Tanatiako 1:25 - Rapa Nui

²⁵ ꞌE te kope taꞌe rehu te meꞌe ŋaroꞌa, hāpī mo ꞌata ꞌite ōꞌona o ruŋa i te haka tere iŋa hopeꞌa o te tī-tika haka eꞌa i te taŋata mai roto i te hara, haka tano tahi i te meꞌe aŋa ki te meꞌe kī e rā roŋo, he haꞌamaitai e te ꞌAtua ꞌi tāꞌana meꞌe taꞌatoꞌa aŋa.

Tanatiako 1:25 ပူးပေါင်းရင်းမြစ်များ

Ruka 11:28

He pāhono e Ietū: —¡Te koa mau tāꞌau i te nuꞌu ŋaroꞌa ꞌe haꞌatura i te vānaŋa o te ꞌAtua!

Iovani 13:17

Mo aŋi-aŋi o kōrua i tāꞌaku meꞌe hāpī atu ena ꞌe mo aŋa i rā ŋā meꞌe, he haꞌamaitai kōrua e te ꞌAtua.

Iovani 8:36

Mo haka eꞌa i a kōrua e te Poki o te ꞌAtua mai te rima o te meꞌe haka ꞌekaravo i a kōrua, he eꞌa mau rō ꞌai.

Aŋa o te ꞌĀpōtoro 13:43

I maraŋa era te taŋata mai te hare pure, meꞌe rahi nuꞌu hūrio ꞌe nuꞌu maꞌu takoꞌa i te haka tere iŋa hūrio i oho ꞌi muri i a Pauro ararua ko Verenāvē. ꞌE he hatu e kuā Pauro mo haka noho mo oho nō i te manaꞌu ꞌi ruŋa i te riva rahi o te ꞌAtua.

Aŋa o te ꞌĀpōtoro 2:42

ꞌE a rāua e maꞌu e oho nō ꞌana i te meꞌe taꞌatoꞌa hāpī e te ꞌāpōtoro, ꞌe te aŋa takoꞌa he haka taka-taka mo pure ꞌe mo mo-more i te haraoa mo manaꞌu i te mate iŋa o Ietū.

Aŋa o te ꞌĀpōtoro 26:22

ꞌE, hai hāꞌūꞌū o te ꞌAtua, e hio-hio e oho nō nei a au ki ꞌaŋarīnā, ꞌe e vānaŋa nei o ruŋa i a ia ki te nuꞌu taꞌatoꞌa, ka hōnui ka taꞌe hōnui. ꞌIna a au he haka ꞌite, ki te hora hopeꞌa, i te rua vānaŋa mo taꞌe ai he vānaŋa o ruŋa i te meꞌe mo topa kī e te perofeta ꞌe e ⌊Mōtē⌋ pē nei ē:

Rōmano 11:22

Te ꞌAtua e haka takeꞌa rō ꞌana i tōꞌona riva ꞌe i tōꞌona riri. Ki te nuꞌu hūrio hārui i a ia hai tuaꞌivi i haka takeꞌa ai i tōꞌona riri, ꞌe ki a kōrua ki te nuꞌu taꞌe he hūrio i haka takeꞌa ai i tōꞌona riva. Te meꞌe nō, e uꞌi e noho kōrua ꞌi roto i tōꞌona riva rahi, ꞌo paꞌo takoꞌa rō i a kōrua mai ruŋa i rā tumu.

Rōmano 2:13

Taꞌe he nuꞌu tano ki te mata o te ꞌAtua te nuꞌu haka roŋo nō i te haka tere iŋa ꞌa Mōtē. Te nuꞌu tano ki tōꞌona mata he nuꞌu haka roŋo ꞌe haꞌatura ki rā haka tere iŋa.

Rōmano 7:12

Te parautiꞌa mau, te haka tere iŋa ꞌa Mōtē ꞌe te roŋo hāꞌaki o ruŋa he meꞌe riva-riva, tano ꞌe hopeꞌa o te moꞌa.

