Ruka 11:2 - Rapa Nui

² He kī e Ietū: —Pē nei a kōrua ana pure: «E te Matuꞌa o mātou ē, te meꞌe haŋa he moꞌa o te taŋata taꞌatoꞌa i tuꞌu ꞌīŋoa, ꞌe he haka rē atu mo haka tere ōꞌou i a rāua.

Ruka 11:2 ပူးပေါင်းရင်းမြစ်များ

Māteo 10:32

»Mo kī e tahi kope ꞌi muꞌa o te taŋata e haŋa rō mai ꞌana a ia ki a au, pē ira takoꞌa ꞌana ka kī ena e au mōꞌona ꞌi muꞌa o tōꞌoku Matuꞌa ꞌi te raŋi.

Māteo 3:2

ꞌI roto i tāꞌana tātara e kī era: «¡Ka ⌊huri te kōrua manaꞌu⌋ ki te ꞌAtua; te haka tere iŋa ꞌāpī ōꞌona ko hāhine mai ꞌā!».

Māteo 5:16

Pē ira kōrua ana haka tere ꞌi muꞌa o te taŋata. Ka takeꞌa ena, paꞌi, i te kōrua haka tere iŋa tano ki te mata o te ꞌAtua, he haꞌahana-hana tahi ki te kōrua Matuꞌa o te raŋi.

Ruka 11:1

E tahi mahana e pure ꞌana a Ietū. I oti era he kī e tahi o roto o tāꞌana nuꞌu hāpī: —E Ietū, ka hāpī mai koe i a mātou pē hē ana pure; a Iovani Papatito, paꞌi, i hāpī rō i te pure ki tāꞌana nuꞌu hāpī.

Rōmano 8:15

Te Vārua vaꞌai mai e te ꞌAtua taꞌe he vārua haka riro i a tātou he ꞌekaravo riꞌa-riꞌa ꞌi te kope haka aŋa i a ia, he Vārua haka riro i a tātou he ŋā poki o te ꞌAtua. Hai ia e kī ena a tātou ki te ꞌAtua: «¡E koro ōꞌoku ē!».

1 Kōrinto 1:3

Ka ai ꞌi ruŋa i a kōrua te riva rahi ꞌe te haumārū o te ꞌAtua he Matuꞌa, ꞌe o te tātou Pūꞌoko Haka Tere ko Ietū Kiritō.

2 Kōrinto 1:2

Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o Ietū Kiritō, Pūꞌoko Haka Tere o tātou.

Karatia 1:4

A Ietū i vaꞌai ai i a ia mo mate mo haka kore e te ꞌAtua i te tātou hara ꞌe mo haka eꞌa i a tātou mai roto i te noho iŋa taꞌe tano o te ao, ꞌi te meꞌe era ko haŋa ꞌā e te ꞌAtua, Matuꞌa o tātou.

Ēfeto 1:2

Ka ai ꞌi ruŋa i a kōrua te riva rahi ꞌe te haumārū o te ꞌAtua Matuꞌa ꞌe o Ietū Kiritō, he Pūꞌoko Haka Tere o tātou.

Fīripo 1:2

Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou, ꞌe o Ietū Kiritō, Pūꞌoko Haka Tere o tātou.

Fīripo 4:20

Ki haꞌahana-hana tahi tātou ki te ꞌAtua, he Matuꞌa o tātou, ꞌātā ki te hopeꞌa raꞌa. ⌊ꞌĀmene⌋.

Kōrosa 1:2

he ꞌaroha atu ki a kōrua ki te nuꞌu taꞌatoꞌa haꞌataꞌa e te ꞌAtua māꞌana o Kōrosa, taina ⌊haka moe i te manaꞌu⌋ ꞌi ruŋa i a Ietū taꞌe haka rē i a ia ki te hora hopeꞌa. Ka ai ꞌi ruŋa i a kōrua te riva rahi ꞌe te haumārū o te ꞌAtua, Matuꞌa o tātou.

