Rōmano 1:3 - Rapa Nui

^3-4 Te roŋo riva-riva nei o ruŋa o tāꞌana Poki ko Ietū Kiritō, he Pūꞌoko Haka Tere o tātou. I poreko ai mai te hakaara o ⌊Tāvita⌋, ꞌe hai ora iŋa haka ꞌou ōꞌona mai te mate, i haka aŋi-aŋi ai e te ⌊Vārua Maitai⌋ ki te taŋata: he Poki o te ꞌAtua ꞌe i a ia te pūai.

Rōmano 1:3 ပူးပေါင်းရင်းမြစ်များ

Māteo 1:1

Te ŋā ꞌīŋoa nei o te hakaara o Ietū Kiritō, he kope mai i a Tāvita ꞌe mai i a ⌊ꞌAparahama⌋ i haka ara mai ai:

Māteo 1:16

A Hākovo he matuꞌa o Kōsē, kenu ꞌa ⌊Māria⌋, matuꞌa vahine o Ietū, kope kī e tātou he ⌊Kiritō⌋.

Māteo 1:6

ꞌe a Hētē he matuꞌa o te ꞌariki era ko Tāvita. Te ꞌariki era ko Tāvita he matuꞌa o Toromono (te matuꞌa vahine he viꞌe hāipo-ipo ꞌa ꞌŪria).

Māteo 12:23

Te nuꞌu taꞌatoꞌa he māere he ꞌui ki a rāua ꞌā: «¿Ko te Hakaara era hō rā o Tāvita?».

Māteo 15:22

E tahi viꞌe tōꞌona noho iŋa e hāhine rō ꞌā ki rā ŋā kona, viꞌe o te kona kī ꞌi muꞌa ꞌā ko ⌊Kanaꞌana⌋, he haka hāhine a muri koia ko ohu: —¡E Ietū, e te Hakaara o ⌊Tāvita⌋ ē, ka haka ꞌaroha koe i a au! ¡Ko oꞌo ꞌana tāꞌaku poki vahine e te tātane he haka māui-ui nō te aŋa i a ia!

Māteo 26:63

I mou nō a Ietū. He kī e rā oromatuꞌa: —Mo ai koe he ⌊Kiritō⌋, he Poki o te ꞌAtua, ka kī mai koe hai ꞌīŋoa o te ꞌAtua ora.

Māteo 27:43

Te kope ena e haka moe rō ꞌana i tōꞌona manaꞌu ꞌi ruŋa i te ꞌAtua. ¡Ka haka ora ia e te ꞌAtua ꞌi te hora ena, ana ai e haŋa mau rō ꞌā ki a ia! ¿Taꞌe ꞌō ko kī mai ꞌana he Poki a ia o te ꞌAtua?».

Māteo 3:17

He ŋaroꞌa i te reꞌo ka kī mai te raŋi: «He Poki nā ꞌāꞌaku, Poki haŋa rahi; ꞌi ruŋa i a ia tōꞌoku koa».

Māteo 9:27

I eꞌa era a Ietū mai tū hare era, ꞌi tuꞌa i oho ai e rua matapō koia ko ohu: —¡E Ietū, e te Hakaara o ⌊Tāvita⌋ ē, ka haka ꞌaroha koe i a māua!

Ruka 1:35

He pāhono e te merahi: —E topa rō atu te Vārua Maitai, ꞌe ꞌi ruŋa i a koe ka noho ena te mana o te ꞌAtua. ꞌO ira te poki ka poreko ena ꞌina e ko ravaꞌa e te hara; e kī rō he Poki o te ꞌAtua.

Ruka 1:69

Ko uŋa mai ꞌana i te kope pūai e tahi mo haka eꞌa i a tātou mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa, he hakaara o tōꞌona tāvini ko Tāvita,

Iovani 1:14

Tū Vānaŋa era i riro rō he taŋata ꞌe i noho rō ꞌi muri i a tātou. Ko takeꞌa ꞌana e tātou tōꞌona pūai, pūai vaꞌai e te ꞌAtua Matuꞌa ki tāꞌana Poki era e tahi mau nō. Te haŋa o te ꞌAtua mo tātou ꞌe te parautiꞌa o ruŋa ōꞌona i haka takeꞌa mai ai ꞌi ruŋa i a ia.

Iovani 1:34

Ko takeꞌa ꞌana e au i rā meꞌe, ꞌe ko au te mataꞌite: a ia he Poki o te ꞌAtua».

Iovani 1:49

He kī e Natanaera: —E te Maꞌori, ¡ko koe te Poki o te ꞌAtua, ko koe te ꞌAriki o Itaraera!

Iovani 10:30

ꞌE, a māua ko te Matuꞌa e tahi mau nō.

Iovani 10:36

¿he aha ia a kōrua e kī ena ko kī ꞌana a au i te vānaŋa taꞌe tano mo te ꞌAtua hora kī era ōꞌoku he Poki au o te ꞌAtua? ꞌĀꞌana, paꞌi, a au i haꞌataꞌa mo te aŋa nei ꞌe i uŋa mai ki te ao nei.

Iovani 20:28

I ꞌauē a Tōmā i kī ai: —¡E te Pūꞌoko Haka Tere ōꞌoku ē, e te ꞌAtua ōꞌoku ē!

Iovani 20:31

ꞌE te ŋā meꞌe nei i pāpaꞌi ai mo haka aŋi-aŋi atu: a Ietū he ⌊Kiritō⌋, he Poki o te ꞌAtua, ꞌe, takoꞌa, mo ravaꞌa e kōrua i te ora ꞌāpī ꞌina he hopeꞌa raꞌa hai ⌊haka moe i te manaꞌu⌋ ꞌi ruŋa i a ia.

Iovani 5:25

»Nā e tuꞌu rō te hora, ko te hora mau nei ꞌā, e ŋaroꞌa rō i te reꞌo o te Poki o te ꞌAtua e te nuꞌu mate, te auraꞌa, e te nuꞌu taꞌe tano ki te mata o te ꞌAtua. ꞌE nuꞌu nō era mo haka moe i te manaꞌu ꞌi ruŋa i a ia ꞌe ꞌi ruŋa i tāꞌana vānaŋa he ravaꞌa i te ora ꞌāpī ꞌina he hopeꞌa raꞌa.

Iovani 7:42

Pē nei e kī ena ꞌi ruŋa i te Pāpaꞌi Moꞌa: te Kiritō he hakaara o te ꞌariki ko ⌊Tāvita⌋, ꞌe ka oho mai ena mai Vērene, he kona o Tāvita».

Aŋa o te ꞌĀpōtoro 2:30

A Tāvita he perofeta; ko ꞌite era ꞌana e ia ko hōrea ꞌā e te ꞌAtua e haka ꞌariki rō e tahi taŋata o roto o tōꞌona hakaara.

Aŋa o te ꞌĀpōtoro 3:13

Te ꞌAtua o ⌊ꞌAparahama⌋, o Itaꞌata, o Hākovo, tupuna o tātou, ko haka nui-nui ꞌā i tōꞌona tāvini ko Ietū vaꞌai e kōrua ki te nuꞌu ra-rahi ꞌe taꞌe haŋa e kōrua ꞌi te hora haŋa e Pirato mo haka eꞌa.

Aŋa o te ꞌĀpōtoro 8:36

E oho nō ꞌā a te ara, he tuꞌu ki te kona vai e tahi ꞌe he kī e tū taŋata etiopia era: —Nā te vai nā. ¿E ai rō ꞌā hō te meꞌe mo taꞌe haꞌatiꞌa mo papatito i a au? [

Aŋa o te ꞌĀpōtoro 9:20

Pē ira a Sauro i haꞌamata i haka ꞌite ai ꞌi roto i te hare pure hūrio o rā kona: a Ietū he Poki o te ꞌAtua.

Rōmano 1:9

A au e aŋa nei ki te ꞌAtua hai māhatu ꞌi te haka ꞌite iŋa ki te taŋata i te roŋo riva-riva o ruŋa o tāꞌana Poki. ꞌE he ꞌAtua te mataꞌite: e manaꞌu rō atu ꞌana a au ki a kōrua,

Rōmano 4:1

Ka manaꞌu rā kōrua ki a ⌊ꞌAparahama⌋, tupuna o mātou o te ⌊hūrio⌋.

Rōmano 9:3

mo tōꞌoku taina he itaraera. ꞌĀhani hai vaꞌai ōꞌoku i a au mo haka ūtuꞌa e te ꞌAtua, ꞌe hai haꞌataꞌa ōꞌoku i a au mai te ⌊Kiritō⌋ he riva a au mo hāꞌūꞌū ki a rāua mo ⌊haka moe i te manaꞌu⌋ ꞌi ruŋa i a Ietū, ko meꞌe era ꞌana e au.

Rōmano 9:5

Ko rāua te hakaara o te tātou tupuna, ꞌe mai i a rāua i poreko ai te Kiritō. A ia, paꞌi, he ꞌAtua o te meꞌe taꞌatoꞌa ꞌe ki a ia ana haꞌahana-hana ꞌātā ki te hopeꞌa raꞌa. ⌊ꞌĀmene⌋.

1 Kōrinto 1:9

ꞌE te ꞌAtua e ko taꞌe haka tano i tāꞌana meꞌe kī. ꞌĀꞌana, paꞌi, i haꞌataꞌa i a kōrua mo nuꞌu o tāꞌana Poki ko Ietū Kiritō, Pūꞌoko Haka Tere o tātou.

1 Kōrinto 10:18

Te itaraera kai i te ꞌanimare tūtia ki te ꞌAtua, e haꞌamuri ꞌana ki te ꞌAtua.

