Marko 8:31 - Rapa Nui

³¹ He haꞌamata he haka ꞌite e Ietū ki tū nuꞌu hāpī era ꞌāꞌana: te ⌊Poki o te taŋata⌋ e tōtōā rō, e oꞌo rō e te māui-ui ki roto i te ivi, ꞌe e ko haŋa e te nuꞌu pūꞌoko haka tere hūrio, e te ⌊oromatuꞌa ra-rahi⌋ ꞌe e te ⌊maꞌori o te haka tere hūrio⌋. I haka ꞌite takoꞌa rō pē nei ē: e tiŋaꞌi e haka mate rō i a ia ꞌe, ꞌi te toru mahana, he ora haka ꞌou.

Marko 8:31 ပူးပေါင်းရင်းမြစ်များ

Māteo 12:40

Pa he noho iŋa e toru mahana o Hōnā ꞌi roto i te ika nui-nui, pē ira takoꞌa te Poki o te taŋata ka noho ena e toru mahana ꞌi te kona muraki i a ia.

Māteo 21:42

He kī ia e Ietū: —¿Kai taiꞌo ꞌana ꞌō kōrua i te meꞌe hāꞌaki ꞌi ruŋa i te Pāpaꞌi Moꞌa? Pē nei e kī ena: “Te māꞌea taꞌe haŋa era e te nuꞌu aŋa hare ko riro ꞌana he māꞌea matuꞌa haka noho hare. O te ꞌAtua i aŋa pē ira, ꞌe ki te mātou mata he meꞌe nui-nui e tahi”.

Māteo 27:63

he kī: —E te suerekao, ko manaꞌu ꞌana a mātou ki te vānaŋa kī e tū reo-reo era ꞌi te hora e ora nō ꞌā pē nei ē: ꞌi te toru mahana he ora haka ꞌou a ia.

Marko 12:10

»¿Kai taiꞌo ꞌana ꞌō kōrua i te meꞌe hāꞌaki ꞌi ruŋa i te ⌊Pāpaꞌi Moꞌa⌋? Pē nei e kī ena: “Te māꞌea taꞌe haŋa era e te nuꞌu aŋa hare ko riro ꞌana he māꞌea matuꞌa haka noho hare.

Ruka 17:25

Ka ai atu pē ira, ꞌi raꞌe te Poki o te taŋata ka ꞌamo ena i te ꞌati ꞌe i te mamae ꞌi roto i tōꞌona māhatu, he taꞌe haŋa e te nuꞌu o te hora nei.

Ruka 24:26

¿Taꞌe ꞌō ꞌi raꞌe te ŋā meꞌe taꞌatoꞌa ena ana topa ki a ia, ꞌe ꞌai ka vaꞌai iho e te ꞌAtua i te tōroꞌa he Pūꞌoko Haka Tere o te meꞌe taꞌatoꞌa?

Ruka 24:44

I oti era he kī: «Te meꞌe topa mai nei he meꞌe ko haka ꞌite atu era ꞌā e au ꞌi muꞌa ꞌā pē nei ē: te meꞌe taꞌatoꞌa pāpaꞌi e Mōtē, e te perofeta ꞌe ꞌi ruŋa i te puka o te hīmene o ruŋa i a au e haka tano tahi rō».

Iovani 12:48

Te kope taꞌe haŋa mai ꞌe taꞌe haꞌatura ki tāꞌaku vānaŋa ko ai era ꞌana te meꞌe mo haka ūtuꞌa i a ia: he vānaŋa kī era e au. Hai rā vānaŋa ka haka ūtuꞌa ena ꞌi te mahana o te ture hopeꞌa.

Iovani 2:19

He pāhono e Ietū: —Ka haka marere rā te kona nei, ꞌe e toru nō mahana ko haka tuꞌu haka ꞌou ꞌā e au.

Aŋa o te ꞌĀpōtoro 7:35

»Ko te Mōtē taꞌe haŋa era nei e te itaraera, ꞌui era: “¿ꞌA ꞌai koe i haka pūꞌoko o mātou?”, ko ia te kope i uŋa e te ꞌAtua mo pūꞌoko haka tere o te itaraera ꞌe mo haka eꞌa i a rāua mai roto i te ꞌati hai merahi haka takeꞌa i a ia ꞌi roto i te ura ahi.

1 Kōrinto 15:4

he tanu ꞌe, ꞌi te toru mahana, he ora haka ꞌou mai te mate, pe he meꞌe hāꞌaki takoꞌa ꞌi ruŋa i te Pāpaꞌi Moꞌa;