1 Tētārōnika 1:1

A au, a Pauro, a Tirivano ꞌe a Timoteo he ꞌaroha atu ki a kōrua ki te nuꞌu taꞌatoꞌa o Tētārōnika haꞌamuri ki te ꞌAtua Matuꞌa ꞌe ki te Pūꞌoko Haka Tere ko Ietū Kiritō. Ka ai ꞌi ruŋa i a kōrua te riva rahi ꞌe te haumārū o te ꞌAtua.

1 Tētārōnika 1:3

E māuru-uru nei ꞌi te meꞌe era he manaꞌu nō te mātou aŋa pē hē kōrua e aŋa ena ki te ꞌAtua, ꞌo te ⌊haka moe i te manaꞌu⌋ ꞌi ruŋa i a Ietū, pē hē e hāꞌūꞌū ena ki te rua, ꞌo te rahi o te kōrua haŋa mo rāua, ꞌe pē hē e haꞌaoromaꞌi ena hai pūai ꞌi te hora o te ꞌati, ꞌo te ai e tiaki e oho rō ꞌā kōrua ki te hoki iŋa mai o te tātou Pūꞌoko Haka Tere ko Ietū Kiritō.

2 Tētārōnika 2:16

ꞌE mā Ietū Kiritō mau ꞌā, Pūꞌoko Haka Tere o tātou, ꞌe mo te ꞌAtua, Matuꞌa o tātou, haŋa mai ꞌe vaꞌai mai hai riva rahi ōꞌona i te koa ꞌina he hopeꞌa raꞌa ꞌe i te ꞌite pē nei ē: pe muꞌa ka oho ena e vaꞌai rō mai i te meꞌe hōrea mai era e ia,

Meꞌe Haka Takeꞌa 11:15

He puhi te hitu merahi i tāꞌana koneta. He ŋaroꞌa mai meꞌe rahi nō atu reꞌo pūai ꞌi te raŋi e kī ꞌā: «ꞌI te hora nei, i te ꞌAtua ꞌe i te ⌊Kiritō⌋ te haka tere iŋa o te ao, ꞌe he haka tere he oho ꞌātā ki te hopeꞌa raꞌa».

Meꞌe Haka Takeꞌa 15:4

¿Ko ai te meꞌe mo taꞌe moꞌa i a koe, e te mātou Pūꞌoko Haka Tere ē? ¿Ko ai te meꞌe mo taꞌe haꞌahana-hana atu? Ko koe mau nō te meꞌe hara kore. Taꞌatoꞌa nuꞌu o te ao ka haꞌamuri atu ena. Ko takeꞌa ꞌana, paꞌi, e te taꞌatoꞌa: taꞌa meꞌe aŋa meꞌe tī-tika».

Meꞌe Haka Takeꞌa 19:6

He ŋaroꞌa takoꞌa e au i te reꞌo o te nuꞌu rahi tuꞌu pa he heruru ena o te vai topa mai te kona ruŋa nui ꞌe pa he heruru pūai o te pātiri e kī era: «¡Ki haꞌahana-hana tahi tātou i te ꞌAtua! Ko haꞌamata ꞌā, paꞌi, ko haka tere ꞌā te tātou Pūꞌoko Haka Tere, te tātou ꞌAtua hopeꞌa o te pūai.

Meꞌe Haka Takeꞌa 20:4

He takeꞌa haka ꞌou ia e au i te pepe noho ꞌariki, ꞌe ꞌi ruŋa i rā ŋā pepe te nuꞌu ki a rāua i vaꞌai ai i te parau mo ture i te taŋata. He takeꞌa takoꞌa e au i te vārua o te nuꞌu i paꞌo i te ŋao i mā-mate ai ꞌo te haka ꞌite i te hāpī ꞌa Ietū ꞌe i te ⌊roŋo riva-riva o te ꞌAtua⌋. Hora era o rāua e ora nō ꞌana kai haꞌamuri ki te manuꞌino ꞌe ki te ꞌītoro aŋa pē ia, ꞌe ꞌina takoꞌa kai haka rē i a rāua mo tāpaꞌo a te tira ꞌe a te rima hai tāpaꞌo era o rā manuꞌino. ꞌE he takeꞌa e au te ora iŋa haka ꞌou mai o rāua mai te mate ꞌe te haka tere iŋa ananake ko te ⌊Kiritō⌋ e hoꞌe taꞌutini matahiti.