Karatia 4:4

ꞌE, i tano era te hora, he uŋa mai e te ꞌAtua i tāꞌana Poki ꞌe he haka poreko mai roto i te viꞌe haꞌatura ki te ⌊haka tere iŋa ꞌa Mōtē⌋,

1 Tētārōnika 1:10

ꞌE e ꞌaꞌamu takoꞌa rō ꞌana rā nuꞌu pē hē kōrua e tiaki ena ki te hoki iŋa mai mai te raŋi o tāꞌana Poki ko Ietū, kope haka ora e te ꞌAtua mai te mate, ꞌe kope haka eꞌa i a tātou mai te ūtuꞌa taparahi-taꞌata, ūtuꞌa nā e tuꞌu rō mai.

1 Timoteo 2:5

Te ꞌAtua e tahi nō, ꞌe e tahi nō kope haka riva-riva i te taŋata ki te ꞌAtua, ko Ietū Kiritō.

1 Timoteo 3:16

He meꞌe nui-nui mau ꞌana te parautiꞌa haka ꞌite mai era e te ꞌAtua pē nei ē: Te Kiritō i tuꞌu mai ai pa he taŋata, i haka ꞌite rō mai e te ⌊Vārua Maitai⌋ he Poki o te ꞌAtua, ꞌe he merahi te mataꞌite. Te roŋo riva-riva o ruŋa i a ia i haka ꞌite rō ki te hau taꞌatoꞌa, i haka moe rō te manaꞌu o te taŋata ꞌi ruŋa i a ia, ꞌe i toꞌo rō e te ꞌAtua ki muri i a ia.

2 Timoteo 2:8

ꞌIna ko rehu i a koe te roŋo riva-riva haka ꞌite e au pē nei ē: te ꞌAtua i haka ora rō mai te mate i a Ietū Kiritō, hakaara o te ꞌariki era ko ⌊Tāvita⌋.

1 Iovani 1:3

E haka ꞌite atu ena o ruŋa i tū kope takeꞌa ꞌe ŋaroꞌa era e mātou, mo ravaꞌa takoꞌa e kōrua i te ora ꞌāpī nei i a mātou, he ora i te ꞌAtua Matuꞌa ꞌe i tāꞌana Poki ko Ietū Kiritō,

1 Iovani 3:23

ꞌE te roŋo ꞌāꞌana: he haka moe i te tātou manaꞌu ꞌi ruŋa i tāꞌana Poki ko Ietū Kiritō ꞌe he haŋa a tātou ki te rua, pa he meꞌe haka ꞌite mai era e ia.

1 Iovani 3:8

ꞌE te kope aŋa i te meꞌe taꞌe tano ꞌa Rukifero. Mai te haꞌamata iŋa o te ao, paꞌi, a Rukifero e hara e oho mai ena. ꞌE te Poki o te ꞌAtua i oho mai ai mo te meꞌe mau nei ꞌā: mo haka kore i te meꞌe aŋa e Rukifero.

1 Iovani 4:15

Te kope kī: a Ietū he Poki o te ꞌAtua, ararua ko te ꞌAtua e noho ena.

1 Iovani 5:1

Nuꞌu nō era mo rāua he parautiꞌa mau ꞌā a Ietū he ⌊Kiritō⌋ he ŋā poki rāua o te ꞌAtua. ꞌE te kope haŋa ki te ꞌAtua Matuꞌa e haŋa takoꞌa ki tāꞌana ŋā poki.

1 Iovani 5:20

ꞌE, ko ꞌite takoꞌa ꞌā e tātou: ko tuꞌu mai ꞌana te Poki o te ꞌAtua, ꞌe ko vaꞌai mai ꞌā i te mārama-rama mo aŋi-aŋi ko ai te ꞌAtua parautiꞌa. ꞌE hora nei, ananake tātou ko nei ꞌAtua ꞌo te ai a tātou o tāꞌana Poki ko Ietū Kiritō. A ia he ꞌAtua parautiꞌa vaꞌai i te ora ꞌāpī ꞌina he hopeꞌa raꞌa.

1 Iovani 5:5

¿Ko ai ia te kope mo rē ki te ao nei? Te kope mōꞌona he parautiꞌa mau ꞌā a Ietū he Poki o te ꞌAtua.

2 Iovani 1:7

ꞌI te kona taꞌatoꞌa o te ao e noho mai ena meꞌe rahi nō atu nuꞌu reo-reo e kī ena kai oho mai a Ietū hai hakari taŋata. Te kope kī pē ira he kope haꞌavare ꞌe he kope taꞌe haŋa ki te ⌊Kiritō⌋.

Meꞌe Haka Takeꞌa 2:18

»E pāpaꞌi takoꞌa ki te merahi o te nūnaꞌa taŋata haka moe i te manaꞌu ꞌi ruŋa i a au o Tiatira: “Pē nei te kī o te Poki nei o te ꞌAtua, he kope tuꞌu o te mata pa he ura o te ahi, ꞌe te vaꞌe pa he ꞌaurī pura: