊ꞌāpōtoro⌋ ꞌa Ietū Kiritō, uŋa e te ꞌAtua, kope toꞌo i a tātou mai roto i te ūtuꞌa o te hara, ꞌe e Ietū Kiritō, kope ꞌi ruŋa i a ia e ŋatu ena te tātou haŋu,

2 Timoteo 1:2

he ꞌaroha atu hai haŋa ki a koe, e Timoteo ē. A koe pa he poki parautiꞌa mau ꞌā ꞌāꞌaku. Ka ai ꞌi ruŋa i a koe te riva rahi, te haka ꞌaroha ꞌe te haumārū o te ꞌAtua Matuꞌa, ꞌe o Ietū Kiritō, he Pūꞌoko Haka Tere o tātou.

2 Timoteo 4:1

ꞌI muꞌa o te ꞌAtua ꞌe o Ietū Kiritō, kope ka oho mai ena pa he ꞌAriki nui-nui mo haka ūtuꞌa i te nuꞌu ora ꞌe i te nuꞌu mate, ka kī atu ena a au:

2 Timoteo 4:8

Te meꞌe toe nō he vaꞌai mai i tōꞌoku hei, hei vaꞌai ki te nuꞌu aŋa i te meꞌe tī-tika ki te mata o te ꞌAtua ka vaꞌai mai ena ꞌi te mahana o te ture hopeꞌa e Ietū Kiritō, kope ture hai parautiꞌa i te hape o te taŋata. ꞌE taꞌe ki a au nō ka vaꞌai mai ena, ki te nuꞌu taꞌatoꞌa tiaki hai māhatu ki tōꞌona hoki iŋa mai.

Tito 3:4

ꞌE te ꞌAtua, kope toꞌo i a tātou mai roto i te ūtuꞌa o te hara, i haka takeꞌa rō mai i tōꞌona riva ꞌe i tōꞌona haŋa.

ꞌEvereo 9:28

Pē ira takoꞌa a Ietū Kiritō: e tahi mau nō vaꞌai iŋa i a ia mo mate pa he tūtia mo haka kore i te hara o te nuꞌu. ꞌE pe muꞌa ka oho ena he tuꞌu haka ꞌou mai a Ietū taꞌe ꞌō mo vaꞌai haka ꞌou i a ia pa he tūtia mo te hara o te taŋata, mo vaꞌai ki te nuꞌu tiaki ki a ia i te ora ꞌāpī ꞌina he hopeꞌa raꞌa.

1 Pētero 1:3

Ki haꞌahana-hana tātou i te ꞌAtua, Matuꞌa o te tātou Pūꞌoko Haka Tere ko Ietū Kiritō. A ia, paꞌi, ko vaꞌai mai ꞌana i te ora ꞌe i te noho iŋa ꞌāpī, he rahi o tōꞌona haka ꞌaroha mo tātou. ꞌE, ꞌi te ai ko haka ora ꞌana e ia i a Ietū mai te mate, e ꞌite nei a tātou e haka ora takoꞌa rō mai i a tātou mai te mate pe muꞌa ka oho ena,

1 Pētero 1:7

Te ꞌAtua, paꞌi, e haꞌatiꞌa rō ꞌā mo topa mai o te ꞌati mo ꞌite hoki te haka moe iŋa nei o tātou i te manaꞌu ꞌi ruŋa i a Ietū e hio-hio rō ꞌā ꞌo ꞌina, pa he piru e tunu ena ꞌi roto i te ahi. ꞌE mo te ꞌAtua te haka moe iŋa o tātou i te manaꞌu ꞌi ruŋa i a Ietū i hau rō atu i te hauhaꞌa ki te piru, he meꞌe e ŋaro nō. Mo hio-hio mo oho nō o te tātou manaꞌu ꞌi ruŋa i a Ietū ka ai atu e rahi rō ꞌā te ꞌati topa mai, ꞌi te hora o te hoki iŋa mai o Ietū Kiritō, he koa te ꞌAtua ꞌe he haka paka he haka nui-nui i a tātou.

2 Pētero 1:1

A au, a Pētero, kī takoꞌa ko Tīmona, tāvini ꞌe ⌊ꞌāpōtoro⌋ ꞌa Ietū Kiritō, he ꞌaroha atu ki a kōrua ki te nuꞌu i a rāua takoꞌa te hauhaꞌa he ⌊haka moe i te manaꞌu⌋ ꞌi ruŋa i a Ietū, pa he haka moe iŋa nei o te mātou manaꞌu, he meꞌe ravaꞌa hai riva rahi o te ꞌAtua ꞌe o Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.

2 Pētero 3:18

Te meꞌe mau o kōrua mo aŋa he uꞌi mo māhani riva-riva ki te tātou Pūꞌoko Haka Tere ko Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa, ꞌe ꞌai kōrua ka noho ka oho rō ꞌi roto i tōꞌona haŋa. ¡Ki haꞌahana-hana tātou ki a ia ꞌi te hora nei ꞌe ꞌi te hora taꞌatoꞌa! Ka ai pē ira.

1 Iovani 4:14

ꞌE o mātou mau ꞌana i takeꞌa ꞌe i haka ꞌite pē nei ē: te Matuꞌa ko uŋa mai ꞌana i tāꞌana Poki mo eꞌa o te taŋata o te ao mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa hai ia.

Hura 1:21

E uꞌi ꞌo rehu te rahi o te haŋa o te ꞌAtua mo tātou. ꞌE e tiaki ki te mahana ka vaꞌai mai ena e te tātou Pūꞌoko Haka Tere ko Ietū Kiritō, hai riva rahi ōꞌona, i te ora ꞌāpī ꞌina he hopeꞌa raꞌa.

Meꞌe Haka Takeꞌa 1:7

ꞌIna ko rehu: ¡ꞌI ruŋa i te raŋi tea-tea ka oho mai ena a Ietū! Taꞌatoꞌa nō ka takeꞌa ena, ꞌātā te nuꞌu ꞌo-ꞌoka era i a ia. Te taŋata taꞌatoꞌa o te ao taꞌe haka moe i te manaꞌu ꞌi ruŋa i a ia e ŋaroꞌa rō i te māui-ui ki roto i te ivi o ruŋa i a ia. He aŋi mau ꞌā, pē ira ka topa ena.