Rōmano 11:25 - Rapa Nui

²⁵ E te taina ē, e haŋa rō ꞌana a au mo haka ꞌite atu i te meꞌe ꞌina kai ꞌite ꞌana e te taŋata o ruŋa i te hūrio, ꞌo manaꞌu rō kōrua i hau rō atu ꞌō kōrua ki a rāua. Tētahi o rāua ko hārui ꞌana hai tuaꞌivi i te ꞌAtua, ꞌe pē rā mau ꞌā ka oho ena ꞌātā ka haka moe tahi rō te manaꞌu ꞌi ruŋa i a Ietū te nuꞌu taꞌe he hūrio haꞌataꞌa e te ꞌAtua māꞌana.

Rōmano 11:25 ပူးပေါင်းရင်းမြစ်များ

Māteo 13:11

He pāhono e Ietū: «Ki a kōrua te ꞌAtua e haka ꞌite atu ena i te meꞌe taꞌe ꞌite e te taŋata o ruŋa o te haka tere iŋa ꞌāpī ꞌāꞌana, ꞌe ki a rāua ꞌina he haka ꞌite.

Ruka 21:24

E ai rō te nuꞌu o ira ka mate ena ꞌi te hoe, ꞌe tētahi atu he ꞌa-ꞌaru he maꞌu ki te rua henua; he tōtōā i a Hērutarema ꞌe he haka tere e te nuꞌu taꞌe he hūrio ꞌātā ki te roa o te mahana i haꞌatiꞌa e te ꞌAtua.

Iovani 10:16

»E ai takoꞌa rō ꞌana tāꞌaku māmoe taꞌe o roto o te ꞌāua nei; e haka taka-taka takoꞌa a au i a rāua. E haka roŋo rō a rāua ki tōꞌoku reꞌo ꞌe he riro mau rō ꞌāvai e tahi nō nūnaꞌa māmoe, ꞌe e tahi nō taŋata hāpaꞌo māmoe.

Rōmano 1:13

E te taina, e haŋa rō ꞌana a au mo ꞌite o kōrua e rahi rō ꞌā te mahana pohe ōꞌoku mo oho atu mo uꞌi i a kōrua, ꞌe ꞌātā ki te hora nei, ꞌī e piri nō mai ꞌā te meꞌe mo taꞌe tuꞌu atu ōꞌoku. Te meꞌe haŋa ꞌāꞌaku he takeꞌa mai ꞌi roto i a kōrua meꞌe rahi nuꞌu e pūai rō ꞌā te manaꞌu ꞌi ruŋa i te hāpī parautiꞌa o te ꞌAtua, ꞌe, takoꞌa, he ꞌata rahi o te nuꞌu haka ꞌou haka moe i te manaꞌu ꞌi ruŋa i a Ietū, pa he meꞌe topa ꞌi te tētahi atu kona o te nuꞌu taꞌe hūrio tuꞌu hāpī e au.

Rōmano 11:12

I ai ena hai hara o te hūrio i haꞌamaitai ai e te ꞌAtua i te nuꞌu o te ao taꞌe he hūrio, ¡ka manaꞌu atu rā kōrua pē hē ka ai ena ꞌi te mahana haka moe i te manaꞌu ꞌi ruŋa i a Ietū te taꞌatoꞌa nuꞌu hūrio haꞌataꞌa e te ꞌAtua māꞌana!

Rōmano 11:24

Pē nei te auraꞌa: mo ai ko toꞌo ꞌana e te ꞌAtua i a koe, he maŋa o te tumu o ꞌuta mo haka tupu ꞌi ruŋa i te tumu ꞌōrivo riva-riva, ¿pē hē ia ana taꞌe haka tupu haka ꞌou e ia, ꞌi ruŋa i rā tumu, i te hūrio, he maŋa parautiꞌa mau o rā tumu?

Rōmano 12:16

ꞌIna ko tātake ꞌi roto i a kōrua. ꞌIna ko manaꞌu i hau rō atu ki te rua, ꞌo manaꞌu e ai rō ꞌana te nuꞌu mo taꞌe piri e kōrua ꞌe te aŋa mo taꞌe aŋa e kōrua. ꞌIna ko manaꞌu ko ꞌite tahi ꞌana i te meꞌe taꞌatoꞌa.

Rōmano 16:25

Ki haꞌahana-hana tahi tātou ki te ꞌAtua. I a ia te pūai mo haka hio-hio i te kōrua manaꞌu ꞌi ruŋa i a ia hai roŋo haka ꞌite e au o ruŋa i a Ietū Kiritō, he parautiꞌa taꞌe haka ꞌite ꞌi muꞌa ꞌā o ruŋa i te meꞌe manaꞌu e ia mo aŋa

Rōmano 9:18

Hai meꞌe nei e ꞌite ena e tātou: te nuꞌu haŋa e te ꞌAtua mo haka ꞌaroha, he haka ꞌaroha, ꞌe te nuꞌu haŋa mo haka hio-hio i te manaꞌu, he haka hio-hio e ia i te manaꞌu.

1 Kōrinto 10:1

E te taina, ꞌina ko rehu te meꞌe topa era ki te tātou tupuna: taꞌatoꞌa o te nuꞌu nei i haka tika rō e te ꞌAtua hai raŋi e tahi, taꞌatoꞌa i haka eꞌa rō ki te rua pāꞌiŋa o te vai era ko Vaikava Mea-mea.

1 Kōrinto 12:1

E te taina, e haŋa rō ꞌana a au mo aŋi-aŋi riva-riva e kōrua o ruŋa i te meꞌe vaꞌai mai e te Vārua Maitai ki a tātou, ki te nuꞌu ⌊haka moe i te manaꞌu⌋ ꞌi ruŋa i a Ietū, mo aŋa i te aŋa o te ꞌAtua.

1 Kōrinto 2:7

Te meꞌe nei o mātou e vānaŋa nei: o ruŋa i te mārama-rama o te ꞌAtua taꞌe ꞌite e te taŋata: he meꞌe i manaꞌu e ia mo aŋa mo te tātou riva-riva pe muꞌa ka oho ena taꞌe haka ꞌite mai e ia ꞌi muꞌa ꞌā. Te meꞌe nei i manaꞌu ai mai te hora era kai aŋa ꞌā i te ao.

1 Kōrinto 4:1

E manaꞌu kōrua i a mātou i te nuꞌu haka ꞌite i te ⌊roŋo riva-riva o te ꞌAtua⌋ pa he tāvini nō o te ⌊Kiritō⌋ uŋa mo haka ꞌite i te meꞌe manaꞌu e te ꞌAtua mo aŋa taꞌe haka ꞌite mai ꞌi muꞌa ꞌā.

Ēfeto 1:9

Ko haka ꞌite mai ꞌana, paꞌi, i tāꞌana meꞌe manaꞌu era mo aŋa taꞌe haka ꞌite era e ia ꞌi muꞌa ꞌā. ꞌE, ꞌi tōꞌona riva rahi, i manaꞌu ai mo aŋa i te meꞌe nei hai Ietū Kiritō

Ēfeto 3:9

ꞌE ko vaꞌai takoꞌa mai ꞌana i te aŋa he haka aŋi-aŋi ōꞌoku ki te taŋata taꞌatoꞌa pē hē i haka tano ai e ia i tāꞌana meꞌe manaꞌu era mo aŋa. Te ꞌAtua, kope ꞌāꞌana i aŋa i te meꞌe taꞌatoꞌa, ko haka ꞌite mai ꞌana i tāꞌana meꞌe manaꞌu era mo aŋa, he meꞌe taꞌe haka ꞌite era ki te taŋata ꞌi muꞌa ꞌā,

Ēfeto 4:18

ꞌE, ꞌi te pūꞌoko hio-hio, ꞌina he haŋa mo ꞌite ꞌe mo aŋi-aŋi o ruŋa i te meꞌe o te ꞌAtua. E pōhāhā nō ꞌā te manaꞌu, ꞌe ꞌina i a rāua te ora ꞌāpī ꞌina he hopeꞌa raꞌa vaꞌai e te ꞌAtua.

2 Pētero 3:8

E te taina, ꞌina takoꞌa ko rehu: te mahana e tahi, mo te ꞌAtua, pa he matahiti e hoꞌe taꞌutini, ꞌe te hoꞌe taꞌutini matahiti, pa he mahana e tahi mōꞌona.

Meꞌe Haka Takeꞌa 1:20

Te auraꞌa o te ŋā hetuꞌu era e hitu takeꞌa era e koe ꞌi tōꞌoku rima mataꞌu he merahi hoko hitu hāpaꞌo i te ŋā nūnaꞌa taŋata era hoko hitu, ꞌe nei ŋā merahi he pūꞌoko haka tere o rā ŋā nūnaꞌa. ꞌE te auraꞌa o te hakariꞌi piru era e hitu ko te ŋā nūnaꞌa taŋata nei hoko hitu.

Meꞌe Haka Takeꞌa 10:7

Ka puhi ena, paꞌi, te hitu merahi i tāꞌana koneta, he tano tahi te meꞌe manaꞌu era e ia mo aŋa taꞌe aŋi-aŋi e te taŋata ꞌi muꞌa ꞌā, he meꞌe kī era e ia ki te perofeta, tāvini ōꞌona».

Meꞌe Haka Takeꞌa 11:15

He puhi te hitu merahi i tāꞌana koneta. He ŋaroꞌa mai meꞌe rahi nō atu reꞌo pūai ꞌi te raŋi e kī ꞌā: «ꞌI te hora nei, i te ꞌAtua ꞌe i te ⌊Kiritō⌋ te haka tere iŋa o te ao, ꞌe he haka tere he oho ꞌātā ki te hopeꞌa raꞌa».

Meꞌe Haka Takeꞌa 7:9

I oti era te meꞌe nei, he uꞌi atu a au ko te nuꞌu riꞌa-riꞌa o te ao o te taꞌatoꞌa hau, o te taꞌatoꞌa ꞌarero ꞌe o te taꞌatoꞌa henua, e māroa rō ꞌana ꞌi muꞌa o te kona pepe ꞌariki era ꞌe o te Māmoe. ꞌI te rahi e ko ravaꞌa mo tataku. E uru tahi rō ꞌana i te kahu tea-tea, e maꞌu-maꞌu rō ꞌā ꞌi te rima i te maŋa niu.