Rōmano 15:14 - Rapa Nui

¹⁴ E te taina ōꞌoku ē, e ꞌite riva-riva rō ꞌana a au: te kōrua noho iŋa noho iŋa tano ki te mata o te ꞌAtua, ko ꞌite riva-riva ꞌana kōrua o ruŋa i te hāpī parautiꞌa ꞌāꞌana, ꞌe e tano rō ꞌana mo hāꞌūꞌū ꞌi roto i a kōrua ꞌā mo haka tika o ruŋa i te meꞌe haŋa o te ꞌAtua.

Rōmano 15:14 ပူးပေါင်းရင်းမြစ်များ

1 Kōrinto 1:5

Hai ia, paꞌi, te ꞌAtua i haꞌamaitai ai i a kōrua mo aŋi-aŋi riva-riva e kōrua i tāꞌana vānaŋa ꞌe mo ꞌite mo hāpī i te nuꞌu,

1 Kōrinto 12:8

O te Vārua Maitai te vaꞌai ki te tētahi taŋata i te pūai mo vānaŋa i te vānaŋa mārama-rama; ꞌe o te Vārua Maitai takoꞌa ꞌā te vaꞌai ki te rua i te pūai mo haka ꞌite i te meꞌe hōhonu o te ꞌAtua haka ꞌite e ia mau ꞌā ki rā taŋata.

1 Kōrinto 13:2

ꞌE mo vānaŋa ōꞌoku ki te nuꞌu i te meꞌe haka ꞌite mai e te ꞌAtua, ꞌe mo aŋi-aŋi ōꞌoku i te meꞌe taꞌatoꞌa, ꞌātā i te meꞌe manaꞌu e te ꞌAtua mo aŋa taꞌe haka ꞌite mai ꞌi muꞌa ꞌā, ꞌe mo riva ōꞌoku mo haka tapa i te maꞌuŋa mai tōꞌona kona ꞌi te pūai o tōꞌoku haka moe iŋa i te manaꞌu ꞌi ruŋa i a Ietū, ꞌe ꞌina o roto i a au te meꞌe he haŋa ki te rua, ꞌina ia e tahi ōꞌoku hauhaꞌa.

1 Kōrinto 8:1

ꞌĪ a au he vānaŋa atu o ruŋa i te ꞌui era o kōrua o te kai tūtia ki te ꞌītoro. Taꞌatoꞌa o tātou e ꞌite rō ꞌā ꞌina e tahi pūai o te ꞌītoro ꞌi ruŋa i a tātou. Ka ai atu pē ira, ka haka topa te manaꞌu: mo haka tere o tātou hai ꞌite, he manaꞌu tātou i hau rō atu tātou ki te rua. ꞌE, mo haka tere hai haŋa, he aŋa tātou i te meꞌe riva-riva mo te rua.

1 Kōrinto 8:10

Pē nei te auraꞌa: mo ai o te taina taꞌe aŋi-aŋi riva-riva i te meꞌe o te ꞌAtua he takeꞌa i a koe e kai ꞌana i te kai tūtia ki te ꞌītoro, ¿e ko taꞌe pohe mau hō rā taina mo kai takoꞌa tāꞌana?

1 Kōrinto 8:7

Te ꞌati nō, tētahi o tātou kai aŋi-aŋi riva-riva ꞌana ꞌina he pūai o te ꞌītoro o ruŋa i a tātou, ꞌi te meꞌe era ꞌi muꞌa ꞌā e haꞌamuri rō ꞌana e rāua. ꞌE hora nei, mo kai i te kai tūtia ki te ꞌītoro, he manaꞌu ko hara ꞌana a rāua.

2 Kōrinto 8:7

A kōrua he nuꞌu haka kē ꞌi te meꞌe taꞌatoꞌa: ꞌi te haka moe i te manaꞌu ꞌi ruŋa i a Ietū, ꞌi te ꞌite mo vānaŋa, ꞌi te ꞌite i te hāpī parautiꞌa o te ꞌAtua, ꞌi te haŋa mo hāꞌūꞌū, ꞌe ꞌi te haŋa mo te rua, he meꞌe i ꞌite e kōrua mai i a mātou. Pē ira takoꞌa ꞌana kōrua ana haka kē ꞌi te aŋa riva nei: he haꞌaputu i te moni ꞌi roto i a kōrua mo te taina veve o Hērutarema.

Ēfeto 5:9

ꞌE te meꞌe poreko mai te nuꞌu noho ꞌi roto i te māꞌeha he meꞌe riva-riva, tī-tika ꞌe parautiꞌa.

Fīripo 1:11

ꞌE pē ira takoꞌa he poreko mai roto i a kōrua meꞌe rahi te meꞌe riva-riva hai pūai o Ietū Kiritō, ꞌe he haꞌahana-hana ia te taŋata i te ꞌAtua.

