Māteo 17:18 - Rapa Nui

¹⁸ He ture e Ietū ki te tātane ꞌi roto i te poki ꞌe he haka eꞌa. ꞌI rā hora mau ꞌā he ora rō ꞌai tū poki era.

Māteo 17:18 ပူးပေါင်းရင်းမြစ်များ

Māteo 12:22

He maꞌu ia ki a Ietū i te taŋata ko keva ꞌā te mata ꞌe ꞌina he vānaŋa ꞌi te oꞌo e te tātane, ꞌe he haka ora e Ietū.

Māteo 15:28

He kī ia e Ietū: —¡Ko te pūai i tuꞌu haka moe iŋa i te manaꞌu ꞌi ruŋa i a au! Ka ai pa he meꞌe haŋa ena e koe. ꞌE ꞌi rā hora mau ꞌā he ora tū poki era.

Māteo 17:17

He kī e Ietū: —¡E te nuꞌu pūꞌoko hio-hio manaꞌu taꞌe tano ꞌe taꞌe ⌊haka moe i te manaꞌu⌋ ꞌi ruŋa i te ꞌAtua ē! ¡Pa he meꞌe ena: ka ai ka oho nō atu a au ꞌi muri i a kōrua ꞌātā ki te paꞌo iŋa o te ao, ko te taꞌe haka moe iŋa mai ꞌā kōrua i te manaꞌu ꞌi ruŋa i a au! ¿ꞌĀtā ki hē rā nei ka haꞌaoromaꞌi ka oho nō nei i a kōrua? Ka maꞌu mai te poki.

Māteo 17:19

ꞌI te hora ko rāua nō, he ꞌui e te nuꞌu hāpī ꞌa Ietū: —E te Maꞌori, ¿he aha i taꞌe ravaꞌa ai e mātou mo haka eꞌa i rā tātane?

Māteo 9:22

He hārui he uꞌi a Ietū a tuꞌa, he takeꞌa i rā viꞌe ꞌe he kī: «Kiahio koe, e vovo ē. He haka moe ōꞌou i tuꞌu manaꞌu ꞌi ruŋa i a au i ora ena tuꞌu māui-ui». ꞌE mai rā hora he ora rō ꞌai rā viꞌe.

Marko 1:34

Rauhuru māui-ui i haka ora ꞌe meꞌe rahi tātane i haka eꞌa mai roto i te taŋata, ꞌe ꞌina he haꞌatiꞌa e Ietū mo vānaŋa o rā ŋā tātane ꞌo te ꞌite ko ai a ia.

Marko 5:8

I kī ai pē ira e te tātane ꞌo te kī e Ietū: «¡Ka eꞌa koe mai roto i te taŋata ena!».

Ruka 4:41

I rahi rō te nuꞌu o rā nuꞌu māui-ui era mai roto takoꞌa i eꞌa ai te tātane koia ko ohu: —¡He Poki koe o te ꞌAtua! He ture e Ietū ki rā ŋā tātane ꞌe, ꞌi te ꞌite o rāua a ia he ⌊Kiritō⌋, ꞌina he haka rē e Ietū mo vānaŋa.

Ruka 8:29

I kī ai i te meꞌe nei ꞌo te ai ko kī ꞌana e Ietū ki tū tātane era mo eꞌa mai roto i rā taŋata. E rahi rō ꞌana te mahana e haka taehae era ꞌe, ka ai atu e here-here rō ꞌana e te nuꞌu i te rima ꞌe i te vaꞌe hai vivi mo haka noho, e motu-motu nō ꞌā, ꞌai ka haka oho e rā tātane a te kona ꞌina he taŋata.

Ruka 9:42

I hāhine i oho era te poki ki a Ietū, he haka hiŋa e te tātane, he haka kiki-kiki. He ture he haka eꞌa e Ietū i rā tātane ꞌe he ora tū poki era. I oti era he haka hoki e Ietū ki tōꞌona matuꞌa.

Aŋa o te ꞌĀpōtoro 16:18

Meꞌe rahi mahana e ohu-ohu era ꞌātā ka ꞌeꞌete rō te manava o Pauro. He teka ia he kī ki te tātane o roto o tū poki era: «¡Hai ꞌīŋoa o Ietū Kiritō he kī atu au: ka eꞌa koe mai roto i te poki ena!». ꞌI tū hora mau era ꞌā he eꞌa tū tātane era mai roto.