Rōmano 8:15

Te Vārua vaꞌai mai e te ꞌAtua taꞌe he vārua haka riro i a tātou he ꞌekaravo riꞌa-riꞌa ꞌi te kope haka aŋa i a ia, he Vārua haka riro i a tātou he ŋā poki o te ꞌAtua. Hai ia e kī ena a tātou ki te ꞌAtua: «¡E koro ōꞌoku ē!».

Rōmano 8:2

ꞌi te meꞌe era te Vārua Maitai, vaꞌai i te ora ki te nuꞌu ꞌa Ietū Kiritō, haka tere i a tātou ꞌi te hora nei, ko haka eꞌa ꞌana i a tātou mai roto i te pūai o te hara maꞌu i a tātou ki te mate.

1 Kōrinto 15:58

Te meꞌe haŋa ia, e te taina haŋa rahi ōꞌoku ē: he haka hio-hio he oho te kōrua manaꞌu ꞌi ruŋa i a Ietū, ꞌo haka tapa kōrua mai te hāpī parautiꞌa o te ꞌAtua. ꞌE, ka aŋa ka oho nō i te aŋa haŋa o te ꞌAtua mo aŋa e kōrua. E ꞌite rō ꞌana, paꞌi, e kōrua: te aŋa ki a ia e ko taꞌe hauhaꞌa.

2 Kōrinto 13:5

E uꞌi kōrua hoki e haka moe parautiꞌa mau rō ꞌana kōrua i te manaꞌu ꞌi ruŋa i a Ietū. Mo ŋaroꞌa e kōrua nā a Ietū Kiritō ꞌi roto i a kōrua, e haka moe parautiꞌa rō ꞌā ia kōrua i te manaꞌu ꞌi ruŋa i a ia ꞌe, takoꞌa, e tano rō ꞌana kōrua ki te mata o te ꞌAtua.

Karatia 2:4

Ka ai atu pē ira, i ai rō ꞌi ira te nuꞌu haka tuꞌu i a rāua pa he nuꞌu ⌊haka moe i te manaꞌu⌋ ꞌi ruŋa i a Ietū, te haŋa mo uꞌi hoki ko te maꞌu iŋa ꞌana a mātou i te ⌊haka tere iŋa ꞌa Mōtē⌋ ꞌe, mo taꞌe ai pē ira, mo haka ꞌamo haka ꞌou mai i rā haka tere iŋa. ꞌE te parautiꞌa, ꞌina he pūai toe o te haka tere iŋa ꞌa Mōtē ꞌi ruŋa i a tātou ꞌo te ai o tātou ꞌa Ietū Kiritō.

Karatia 5:1

A Ietū Kiritō i haka eꞌa i a tātou mai te meꞌe ena he ꞌamo i te haka tere iŋa ꞌa Mōtē mo tano ki te mata o te ꞌAtua. ꞌO ira, e uꞌi kōrua ꞌo haka ꞌamo haka ꞌou rō atu i te haka tere iŋa era, ꞌo ꞌekaravo haka ꞌou kōrua o rā haka tere iŋa.

Karatia 6:2

E hāꞌūꞌū takoꞌa kōrua i te rua mo ꞌamo i tōꞌona ꞌati; pē ira he haka tano kōrua i te meꞌe kī mai e te ⌊Kiritō⌋ mo aŋa.

Kōrosa 1:23

Te meꞌe nō, e haka hio-hio e oho te kōrua manaꞌu ꞌi ruŋa i a Ietū ꞌe e tiaki e oho ki te meꞌe taꞌatoꞌa hōrea e te ꞌAtua mo te nuꞌu ꞌāꞌana, meꞌe i ꞌite e kōrua ꞌi te hora ŋaroꞌa era i te ⌊roŋo riva-riva o ruŋa i a Ietū⌋, roŋo haka ꞌite oho a te kona taꞌatoꞌa o te ao, ꞌe roŋo hāꞌūꞌū e au, e Pauro, mo haka ꞌite.

