Marko 9:24 - Rapa Nui

²⁴ He kī ia e te matuꞌa o tū poki era hai reꞌo pūai: —E haka moe rō ꞌana a au i tōꞌoku manaꞌu ꞌi ruŋa i te ꞌAtua. Ka haka haŋu mai koe i a au mo ꞌata haka moe ōꞌoku i te manaꞌu ꞌi ruŋa i a ia.

Marko 9:24 ပူးပေါင်းရင်းမြစ်များ

Marko 9:23

He kī e Ietū: —¿He aha te vānaŋa ena: «mo ai e ravaꞌa rō e koe»? ¡Taꞌatoꞌa meꞌe e ravaꞌa nō e te kope haka moe i te manaꞌu ꞌi ruŋa i te ꞌAtua!

Marko 9:25

ꞌI te uꞌi o Ietū ko ꞌata rahi ko oho ꞌā te taŋata, he ture ki tū tātane era he kī: —E te tātane taꞌe haꞌatiꞌa mo vānaŋa ꞌe mo ŋaroꞌa ē, ka eꞌa koe mai roto i te poki ena, ꞌe ꞌina koe ko uru haka ꞌou ki roto.

Ruka 17:5

He ani ia e te ⌊ꞌāpōtoro⌋ ki a Ietū mo haka pūai i te rāua haka moe iŋa i te manaꞌu ꞌi ruŋa i te ꞌAtua.

Ruka 7:38

I puā era ki a Ietū, he taŋi a te vaꞌe. He haꞌamata he haka rari he oho i te vaꞌe hai matavai. I oti era he haroꞌi hai tōꞌona rauꞌoho koia ko hoŋi ꞌe ko huri hai manoꞌi.

Ruka 7:44

He uꞌi ia a Ietū a ruŋa i rā viꞌe, ꞌe he kī ki a Tīmona: —¿Ko takeꞌa ꞌā e koe te viꞌe nei? I uru mai era a au, kai vaꞌai mai koe hai vai mo hopu o tōꞌoku vaꞌe; ꞌe te viꞌe nei, ko haka hopu mai ꞌana i tōꞌoku vaꞌe hai matavai ꞌe ꞌai ka haroꞌi hai rauꞌoho ōꞌona.

Aŋa o te ꞌĀpōtoro 10:19

E manaꞌu nō ꞌana a Pētero o ruŋa i tū meꞌe takeꞌa era e ia, i kī rō ai e te ⌊Vārua Maitai⌋: «Nā te taŋata e toru e kimi ꞌana i a koe.

Aŋa o te ꞌĀpōtoro 10:31

He kī mai: “E Koronerio, ko ŋaroꞌa ꞌana e te ꞌAtua i taꞌa pure, ꞌe e manaꞌu rō ꞌana i taꞌa meꞌe aŋa mo hāꞌūꞌū ki te nuꞌu veve.

2 Kōrinto 2:4

ꞌE, hora pāpaꞌi atu era ōꞌoku i rā parau, i manaꞌu rahi rō atu a au ki a kōrua ꞌe i rahi rō te mamae o tōꞌoku māhatu, ꞌātā i taŋi rō a au. Ka ai atu pē ira, taꞌe i pāpaꞌi atu ai mo haka māui-ui i te kōrua māhatu; mo haka ꞌite atu i te rahi o tōꞌoku haŋa mo kōrua.

Ēfeto 2:8

ꞌI te riva rahi o te ꞌAtua ko haka eꞌa ꞌana i a tātou mai roto i te ūtuꞌa o te hara ꞌo te haka moe o tātou i te manaꞌu ꞌi ruŋa i a Ietū. Taꞌe he meꞌe i ravaꞌa e tātou, he meꞌe o te ꞌAtua i vaꞌai mai,

Fīripo 1:29

Te ꞌAtua, paꞌi, hai riva rahi ōꞌona, ko vaꞌai mai ꞌana ki a tātou i te meꞌe taꞌe vaꞌai ki te taꞌatoꞌa: te meꞌe ena he haka moe i te manaꞌu ꞌi ruŋa i a Ietū, ꞌe pē ira ꞌā te meꞌe ena he ꞌamo i te ꞌati topa mai ki a tātou ki te nuꞌu ꞌāꞌana,

2 Tētārōnika 1:11

ꞌO ira, ꞌi roto i te mātou pure, e pure takoꞌa rō ꞌana a mātou mo kōrua paurō te mahana. E ani nei mātou ki te tātou ꞌAtua mo hāꞌūꞌū atu, ki ai ai te kōrua noho iŋa tano o te nuꞌu haꞌataꞌa e ia māꞌana, ꞌe ki ravaꞌa ai kōrua, hai pūai ōꞌona, mo aŋa i te meꞌe riva-riva taꞌatoꞌa manaꞌu e kōrua mo aŋa ꞌo te ai o kōrua he nuꞌu haka moe i te manaꞌu ꞌi ruŋa i a Ietū.

2 Tētārōnika 1:3

E te taina, te meꞌe tano mo aŋa e mātou he māuru-uru he oho ki te ꞌAtua mo kōrua ꞌo te ai te haka moe iŋa o kōrua i te manaꞌu ꞌi ruŋa i a Ietū pe te ꞌata pūai e oho ena, ꞌe te haŋa o kōrua mo te rua pe te ꞌata rahi nō e oho ena.

2 Timoteo 1:4

E haŋu, e manaꞌu rō ꞌana a au ꞌi ruŋa i tuꞌu matavai taŋi era mōꞌoku; ꞌo ira a au e haŋa nei mo takeꞌa mai i a koe. ¡Ko te koa ꞌō i a au mo ai pē ira!

ꞌEvereo 12:17

Ko ꞌite ꞌana a kōrua pē hē i hopeꞌa ai rā meꞌe. I haŋa era a Etaū mo vaꞌai e tōꞌona matuꞌa tane i te haꞌamaitai o te ꞌatariki, ka ai atu i taŋi rahi rō, kai ravaꞌa i rā meꞌe haŋa era e ia; ꞌina, paꞌi, he rāveꞌa toe mo haka hoki i te meꞌe a tuꞌa.

ꞌEvereo 12:2

Te tātou mata a ruŋa i a Ietū ana uꞌi ꞌo te ai mai i a ia te haka moe iŋa nei o tātou i te manaꞌu ꞌi ruŋa i te ꞌAtua ꞌe ꞌāꞌana te haka tī-tika. A ia, paꞌi, i haꞌaoromaꞌi rō i tōꞌona mate ꞌi ruŋa i te tātaurō, ꞌe ꞌina kai tapa atu i te haꞌamā o te mate iŋa tuꞌu pē ira ꞌo te ꞌite ki oti te ꞌati he koa a ia. ꞌE hora nei, ko noho ꞌā ꞌi te pāꞌiŋa mataꞌu o te ꞌAtua.

ꞌEvereo 5:7

Hora era o Ietū ꞌi te ao nei, ꞌi te ꞌite e ai rō ꞌā i te ꞌAtua te pūai mo haka eꞌa i a ia mai te mate, he pure he ani nō te aŋa hai reꞌo pūai koia ko taŋi; ꞌe ꞌi tōꞌona haꞌatura, he haka roŋo e te ꞌAtua.