Rōmano 8:2 - Rapa Nui

² ꞌi te meꞌe era te Vārua Maitai, vaꞌai i te ora ki te nuꞌu ꞌa Ietū Kiritō, haka tere i a tātou ꞌi te hora nei, ko haka eꞌa ꞌana i a tātou mai roto i te pūai o te hara maꞌu i a tātou ki te mate.

Rōmano 8:2 ပူးပေါင်းရင်းမြစ်များ

Iovani 4:10

He pāhono e Ietū: —ꞌĀhani ꞌō e ꞌite rō ꞌā koe he aha te meꞌe haŋa o te ꞌAtua mo vaꞌai atu, ꞌe ꞌāhani takoꞌa e ꞌite rō ꞌā koe ko ai te meꞌe nei e no-noꞌi atu ena ki te vai, ko no-noꞌi ꞌana ia e koe ki a ia hai vai, ꞌe he vaꞌai atu i te vai vaꞌai i te ora ꞌāpī ꞌina he hopeꞌa raꞌa.

Iovani 4:14

ꞌe, te kope unu i te vai vaꞌai e au, e ko pohe haka ꞌou. Te vai vaꞌai e au ꞌi roto i a ia pa he kona tehe vai ꞌina he oti ꞌe mai ira he ravaꞌa e ia i te ora ꞌāpī ꞌina he hopeꞌa raꞌa vaꞌai e te ꞌAtua.

Iovani 6:63

ꞌĪ a au he kī atu: o te ⌊Vārua Maitai⌋ te vaꞌai i te ora ꞌāpī; taꞌe hai haŋu taŋata ana ravaꞌa. Te meꞌe vānaŋa atu era e au o te Vārua Maitai, ꞌe hai rā vānaŋa e vaꞌai ena e ia i te ora ꞌāpī ki te taŋata.

Iovani 8:32

he ꞌite kōrua i te parautiꞌa, ꞌe hai nā parautiꞌa he eꞌa kōrua mai te rima o te meꞌe haka ꞌekaravo atu i a kōrua.

Iovani 8:36

Mo haka eꞌa i a kōrua e te Poki o te ꞌAtua mai te rima o te meꞌe haka ꞌekaravo i a kōrua, he eꞌa mau rō ꞌai.

Rōmano 16:3

E ꞌaroha atu kōrua ki a Pirika ꞌe ki a ꞌĀkira; a rāua he hokorua ōꞌoku ꞌi te aŋa vaꞌai mai e Ietū Kiritō.

Rōmano 3:27

Mo ai ia pē ira, ¿e riva rō tātou mo teꞌo-teꞌo ꞌi muꞌa o te ꞌAtua o ruŋa i te tātou meꞌe aŋa? ꞌIna. ¿ꞌO te aha? ꞌO te ai hai haka moe nō o tātou i te manaꞌu ꞌi ruŋa i a Ietū te ꞌAtua e kī ena e tano rō ꞌana tātou ki tōꞌona mata, taꞌe ꞌō hai haꞌatura ki te haka tere iŋa ꞌa Mōtē.

Rōmano 5:21

Te meꞌe ravaꞌa e te taŋata mai te hara he mate, he haꞌataꞌa mau rō ꞌāvai mai te ꞌAtua. ꞌE te meꞌe ravaꞌa mai te riva rahi o te ꞌAtua he tano ki tōꞌona mata ꞌe he ora ꞌāpī ꞌina he hopeꞌa raꞌa hai meꞌe aŋa era ꞌi ruŋa i te tātaurō e te tātou Pūꞌoko Haka Tere ko Ietū Kiritō.

Rōmano 6:14

Pē ira e ko ai haka ꞌou ꞌi ruŋa i a kōrua te pūai o te hara. Te kōrua ora, paꞌi, ꞌi te riva rahi o te ꞌAtua ꞌe taꞌe ꞌi te haꞌatura ki te ⌊haka tere iŋa ꞌa Mōtē⌋.

Rōmano 6:18

Te ꞌAtua ko haka eꞌa ꞌā i a kōrua mai roto i te pūai o te hara, ꞌe ko haka riro ꞌā i a kōrua he tāvini ꞌāꞌana, mo aŋa i te meꞌe tī-tika ꞌi muꞌa i a ia.

Rōmano 6:22

A kōrua ꞌi te hora nei taꞌe he tāvini toe o te hara, he tāvini o te ꞌAtua. Te meꞌe nei mo te kōrua riva-riva mau ꞌā; pē ira he tano he oho te kōrua noho iŋa ki te mata o te ꞌAtua, ꞌe, ꞌi te hora hopeꞌa, he ravaꞌa i te ora ꞌāpī ꞌina he hopeꞌa raꞌa vaꞌai e ia.

Rōmano 7:21

Hora nei ko aŋi-aŋi ꞌana e au: ka haŋa atu a au mo aŋa i te meꞌe riva-riva, te meꞌe ravaꞌa nō mo aŋa he meꞌe rake-rake.

Rōmano 7:23

Ka ai atu pē ira, ꞌi roto i a au te meꞌe haka tātake i tōꞌoku manaꞌu riva-riva: he huru hara o roto ōꞌoku, maꞌu i a au pa he taŋata puru ꞌāꞌana.

Rōmano 7:4

Pē ira takoꞌa a kōrua, e te taina ōꞌoku ē. ꞌIna he pūai toe o te haka tere iŋa ꞌa Mōtē ꞌi ruŋa i a kōrua. I mate era a Ietū mo tātou, ko mate takoꞌa ꞌā a tātou ꞌi muri. Pē ira i kore ai te pūai o rā haka tere iŋa mai ruŋa i a tātou, ꞌe ꞌi te hora nei te meꞌe i a tātou he pūai o te kope ora haka ꞌou mai era mai te mate mo aŋa o tātou i te meꞌe haŋa o te ꞌAtua.

Rōmano 8:1

Hora nei ꞌina he ūtuꞌa toe mo tātou mo te nuꞌu ꞌa Ietū Kiritō, nuꞌu ⌊haka moe i te manaꞌu⌋ ꞌi ruŋa i a ia,

1 Kōrinto 15:45

Pē nei e hāꞌaki ena ꞌi ruŋa i te Pāpaꞌi Moꞌa: «Ki te taŋata raꞌe era ko ꞌĀtamu i vaꞌai ai e te ꞌAtua i te ora ki tōꞌona hakari mo noho ꞌi te ao nei»; ꞌe ki a ꞌĀtamu hopeꞌa ena, ko Ietū Kiritō, i vaꞌai ai i te parau mo vaꞌai i te ora ꞌāpī ꞌina he hopeꞌa raꞌa mo noho ꞌi te raŋi.

2 Kōrinto 3:17

Te tātou Pūꞌoko Haka Tere e haka tika ena i te tātou māhatu hai Vārua Maitai. ꞌE te kope haka tika e te Vārua Maitai ko eꞌa ꞌā mai te pūai o te hara ꞌe ko eꞌa takoꞌa ꞌā mai te manaꞌu pē nei ē: hai haꞌatura ki te haka tere iŋa ꞌa Mōtē he tano ki te mata o te ꞌAtua.

2 Kōrinto 3:6

Hai hāꞌūꞌū mau nō ōꞌona e tano nei mātou mo haka ꞌite o ruŋa i te haka tere iŋa ꞌāpī ōꞌona ananake ko te taŋata, ꞌe te oho iŋa nei taꞌe hai haꞌatura ki te ⌊haka tere iŋa ꞌa Mōtē⌋ ana tano ki tōꞌona mata, hai ai o te Vārua Maitai ꞌi roto i te māhatu. Te meꞌe mo ravaꞌa hai haꞌatura ki te haka tere iŋa ꞌa Mōtē he mate, ꞌe te meꞌe vaꞌai e te Vārua Maitai he ora ꞌāpī ꞌina he hopeꞌa raꞌa.

Karatia 2:19

I aŋi-aŋi era e au e ko ravaꞌa mo tano ki te mata o te ꞌAtua hai haꞌatura ki te haka tere iŋa ꞌa Mōtē, kai haka haŋu haka ꞌou ia a au a ruŋa i rā haka tere iŋa. ꞌE hora nei, mo te ꞌAtua mau nō a au e ora nei. I haka moe era a au i tōꞌoku manaꞌu ꞌi ruŋa i a Ietū, i tuꞌu rō pa he meꞌe ena ē: ko mate takoꞌa ꞌana a au ꞌi muri i a ia ꞌo te ai i mate ai a ia mōꞌoku.

Karatia 5:1

A Ietū Kiritō i haka eꞌa i a tātou mai te meꞌe ena he ꞌamo i te haka tere iŋa ꞌa Mōtē mo tano ki te mata o te ꞌAtua. ꞌO ira, e uꞌi kōrua ꞌo haka ꞌamo haka ꞌou rō atu i te haka tere iŋa era, ꞌo ꞌekaravo haka ꞌou kōrua o rā haka tere iŋa.

Karatia 6:2

E hāꞌūꞌū takoꞌa kōrua i te rua mo ꞌamo i tōꞌona ꞌati; pē ira he haka tano kōrua i te meꞌe kī mai e te ⌊Kiritō⌋ mo aŋa.

Tanatiako 1:25

ꞌE te kope taꞌe rehu te meꞌe ŋaroꞌa, hāpī mo ꞌata ꞌite ōꞌona o ruŋa i te haka tere iŋa hopeꞌa o te tī-tika haka eꞌa i te taŋata mai roto i te hara, haka tano tahi i te meꞌe aŋa ki te meꞌe kī e rā roŋo, he haꞌamaitai e te ꞌAtua ꞌi tāꞌana meꞌe taꞌatoꞌa aŋa.

Meꞌe Haka Takeꞌa 11:11

Ki tano te toru mahana ꞌe te ꞌafa, he haka ora haka ꞌou e te ꞌAtua i tū ŋā mataꞌite era ꞌe he eꞌa ki ruŋa. ꞌE te nuꞌu taꞌatoꞌa takeꞌa i a rāua he riꞌa-riꞌa rō atu ꞌai.

Meꞌe Haka Takeꞌa 22:1

He haka takeꞌa mai ia e tū merahi era i te rio maꞌitaki e tahi mai ira e eꞌa era te vai vaꞌai i te ora ꞌāpī ꞌina he hopeꞌa raꞌa. Rā vai pa he hiꞌo ꞌā te māꞌeha, ꞌe mai te kona pepe noho ꞌariki o te ꞌAtua ꞌe o te Māmoe e eꞌa era.