Rōmano 12:1 - Rapa Nui

¹ E te taina, te ꞌAtua e haka ꞌaroha rō ꞌana i a tātou, ꞌe ꞌi ruŋa i a tātou tōꞌona riva rahi. ꞌO ira ꞌī a au he ani atu: e vaꞌai tahi kōrua i te kōrua hakari ꞌe i te kōrua manaꞌu ki te ꞌAtua pa he tūtia ora haꞌataꞌa māꞌana mo aŋa i tāꞌana meꞌe haŋa. Te meꞌe nei he rāveꞌa tano mo haꞌamuri ki te ꞌAtua.

Rōmano 12:1 ပူးပေါင်းရင်းမြစ်များ

Ruka 7:47

ꞌĪ a au he kī atu: te hara rahi o te viꞌe nei ko haka kore ꞌana, he rahi o tōꞌona haŋa mai. Te kope taꞌe rahi te hara haka kore, taꞌe rahi tōꞌona haŋa ki te ꞌAtua.

Rōmano 12:2

ꞌIna kōrua ko noho haka ꞌou hai manaꞌu taꞌe tano o te taŋata. E haka rē ki te ꞌAtua mo huri i te kōrua manaꞌu, ki huri ai te kōrua noho iŋa, ꞌe ki ꞌite ai e kōrua he aha te meꞌe haŋa o te ꞌAtua, te auraꞌa, he aha te meꞌe tano ki a ia, he aha te meꞌe mo koa ōꞌona, ꞌe he aha te meꞌe hopeꞌa o te riva-riva ki tōꞌona mata.

Rōmano 15:16

mo tāvini ki a Ietū Kiritō mo te riva-riva o te nuꞌu taꞌatoꞌa taꞌe he hūrio. Tāꞌaku aŋa pa he aŋa ꞌā o te ⌊oromatuꞌa⌋: he haka ꞌite ki te nuꞌu taꞌe he hūrio i te ⌊roŋo riva-riva o te ꞌAtua⌋, ki haka moe ai a rāua i te manaꞌu ꞌi ruŋa i a Ietū. Pē ira ka ai ena a rāua pa he meꞌe mo vaꞌai ki te ꞌAtua mo tōꞌona koa haka maꞌitaki e te Vārua Maitai.

Rōmano 15:30

E te taina, ꞌi te ai o tātou taꞌatoꞌa ꞌa Ietū Kiritō, he Pūꞌoko Haka Tere o tātou, ꞌe ꞌi te ai o te haŋa ꞌi roto i a tātou vaꞌai mai e te Vārua Maitai, he ani atu a au: e pure kōrua ki te ꞌAtua mōꞌoku.

Rōmano 2:4

ꞌIna koe he tapa atu i te riva rahi taꞌe pau o te ꞌAtua, tōꞌona haꞌaoromaꞌi iŋa, ꞌe tōꞌona huru haumārū mo tiaki mai. ꞌIna e koe he ꞌite: te ꞌAtua e haka takeꞌa atu ena i tōꞌona riva rahi ꞌi te haŋa ōꞌona mo huri ōꞌou i tuꞌu manaꞌu ki a ia.

Rōmano 6:13

ꞌIna ko vaꞌai i te kōrua hakari ki te hara, ꞌo riro te hakari he meꞌe mo aŋa o te meꞌe taꞌe tano. Te meꞌe o kōrua mo aŋa, pa he taŋata ora haka ꞌou mai te mate, he vaꞌai i a kōrua ki te ꞌAtua mo haka tere atu, ꞌe te kōrua hakari pa he meꞌe mo aŋa o te meꞌe tī-tika ꞌi muꞌa ōꞌona.

Rōmano 6:16

¿Kai ꞌite ꞌō kōrua pē nei ē: mo haꞌatura mo oho o kōrua ki te meꞌe e tahi, he riro kōrua he ꞌekaravo o rā meꞌe? He parautiꞌa te vānaŋa nei ka ai atu he hara ꞌo he ꞌAtua te meꞌe haꞌatura o kōrua. Te meꞌe nō, te hara he meꞌe maꞌu i a kōrua ki te mate, ꞌe te haꞌatura ki te ꞌAtua he meꞌe maꞌu i a kōrua mo haka tere hai meꞌe tī-tika.

Rōmano 6:19

(E haꞌaauraꞌa atu ena a au hai ꞌekaravo he aŋa riꞌa-riꞌa o kōrua mo aŋi-aŋi i te ŋā meꞌe nei). ꞌO ira, pa he vaꞌai iŋa o kōrua i te hakari mo aŋa i te meꞌe taꞌe tano ꞌi muꞌa ꞌā, pē ira takoꞌa ꞌā ana vaꞌai ꞌi te hora nei i te hakari mo aŋa i te meꞌe riva-riva ki te mata o te ꞌAtua, ki ai ai te kōrua huru ꞌe te kōrua noho iŋa e tano rō ꞌā ki a ia.

