Tito 1:1 - Rapa Nui

^1-4 A au, a Pauro, he ꞌaroha atu ki a koe, e Tito ē. A koe pa he poki mau ꞌā ꞌāꞌaku ꞌo tuꞌu ⌊haka moe i te manaꞌu⌋ ꞌi ruŋa i a Ietū pē au. Ka ai ꞌi ruŋa i a koe te riva rahi ꞌe te haumārū o te ꞌAtua, he Matuꞌa o tātou, ꞌe o Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa. E Tito, ko ꞌite riva-riva ꞌana e koe: a au he tāvini o te ꞌAtua, ꞌe he ⌊ꞌāpōtoro⌋ ꞌa Ietū Kiritō, kope uŋa mai i a au ki te nuꞌu haꞌataꞌa e te ꞌAtua māꞌana, mo haka pūai i te rāua haka moe iŋa i te manaꞌu ꞌi ruŋa i a ia, ꞌe mo ꞌata haka aŋi-aŋi ki a rāua i te roŋo parautiꞌa o ruŋa i te ⌊Kiritō⌋, he roŋo hāꞌūꞌū i te taŋata mo riro o te rāua noho iŋa noho iŋa tano ki te mata o te ꞌAtua, ki aŋi-aŋi riva-riva ai pē nei ē: e ai rō i a rāua te ora ꞌāpī ꞌina he hopeꞌa raꞌa vaꞌai e te ꞌAtua. ꞌI raꞌe, paꞌi, ki te aŋa i te ao, i hōrea rō ai e te ꞌAtua i te ora ꞌāpī nei, ꞌe a ia ꞌAtua haka tano i tāꞌana meꞌe kī. ꞌI te hora tano kī e te ꞌAtua i haka ꞌite ai ki te taŋata o ruŋa i te ora ꞌāpī nei hai ⌊roŋo riva-riva o ruŋa i a Ietū Kiritō⌋, he roŋo haka ꞌite oho e au uŋa mai e te ꞌAtua, kope toꞌo i a tātou mai roto i te ūtuꞌa o te hara.

Tito 1:1 ပူးပေါင်းရင်းမြစ်များ

Ruka 18:7

Mo ai pē ira e manaꞌu era, ¿e ko hāꞌūꞌū hō te ꞌAtua ki te nuꞌu haꞌataꞌa e ia māꞌana pure ki a ia paurō te mahana? ¿E haka tiaki mau rō e te ꞌAtua?

Aŋa o te ꞌĀpōtoro 13:48

I ŋaroꞌa era i te meꞌe nei e te nuꞌu taꞌe he hūrio, he koa rō atu ꞌai ꞌe he haꞌamata he kī: te vānaŋa o te ꞌAtua vānaŋa riva-riva. ꞌE o roto i rā nuꞌu he haka moe i te manaꞌu ꞌi ruŋa i a Ietū te nuꞌu taꞌatoꞌa ko haꞌataꞌa era ꞌā e te ꞌAtua mo ravaꞌa i te ora ꞌāpī ꞌina he hopeꞌa raꞌa.

Rōmano 1:1

He ꞌaroha atu a au, a Pauro, tāvini o Ietū Kiritō, haꞌataꞌa e ia mo ꞌāpōtoro mo haka ꞌite mo oho i te ⌊roŋo riva-riva o te ꞌAtua⌋

2 Kōrinto 1:1

A au a Pauro, ⌊ꞌāpōtoro⌋ ꞌa Ietū Kiritō hai haŋa o te ꞌAtua, ꞌe te tātou taina nei ko Timoteo he ꞌaroha atu ki a kōrua ki te nūnaꞌa taŋata ⌊haka moe i te manaꞌu⌋ ꞌi ruŋa i a Ietū o Kōrinto, ꞌe ki te tētahi atu taina o te ŋā kona taꞌatoꞌa ena o Ākāia.

Ēfeto 2:8

ꞌI te riva rahi o te ꞌAtua ko haka eꞌa ꞌana i a tātou mai roto i te ūtuꞌa o te hara ꞌo te haka moe o tātou i te manaꞌu ꞌi ruŋa i a Ietū. Taꞌe he meꞌe i ravaꞌa e tātou, he meꞌe o te ꞌAtua i vaꞌai mai,

Fīripo 1:1

A au, a Pauro, ꞌe a Timoteo, tāvini o Ietū Kiritō, he ꞌaroha atu ki a kōrua ki te nuꞌu o Fīripo haꞌataꞌa e te ꞌAtua māꞌana ꞌo te ⌊haka moe i te manaꞌu⌋ ꞌi ruŋa i a Ietū. Te ꞌaroha nei mo te taꞌatoꞌa o kōrua ananake ko te nuꞌu pūꞌoko haka tere o kōrua ꞌe ko te kōrua ⌊taina hāꞌūꞌū⌋.

