Rōmano 3:28 - Rapa Nui

²⁸ Pē ira a tātou i tuꞌu ai ki te roa: he tano te taŋata ꞌi muꞌa o te ꞌAtua hai haka moe i te manaꞌu ꞌi ruŋa i a Ietū, ꞌe taꞌe ꞌō hai haꞌatura ki te haka tere iŋa ꞌa Mōtē.

Rōmano 3:28 ပူးပေါင်းရင်းမြစ်များ

Iovani 5:24

»ꞌĪ a au he kī atu: te kope haka roŋo i tāꞌaku vānaŋa ꞌe haka moe i tōꞌona manaꞌu ꞌi ruŋa i te kope uŋa mai i a au, i a ia te ora ꞌāpī ꞌina he hopeꞌa raꞌa, ꞌe ꞌina he ūtuꞌa mōꞌona. Ko haka eꞌa ꞌana, paꞌi, e te ꞌAtua mai te ara o te mate ꞌe ko haka noho ꞌana ꞌi roto i te ara o te ora.

Iovani 6:40

Te haŋa o tōꞌoku Matuꞌa: he ai o te ora ꞌāpī ꞌina he hopeꞌa raꞌa i te nuꞌu taꞌatoꞌa ꞌite ko ai te Poki nei o te ꞌAtua ꞌe haka moe i te manaꞌu ꞌi ruŋa i a ia; ꞌe he haka ora tahi e au ꞌi te mahana o te ture hopeꞌa.

Rōmano 4:5

ꞌE te meꞌe he tano ki te mata o te ꞌAtua taꞌe pē ira. Te taŋata hara, paꞌi, ⌊haka moe i te manaꞌu⌋ ꞌi ruŋa i te ꞌAtua, hai riva rahi mau nō o te ꞌAtua e kī ena he kope tano ki tōꞌona mata ꞌe taꞌe ꞌō hai meꞌe aŋa e rā kope.

Rōmano 5:1

ꞌI te ai o tātou ꞌi te hora nei he taŋata tano ki te mata o te ꞌAtua ꞌo te ⌊haka moe i te manaꞌu⌋ ꞌi ruŋa i a Ietū, e riva-riva nei a tātou ko te ꞌAtua hai meꞌe aŋa era e te tātou Pūꞌoko Haka Tere ko Ietū Kiritō.

Rōmano 8:3

Te ꞌAtua ko aŋa ꞌā i te meꞌe taꞌe ravaꞌa e te ⌊haka tere iŋa ꞌa Mōtē⌋ mo aŋa, ꞌi te pūai kore o te taŋata. Ko haka kore ꞌā i te pūai o te hara mai ruŋa i te taŋata hai uŋa mai i tāꞌana Poki pa he taŋata ꞌe pa he tūtia mo ꞌamo e tōꞌona hakari i te ūtuꞌa o te tātou hara.

1 Kōrinto 6:11

Tētahi o kōrua i aŋa rō i te ŋā meꞌe nei ꞌi muꞌa ꞌā. ꞌE, hora nei, ꞌi te ai o te tātou Pūꞌoko Haka Tere ko Ietū Kiritō hai haka moe i te manaꞌu ꞌi ruŋa i a ia, te ꞌAtua ko haka kore ꞌana i te kōrua hara, ko haꞌataꞌa ꞌana i a kōrua māꞌana, ꞌe ko haka riro ꞌana he nuꞌu tano ki tōꞌona mata ꞌi te ai o te ⌊Vārua Maitai⌋ ꞌi roto i a kōrua.

Karatia 2:16

Ka ai atu pē ira, e ꞌite rō ꞌana e tātou ꞌina e tahi kope mo tano ki te mata o te ꞌAtua hai haꞌatura ki te haka tere iŋa ꞌa Mōtē. Hai haka moe mau nō i te manaꞌu ꞌi ruŋa i a Ietū ana tano te taŋata ki te mata o te ꞌAtua. ꞌO ira a mātou, te hūrio, e haka moe ena i te manaꞌu ꞌi ruŋa i a Ietū, mo tano o mātou ki te mata o te ꞌAtua hai meꞌe nei ꞌe taꞌe ꞌō hai haꞌatura ki te haka tere iŋa ꞌa Mōtē. ꞌIna, paꞌi, e tahi taŋata mo tano ki a ia hai haꞌatura ki rā haka tere iŋa.