1 Timoteo 2:15

Te tano mau: e haka tere te ŋā viꞌe hai manaꞌu o te ꞌAtua ki moꞌa ai e te taŋata. E noho e hāpaꞌo i te rāua ŋā poki, e haka moe e oho i te rāua manaꞌu ꞌi ruŋa i a Ietū, e haŋa e oho ki te rua, ꞌe e haꞌatura e oho ki te ꞌAtua. Pē ira he haka eꞌa e te ꞌAtua mai roto i te ūtuꞌa o te hara.

1 Timoteo 4:16

E uꞌi riva-riva te huru o tuꞌu noho iŋa ꞌe te huru o tuꞌu hāpī iŋa i te rua; e haka hio-hio e oho nō koe i te ŋā meꞌe taꞌatoꞌa ena. Mo aŋa ōꞌou pē ira, taꞌe ko koe nō te meꞌe ka eꞌa ena mai roto i te ūtuꞌa o te hara, pē ira ꞌana te nuꞌu haka roŋo atu.

ꞌEvereo 12:15

E uꞌi takoꞌa ꞌo hārui e tahi o kōrua i te riva rahi o te ꞌAtua hai tuaꞌivi, ꞌo tuꞌu rō pa he tumu hua o te meꞌe maŋeo. Te kope pē ira he haka tupu i te manaꞌu taꞌe tano ꞌi roto i te tētahi nuꞌu.

Tanatiako 2:12

ꞌE a kōrua, e te taina ē, e vānaŋa ꞌe e haka tere i a kōrua pa he nuꞌu ꞌite pē nei ē: te ꞌAtua ka kī ena i te kōrua meꞌe tano ꞌe taꞌe tano hai haka tere iŋa ꞌāꞌana haka eꞌa i te taŋata mai roto i te hara.

1 Pētero 2:16

E noho kōrua pa he nuꞌu taꞌe haka tere e te meꞌe o te ao nei; te ꞌAtua, paꞌi, ko haka eꞌa ꞌana i a kōrua mai rā haka tere iŋa. ꞌE, ka ai atu pē ira, e uꞌi ꞌo riro te parautiꞌa nei he ꞌōtohe e tahi mo aŋa o kōrua i te meꞌe taꞌe tano. Te meꞌe haŋa mau: e noho kōrua pa he tāvini o te ꞌAtua.

1 Iovani 2:24

ꞌO ira, e hāpaꞌo ꞌe e haka tere kōrua hai hāpī ŋaroꞌa mai te hora haka moe era ꞌā i te kōrua manaꞌu ꞌi ruŋa i a Ietū. Mo aŋa pē ira, e ko topa kē a kōrua mai muri i te ꞌAtua Poki ꞌe mai muri i te ꞌAtua Matuꞌa.

Meꞌe Haka Takeꞌa 14:13

He ŋaroꞌa ia e au i te reꞌo e tahi mai te raŋi e kī ꞌā: «Ka pāpaꞌi te meꞌe nei: “Ko te koa i te nuꞌu mate, ꞌi te hora nei ꞌe pe muꞌa ka oho ena, ⌊haka moe i te manaꞌu⌋ ꞌi ruŋa i te tātou Pūꞌoko Haka Tere ko Ietū Kiritō”». «ꞌĒ-ē —i kī ai e te ⌊Vārua Maitai⌋— e haka ora rō rāua mai te rāua aŋa, ꞌe e vaꞌai rō hai meꞌe mo haka koa ꞌo te rāua meꞌe riva-riva aŋa».

Meꞌe Haka Takeꞌa 22:14

»Ko te koa i te nuꞌu tata i te rāua kahu, te auraꞌa, te nuꞌu haka rē mo haka kore e te ꞌAtua i te rāua hara, ki tano ai mo oꞌo ki roto ꞌi te kona moꞌa era ko Hērutarema ꞌāpī ꞌe mo kai mai ruŋa i te tumu vaꞌai i te ora ꞌāpī ꞌina he hopeꞌa raꞌa.