Fīripo 1:7

Taꞌe he meꞌe mo māere te manaꞌu ōꞌoku i te ŋā meꞌe nei mo kōrua; e maꞌu rō ꞌana, paꞌi, au i a kōrua ꞌi roto i tōꞌoku māhatu. A kōrua, paꞌi, ka ai a au ꞌi roto i te hare maꞌuꞌaurī ꞌo ꞌi muꞌa o te nuꞌu ra-rahi e haka aŋi-aŋi ꞌā pē nei ē: he parautiꞌa mau ꞌā te ⌊roŋo riva-riva o te ꞌAtua⌋, ko te hokorua iŋa nō mai ꞌā kōrua ꞌi tāꞌaku aŋa vaꞌai mai e te ꞌAtua hai riva rahi ōꞌona.

Kōrosa 3:16

E te taina, e maꞌu te roŋo ꞌa Ietū Kiritō ꞌi roto i te kōrua māhatu, ki haka tika ai nei roŋo i te kōrua manaꞌu ꞌe i te kōrua meꞌe aŋa. E hāpī ꞌe e hatu ki te rua, hai mārama-rama, mo haꞌatura o rāua ki te ꞌAtua. E hīmene kōrua i te vānaŋa o te ꞌAtua aŋa mo hīmene, i te tētahi hīmene haꞌahana-hana mo te ꞌAtua, ꞌe i te meꞌe haka hīmene e te ⌊Vārua Maitai⌋ koia ko māuru-uru ki te ꞌAtua hai māhatu.

1 Tētārōnika 5:11

ꞌO ira, ꞌi roto i a kōrua e haka koa, e haka pūai te kōrua manaꞌu ꞌi ruŋa i a Ietū, pa he meꞌe mau ena ꞌā e kōrua e aŋa mai ena.

1 Tētārōnika 5:14

He ani takoꞌa atu mātou, e te taina ē: e haka pūai te manaꞌu o te nuꞌu e riꞌa-riꞌa rō ꞌā, e hāꞌūꞌū ki te nuꞌu ꞌina he pūai te rāua haka moe iŋa i te manaꞌu ꞌi ruŋa i a Ietū, e kī ki te nuꞌu hupe-hupe: «e aŋa», ꞌe e ꞌite kōrua mo haꞌaoromaꞌi i te taꞌatoꞌa.

2 Tētārōnika 1:11

ꞌO ira, ꞌi roto i te mātou pure, e pure takoꞌa rō ꞌana a mātou mo kōrua paurō te mahana. E ani nei mātou ki te tātou ꞌAtua mo hāꞌūꞌū atu, ki ai ai te kōrua noho iŋa tano o te nuꞌu haꞌataꞌa e ia māꞌana, ꞌe ki ravaꞌa ai kōrua, hai pūai ōꞌona, mo aŋa i te meꞌe riva-riva taꞌatoꞌa manaꞌu e kōrua mo aŋa ꞌo te ai o kōrua he nuꞌu haka moe i te manaꞌu ꞌi ruŋa i a Ietū.

2 Timoteo 1:5

E manaꞌu takoꞌa rō ꞌana a au i tuꞌu haka moe iŋa parautiꞌa i te manaꞌu ꞌi ruŋa i a Ietū, he meꞌe ai ꞌi tuꞌu māmārūꞌau era ko Rōira ꞌe ꞌi tuꞌu matuꞌa vahine era ko Eunite. ꞌE ko ꞌite riva-riva ꞌana e au nā i a koe takoꞌa.

Firemono 1:21

E pāpaꞌi atu ena ꞌo te ꞌite ōꞌoku e haꞌatura rō mai koe, ꞌe ꞌo te ꞌite takoꞌa ōꞌoku pē nei ē: e hau rō atu taꞌa meꞌe riva-riva ka aŋa ena ki te meꞌe no-noꞌi atu ena e au.

ꞌEvereo 5:12

A kōrua ko haka moe nō mai era ꞌā i te manaꞌu ꞌi ruŋa i a Ietū. ꞌO ira, te tano mau: e hāpī kōrua i te rua. Ka ai atu pē ira, ko te ai iŋa ꞌana kōrua pa he nuꞌu e hāpī haka ꞌou i te meꞌe taꞌe aŋarahi mo aŋi-aŋi o ruŋa i te ꞌAtua. E tuꞌu rō ꞌana kōrua pa he ŋā poki poreko iho ꞌomo-ꞌomo ū taꞌe ꞌite mo kai i te kai paka-paka.

ꞌEvereo 6:9

E te taina haŋa rahi ē, ka ai atu meꞌe paŋahaꞌa te mātou meꞌe kī atu, e ꞌite riva-riva rō ꞌā e mātou: a kōrua pa he henua hua o te kai riva-riva tano o te nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa.

2 Pētero 1:12

ꞌO ira a au, e te taina ē, ka haka manaꞌu ka oho atu ena o ruŋa i te meꞌe taꞌatoꞌa ena, ka ai atu, nā e maꞌu hio-hio mai ena kōrua i nā parautiꞌa.

1 Iovani 2:21

E pāpaꞌi atu ena a au taꞌe ꞌo te taꞌe ꞌite o kōrua i te hāpī parautiꞌa, ꞌo te ai e ꞌite rō ꞌana e kōrua. ꞌE, ko ꞌite takoꞌa ꞌana e kōrua ꞌina e tahi reo-reo eꞌa mai roto i te hāpī parautiꞌa.