Meꞌe Haka Takeꞌa 12:9 - Rapa Nui

⁹ He ava i rā manuꞌino ananake ko tāꞌana vaꞌehau ki ruŋa i te henua. Rā manuꞌino ko te kōreha era o te noho iŋa tuai era ko Rukifero, he kope reo-reo ki te taŋata o te henua taꞌatoꞌa.

Meꞌe Haka Takeꞌa 12:9 ပူးပေါင်းရင်းမြစ်များ

Māteo 13:39

ꞌE tū kope taꞌe haŋa era ki te taŋata era ōꞌona te henua, pī era i te mauku rake-rake ko Rukifero. Te hora era o te hore he paꞌo o te ao, ꞌe te nuꞌu aŋa he merahi.

Māteo 24:24

Nā e tuꞌu rō mai te kiritō ꞌe te perofeta taꞌe parautiꞌa; e aŋa rō i te mana mo haka maꞌa-maꞌa i te manaꞌu o te taŋata, ꞌātā i te manaꞌu o te nuꞌu haꞌataꞌa e te ꞌAtua māꞌana, ana ravaꞌa e rāua.

Māteo 25:41

»Ki oti ka kī era e te ꞌAriki ki te nuꞌu o tōꞌona pāꞌiŋa maui: “Ka haka tapa kōrua mai muri i a au ꞌe ka oho, e te nuꞌu tohu e te ꞌAtua ē, ki roto i te ahi ꞌina he mate ki te hora hopeꞌa aŋa mo Rukifero koia ko tāꞌana tātane.

Māteo 4:1

He maꞌu ia e te ⌊Vārua Maitai⌋ i a Ietū ki te kona ꞌone taꞌe noho taŋata mo haka ꞌatu e Rukifero koiꞌite e aŋa rō e tahi meꞌe taꞌe haŋa e te ꞌAtua.

Māteo 4:10

He pāhono e Ietū: —¡Ka mahiti koe ka oho, e Rukifero ē! Ko pāpaꞌi era ꞌana ꞌi ruŋa i te Pāpaꞌi Moꞌa: «E haꞌamuri koe ki a Iehoha ki tuꞌu ꞌAtua ꞌe ki a ia mau nō koe ana tāvini».

Māteo 4:5

He maꞌu ia e Rukifero i a Ietū ki Hērutarema, ki ruŋa i te kona hopeꞌa o te ruŋa nui o te Kona Haꞌamuri ꞌAtua

Māteo 4:8

ꞌI te hora hopeꞌa he maꞌu e Rukifero ki ruŋa i te maꞌuŋa hopeꞌa o te ruŋa nui. He haka takeꞌa i te henua taꞌatoꞌa o te ao ꞌe i te rāua hauhaꞌa

Ruka 10:18

He kī e Ietū: —ꞌĒ-ē, i takeꞌa rō e au i a Rukifero te viri iŋa mai te raŋi pa he ꞌuira.

Ruka 13:16

ꞌE te viꞌe nei, he hakaara o ⌊ꞌAparahama⌋, ko here-here ꞌana hai māui-ui e te tātane ka hoꞌe ꞌahuru mā vaꞌu matahiti, ¿e ko tano hō mo haka ora i a ia ka ai atu he mahana haka ora?».

Ruka 22:3

He oꞌo a Rukifero ki roto i a Hura, he kope o roto o te hoꞌe ꞌahuru mā piti nuꞌu hāpī ꞌa Ietū, kī ko Ikariote.

Ruka 22:31

He kī e Ietū: —E Tīmona, ka haka roŋo mai. Ko kī mai ꞌā a Rukifero mo haꞌatiꞌa ōꞌoku mo rū-rū i a kōrua pa he tariko.

Ruka 8:12

»Te kona ara era he tētahi nuꞌu ŋaroꞌa i rā roŋo, ꞌe, ka ai atu pē ira, e toꞌo nō e Rukifero mai roto i te rāua māhatu, pa he kai iŋa era e te manu i te karu, ꞌo ⌊haka moe i te manaꞌu⌋ ꞌi ruŋa ꞌe ꞌo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.

