Ruka 14:27 - Rapa Nui

²⁷ ꞌE te kope taꞌe haŋa mo ꞌamo i tōꞌona tātaurō, te auraꞌa, mo vaꞌai i a ia ki te mate mo aŋa i tāꞌaku meꞌe haŋa ꞌe mo oho mai ꞌi muri i a au, e ko tano takoꞌa mo taŋata hāpī ꞌāꞌaku.

Ruka 14:27 ပူးပေါင်းရင်းမြစ်များ

Māteo 10:38

ꞌE te kope taꞌe haŋa mo ꞌamo i tōꞌona tātaurō, te auraꞌa, mo vaꞌai i a ia ꞌātā mo mate mo aŋa i tāꞌaku meꞌe haŋa, e ko tano takoꞌa mo taŋata hāpī ꞌāꞌaku.

Māteo 13:21

Te meꞌe ꞌino nō, he haka moe i te rāua manaꞌu ꞌi ruŋa i rā roŋo mo te hora nō e tahi; ka riri era te nuꞌu mo rāua o ruŋa o te vānaŋa o te ꞌAtua ꞌo ka topa rō era te ꞌati ꞌi te hora haka ꞌatu i a rāua, he rehu rā roŋo, pa he taꞌe hio-hio iŋa o te aka ꞌi te kona ꞌōꞌone taꞌe rahi.

Marko 10:21

He uꞌi a Ietū a ruŋa i rā kope ꞌe he koa. He kī: —E tahi aꞌa meꞌe toe mo aŋa: ka oho ka hoꞌo tahi tuꞌu hauhaꞌa, ꞌe ꞌai ka vaꞌai rō te moni mo te nuꞌu veve. Pē ira he ai tuꞌu hauhaꞌa ꞌi ruŋa i te raŋi. ꞌE ꞌai koe ka oho iho mai ꞌi muri i a au mo taŋata hāpī ꞌāꞌaku.

Marko 15:21

E maꞌu e oho nō ꞌā i a Ietū a te ara he piri te taŋata e tahi o te kona ko Tīrene te ꞌīŋoa ko Tīmona, matuꞌa tane o Arehantaro ararua ko Rufo, e hoki ꞌā mai ꞌuta. He toꞌo mai e te vaꞌehau he haka ꞌamo i te tātaurō ꞌamo e Ietū.

Ruka 14:28

»ꞌĪ a au he kī atu: mo haŋa e tahi o kōrua mo aŋa i te hare ruŋa nui e tahi, ¿e ko manaꞌu hō, ꞌi raꞌe, hoki e tano rō te tara mo aŋa o rā hare?

Iovani 19:17

He haka eꞌa ia i a Ietū mai tū kona era e ꞌamo rō ꞌana i tōꞌona tātaurō mo oho ki te kona e kī era ko Korokota, te auraꞌa ꞌi te ꞌevereo: «Kona o te Pakahera Taŋata Mate».

Aŋa o te ꞌĀpōtoro 14:22

he haka pūai he oho i te manaꞌu o te nuꞌu haka moe i te manaꞌu ꞌi ruŋa i a Ietū o rā ŋā kona. He hatu mo haka hio-hio mo oho i te rāua manaꞌu ꞌi ruŋa i a Ietū, ꞌe he kī: «E ko taꞌe piri mai ki a tātou ki te nuꞌu haka moe i te manaꞌu ꞌi ruŋa i a Ietū te ꞌati ꞌi te ao nei ꞌi raꞌe ki te oꞌo ki te ao haka tere e te ꞌAtua pe muꞌa ka oho ena».

2 Timoteo 1:12

ꞌO ira te ꞌati e topa mai nei ki a au. Ka ai atu pē ira, ꞌina a au he riꞌa-riꞌa. Ko ꞌite ꞌana, paꞌi, e au ꞌi ruŋa i a ai a au e haka noho nei i tōꞌoku manaꞌu, ꞌe ko aŋi-aŋi riva-riva ꞌana e au e ai rō ꞌana tōꞌona pūai mo hāpaꞌo ꞌe mo hāꞌūꞌū mai i te aŋa vaꞌai mai e ia ꞌātā ki te mahana o tōꞌona hoki iŋa mai.

2 Timoteo 3:12

ꞌĪ a au he kī atu: te nuꞌu taꞌatoꞌa ⌊haka moe i te manaꞌu⌋ ꞌi ruŋa i a Ietū Kiritō, haŋa mo riro o rāua he nuꞌu moꞌa ꞌe haꞌatura ki a ia, e ꞌite: he tute i a rāua e te nuꞌu taꞌe haŋa ki te ꞌAtua mo tōtōā.