Rōmano 9:23

I haŋa takoꞌa rō mo haka takeꞌa i te nui-nui o tōꞌona riva rahi ꞌi ruŋa i a tātou, he nuꞌu e haka ꞌaroha rō ꞌana e ia. ꞌE, ko haka riva-riva era ꞌā e te ꞌAtua mo ai o tātou pe muꞌa ka oho ena ꞌi roto i tōꞌona nui-nui, te auraꞌa, mo ai takoꞌa i a tātou te huru riva ōꞌona.

1 Kōrinto 1:10

E te taina, hai ꞌīŋoa o te tātou Pūꞌoko Haka Tere ko Ietū Kiritō he ani atu a au mo ai o kōrua taꞌatoꞌa e tahi mau nō manaꞌu, ꞌe ꞌina ko haka topa kē-kē. E noho kōrua taꞌatoꞌa ꞌi roto i te haumārū, e tahi mau nō manaꞌu ꞌe e tahi mau nō meꞌe haŋa mo aŋa.

2 Kōrinto 10:1

E te taina, nā ꞌi roto i a kōrua te nuꞌu e haꞌaꞌino rō ꞌā i a au pē nei ē: ꞌi te hora ōꞌoku ꞌi muri i a kōrua, ꞌina a au he kī atu ki te kōrua ꞌāriŋa i te kōrua hape, ꞌe, ꞌi te hora mo pāpaꞌi atu, he ture nō atu tāꞌaku aŋa. ꞌO ira, a au, a Pauro, he ani atu hai haŋa ꞌe hai riva rahi o te ⌊Kiritō⌋:

2 Kōrinto 4:1

Te ꞌAtua i vaꞌai mai ai i te aŋa nei, he riva rahi ōꞌona. ꞌO ira a mātou e taꞌe hōriŋa nei.

2 Kōrinto 4:16

ꞌO ira a mātou e taꞌe hōriŋa nei ꞌi te mātou aŋa. Te mātou hakari, pe te rehe-rehe pe te oho nō, ꞌe, ka ai atu pē ira, te mātou haka moe iŋa i te manaꞌu ꞌi ruŋa i a Ietū pe te pūai pe te oho nō te mahana te mahana.

2 Kōrinto 5:20

He nuꞌu vānaŋa mātou hai ꞌīŋoa o te Kiritō, ꞌe hai mātou te ꞌAtua e vānaŋa atu ena ki a kōrua. ꞌO ira, hai ꞌīŋoa o te Kiritō he ani atu mātou: e haka moe kōrua i te manaꞌu ꞌi ruŋa i te roŋo parautiꞌa o ruŋa i te Kiritō mo riva-riva o kōrua ki te ꞌAtua.

2 Kōrinto 6:1

Hora nei, pa he nuꞌu hokorua mātou ꞌi te aŋa o te ꞌAtua, he ani atu: ꞌina kōrua ko haka māuꞌa i te riva rahi o te ꞌAtua vaꞌai atu era e ia.

Ēfeto 4:1

A au, a Pauro, e puru atu ena ꞌo te haka ꞌite i te ⌊roŋo riva-riva o ruŋa i a Ietū Kiritō⌋, he ani atu: ꞌo te ai o kōrua he nuꞌu haꞌataꞌa e te ꞌAtua māꞌana, e ai te kōrua noho iŋa, noho iŋa tano o te nuꞌu ꞌāꞌana.

Ēfeto 5:10

Te auraꞌa: e ꞌite kōrua he aha te meꞌe mo koa o te tātou Pūꞌoko Haka Tere ko Ietū Kiritō, ꞌe ꞌai ka aŋa rō.

Fīripo 1:20

Tāꞌaku meꞌe hopeꞌa o te haŋa he taꞌe aŋa ōꞌoku e tahi meꞌe ꞌo haꞌamā a au ꞌi muꞌa i a Ietū, ꞌe he vānaŋa he oho ōꞌoku o ruŋa i a ia hai pūai, pa he meꞌe nei e aŋa atu ena ki ꞌaŋarīnā, ki takeꞌa ai e te nuꞌu i te nui-nui o Ietū hai meꞌe taꞌatoꞌa aŋa ꞌe kī e au, ꞌo, ana haŋa te ꞌAtua, hai mate iŋa ōꞌoku.

Fīripo 2:17

Pa he tūtia vaꞌai e kōrua ki te ꞌAtua mo koa ōꞌona te ꞌati e ꞌamo ena e kōrua ꞌo te ⌊haka moe i te manaꞌu⌋ ꞌi ruŋa i a Ietū ꞌe ꞌo te aŋa o kōrua ki a ia. ꞌE mo haŋa o te ꞌAtua mo ꞌāmui i tōꞌoku mate ki te tūtia vaꞌai e kōrua ki a ia, pa he huri iŋa i te manu tūtia hai vino, e koa nō a au, pa he koa iŋa nei ōꞌoku mo kōrua.

Fīripo 4:18

He haka ꞌite atu a au: te meꞌe taꞌatoꞌa haka maꞌu mai era e kōrua ki a Epafororito ko tuꞌu mai ꞌana; rahi riꞌa-riꞌa ꞌe ꞌina he meꞌe hape toe ꞌāꞌaku. Te meꞌe nei pa he tūtia ꞌeo vaꞌai ki te ꞌAtua, ꞌe he meꞌe koa ꞌāꞌana.

1 Tētārōnika 4:1

E te taina, ko haka ꞌite atu era ꞌā e mātou pē hē ana tano te kōrua noho iŋa ki te mata o te ꞌAtua, ꞌe ko ꞌite ꞌā e mātou, nā kōrua e noho mai ena pē ira. Ka ai atu pē ira, he ani atu a mātou hai ꞌīŋoa o te tātou Pūꞌoko Haka Tere ko Ietū: ka ꞌata haka tano ka oho nō te kōrua noho iŋa pē ira mo koa o te ꞌAtua.

1 Tētārōnika 4:10

ꞌE he aŋi mau ꞌā e haŋa rō ꞌana a kōrua ki te taina taꞌatoꞌa o te ŋā kona taꞌatoꞌa ena o Mātērōnia. Ka ai atu pē ira, e te taina ē, ꞌī mātou he ani atu pē nei ē: e ꞌata haŋa e oho kōrua ki te taꞌatoꞌa.

1 Tētārōnika 5:12

E te taina, he ani atu mātou: e moꞌa kōrua i te nuꞌu taꞌatoꞌa aŋa ꞌi roto i a kōrua, he nuꞌu hatu atu ꞌe he nuꞌu haka tika atu ꞌi te meꞌe o te ꞌAtua.

1 Timoteo 2:3

Te meꞌe nei he meꞌe riva-riva ꞌe he meꞌe haŋa o te ꞌAtua, kope toꞌo i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.

1 Timoteo 5:4

ꞌE mo ai tāꞌue te poki ꞌe te makupuna mo hāpaꞌo i rā hove, ko rāua te meꞌe raꞌe mo hāꞌūꞌū i a ia. Pē ira he haka hoki ki rā matuꞌa te haŋa vaꞌai era e ia ki a rāua. He meꞌe nei te meꞌe haŋa o te ꞌAtua.

Firemono 1:10

he ani atu mo haka ꞌaroha ōꞌou i a Onetimoro. A ia ko tuꞌu ꞌana pa he poki ꞌāꞌaku ꞌe a au pa he matuꞌa ōꞌona he haka moe i te manaꞌu ꞌi ruŋa i a Ietū ꞌi te hora haka ꞌite e au, ꞌi roto i te hare maꞌuꞌaurī, o ruŋa i a Ietū.

Firemono 1:9

ꞌe ꞌina a au kai haŋa mo aŋa pē ira. ꞌI te ai o tuꞌu here mo te taina, te haŋa e no-noꞌi atu. ꞌĪ a au, a Pauro, korohuꞌa, e puru atu ena ꞌi te hora nei ꞌo te haka ꞌite o ruŋa i a Ietū Kiritō,

ꞌEvereo 13:22

E te taina, he ani atu au mo haka roŋo riva-riva kōrua ki tāꞌaku meꞌe ꞌiti-ꞌiti pāpaꞌi atu ena mo haka pūai i te kōrua manaꞌu ꞌi ruŋa i te ꞌAtua.

1 Pētero 2:20

Te ꞌamo ꞌe te haꞌaoromaꞌi i te ūtuꞌa ꞌo te aŋa i te meꞌe taꞌe tano, ꞌina e tahi hauhaꞌa. ꞌE mo ꞌamo ꞌe mo haꞌaoromaꞌi hai pūai i te ūtuꞌa ꞌo te aŋa i te meꞌe tī-tika, he koa te ꞌAtua.

1 Pētero 2:5

A kōrua takoꞌa pa he māꞌea ora, ꞌe te ꞌAtua, hai ŋā māꞌea ora ena ko kōrua, e aŋa mai ena i te kona mo haꞌamuri ki a ia. ꞌI roto a kōrua pa he ⌊oromatuꞌa⌋ haꞌataꞌa e ia māꞌana tūtia ki a ia i te meꞌe riva-riva haka poreko e te Vārua Maitai ꞌi roto i a kōrua, he tūtia koa ꞌāꞌana ꞌo te ai o kōrua ꞌa Ietū Kiritō.