Rōmano 11:7 - Rapa Nui

⁷ ¿He aha ia te auraꞌa o te meꞌe taꞌatoꞌa nei? Te auraꞌa: te rahi raꞌa o te itaraera ꞌina kai ravaꞌa i te rāua meꞌe kimi: he tano o rāua ki te mata o te ꞌAtua. O te nuꞌu itaraera haꞌataꞌa e te ꞌAtua māꞌana i ravaꞌa. ꞌE tū rahi raꞌa era o te itaraera ko haka hio-hio ꞌā e te ꞌAtua i te rāua manaꞌu.

Rōmano 11:7 ပူးပေါင်းရင်းမြစ်များ

Marko 6:52

Ka ai atu, paꞌi, ko takeꞌa ꞌana i te mana aŋa mo haka rahi i te haraoa ꞌe i te ika, ꞌina ꞌā he aŋi-aŋi ko ai mau a Ietū ꞌi te taꞌe haka moe riva-riva i te rāua manaꞌu ꞌi ruŋa i a ia.

Ruka 13:24

«E uꞌi kōrua e uru a roto i te ꞌōpani vako-vako. ꞌĪ a au he kī atu: nuꞌu rahi te nuꞌu haŋa mo uru ki roto i te ao haka tere e te ꞌAtua ꞌe nuꞌu taꞌe rahi ka oꞌo ena.

Iovani 12:40

«Te nuꞌu hārui i te ꞌAtua hai tuaꞌivi ko haka keva ꞌā e ia i te mata ꞌo takeꞌa, ꞌe ko haka mira-mira ꞌana i te manaꞌu ꞌo aŋi-aŋi; ꞌo huri mai te rāua manaꞌu a ruŋa i a au ꞌe ꞌo haka ora e au».

Rōmano 10:3

Mo rāua, paꞌi, taꞌe he parautiꞌa te rāveꞌa vaꞌai e te ꞌAtua mo tano o te taŋata ki tōꞌona mata. ꞌO ira e aŋa ena hai rāveꞌa mau ꞌana o rāua, ꞌe ꞌina he haŋa ki te rāveꞌa vaꞌai e te ꞌAtua.

Rōmano 11:25

E te taina ē, e haŋa rō ꞌana a au mo haka ꞌite atu i te meꞌe ꞌina kai ꞌite ꞌana e te taŋata o ruŋa i te hūrio, ꞌo manaꞌu rō kōrua i hau rō atu ꞌō kōrua ki a rāua. Tētahi o rāua ko hārui ꞌana hai tuaꞌivi i te ꞌAtua, ꞌe pē rā mau ꞌā ka oho ena ꞌātā ka haka moe tahi rō te manaꞌu ꞌi ruŋa i a Ietū te nuꞌu taꞌe he hūrio haꞌataꞌa e te ꞌAtua māꞌana.

Rōmano 11:5

Pē ira takoꞌa ꞌana ꞌi te hora nei, e te taina ē, e toe nō ꞌā te itaraera haꞌataꞌa e te ꞌAtua māꞌana hai riva rahi ōꞌona.

Rōmano 3:9

¿Pē hē ia te meꞌe nei? ¿ꞌAta hau hō tātou te hūrio ki te mata o te ꞌAtua ki te nuꞌu taꞌe he hūrio? Taꞌe pē ira. Nā ko haka ꞌite atu ꞌana pē nei ē: ka hūrio, ka taꞌe hūrio, taꞌatoꞌa nō he nuꞌu hara.

Rōmano 6:15

¿He aha ia te tātou meꞌe mo aŋa ꞌi te hora nei? ¿He hara he oho rō ꞌai ꞌi te ai o te tātou ora ꞌi te riva rahi o te ꞌAtua ꞌe taꞌe ꞌi te haꞌatura ki te haka tere iŋa ꞌa Mōtē? ¡Taꞌe pē ira!

Rōmano 9:18

Hai meꞌe nei e ꞌite ena e tātou: te nuꞌu haŋa e te ꞌAtua mo haka ꞌaroha, he haka ꞌaroha, ꞌe te nuꞌu haŋa mo haka hio-hio i te manaꞌu, he haka hio-hio e ia i te manaꞌu.