Iovani 12:31

He hora era nei mo kī i te ūtuꞌa mo te taŋata taꞌatoꞌa o te ao ꞌe mo rē o te ꞌAtua ki te kope ꞌāꞌana te haka tere i te ao nei ko Rukifero.

Iovani 14:30

ꞌIna a au e ko vānaŋa rahi haka ꞌou atu; nā, paꞌi, e oho mai ena te kope ꞌāꞌana te ao nei te haka tere. ꞌE, ka ai atu ꞌāꞌana te haka tere, taꞌe i a ia te parau ōꞌoku.

Iovani 16:11

ꞌe te kope ꞌi ruŋa i a ia ka topa ena te ture o te ꞌAtua: ko te kope ena ꞌāꞌana te ao te haka tere, te auraꞌa, ko Rukifero, he kope ko ai era ꞌā tōꞌona ūtuꞌa.

Iovani 8:44

Te kōrua matuꞌa ko Rukifero; ꞌāꞌana kōrua, ꞌe te kōrua meꞌe haŋa mo aŋa he meꞌe haŋa ꞌāꞌana. A ia he taparahi-taꞌata tiŋaꞌi i te taŋata mai muꞌa ꞌā. ꞌIna he noho ꞌi roto i te parautiꞌa, ꞌe ꞌina e tahi parautiꞌa kī. E reo-reo ena, e vānaŋa ꞌā i tāꞌana meꞌe i ꞌite. A ia he reo-reo ꞌe he matuꞌa o te reo-reo.

Aŋa o te ꞌĀpōtoro 26:18

Taꞌa meꞌe ka aŋa ena he haka ꞌara i te rāua mata, ki eꞌa ai mai roto i te pōhāhā ki roto i te māꞌeha, ꞌe mai te rima o Rukifero ki te rima o te ꞌAtua, ki haka moe ai i te rāua manaꞌu ꞌi ruŋa i a au. Pē ira te ꞌAtua ana haka kore i te rāua hara, ꞌe he oꞌo a rāua ki roto i te nūnaꞌa taŋata haꞌataꞌa e te ꞌAtua māꞌana”.

Aŋa o te ꞌĀpōtoro 5:3

He kī e Pētero: —E ꞌĀnānia, ¿he aha koe i haꞌatiꞌa ai i a Rukifero mo haka tere atu? Ko reo-reo ꞌā koe ki te ⌊Vārua Maitai⌋ hai haka rē e tahi ꞌapa o te moni mōꞌou.

Rōmano 16:18

A rāua, paꞌi, taꞌe he tāvini o te tātou Pūꞌoko Haka Tere he Kiritō; he tāvini o te meꞌe pohe ꞌe haŋa nō o rāua. Hai vānaŋa koroꞌiti ꞌe reka e reo-reo ena ki te nuꞌu māhatu rehe-rehe taꞌe manaꞌu e aŋa rō ꞌō e te rua i te meꞌe taꞌe tano ki a rāua.

Rōmano 16:20

Pē ira e ko roa he toꞌo mai e te ꞌAtua, vaꞌai i te haumārū, he haka hēpiꞌi i a Rukifero ꞌi raro i te kōrua vaꞌe. Ka ai ꞌi ruŋa i a kōrua te riva rahi o Ietū, he Pūꞌoko Haka Tere o tātou.

2 Kōrinto 11:14

Te meꞌe nei taꞌe he meꞌe mo māere; a Rukifero mau ꞌā e haka tuꞌu rō ꞌana i a ia pa he merahi ꞌana-ꞌana o te ꞌAtua.

2 Kōrinto 11:3

ꞌE, e riꞌa-riꞌa rō ꞌā a au ꞌo kore te kōrua haŋa parautiꞌa ki te Kiritō, pa he meꞌe topa ki a ⌊Eva⌋ ꞌi te hora haka roŋo ki te reo-reo o tū kōreha era ko Rukifero.

