Māteo 10:15 - Rapa Nui

¹⁵ ꞌĪ a au he kī atu: ꞌi te mahana o te ture hopeꞌa, te ūtuꞌa mo te nuꞌu o rā kona ꞌata hau rō atu ki te ūtuꞌa topa ꞌi ruŋa i te nuꞌu hara o ⌊Tōroma⌋ ꞌe o ⌊Kōmora⌋.

Māteo 10:15 ပူးပေါင်းရင်းမြစ်များ

Māteo 12:36

ꞌĪ a au he kī atu: ꞌi te mahana o te ture hopeꞌa, e tahi e tahi ka kī ena ki te ꞌAtua i te tumu o tāꞌana vānaŋa taꞌe tano kī.

Māteo 5:18

ꞌĪ a au he kī atu i te parautiꞌa: mo ai nō o te raŋi ꞌe o te henua, ꞌina e tahi tiꞌaraꞌa ka hopeꞌa atu te ꞌiti-ꞌiti o ruŋa i te haka tere iŋa o te ꞌAtua mo haka kore ꞌātā ka haka tano tahi rō te meꞌe hāꞌaki o ruŋa.

Māteo 7:22

ꞌI te mahana o tāꞌana ture hopeꞌa, nuꞌu rahi te nuꞌu ka kī mai ena: “E te mātou Pūꞌoko Haka Tere ē, i haka ꞌite i oho rō mātou hai ꞌīŋoa ōꞌou i te vānaŋa haka ꞌite mai e te ꞌAtua, i haka eꞌa rō i te tātane mai roto i te taŋata ꞌe i aŋa takoꞌa rō meꞌe rahi nō atu mana hai ꞌīŋoa ōꞌou”.

Marko 6:11

ꞌE mo tuꞌu kōrua ki te kona ꞌina he haŋa atu ꞌe ꞌina he haka roŋo atu te nuꞌu o ira, e tū-tū te puŋaꞌehu mai te kōrua vaꞌe mo haka ꞌite ki rā nuꞌu: ka topa era ꞌi ruŋa i a rāua te ūtuꞌa o te ꞌAtua, he hape o rāua mau ꞌā, ꞌe ꞌai kōrua ka oho rō mai ira».

Iovani 12:48

Te kope taꞌe haŋa mai ꞌe taꞌe haꞌatura ki tāꞌaku vānaŋa ko ai era ꞌana te meꞌe mo haka ūtuꞌa i a ia: he vānaŋa kī era e au. Hai rā vānaŋa ka haka ūtuꞌa ena ꞌi te mahana o te ture hopeꞌa.

Iovani 6:39

ꞌE tāꞌana meꞌe haŋa he taꞌe ŋaro e tahi o te nuꞌu vaꞌai mai e ia, ꞌe he haka ora e au i a rāua mai te mate ꞌi te mahana o te ture hopeꞌa.

Iovani 6:40

Te haŋa o tōꞌoku Matuꞌa: he ai o te ora ꞌāpī ꞌina he hopeꞌa raꞌa i te nuꞌu taꞌatoꞌa ꞌite ko ai te Poki nei o te ꞌAtua ꞌe haka moe i te manaꞌu ꞌi ruŋa i a ia; ꞌe he haka ora tahi e au ꞌi te mahana o te ture hopeꞌa.

Aŋa o te ꞌĀpōtoro 17:31

Te ꞌAtua ko uꞌi era ꞌana i te mahana mo ture e te kope haꞌataꞌa e ia i te taŋata taꞌatoꞌa o te ao hai tī-tika ꞌe hai parautiꞌa. ꞌE hai haka ora i rā kope mai te mate i haka aŋi-aŋi ai e te ꞌAtua ki te nuꞌu taꞌatoꞌa ko ai rā kope».

1 Kōrinto 3:13

Te huru o te aŋa o te taꞌatoꞌa ka takeꞌa riva-riva ena ꞌi te mahana o te ture hopeꞌa, mahana ka uꞌi era e Ietū hai ahi hoki i aŋa riva-riva rō ꞌo ꞌina.

1 Tētārōnika 5:4

ꞌE a kōrua, e te taina ē, taꞌe ꞌi roto i te pōhāhā o te ao nei e noho ena, ki maꞌurima ai i a kōrua pa he toke-toke e te mahana o tōꞌona hoki iŋa mai.

ꞌEvereo 10:25

ꞌIna ko taꞌe haka taka-taka tātou mo haꞌamuri ki te ꞌAtua, pa he tētahi nuꞌu. Te meꞌe o tātou mo aŋa he ꞌata haka hio-hio i te manaꞌu o te tātou taina ꞌi te ŋā hora nei; ko ꞌite ꞌana, paꞌi, a tātou ko hāhine mai ꞌā te hoki iŋa mai o te tātou Pūꞌoko Haka Tere ko Ietū Kiritō.

2 Pētero 2:6

ꞌE te ŋā kona era ko ⌊Tōroma⌋ ꞌe ko ⌊Kōmora⌋ i haka ūtuꞌa rō e te ꞌAtua hai ahi ꞌātā ka topa rō he ꞌeo-ꞌeo, mo haka takeꞌa he aha te meꞌe mo topa ki te nuꞌu aŋa i te meꞌe taꞌe tano.

2 Pētero 2:9

Hai ŋā haꞌaauraꞌa nei e ꞌite ena e ai rō ꞌana te pūai o te ꞌAtua mo haka eꞌa mai roto i te ꞌati i te taŋata aŋa i te meꞌe tī-tika, ꞌe mo haka ūtuꞌa i te nuꞌu aŋa i te meꞌe taꞌe tano, nuꞌu e tiaki e oho ꞌā ki te mahana o te ture hopeꞌa.

2 Pētero 3:7

Te raŋi ꞌe te henua o te hora nei ko haka rē ꞌā e te ꞌAtua mo tutu hai ahi. ꞌI te mahana era o te ture hopeꞌa ꞌe o te haka ūtuꞌa i te nuꞌu aŋa i te meꞌe taꞌe tano ka tutu ena hai nei ahi.

1 Iovani 4:17

Hai haŋa ki te rua e takeꞌa ena e maꞌu rō ꞌana a tātou i te haŋa o te ꞌAtua ꞌi roto i te tātou māhatu. Pē ira, ꞌi te mahana o te ture hopeꞌa, e ko haꞌamā tātou ꞌi te meꞌe era te noho iŋa o tātou ꞌi te ao nei pa he noho iŋa era ꞌā o Ietū Kiritō.

Hura 1:6

ꞌE te ŋā merahi taꞌe haka hauhaꞌa era i te rāua tōroꞌa ꞌe hoa era i te rāua kona noho, ko here-here ꞌana e te ꞌAtua hai vivi taꞌe mo pakoꞌo ki te hora hopeꞌa, ꞌe ꞌi te kona pōꞌuri i haka rē ai mo te mahana o te ture hopeꞌa.

Hura 1:7

ꞌE ki te nuꞌu o ⌊Tōroma⌋, o ⌊Kōmora⌋ ꞌe o te kona hāhine ki ira i haka ūtuꞌa ai ꞌi roto i te ahi ꞌina he hopeꞌa raꞌa ꞌo te vaꞌai i a rāua ki te taiꞌata, ꞌe ki te rauhuru meꞌe taꞌe tano pa he noho te taŋata ki te taŋata ꞌā, ꞌe te viꞌe ki te viꞌe ꞌā. Te nuꞌu nei koia ko rā ŋā merahi he noho rō ꞌai pa he meꞌe mo haka manaꞌu ki te taꞌatoꞌa, ꞌo aŋa i te meꞌe tuꞌu pē ira ꞌe ꞌo haka ūtuꞌa e te ꞌAtua.