Rōmano 2:7 - Rapa Nui

⁷ Ki te nuꞌu aŋa oho i te meꞌe riva-riva ꞌi te manaꞌu ki te mahana era mo haka koa ꞌe mo haka nui-nui i a rāua e te ꞌAtua, ꞌe ꞌi te haŋa mo ai ꞌi muri i a ia pe muꞌa ka oho ena, ki a rāua ka vaꞌai ena e te ꞌAtua i te ora ꞌāpī ꞌina he hopeꞌa raꞌa.

Rōmano 2:7 ပူးပေါင်းရင်းမြစ်များ

Māteo 25:46

He kī ia e Ietū: —Te hopeꞌa mo te nuꞌu o te pāꞌiŋa maui he ūtuꞌa ꞌina he hopeꞌa raꞌa, ꞌe mo te nuꞌu o te pāꞌiŋa mataꞌu tano ki te mata o te ꞌAtua he ora ꞌina he hopeꞌa raꞌa.

Ruka 21:19

ꞌO ira, e haka noho nō te kōrua manaꞌu ꞌi ruŋa i a au ki ravaꞌa ai e kōrua i te ora ꞌāpī ꞌina he hopeꞌa raꞌa vaꞌai e te ꞌAtua.

Ruka 8:15

»Te kona ꞌōꞌone riva-riva era he nuꞌu haka roŋo ꞌe haꞌatura hai māhatu ki te roŋo o te ꞌAtua, ꞌe maꞌu hio-hio ꞌi roto i a rāua. Mai roto i a rāua e eꞌa ena meꞌe rahi meꞌe riva-riva, pa he karu hua era meꞌe rahi karu haka ꞌou mai ruŋa.

Iovani 4:36

»Te nuꞌu kato i te kai e ꞌauhau rō ꞌā, ꞌe te kai kato era he ravaꞌa e rāua i te ora ꞌāpī ꞌina he hopeꞌa raꞌa. Pē ira te nuꞌu ꞌoka (te auraꞌa, te nuꞌu haka ꞌite i te vānaŋa o te ꞌAtua) ka koa ena ananake ko te nuꞌu o rāua i kato i te nuꞌu ⌊haka moe i te manaꞌu⌋ ꞌi ruŋa i a au.

Iovani 5:44

¿Pē hē ia a kōrua ana haka moe i te manaꞌu ꞌi ruŋa i a au? Te meꞌe haŋa rahi o kōrua he vānaŋa riva-riva atu e te rua o ruŋa i a kōrua, ꞌe ꞌina kōrua he tapa atu ana manaꞌu riva-riva te ꞌAtua o ruŋa i a kōrua.

Rōmano 2:10

ꞌE te nuꞌu taꞌatoꞌa aŋa i te meꞌe riva-riva e haka nui-nui rō e te ꞌAtua ꞌe e vaꞌai rō i te haumārū, ki te hūrio he raꞌe, ꞌe ki te nuꞌu taꞌe he hūrio takoꞌa.

Rōmano 6:23

Te meꞌe vaꞌai mai e te hara he mate, he haꞌataꞌa mau rō ꞌāvai mai muri i te ꞌAtua. ꞌE te meꞌe vaꞌai mai e te ꞌAtua he ora ꞌāpī ꞌina he hopeꞌa raꞌa ꞌi muri i a ia ꞌi te ai o tātou ꞌa Ietū Kiritō, Pūꞌoko Haka Tere o tātou.

Rōmano 8:18

Ki tōꞌoku manaꞌu, te ꞌati ꞌamo e tātou ꞌi te hora nei taꞌe ꞌā he meꞌe ki te meꞌe hopeꞌa o te nui-nui ka takeꞌa ena e tātou pe muꞌa ka oho ena.

Rōmano 9:23

I haŋa takoꞌa rō mo haka takeꞌa i te nui-nui o tōꞌona riva rahi ꞌi ruŋa i a tātou, he nuꞌu e haka ꞌaroha rō ꞌana e ia. ꞌE, ko haka riva-riva era ꞌā e te ꞌAtua mo ai o tātou pe muꞌa ka oho ena ꞌi roto i tōꞌona nui-nui, te auraꞌa, mo ai takoꞌa i a tātou te huru riva ōꞌona.

1 Kōrinto 15:42

Pē ira takoꞌa ꞌana te hakari o tātou o te hora nei taꞌe pa he hakari ka ora ena mai te mate ꞌo te ai te hakari nei he mate ꞌe he piro. ꞌE te hakari ora mai te mate ꞌina e ko mate ki te hora hopeꞌa.

1 Kōrinto 15:50

Te kī, e te taina ē: te hakari mate nei o tātou e ko tano ꞌi te ao haka tere e te ꞌAtua, he kona taꞌe ai o te mate.

1 Kōrinto 15:58

Te meꞌe haŋa ia, e te taina haŋa rahi ōꞌoku ē: he haka hio-hio he oho te kōrua manaꞌu ꞌi ruŋa i a Ietū, ꞌo haka tapa kōrua mai te hāpī parautiꞌa o te ꞌAtua. ꞌE, ka aŋa ka oho nō i te aŋa haŋa o te ꞌAtua mo aŋa e kōrua. E ꞌite rō ꞌana, paꞌi, e kōrua: te aŋa ki a ia e ko taꞌe hauhaꞌa.

Karatia 6:9

ꞌO ira, ꞌina ko rohi-rohi mo hāꞌūꞌū ki te rua. Mo taꞌe rohi-rohi, ꞌi te hora tano he haꞌamaitai a tātou e te ꞌAtua.

Ēfeto 6:24

Ka ai te riva rahi o te ꞌAtua ꞌi ruŋa i te nuꞌu taꞌatoꞌa haŋa hai māhatu ki a Ietū Kiritō, Pūꞌoko Haka Tere o tātou.

Kōrosa 1:27

nuꞌu ki a rāua te ꞌAtua i haŋa ai mo haka ꞌite pē nei ē: te hauhaꞌa taꞌatoꞌa o rā parautiꞌa mo te nuꞌu taꞌe hūrio takoꞌa. ꞌE rā parautiꞌa ko te meꞌe nei: a Ietū Kiritō e noho takoꞌa rō ꞌana, hai Vārua Maitai, ꞌi roto i a kōrua i te nuꞌu taꞌe hūrio. ꞌE hai noho atu ōꞌona ꞌi roto i a kōrua he ꞌite kōrua pē nei ē: pe muꞌa ka oho ena a kōrua takoꞌa ꞌi roto i tōꞌona nui-nui, te auraꞌa: i a kōrua takoꞌa tōꞌona huru riva.

1 Timoteo 1:17

¡Ki moꞌa ꞌe ki haꞌahana-hana tahi tātou, ꞌātā ki te hopeꞌa raꞌa, ki te ꞌAriki, he ꞌAtua ꞌina ōꞌona haꞌamata, ꞌina ōꞌona hopeꞌa, ꞌina he mate, ꞌina he takeꞌa, ꞌe e tahi mau nō! Ka ai pē ira.

2 Timoteo 1:10

ꞌE, ko haka takeꞌa mai ꞌā e te ꞌAtua hai tuꞌu mai era o Ietū Kiritō, kope haka eꞌa i a tātou mai roto i te ūtuꞌa o te hara. Ko haka kore ꞌā, paꞌi, e Ietū i te pūai o te mate, ꞌe ko haka ꞌite ꞌā ki te nuꞌu: mo haka noho o rāua i te manaꞌu ꞌi ruŋa i te ⌊roŋo riva-riva o te ꞌAtua⌋ he ravaꞌa i te ora ꞌāpī ꞌina he hopeꞌa raꞌa.

ꞌEvereo 2:7

Mo te hora ꞌiti-ꞌiti e tahi i vaꞌai rō ki te merahi i te tōroꞌa ꞌata hau rō atu ki te tōroꞌa o te taŋata. I oho era he haka nui-nui haka ꞌou i te taŋata ꞌe he moꞌa pa he moꞌa iŋa ki te ꞌariki,

ꞌEvereo 6:12

ꞌE ꞌina a mātou he haŋa mo hupe-hupe o kōrua. Ka aŋa ka oho nō, pa he meꞌe aŋa e te nuꞌu ⌊haka moe i te manaꞌu⌋ ꞌi ruŋa i a Ietū taꞌe haka rē i a ia ki te hora hopeꞌa. I a rāua te meꞌe hōrea e te ꞌAtua.

ꞌEvereo 6:15

I tiaki i oho nō a ꞌAparahama hai haumārū ꞌe i haka tano rō e te ꞌAtua i rā meꞌe hōrea era ki a ia.

1 Iovani 2:25

ꞌE te meꞌe hōrea mai era e Ietū Kiritō ko te meꞌe nei: he ora ꞌāpī ꞌina he hopeꞌa raꞌa.