Rōmano 2:3 - Rapa Nui

³ ꞌE a koe, e te kope tuhi i te hape o te rua ꞌe aŋa takoꞌa i te meꞌe aŋa e rā kope ē, ꞌina ko manaꞌu he ora koe mai te ūtuꞌa o te ꞌAtua.

Rōmano 2:3 ပူးပေါင်းရင်းမြစ်များ

Māteo 23:33

»¡E te huaꞌai o te kōreha veneno ē! Nā kōrua he viri ki roto i te ūtuꞌa o te pōꞌauahi.

Māteo 26:53

¿Kai ꞌite ꞌō koe mo ani ōꞌoku ki tōꞌoku Matuꞌa, he uŋa mai e ia, ꞌi te hora mau nei ꞌā, ka taꞌutini ka taꞌutini te merahi?

Ruka 12:14

He pāhono e Ietū: —E hoa, ¿ꞌa ꞌai i vaꞌai mai i te parau mo vahi ōꞌoku i te kōrua hauhaꞌa?

Ruka 22:58

I hini era he takeꞌa e te rua kope he kī ki a Pētero: —A koe o roto i rā nuꞌu. He pāhono e Pētero: —Ē, taꞌe a au o te nuꞌu era.

Ruka 22:60

He kī haka ꞌou e Pētero: —Ē, kai ꞌite a au he aha taꞌa meꞌe ena e kī mai ena. ꞌI tū hora mau era ꞌana, e vānaŋa nō ꞌā a Pētero, he ꞌoꞌoa te moa.

Rōmano 1:32

Te nuꞌu nei e ꞌite riva-riva rō ꞌana pē nei ē: te ꞌAtua ko kī ꞌā: te ūtuꞌa mo te nuꞌu aŋa i te ŋā meꞌe nei he mate; ꞌe, ka ai atu pē ira, ko te aŋa ko te oho iŋa ꞌā, ꞌe ꞌātā e koa rō ꞌana mo takeꞌa i te rua e aŋa ꞌana i nei ŋā meꞌe.

Rōmano 2:1

ꞌO ira ꞌina he ꞌōtohe toe mōꞌou, e te kope tuhi i te hape o te rua ē, ka ai nō atu ko ai koe. Mo tuhi ōꞌou i te hape o te tētahi, e tuhi takoꞌa ꞌana koe i tuꞌu hape; te meꞌe aŋa, paꞌi, e rā nuꞌu, e aŋa takoꞌa rō ꞌana e koe.

Rōmano 2:2

Ko ꞌite riva-riva ꞌana a tātou: te ꞌAtua e ture ena hai parautiꞌa ꞌi te hora haka ūtuꞌa i te nuꞌu aŋa i te meꞌe tuꞌu pē ira.

Rōmano 9:20

ꞌE, ¿ko ai a tātou te taŋata mo ꞌui iŋa ki te ꞌAtua o ruŋa i te meꞌe haŋa ꞌe aŋa e ia? ¿Ka kī ꞌō e tano rō mo kī e te pani aŋa hai ꞌōꞌone ki te kope aŋa i a ia pē nei ē: «¿He aha koe i aŋa mai ai i a au pē nei?»?

1 Tētārōnika 5:3

E kī nō ꞌā e te nuꞌu pē nei ē: «ꞌIna he tamaꞌi ꞌe ꞌina he meꞌe mo riꞌa-riꞌa iŋa», ꞌi rā hora, mā te taꞌe ꞌite, he topa te ꞌati ꞌi ruŋa i a rāua, pa he hora o te huki iŋa o te tūātoto o te hānautama, ꞌe e ko ravaꞌa mo eꞌa mai rā ꞌati.

ꞌEvereo 12:25

E te taina, e uꞌi kōrua ꞌo taꞌe haka roŋo rō ki te vānaŋa o te ꞌAtua. Te nuꞌu o muꞌa ꞌā hārui hai tuaꞌivi ki tāꞌana vānaŋa haka ꞌite e Mōtē ꞌi te ao nei ꞌina kai taꞌe haka ūtuꞌa e te ꞌAtua. Pē ira ka topa ena ki a tātou mo taꞌe haka roŋo ki te kope ꞌāꞌana te vānaŋa mai mai te raŋi.

ꞌEvereo 2:3

Mo ai pē ira, ¿pē hē ia ana taꞌe haka ūtuꞌa i a tātou ana hārui hai tuaꞌivi i te rāveꞌa vaꞌai mai e te ꞌAtua mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa? Te meꞌe nei o te Pūꞌoko Haka Tere mau nei ꞌā o tātou i haka ꞌite raꞌe mai. I oho era he haka ꞌite takoꞌa mai he parautiꞌa mau ꞌā e te nuꞌu ŋaroꞌa era i rā meꞌe mai i a ia.