2 Kōrinto 12:7

ꞌE, ꞌo manaꞌu au i hau rō atu a au ki te rua ꞌo te haka takeꞌa mai ꞌe ꞌo te haka ꞌite mai e te ꞌAtua i te meꞌe hopeꞌa o te nui-nui ꞌi ruŋa i te raŋi, he haꞌatiꞌa e te ꞌAtua i a Rukifero mo tōtōā mai i a au hai māui-ui.

2 Kōrinto 2:11

ꞌo rē a Rukifero; ko ꞌite ꞌana, paꞌi, e tātou he aha tāꞌana meꞌe haŋa.

2 Kōrinto 4:4

Te nuꞌu nei, ꞌi te taꞌe haka moe i te rāua manaꞌu ꞌi ruŋa i a Ietū, ko haka pōhāhā ꞌā i te rāua manaꞌu e Rukifero, ꞌatua o te ao nei, ꞌo aŋi-aŋi, ꞌo takeꞌa i te māꞌeha o te mōrī o te roŋo riva-riva o ruŋa i te pūai ꞌe i te nui-nui o te ⌊Kiritō⌋, ꞌāriŋa ora o te ꞌAtua.

Ēfeto 4:14

E ko ai haka ꞌou ia a tātou pa he ŋā poki e ko roa he huri te manaꞌu ꞌi te haka roŋo ki te hāpī taꞌe he parautiꞌa haka ꞌite e te nuꞌu mārama-rama ꞌite i te reo-reo.

2 Tētārōnika 2:3

Te meꞌe nei ꞌāꞌaku e kī atu ena: e uꞌi kōrua ꞌo haka roŋo rō ki te reo-reo kī atu e te nuꞌu. ꞌI raꞌe, paꞌi, ki te hoki iŋa mai o Ietū, e rahi rō te nuꞌu riri mo te ꞌAtua ꞌe haka tumu i te ture ki a ia. ꞌI rā hora ka eꞌa mai ena e tahi taŋata riri taparahi-taꞌata mo te ꞌAtua, kope mōꞌona ko ai era ꞌana te ūtuꞌa he pōꞌauahi.

1 Timoteo 2:14

ꞌE taꞌe ko ꞌĀtamu te meꞌe i haka roŋo ki te reo-reo ꞌa Rukifero, ko Eva; ꞌe, ꞌi te haka roŋo ki rā reo-reo, he hara rō ꞌai.

2 Timoteo 3:13

ꞌE te ŋāŋata aŋa i te meꞌe taꞌe tano ꞌe te nuꞌu haka tuꞌu i a rāua pa he nuꞌu haka moe i te manaꞌu ꞌi ruŋa i a Ietū pe te ꞌata taꞌe riva-riva ka oho ena; te aŋa he reo-reo he oho nō ki te taŋata ꞌe, ꞌina he aŋi-aŋi, e reo-reo takoꞌa rō ꞌana ki a rāua.

ꞌEvereo 2:14

ꞌI te ai o te ŋā poki o te ꞌAtua he taŋata e mate nō i haka riro ai a Ietū i a ia he taŋata, ki mate takoꞌa ai ꞌe ki haka kore ai, hai mate era ōꞌona, i te pūai o te kope i a ia te mate, te auraꞌa, ko Rukifero.

1 Pētero 5:8

E veveri e ꞌara kōrua; te kope taꞌe haŋa atu ena ko Rukifero, nā e kimi e oho ꞌana, pa he reone maruaki, ki te taŋata mo kai.

1 Iovani 5:19

A tātou ko ꞌite takoꞌa ꞌana: o te ꞌAtua a tātou, ka ai atu ꞌa Rukifero te haka tere i te ao nei.

Hura 1:9

Ka manaꞌu rā: hora tātake era o Mihaera, he merahi ra-rahi o te ꞌAtua, ararua ko Rukifero o ruŋa i te hakari o ⌊Mōtē⌋, ꞌina a Mihaera kai kī i te vānaŋa rake-rake mo Rukifero; i kī nō: «¡Mo te ꞌAtua koe e ture atu!».

Meꞌe Haka Takeꞌa 12:12

¡E te meꞌe noho ꞌi te raŋi ē, ka koa kōrua! ¡ꞌE, ko te ꞌaroha i a kōrua, e te meꞌe o ruŋa i te henua ꞌe o roto i te vaikava ē, nā ko topa atu ꞌā a Rukifero ko ꞌata riri atu ꞌā ꞌi te ꞌite ꞌina ōꞌona hora toe!».

Meꞌe Haka Takeꞌa 12:3

I oti era he takeꞌa haka ꞌou e au i te meꞌe nui-nui e tahi ꞌi te raŋi: he manuꞌino nui-nui mea-mea e tahi. E hitu ōꞌona pūꞌoko, e hoꞌe ꞌahuru tara. ꞌE ꞌi ruŋa i rā ŋā pūꞌoko e huki rō ꞌā e tahi e tahi hei.

Meꞌe Haka Takeꞌa 12:7

I oho era he haꞌamata te tamaꞌi ꞌi ruŋa i te raŋi: a Mihaera koia ko tōꞌona merahi he moto ki tū manuꞌino nui-nui mea-mea era ꞌe ki tāꞌana vaꞌehau. Ka ai atu hai pūai i tamaꞌi ai rā manuꞌino ki a kuā Mihaera,

Meꞌe Haka Takeꞌa 12:8

i rē nō a Mihaera, ꞌe kai haꞌatiꞌa e te ꞌAtua mo noho haka ꞌou o rāua ꞌi te raŋi.

Meꞌe Haka Takeꞌa 13:14

Hai ŋā mana nei, mana haꞌatiꞌa era mo aŋa e ia hai ꞌīŋoa o tū manuꞌino eꞌa era mai roto i te vaikava, i reo-reo ai ki te taŋata. He uŋa ia i te nuꞌu nei he haka aŋa i te ꞌītoro pē rā manuꞌino mau ꞌā, manuꞌino taꞌe mate era ka ai atu i more rō ꞌi te more taparahi-taꞌata ꞌi te hoe.

Meꞌe Haka Takeꞌa 16:14

Te ŋā tātane nei e ai rō ꞌā te rāua pūai mo aŋa i te mana ꞌe i te meꞌe mo māere o te taŋata. He eꞌa he oho ananake he haka taka-taka i te ꞌariki taꞌatoꞌa o te ao, mo moto ki te ꞌAtua, i a ia te pūai taꞌatoꞌa, ꞌi te mahana o te ture hopeꞌa.

Meꞌe Haka Takeꞌa 18:2

ꞌE hai reꞌo pūai i kī ai: «¡Ko haka pararaha ꞌā te kona nui-nui era ko Vāvīrōnia! ¡Ko riro ꞌā he kona noho o te tātane, he hare o te tiꞌaporo, hakapupa o te rauhuru atu manu rere kai i te meꞌe hano-hano ꞌe he ꞌana o te ꞌanimare taparahi-taꞌata!

Meꞌe Haka Takeꞌa 18:23

Ki te hora hopeꞌa e ko māꞌeha haka ꞌou koe ꞌi te mōrī o te hakariꞌi, ꞌe e ko ŋaroꞌa haka ꞌou te peho o te ŋoŋoro hāipo-ipo ꞌi tuꞌu ara ena, ꞌi te meꞌe era te nuꞌu hoꞌo meꞌe ꞌāꞌau, he nuꞌu pūai o te ao, ꞌe a koe, hai tahu-tahu ena ꞌāꞌau, e reo-reo era ki te taŋata taꞌatoꞌa».

Meꞌe Haka Takeꞌa 19:20

Te manuꞌino nei ko ꞌa-ꞌaru ꞌā, ꞌe ko ꞌa-ꞌaru takoꞌa ꞌā tū perofeta reo-reo aŋa era ꞌi muꞌa i rā manuꞌino i te mana ꞌe i te tētahi atu meꞌe mo māere o te taŋata. Hai ŋā meꞌe nei i haka rē ai te nuꞌu i a rāua mo tāpaꞌo hai tāpaꞌo o te manuꞌino, ꞌe i haꞌamuri ai i te ꞌītoro aŋa pē ia. I oho era he toꞌo mai he hoa ora i rā manuꞌino ꞌe i rā perofeta reo-reo era ki roto i te pōꞌauahi, kona ꞌi ira e ura ena te azufre.

