Rōmano 2:12 - Rapa Nui

¹² Te nuꞌu taꞌatoꞌa hara taꞌe ꞌite o ruŋa i te haka tere iŋa ꞌa Mōtē ꞌe te nuꞌu taꞌatoꞌa hara ꞌite o ruŋa e ko taꞌe haka ūtuꞌa e te ꞌAtua, ꞌe te ūtuꞌa mo rāua taꞌatoꞌa he haka tapa mau rō ꞌāvai mai muri i a ia. Te meꞌe nō, te nuꞌu hara taꞌe ꞌite o ruŋa i rā haka tere iŋa, taꞌe hai rā haka tere iŋa ka haka ūtuꞌa ena e te ꞌAtua, ꞌe te nuꞌu hara ꞌite o ruŋa, hai rā haka tere iŋa mau ꞌā ka haka ūtuꞌa ena.

Rōmano 2:12 ပူးပေါင်းရင်းမြစ်များ

Māteo 11:22

ꞌĪ ia a au he kī atu: ꞌi te mahana o te ture hopeꞌa o te ꞌAtua, te ūtuꞌa mo kōrua ꞌata hau rō atu ki te ūtuꞌa mo te nuꞌu o Tiro ꞌe o Tīrone.

Māteo 11:24

ꞌĪ ia a au he kī atu: ꞌi te mahana o te ture hopeꞌa, te ūtuꞌa mōꞌou ꞌata hau rō atu ki te ūtuꞌa topa ki te nuꞌu o Tōroma».

Iovani 19:11

He pāhono e Ietū: —E ko ai i a koe te parau o ruŋa ōꞌoku ꞌāhani i taꞌe haꞌatiꞌa atu e te ꞌAtua. ꞌO ira te kope vaꞌai atu era i a au ki a koe ꞌata hau ꞌi te hara ki a koe.

Aŋa o te ꞌĀpōtoro 2:23

I vaꞌai atu ai ki a kōrua mo haka tano o te aŋa manaꞌu ꞌāꞌana ꞌi muꞌa ꞌā; pē ira kōrua i haka tiŋaꞌi ai ꞌi ruŋa i te tātaurō hai rima o te taŋata taꞌe he hūrio.

Rōmano 1:32

Te nuꞌu nei e ꞌite riva-riva rō ꞌana pē nei ē: te ꞌAtua ko kī ꞌā: te ūtuꞌa mo te nuꞌu aŋa i te ŋā meꞌe nei he mate; ꞌe, ka ai atu pē ira, ko te aŋa ko te oho iŋa ꞌā, ꞌe ꞌātā e koa rō ꞌana mo takeꞌa i te rua e aŋa ꞌana i nei ŋā meꞌe.

Rōmano 4:15

Te meꞌe ravaꞌa, paꞌi, mai te haka tere iŋa ꞌa Mōtē, he ūtuꞌa ꞌo te ai ꞌina e tahi kope mo ravaꞌa mo haꞌatura tahi i rā haka tere iŋa. ꞌE mo taꞌe ai o te haka tere iŋa mo haꞌatura, ꞌina ia he meꞌe mo kī mai ko hape ꞌā a tātou.

Rōmano 8:3

Te ꞌAtua ko aŋa ꞌā i te meꞌe taꞌe ravaꞌa e te ⌊haka tere iŋa ꞌa Mōtē⌋ mo aŋa, ꞌi te pūai kore o te taŋata. Ko haka kore ꞌā i te pūai o te hara mai ruŋa i te taŋata hai uŋa mai i tāꞌana Poki pa he taŋata ꞌe pa he tūtia mo ꞌamo e tōꞌona hakari i te ūtuꞌa o te tātou hara.

1 Kōrinto 9:21

ꞌE mo ai ōꞌoku ꞌi roto i te nuꞌu taꞌe he hūrio taꞌe maꞌu i te haka tere iŋa ꞌa Mōtē, he haka tere takoꞌa a au i a au pē rāua, ki ravaꞌa ai i te rāveꞌa mo haka huri i te manaꞌu ki ruŋa i a Ietū. Ka ai atu pē ira, taꞌe a au e taꞌe haꞌatura ꞌā ki te roŋo o te ꞌAtua; e haka tano e oho ꞌana i te roŋo o te Kiritō.

Karatia 3:10

Te nuꞌu manaꞌu: hai haꞌatura ki te haka tere iŋa ꞌa Mōtē he tano a rāua ki te mata o te ꞌAtua ko ai era ꞌā te ūtuꞌa mo rāua. E kī rō ꞌana, paꞌi, ꞌi ruŋa i te Pāpaꞌi Moꞌa: «Te kope taꞌe haꞌatura ki te roŋo taꞌatoꞌa o te haka tere iŋa ꞌa Mōtē, he haka ūtuꞌa e te ꞌAtua ꞌātā ki te hopeꞌa raꞌa».

Karatia 3:22

Te meꞌe nō, pē nei e kī ena ꞌi ruŋa i te Pāpaꞌi Moꞌa: te taŋata taꞌatoꞌa o te hara te haka tere, ꞌe te rāveꞌa nō mo ravaꞌa i te meꞌe hōrea e te ꞌAtua, he ora ꞌāpī ꞌina he hopeꞌa raꞌa, e haka moe i te manaꞌu ꞌi ruŋa i a Ietū.

Tanatiako 2:10

Te kope haꞌatura oho ia ki te haka tere iŋa o te ꞌAtua, mo hape ꞌi te meꞌe nō e tahi, ko hape ꞌā ki te haka tere iŋa taꞌatoꞌa o te ꞌAtua.