Rōmano 1:21 - Rapa Nui

²¹ A rāua ko ꞌite ꞌana ko ai te ꞌAtua ꞌe, ka ai atu pē ira, ꞌina he moꞌa ꞌe ꞌina he māuru-uru. Te meꞌe manaꞌu nō he meꞌe maꞌa-maꞌa ꞌe, ꞌi te taꞌe haŋa mo haka topa riva-riva i te manaꞌu, ꞌina he aŋi-aŋi haka ꞌou i te parautiꞌa.

Rōmano 1:21 ပူးပေါင်းရင်းမြစ်များ

Iovani 3:19

Te ꞌAtua ka haka ūtuꞌa ena i te taŋata ꞌo te meꞌe nei: i oho mai era te mōrī ki te ao, ꞌina kai haŋa e te taŋata. Te meꞌe i haŋa he pōhāhā, taꞌe he māꞌeha, ꞌo te ai te rāua meꞌe aŋa he meꞌe taꞌe tano.

Aŋa o te ꞌĀpōtoro 26:18

Taꞌa meꞌe ka aŋa ena he haka ꞌara i te rāua mata, ki eꞌa ai mai roto i te pōhāhā ki roto i te māꞌeha, ꞌe mai te rima o Rukifero ki te rima o te ꞌAtua, ki haka moe ai i te rāua manaꞌu ꞌi ruŋa i a au. Pē ira te ꞌAtua ana haka kore i te rāua hara, ꞌe he oꞌo a rāua ki roto i te nūnaꞌa taŋata haꞌataꞌa e te ꞌAtua māꞌana”.

Rōmano 1:19

Te meꞌe mo ꞌite o ruŋa i te ꞌAtua, e ko taꞌe ꞌite e rāua; ko haka takeꞌa nō era ꞌana, paꞌi, e ia mau ꞌā.

Rōmano 1:28

ꞌI te haka rehu e te nuꞌu nei i te ꞌAtua, he haka rē mau rō ꞌai e te ꞌAtua ki te rāua manaꞌu taꞌe au mo aŋa mo oho nō i te meꞌe taꞌe tano.

Rōmano 11:10

Ka pōhāhā ka oho nō te rāua manaꞌu, ꞌo aŋi-aŋi i te parautiꞌa, ꞌe ka piko-piko ka oho nō te rāua tuaꞌivi ꞌi te paŋahaꞌa o te ꞌati ꞌamo e rāua».

Rōmano 15:9

I oho takoꞌa mai ai mo haꞌahana-hana o te nuꞌu taꞌe he hūrio ki te ꞌAtua ꞌo tōꞌona riva rahi, pa he meꞌe kī ꞌi ruŋa i te Pāpaꞌi Moꞌa: «ꞌI muꞌa o te taŋata taꞌatoꞌa o te ao ka haꞌahana-hana atu ena a au ki a koe, ꞌe he hīmene atu i te hīmene mōꞌou».

2 Timoteo 3:2

He ꞌino te taŋata, he haŋa ki te moni nō, he haka meꞌe i a rāua, he manaꞌu i a rāua mau nō te tano, he vānaŋa taꞌe tano mo te ꞌAtua, e ko haꞌatura ki te rāua matuꞌa, e ko ꞌite mo māuru-uru ꞌe ꞌina takoꞌa e ko moꞌa i te hāpī o te ꞌAtua.

1 Pētero 1:18

Te ꞌAtua ko toꞌo ꞌana i a kōrua mai roto i te noho iŋa hauhaꞌa kore ravaꞌa e kōrua mai te kōrua tupuna. ꞌE ko ꞌite riva-riva ꞌana e kōrua: taꞌe hai meꞌe pa he piru, meꞌe tōꞌona hauhaꞌa mo te ao nō nei, i ꞌauhau ai mo toꞌo i a kōrua mai te noho iŋa nei,

1 Pētero 2:9

ꞌE a kōrua he huaꞌai toꞌo e te ꞌAtua, he oromatuꞌa aŋa ki te ꞌariki, he nuꞌu haꞌataꞌa māꞌana, ꞌe he taŋata haka tere e ia. Te ꞌAtua, kope haka eꞌa i a kōrua mai roto i te pōhāhā o te meꞌe taꞌe tano mo oꞌo ki roto i tōꞌona mōrī nui-nui ena, i haꞌataꞌa ai i a kōrua mo haka ꞌite mo oho o ruŋa i te meꞌe nui-nui aŋa e ia.

Meꞌe Haka Takeꞌa 14:7

E kī pūai era: «E moꞌa kōrua i te ꞌAtua, e haꞌahana-hana kōrua i a ia ꞌo te ai ꞌī ko tuꞌu mai ꞌā te hora era mo ture ōꞌona i te taŋata. E haꞌamuri kōrua ki te kope ꞌāꞌana i aŋa i te raŋi, i te henua, i te vaikava ꞌe i te kona manana vai».

Meꞌe Haka Takeꞌa 15:4

¿Ko ai te meꞌe mo taꞌe moꞌa i a koe, e te mātou Pūꞌoko Haka Tere ē? ¿Ko ai te meꞌe mo taꞌe haꞌahana-hana atu? Ko koe mau nō te meꞌe hara kore. Taꞌatoꞌa nuꞌu o te ao ka haꞌamuri atu ena. Ko takeꞌa ꞌana, paꞌi, e te taꞌatoꞌa: taꞌa meꞌe aŋa meꞌe tī-tika».