Māteo 26:28 - Rapa Nui

²⁸ He toto nā ōꞌoku ka tehe ena mo te riva-riva o te taŋata, mo haka kore o te rāua hara. Hai nā toto ka tāpaꞌo ena i te ⌊haka tere iŋa ꞌāpī o te ꞌAtua ananake ko te taŋata⌋.

Māteo 26:28 ပူးပေါင်းရင်းမြစ်များ

Māteo 20:28

Te Poki o te taŋata, paꞌi, taꞌe mo tāvini ki a ia e te rua i oho mai ai, mo tāvini ōꞌona ki te rua ꞌe mo vaꞌai i a ia ki te mate, he ꞌauhau iŋa mo haka eꞌa meꞌe rahi taŋata mai roto i te ūtuꞌa o te hara».

Māteo 26:27

I oti era he toꞌo i te hapaina vino, he māuru-uru ki te ꞌAtua, he vaꞌai ki tāꞌana nuꞌu hāpī ꞌe he kī: «Ka unu kōrua taꞌatoꞌa mai roto i te hapaina ena.

Māteo 26:29

ꞌĪ a au he kī atu: e ko unu haka ꞌou a au i te vino ꞌātā ki te mahana ka unu ena tātou i te vino ꞌāpī ꞌi te ao haka tere e tōꞌoku Matuꞌa».

Māteo 6:12

E haka kore koe i te mātou hara, pa he haka rehu iŋa o mātou i te meꞌe ꞌino aŋa mai e te rua.

Marko 1:4

Pē ira i tuꞌu i tātara ai a Iovani Papatito ꞌi te kona ꞌone taꞌe noho taŋata. Tāꞌana tātara: e ⌊papatito⌋ te taŋata mo takeꞌa ko ⌊huri ꞌana te rāua manaꞌu ki te ꞌAtua⌋, pē ira he haka kore e te ꞌAtua i te rāua hara.

Marko 14:24

ꞌE he kī: «He toto nā ōꞌoku ka tehe ena mo te riva-riva o te taŋata; hai nā toto ka tāpaꞌo ena te ⌊haka tere iŋa ꞌāpī o te ꞌAtua ananake ko te taŋata⌋ ⌊haka moe i te manaꞌu⌋ ꞌi ruŋa i a au.

Ruka 22:19

He toꞌo ia i te haraoa. I oti era te māuru-uru ki te ꞌAtua, he more-more he tuhaꞌa ki tū nuꞌu era koia ko kī: «Te haraoa ena he hakari ōꞌoku vaꞌai ki te mate mo te riva-riva o kōrua. E aŋa te meꞌe nei mo manaꞌu o kōrua ki a au».

Ruka 22:20

I oti era te kai he toꞌo haka ꞌou a Ietū i te hapaina vino ꞌe he kī: «Te meꞌe nei he toto ōꞌoku ka tehe ena mo te riva-riva o kōrua, he tāpaꞌo o te ⌊haka tere iŋa ꞌāpī o te ꞌAtua ananake ko te taŋata⌋.

Rōmano 5:15

Te hara o ꞌĀtamu ꞌe te meꞌe vaꞌai mai e te ꞌAtua meꞌe kē meꞌe kē. Hai hara, paꞌi, o te kope mau nō e tahi i mate ai te taŋata. ꞌE te meꞌe vaꞌai mai e te ꞌAtua hai riva rahi o te taŋata mau nō e tahi ko Ietū Kiritō, he meꞌe hopeꞌa o te nui-nui mo te riva-riva o te taŋata taꞌatoꞌa.

Rōmano 5:19

ꞌO te taꞌe haꞌatura o te taŋata mau nō e tahi i hara tahi ai te taŋata, ꞌe ꞌo te haꞌatura o te taŋata mau nō e tahi meꞌe rahi nō atu taŋata ka ai ena he nuꞌu e tano rō ꞌana ki te mata o te ꞌAtua.

1 Kōrinto 11:25

ꞌE pē ira takoꞌa ꞌana, i oti era te kai, he toꞌo i te hapaina vino ki tōꞌona rima ꞌe he kī: «Te meꞌe nei he toto ōꞌoku ka pariŋi ena mo kōrua, he tāpaꞌo o te ⌊haka tere iŋa ꞌāpī o te ꞌAtua ananake ko te taŋata⌋. E aŋa i te meꞌe nei pa he meꞌe mo manaꞌu ki a au». Pē ira i kī ai e Ietū.