Meꞌe Haka Takeꞌa 2:13

‘Ko ꞌite ꞌana a au e noho ena koe ꞌi te kona ꞌa Rukifero te haka tere, ꞌe, ka ai atu pē ira, kai haka tapa koe i tuꞌu manaꞌu mai ruŋa i a au, ꞌe kai haka rē i tāꞌaku hāpī, korohaŋa ꞌi te hora tiŋaꞌi era ꞌi nā i a Antipa, he mataꞌite parautiꞌa ōꞌoku.

Meꞌe Haka Takeꞌa 2:24

’ꞌE a kōrua, te tētahi nuꞌu haka moe i te manaꞌu ꞌi ruŋa i a au o Tiatira taꞌe maꞌu i te hāpī o te viꞌe ena, hāpī kī e te tētahi he hāpī hōhonu, ꞌe te parautiꞌa mau he hāpī ꞌa Rukifero, he kī atu a au: ꞌina a au e ko haka ꞌamo i a kōrua hai meꞌe haka ꞌou mo haꞌatura.

Meꞌe Haka Takeꞌa 2:9

‘E ꞌite rō ꞌana a au i te rahi o te ꞌati e ꞌamo ena e koe, ꞌe i tuꞌu veve, ka ai atu te parautiꞌa mau he ꞌono koe. E ꞌite takoꞌa rō ꞌana a au pē hē e vānaŋa taꞌe tano ena o ruŋa ōꞌou e te nuꞌu kī he ⌊hūrio⌋ a rāua ꞌe te parautiꞌa mau he nūnaꞌa rāua ꞌa Rukifero.

Meꞌe Haka Takeꞌa 20:10

ꞌE a Rukifero, reo-reo era ki rā nuꞌu, ko hoa ꞌā ki roto i te kona ahi era, kona ꞌi ira e ura ena te azufre, kona ki ira takoꞌa i hoa ai i tū manuꞌino era ꞌe i tū perofeta reo-reo era. ꞌI ira ka oꞌo era te māui-ui ki roto i te ivi ka pō ka ꞌōtea ꞌātā ki te hopeꞌa raꞌa.

Meꞌe Haka Takeꞌa 20:8

ꞌe he eꞌa he reo-reo ki a Koko ꞌe ki a Mākoko, te auraꞌa, ki te taŋata o te ŋā pāꞌiŋa ena e hā o te henua, ꞌe he haka taka-taka tahi ananake mo tamaꞌi ki te ꞌAtua. Te rahi o rāua pa he rahi ena ꞌā o te ꞌone.

Meꞌe Haka Takeꞌa 3:9

ꞌE, te nuꞌu ꞌa Rukifero kī atu: he ⌊hūrio⌋ a rāua ꞌe taꞌe mau pē ira, he haka tū-turi atu e au ꞌi muꞌa i a koe, ki ꞌite ai pē nei ē: e haŋa rō atu ꞌana a au ki a koe.

Meꞌe Haka Takeꞌa 9:1

He puhi te rima merahi i tāꞌana koneta. He takeꞌa e au i te hetuꞌu e tahi viri ki ruŋa i te henua. Te hetuꞌu nei he merahi o te kona pū ꞌina he hopeꞌa o te raro nui. Ki a ia i vaꞌai ai i te tāviri o rā kona.

Meꞌe Haka Takeꞌa 9:20

ꞌE te tētahi nuꞌu taꞌe mā-mate era ꞌi rā ŋā ꞌati, ka ai atu ko mate ꞌana e tahi ꞌapa o te ꞌapa e toru o te taŋata, ꞌina kai haka rē i te meꞌe taꞌe tano aŋa e rāua, ꞌe ꞌina takoꞌa kai haka rē i te haꞌamuri ki te tātane, ki te ꞌītoro aŋa hai piru, hai ꞌaurī, hai māꞌea ꞌe hai miro, meꞌe ꞌina he takeꞌa, ꞌina he ŋaroꞌa ꞌe ꞌina he haꞌere.