Marko 4:20 - Rapa Nui

²⁰ »ꞌE nā e ai rō ꞌana te nuꞌu pē rā kona ꞌōꞌone riva-riva era: e haka roŋo rō ꞌā ꞌe e hāpaꞌo rō ꞌana i te vānaŋa o te ꞌAtua ꞌi roto i te rāua māhatu, ꞌe mai i a rāua e hua ena meꞌe rahi meꞌe haŋa e te ꞌAtua, pa he ŋā karu era ꞌā mai ruŋa i hua ai e toru ꞌahuru, e ono ꞌahuru, ꞌe ꞌātā e hoꞌe hānere karu mai te karu mau nō e tahi».

Marko 4:20 ပူးပေါင်းရင်းမြစ်များ

Māteo 13:23

»ꞌE te kona ꞌōꞌone riva-riva vī-viri era o te karu he nuꞌu haka roŋo ꞌe aŋi-aŋi i te roŋo o te ꞌAtua. Mai i a rāua he hua meꞌe rahi nō atu meꞌe haŋa e te ꞌAtua, pa he ŋā karu ena ꞌā mai ruŋa i hua ai e hoꞌe hānere, e ono ꞌahuru ꞌe e toru ꞌahuru karu».

Māteo 13:8

»I ai takoꞌa rō te karu i marere a te kona ꞌōꞌone riva-riva. I tupu era he taiko. Mai rā ŋā karu i hua ꞌe i puŋa ai e hoꞌe hānere, e ono ꞌahuru ꞌe e toru ꞌahuru karu mai te karu nō e tahi.

Marko 4:8

»Kē rō atu te karu i marere a te kona ꞌōꞌone riva-riva. I tupu era he taiko. Mai rā ŋā karu i hua ꞌe i puŋa ai e toru ꞌahuru, e ono ꞌahuru, ꞌe ꞌātā e hoꞌe hānere karu mai te karu nō e tahi».

Ruka 8:15

»Te kona ꞌōꞌone riva-riva era he nuꞌu haka roŋo ꞌe haꞌatura hai māhatu ki te roŋo o te ꞌAtua, ꞌe maꞌu hio-hio ꞌi roto i a rāua. Mai roto i a rāua e eꞌa ena meꞌe rahi meꞌe riva-riva, pa he karu hua era meꞌe rahi karu haka ꞌou mai ruŋa.

Iovani 15:16

»Taꞌe hai haŋa o kōrua i ai ena he nuꞌu hāpī ꞌāꞌaku. ꞌĀꞌaku kōrua i haꞌataꞌa ꞌe ko uŋa ꞌā mo ꞌata rahi te kōrua hua iŋa, te auraꞌa, mo ꞌata rahi te kōrua meꞌe riva-riva aŋa, ꞌe mo taꞌe ŋaro nā meꞌe ki te hora hopeꞌa. ