Meꞌe Haka Takeꞌa 6:9 - Rapa Nui

⁹ I kume era e te Māmoe i te rima tāmaꞌu, he takeꞌa e au ꞌi raro o te ⌊fata⌋ i te vārua o te nuꞌu mā-mate, tiŋaꞌi e te nuꞌu ꞌo te haka ꞌite ꞌo te oho i te ⌊roŋo riva-riva o te ꞌAtua⌋ ꞌe ꞌo te maꞌu i rā roŋo pa he meꞌe o rāua.

Meꞌe Haka Takeꞌa 6:9 ပူးပေါင်းရင်းမြစ်များ

Iovani 16:2

A kōrua nā he haka eꞌa mau rō ꞌai mai roto i te ⌊hare pure hūrio⌋; ꞌe ꞌātā e tuꞌu rō te mahana te kope nō era mo tiŋaꞌi mo haka mate i a kōrua he manaꞌu e aŋa ꞌana i te meꞌe haŋa e te ꞌAtua.

2 Kōrinto 5:8

ꞌE ꞌina he ꞌaka-ꞌaka te mātou manaꞌu ꞌi ruŋa i a ia. Ka ai atu pē ira, te meꞌe haŋa mau o mātou he noho o mātou ꞌi te kona era ꞌi ira te tātou Pūꞌoko Haka Tere.

Fīripo 1:23

E tātake rō ꞌana, paꞌi, tōꞌoku manaꞌu o ruŋa i te ŋā meꞌe nei ararua. E haŋa rō ꞌana, paꞌi, a au mo mate mo iri ōꞌoku ki muri i a Ietū, he meꞌe ꞌata riva-riva mōꞌoku.

Fīripo 2:17

Pa he tūtia vaꞌai e kōrua ki te ꞌAtua mo koa ōꞌona te ꞌati e ꞌamo ena e kōrua ꞌo te ⌊haka moe i te manaꞌu⌋ ꞌi ruŋa i a Ietū ꞌe ꞌo te aŋa o kōrua ki a ia. ꞌE mo haŋa o te ꞌAtua mo ꞌāmui i tōꞌoku mate ki te tūtia vaꞌai e kōrua ki a ia, pa he huri iŋa i te manu tūtia hai vino, e koa nō a au, pa he koa iŋa nei ōꞌoku mo kōrua.

2 Timoteo 1:8

ꞌIna koe ko riꞌa-riꞌa mo vānaŋa o ruŋa i te tātou Pūꞌoko Haka Tere ko Ietū Kiritō, ꞌe ꞌina koe ko haꞌamā ꞌo tōꞌoku puru ꞌi roto i te hare maꞌuꞌaurī. Hai pūai o te ꞌAtua, mai ki haꞌaoromaꞌi ki oho i te ꞌati mo topa mai ꞌo te haka ꞌite i te roŋo riva-riva o ruŋa i a Ietū.

2 Timoteo 4:6

E Timoteo, ko hāhine ꞌana a au mo mate; ko tuꞌu ꞌana a au ꞌi te hora nei pa he tūtia mo te ꞌAtua.

ꞌEvereo 12:23

ꞌe te nuꞌu taꞌatoꞌa haka moe i te manaꞌu ꞌi ruŋa i a Ietū, nuꞌu i a rāua te tōroꞌa o te ŋā poki ꞌatariki ꞌe te rāua ꞌīŋoa ko pāpaꞌi ꞌana ꞌi ruŋa i te raŋi, ꞌe he kona ꞌi ira a tātou e piri nei ki te ꞌAtua, kope ꞌāꞌana te ture i te taꞌatoꞌa; ki te vārua o te nuꞌu mā-mate ko haka tano ko oti ꞌā ki te mata o te ꞌAtua;

Meꞌe Haka Takeꞌa 1:2

ꞌE a au e pāpaꞌi atu ena hai parautiꞌa i tāꞌana meꞌe taꞌatoꞌa haka takeꞌa mai era. ꞌE he mataꞌite a au o te roŋo nei o te ꞌAtua ꞌe o te meꞌe taꞌatoꞌa haka ꞌite mai era e Ietū Kiritō.

Meꞌe Haka Takeꞌa 1:9

A au, a Iovani, he taina o kōrua, ꞌe, ꞌi te ai ōꞌoku ꞌa Ietū, a au takoꞌa ꞌi roto i te nūnaꞌa taŋata haka tere e te ꞌAtua, ꞌamo ꞌe haꞌaoromaꞌi i te ꞌati ananake ko kuā kōrua. ꞌE, ꞌi te haka ꞌite ōꞌoku i te roŋo o te ꞌAtua ꞌe ꞌi te vānaŋa o ruŋa i a Ietū, i maꞌu i puru ai i a au ꞌi te motu era ko Patamo.