Karatia 3:24

Mo tātou te haka tere iŋa ꞌa Mōtē pa he kope hāpaꞌo ŋā poki, haka tika i te tātou ara ꞌātā ki te tuꞌu iŋa mai o Ietū Kiritō, ki ai ai hora era ōꞌona ka tuꞌu mai ena he tano a tātou ki te mata o te ꞌAtua hai haka moe i te manaꞌu ꞌi ruŋa i a ia.

Karatia 3:8

Ko manaꞌu era ꞌana, paꞌi, e te ꞌAtua, ꞌe ko haka ꞌite era ꞌā e ia ꞌi ruŋa i te ⌊Pāpaꞌi Moꞌa⌋ pē nei ē: mo haka moe o te nuꞌu taꞌe he hūrio i te rāua manaꞌu ꞌi ruŋa i a ia, e kī takoꞌa rō e te ꞌAtua mo rāua: he nuꞌu tano ki tōꞌona mata. Te parau ꞌāpī nei i haka ꞌite rō ki a ꞌAparahama ꞌi te hora kī era pē nei ē: «Hai koe ka haꞌamaitai nei e au i te taŋata taꞌatoꞌa o te ao».

Ēfeto 2:9

ꞌe taꞌe ꞌō ꞌo te aŋa o tātou i te meꞌe riva-riva. ꞌO ira ꞌina e tahi kope mo teꞌo-teꞌo ꞌo te eꞌa ōꞌona mai te ūtuꞌa o te hara.

Fīripo 3:9

ꞌe he ai ōꞌoku ꞌāꞌana. Hai ia, paꞌi, a au e tano nei ki te mata o te ꞌAtua, taꞌe ꞌō hai haꞌatura ki te ⌊haka tere iŋa ꞌa Mōtē⌋. He haka moe ōꞌoku i te manaꞌu ꞌi ruŋa i a Ietū i kī ai e te ꞌAtua e tano rō ꞌana a au ki tōꞌona mata.

Tito 3:7

ki aŋi-aŋi riva-riva ai e tātou: pe muꞌa ka oho ena e ravaꞌa rō e tātou i te ora ꞌāpī ꞌina he hopeꞌa raꞌa vaꞌai e te ꞌAtua, pa he hauhaꞌa haka rē e te matuꞌa mo tāꞌana poki. ꞌE e ꞌite nei e tātou i nei meꞌe ꞌo te ai, ꞌi tōꞌona riva rahi, i kī ai e te ꞌAtua: a tātou he nuꞌu tano ki tōꞌona mata.

Tanatiako 2:18

Nā e kī rō atu e te kope e tahi: «Tuꞌu meꞌe he haka moe i te manaꞌu ꞌi ruŋa i te ꞌAtua, ꞌe tōꞌoku, he meꞌe riva-riva aŋa». ꞌĪ a au he kī atu: «Ka haka takeꞌa mai rā tuꞌu haka moe iŋa ena i te manaꞌu ꞌi ruŋa i te ꞌAtua ꞌina he meꞌe riva-riva aŋa, ꞌe māꞌaku e haka takeꞌa atu, hai meꞌe riva-riva aŋa, i tōꞌoku haka moe iŋa i te manaꞌu ꞌi ruŋa i te ꞌAtua».

Tanatiako 2:20

E te maꞌa-maꞌa ē, ka haka topa te manaꞌu: te haka moe iŋa i te manaꞌu ꞌi ruŋa i te ꞌAtua mo taꞌe haka takeꞌa hai meꞌe riva-riva aŋa, ꞌina e tahi hauhaꞌa.

Tanatiako 2:24

Hora ena ko ꞌite ꞌā e kōrua: te ꞌAtua e kī rō ꞌana: te taŋata e tano rō ꞌā ki tōꞌona mata taꞌe nō hai haka moe i te manaꞌu ꞌi ruŋa i a ia, e ai takoꞌa te meꞌe riva-riva aŋa.