Kōrosa 2:2

Tāꞌaku meꞌe haŋa: he pūai o te kōrua manaꞌu ꞌi ruŋa i te ꞌAtua, he pūai he oho te kōrua haŋa ꞌi roto i a kōrua, mo ai e tahi mau nō manaꞌu, ꞌe he ŋaroꞌa e kōrua i te koa ꞌe i te ora o te nuꞌu aŋi-aŋi riva-riva o ruŋa i te parautiꞌa taꞌe haka ꞌite e te ꞌAtua ꞌi muꞌa ꞌā, ꞌe nei parautiꞌa ko Ietū Kiritō.

1 Timoteo 2:4

A ia e haŋa rō ꞌana mo eꞌa o te taŋata taꞌatoꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa. E haŋa takoꞌa rō ꞌana te ꞌAtua mo ꞌite o te taŋata i te hāpī parautiꞌa pē nei ē:

1 Timoteo 3:16

He meꞌe nui-nui mau ꞌana te parautiꞌa haka ꞌite mai era e te ꞌAtua pē nei ē: Te Kiritō i tuꞌu mai ai pa he taŋata, i haka ꞌite rō mai e te ⌊Vārua Maitai⌋ he Poki o te ꞌAtua, ꞌe he merahi te mataꞌite. Te roŋo riva-riva o ruŋa i a ia i haka ꞌite rō ki te hau taꞌatoꞌa, i haka moe rō te manaꞌu o te taŋata ꞌi ruŋa i a ia, ꞌe i toꞌo rō e te ꞌAtua ki muri i a ia.

1 Timoteo 6:3

Mo hāpī o te kope e tahi i te meꞌe kē ꞌe ꞌina he haŋa ki te hāpī parautiꞌa o te tātou Pūꞌoko Haka Tere ko Ietū Kiritō ꞌe ki te hāpī maꞌu e tātou,

2 Timoteo 2:10

ꞌO ira a au e haꞌaoromaꞌi nei i te taꞌatoꞌa nō ꞌati mo te riva-riva o te nuꞌu haꞌataꞌa e te ꞌAtua māꞌana, mo eꞌa takoꞌa o rāua mai roto i te ūtuꞌa o te hara hai Ietū Kiritō ꞌe mo ravaꞌa mo noho ꞌi muri i a ia ꞌina he hopeꞌa raꞌa pe muꞌa ka oho ena.

2 Timoteo 2:23

ꞌIna koe ko haka roŋo ki te vānaŋa tahaŋa o te nuꞌu taꞌe haka moe i te manaꞌu ꞌi ruŋa i a Ietū; ko ꞌite ꞌana, paꞌi, koe: te meꞌe nō mo ravaꞌa he tātake.

2 Timoteo 2:25

E ꞌite takoꞌa i te kī, hai māhatu maꞌitaki, i te hape o te nuꞌu taꞌe haka roŋo, koiꞌite ꞌi te riva rahi o te ꞌAtua, he huri i te rāua manaꞌu ki a ia, ꞌe he ꞌite i te parautiꞌa o ruŋa i a Ietū Kiritō,

Tanatiako 1:1

A au, a ⌊Tanatiako⌋, tāvini o te ꞌAtua ꞌe o te Pūꞌoko Haka Tere ko Ietū Kiritō, he ꞌaroha atu ki a kōrua ki te taina ⌊haka moe i te manaꞌu⌋ ꞌi ruŋa i a Ietū o te hoꞌe ꞌahuru mā piti mata o te itaraera noho ꞌi te henua taꞌatoꞌa.

2 Pētero 1:3

Te ꞌAtua, hai pūai ōꞌona, e hāꞌūꞌū mai ena hai rauhuru rāveꞌa mo riva o tātou mo haꞌatura ki a ia ꞌe mo tano o te tātou noho iŋa ki tōꞌona mata. Te meꞌe nei e ravaꞌa ena hai māhani o tātou ki a ia, kope haꞌataꞌa i a tātou mo huaꞌai ꞌāꞌana hai haka ꞌite mai i tōꞌona huru riva ꞌe i tōꞌona pūai nui-nui.

2 Pētero 3:11

ꞌI te ai pē ira te meꞌe taꞌatoꞌa ka haka kore ena, e tano te kōrua noho iŋa ki te mata o te ꞌAtua koia ko haꞌatura ꞌe ko moꞌa i a ia

1 Iovani 2:23

Te kope taꞌe haŋa ki te Poki, taꞌe a ia o te ꞌAtua Matuꞌa. ꞌE te kope kī: o te Poki a ia, o te ꞌAtua Matuꞌa takoꞌa a ia.

Meꞌe Haka Takeꞌa 1:1

Te meꞌe nei e au e ⌊Iovani⌋ ka pāpaꞌi atu ena he meꞌe e ko roa ka topa rō mai ena, he meꞌe i haka ꞌite e te ꞌAtua ki a Ietū Kiritō mo haka ꞌite mai ki a tātou ki tōꞌona tāvini. Nei meꞌe i haka ꞌite mai ai e Ietū hai meꞌe i haka takeꞌa mai e tōꞌona merahi.