Ruka 18:43 - Rapa Nui

⁴³ ꞌI tū hora mau era ꞌā he ora rō ꞌai te mata o tū taŋata era. He oho ia ꞌi muri i a Ietū koia ko haꞌahana-hana ki te ꞌAtua. Te nuꞌu taꞌatoꞌa takeꞌa i tū meꞌe era he haꞌahana-hana takoꞌa ki te ꞌAtua.

Ruka 18:43 ပူးပေါင်းရင်းမြစ်များ

Māteo 11:5

Ka ꞌaꞌamu: “Ko māꞌeha ꞌā te mata o te nuꞌu matapō; ko haꞌere ꞌana te nuꞌu vaꞌe koke. Ko ora ꞌā te nuꞌu māui-ui ꞌi te rēpera; ko ŋaroꞌa ꞌana te vānaŋa e te tariŋa pō. Ko ora ꞌā te nuꞌu mai te mate, ꞌe ko haka ꞌite ꞌā i te roŋo riva-riva o te ꞌAtua ki te nuꞌu veve”.

Māteo 21:14

He haka hāhine ia te nuꞌu matapō ꞌe te nuꞌu vaꞌe koke ki a Ietū ꞌi roto, ꞌe he haka ora e ia.

Māteo 9:8

I takeꞌa era e te nuꞌu i tū meꞌe era, he riꞌa-riꞌa ꞌe he haꞌahana-hana ki te ꞌAtua ꞌo te vaꞌai i te pūai pē ira ki te taŋata.

Ruka 13:17

I kī era e Ietū i tū vānaŋa era, he haꞌamā rō atu ꞌai te nuꞌu riri mōꞌona. ꞌE te nuꞌu haka ꞌou o roto he koa ꞌi te takeꞌa i te meꞌe nui-nui aŋa e Ietū.

Ruka 19:37

I hāhine era ki te hakaturu o te Maꞌuŋa o te ꞌŌrivo, te nuꞌu taꞌatoꞌa oho ꞌi muri i a ia, ꞌi te koa, he haꞌamata he ꞌeha ꞌai ka haꞌahana-hana i te ꞌAtua ꞌo te mana taꞌatoꞌa takeꞌa e rāua.

Ruka 4:39

He noi a Ietū a ruŋa i rā viꞌe, he kī ki te māui-ui mo kore, ꞌe he kore rō ꞌai. ꞌI tū hora ꞌā he eꞌa rā viꞌe ki ruŋa he haꞌamata he vaꞌai hai kai mo rāua.

Ruka 5:26

He māere te nuꞌu taꞌatoꞌa o rā kona koia ko riꞌa-riꞌa; he haꞌahana-hana ki te ꞌAtua ꞌe he kī: «¡ꞌI ꞌaŋarīnā i takeꞌa ai e tātou i te meꞌe hopeꞌa o te nui-nui!».

Ruka 9:43

ꞌE he māere tahi te nuꞌu ꞌi te nui-nui o te pūai o te ꞌAtua. E māere nō ꞌana te nuꞌu ꞌi te meꞌe taꞌatoꞌa aŋa e Ietū, he kī e Ietū ki tāꞌana nuꞌu hāpī:

Aŋa o te ꞌĀpōtoro 11:18

I ŋaroꞌa era e te taina taꞌatoꞌa o Hērutarema i te ŋā meꞌe nei, ꞌina kai ai haka ꞌou te vānaŋa mo kī ꞌe he haꞌamata he haka nui-nui i te ꞌAtua e kī era: «¡Ko te riva i te ꞌAtua i vaꞌai takoꞌa ai ki te nuꞌu taꞌe he hūrio i te rāveꞌa mo huri o te manaꞌu ki a ia ꞌe mo ravaꞌa e rāua i te ora ꞌāpī ꞌina he hopeꞌa raꞌa!».

Aŋa o te ꞌĀpōtoro 26:18

Taꞌa meꞌe ka aŋa ena he haka ꞌara i te rāua mata, ki eꞌa ai mai roto i te pōhāhā ki roto i te māꞌeha, ꞌe mai te rima o Rukifero ki te rima o te ꞌAtua, ki haka moe ai i te rāua manaꞌu ꞌi ruŋa i a au. Pē ira te ꞌAtua ana haka kore i te rāua hara, ꞌe he oꞌo a rāua ki roto i te nūnaꞌa taŋata haꞌataꞌa e te ꞌAtua māꞌana”.

Aŋa o te ꞌĀpōtoro 4:21

ꞌE, ꞌi te taꞌe ꞌite o tū nuꞌu ra-rahi era pē hē a rāua ana haka ūtuꞌa i a kuā Pētero ꞌo riri te nuꞌu, he haka riꞌa-riꞌa haka ꞌou ꞌe ꞌai ka haka eꞌa. Te taŋata taꞌatoꞌa, paꞌi, e haꞌahana-hana ꞌana ki te ꞌAtua o ruŋa o tū meꞌe topa era, ꞌo ira te nuꞌu ra-rahi e riꞌa-riꞌa era.

Karatia 1:24

ꞌE ꞌi te parau ꞌāpī era o ruŋa i a au, i haꞌahana-hana ai rā nuꞌu ki te ꞌAtua.

1 Pētero 2:9

ꞌE a kōrua he huaꞌai toꞌo e te ꞌAtua, he oromatuꞌa aŋa ki te ꞌariki, he nuꞌu haꞌataꞌa māꞌana, ꞌe he taŋata haka tere e ia. Te ꞌAtua, kope haka eꞌa i a kōrua mai roto i te pōhāhā o te meꞌe taꞌe tano mo oꞌo ki roto i tōꞌona mōrī nui-nui ena, i haꞌataꞌa ai i a kōrua mo haka ꞌite mo oho o ruŋa i te meꞌe nui-nui aŋa e ia.