Ēfeto 1:7

Hai toto tehe era o Ietū ꞌi ruŋa i te tātaurō te ꞌAtua ko haka rehu ꞌana i te tātou hara, ꞌe ko haka kore ꞌana i te ūtuꞌa mai ruŋa i a tātou ꞌo te ai o tātou ꞌa Ietū Kiritō. I aŋa ai i te meꞌe nei e te ꞌAtua he riva rahi ōꞌona ꞌina he hāito ꞌi ruŋa i a tātou. ꞌE ꞌāꞌana takoꞌa i vaꞌai mai i te mārama-rama mo aŋi-aŋi e tātou i te parautiꞌa o ruŋa i a ia.

Kōrosa 1:14

kope hai toto tehe era ōꞌona ꞌi ruŋa i te tātaurō i ꞌauhau ai i te tātou hara mo haka eꞌa i a tātou mai roto i te pōhāhā ꞌe mo haka rehu e te ꞌAtua i te tātou hara.

Kōrosa 1:20

ꞌE hai Ietū, hai toto tehe era ōꞌona ꞌi ruŋa i te tātaurō, te ꞌAtua i haka riva-riva haka ꞌou ai ki a ia i te meꞌe taꞌatoꞌa o te ao ꞌe o ruŋa i te raŋi ꞌava-ꞌava mai i a ia ꞌi te hara.

ꞌEvereo 10:29

Mo ai pē ira e haka ūtuꞌa era i te nuꞌu taꞌe haꞌatura ki te haka tere iŋa ꞌa Mōtē, ka manaꞌu atu kōrua i te ūtuꞌa mo te nuꞌu taꞌe haŋa ꞌe hārui i te Poki o te ꞌAtua hai tuaꞌivi, ꞌe taꞌe haka hauhaꞌa i tōꞌona toto, toto tāpaꞌo i te ⌊haka tere iŋa ꞌāpī o te ꞌAtua ananake ko te taŋata⌋, haka maꞌitaki i a rāua mai te hara ꞌe haꞌataꞌa i a rāua mo te ꞌAtua. Te nuꞌu aŋa i te meꞌe pē ira, e parauꞌino ꞌā ki te Vārua Maitai, kope haka takeꞌa i te riva rahi o te ꞌAtua.

ꞌEvereo 13:20

Mo te ꞌAtua vaꞌai i te haumārū, haka ora mai te mate i te tātou Pūꞌoko Haka Tere ko Ietū Kiritō, kope riva-riva hāpaꞌo māmoe, tāpaꞌo i te haka tere iŋa ꞌina he hopeꞌa raꞌa o te ꞌAtua ananake ko te taŋata hai toto era ōꞌona,

ꞌEvereo 9:28

Pē ira takoꞌa a Ietū Kiritō: e tahi mau nō vaꞌai iŋa i a ia mo mate pa he tūtia mo haka kore i te hara o te nuꞌu. ꞌE pe muꞌa ka oho ena he tuꞌu haka ꞌou mai a Ietū taꞌe ꞌō mo vaꞌai haka ꞌou i a ia pa he tūtia mo te hara o te taŋata, mo vaꞌai ki te nuꞌu tiaki ki a ia i te ora ꞌāpī ꞌina he hopeꞌa raꞌa.

1 Iovani 2:2

A Ietū i vaꞌai rō i a ia pa he tūtia mo tātou, ki haka kore ai e te ꞌAtua i te tātou hara, ꞌe taꞌe nō i te hara o tātou, i te hara takoꞌa o te nuꞌu taꞌatoꞌa o te ao.

Meꞌe Haka Takeꞌa 7:14

—E koro, ko koe i ꞌite —i pāhono ai e au. He kī mai ia: —Te nuꞌu era he nuꞌu eꞌa mai roto i te ꞌati taparahi-taꞌata o te paꞌo iŋa o te ao, ko te nuꞌu haka maꞌitaki era ꞌe haka rito-rito era i te rāua kahu hai toto o te Māmoe.

Meꞌe Haka Takeꞌa 7:9

I oti era te meꞌe nei, he uꞌi atu a au ko te nuꞌu riꞌa-riꞌa o te ao o te taꞌatoꞌa hau, o te taꞌatoꞌa ꞌarero ꞌe o te taꞌatoꞌa henua, e māroa rō ꞌana ꞌi muꞌa o te kona pepe ꞌariki era ꞌe o te Māmoe. ꞌI te rahi e ko ravaꞌa mo tataku. E uru tahi rō ꞌana i te kahu tea-tea, e maꞌu-maꞌu rō ꞌā ꞌi te rima i te maŋa niu.