Meꞌe Haka Takeꞌa 14:18

ꞌE mai te kona ⌊fata⌋ era i eꞌa ai te merahi haka ꞌou e tahi i a ia te parau o te ahi, ꞌe hai reꞌo pūai i ohu ai ki te merahi maꞌu era i te hoe kaꞌi-kaꞌi hore tariko: «¡Ka ha-haꞌo taꞌa hoe kaꞌi-kaꞌi ena a roto i te tumu vino, ꞌe ꞌai ka hore tahi rō te kāhui vino ena o ruŋa i te henua; ko para tahi ꞌana, paꞌi!».

Meꞌe Haka Takeꞌa 16:7

He ŋaroꞌa takoꞌa e au i te kī iŋa, mai te kona ⌊fata⌋ era: «ꞌĒ-ē, e te ꞌAtua hopeꞌa o te pūai, Pūꞌoko Haka Tere o mātou ē. Hai parautiꞌa ꞌe hai tī-tika a koe i haka ūtuꞌa ai i te taŋata».

Meꞌe Haka Takeꞌa 19:10

He tū-turi ia a au a te vaꞌe o rā merahi mo haꞌamuri, ꞌe tē rā ia ka kī mai: «ꞌIna koe ko aŋa i te meꞌe ena; ki te ꞌAtua koe ana haꞌamuri. He tāvini nō, paꞌi, a au o te ꞌAtua pē koe ꞌe pē tuꞌu ŋā taina era, nuꞌu taꞌe haka tapa mai te hāpī parautiꞌa haka ꞌite e Ietū». Te hāpī nei ꞌa Ietū he meꞌe i haka ꞌite e te perofeta hai ⌊Vārua Maitai⌋.

Meꞌe Haka Takeꞌa 2:13

‘Ko ꞌite ꞌana a au e noho ena koe ꞌi te kona ꞌa Rukifero te haka tere, ꞌe, ka ai atu pē ira, kai haka tapa koe i tuꞌu manaꞌu mai ruŋa i a au, ꞌe kai haka rē i tāꞌaku hāpī, korohaŋa ꞌi te hora tiŋaꞌi era ꞌi nā i a Antipa, he mataꞌite parautiꞌa ōꞌoku.

Meꞌe Haka Takeꞌa 20:4

He takeꞌa haka ꞌou ia e au i te pepe noho ꞌariki, ꞌe ꞌi ruŋa i rā ŋā pepe te nuꞌu ki a rāua i vaꞌai ai i te parau mo ture i te taŋata. He takeꞌa takoꞌa e au i te vārua o te nuꞌu i paꞌo i te ŋao i mā-mate ai ꞌo te haka ꞌite i te hāpī ꞌa Ietū ꞌe i te ⌊roŋo riva-riva o te ꞌAtua⌋. Hora era o rāua e ora nō ꞌana kai haꞌamuri ki te manuꞌino ꞌe ki te ꞌītoro aŋa pē ia, ꞌe ꞌina takoꞌa kai haka rē i a rāua mo tāpaꞌo a te tira ꞌe a te rima hai tāpaꞌo era o rā manuꞌino. ꞌE he takeꞌa e au te ora iŋa haka ꞌou mai o rāua mai te mate ꞌe te haka tere iŋa ananake ko te ⌊Kiritō⌋ e hoꞌe taꞌutini matahiti.

Meꞌe Haka Takeꞌa 8:3

I oti era he takeꞌa haka ꞌou e au i te merahi e tahi e maꞌu rō ꞌā i te poko-poko aŋa hai piru mo tutu o te meꞌe haka ꞌeo. He māroa rā merahi ꞌi muꞌa o te ⌊fata⌋ aŋa takoꞌa hai piru o muꞌa o te kona pepe noho ꞌariki era, ꞌe he vaꞌai ki a ia meꞌe rahi nō atu incienso mo tūtia koia ko te pure o te nuꞌu haꞌataꞌa e te ꞌAtua māꞌana ꞌi ruŋa i rā fata.

Meꞌe Haka Takeꞌa 9:13

He puhi ia te ono merahi i tāꞌana koneta. He ŋaroꞌa e au i te reꞌo e tahi eꞌa mai vāeŋa o te tara e hā o tū ⌊fata⌋ aŋa era hai piru o muꞌa o te ꞌAtua.