Rōmano 9:23

I haŋa takoꞌa rō mo haka takeꞌa i te nui-nui o tōꞌona riva rahi ꞌi ruŋa i a tātou, he nuꞌu e haka ꞌaroha rō ꞌana e ia. ꞌE, ko haka riva-riva era ꞌā e te ꞌAtua mo ai o tātou pe muꞌa ka oho ena ꞌi roto i tōꞌona nui-nui, te auraꞌa, mo ai takoꞌa i a tātou te huru riva ōꞌona.

1 Kōrinto 10:19

Mo ai pē ira, ¿ko tū meꞌe ꞌana hō mo te nuꞌu kai i te kai tūtia ki te ꞌītoro? ꞌIna. Te ꞌītoro, paꞌi, ꞌe te kai tūtia ki a ia ꞌina e tahi ōꞌona hauhaꞌa.

2 Kōrinto 3:14

ꞌE te itaraera, ꞌātā ki te hora nei, ꞌina he haŋa mo aŋi-aŋi pē nei ē: te haka tere iŋa tuai o te ꞌAtua ananake ko te taŋata he meꞌe mo ŋaro. E taiꞌo ena i rā haka tere iŋa, e tuꞌu rō ꞌā pa he meꞌe ena ē: e ai rō ꞌā te meꞌe puru i te rāua manaꞌu ꞌo aŋi-aŋi i te parautiꞌa. ꞌE te meꞌe mau nō mo kume i te meꞌe puru i te rāua manaꞌu ꞌo aŋi-aŋi he ⌊haka moe i te manaꞌu⌋ ꞌi ruŋa i a Ietū.

2 Kōrinto 4:4

Te nuꞌu nei, ꞌi te taꞌe haka moe i te rāua manaꞌu ꞌi ruŋa i a Ietū, ko haka pōhāhā ꞌā i te rāua manaꞌu e Rukifero, ꞌatua o te ao nei, ꞌo aŋi-aŋi, ꞌo takeꞌa i te māꞌeha o te mōrī o te roŋo riva-riva o ruŋa i te pūai ꞌe i te nui-nui o te ⌊Kiritō⌋, ꞌāriŋa ora o te ꞌAtua.

Ēfeto 1:4

ꞌI muꞌa ꞌā, hora era kai aŋa ꞌana i te ao, i haꞌataꞌa rō ai te ꞌAtua i a tātou i te nuꞌu ꞌa Ietū Kiritō mo nuꞌu ꞌāꞌana ꞌina e tahi hape ꞌi muꞌa i a ia. He haŋa mai o te ꞌAtua ki a tātou

Ēfeto 4:18

ꞌE, ꞌi te pūꞌoko hio-hio, ꞌina he haŋa mo ꞌite ꞌe mo aŋi-aŋi o ruŋa i te meꞌe o te ꞌAtua. E pōhāhā nō ꞌā te manaꞌu, ꞌe ꞌina i a rāua te ora ꞌāpī ꞌina he hopeꞌa raꞌa vaꞌai e te ꞌAtua.

Fīripo 1:18

Nōatu. Mo ai he parautiꞌa te rāua meꞌe hāpī, ko te koa iŋa ꞌana a au, ka ai hai māhatu ꞌo taꞌe hai māhatu e hāpī ena. Te meꞌe hauhaꞌa, paꞌi, ko te haka ꞌite ko te oho iŋa ꞌana o ruŋa i a Ietū. ꞌE, koa riꞌa-riꞌa au

ꞌEvereo 12:17

Ko ꞌite ꞌana a kōrua pē hē i hopeꞌa ai rā meꞌe. I haŋa era a Etaū mo vaꞌai e tōꞌona matuꞌa tane i te haꞌamaitai o te ꞌatariki, ka ai atu i taŋi rahi rō, kai ravaꞌa i rā meꞌe haŋa era e ia; ꞌina, paꞌi, he rāveꞌa toe mo haka hoki i te meꞌe a tuꞌa.

1 Pētero 1:2

Te manaꞌu o te ꞌAtua Matuꞌa i haꞌataꞌa ai i a kōrua: mo haka riro i a kōrua he nuꞌu ꞌina e tahi hara haꞌataꞌa māꞌana hai Vārua Maitai ꞌe haꞌatura ki a Ietū ꞌi te haka kore e te ꞌAtua i te kōrua hara hai toto tehe era o Ietū ꞌi ruŋa i te tātaurō. Ka rahi ka oho nō te riva rahi ꞌe te haumārū o te ꞌAtua ꞌi ruŋa i a kōrua.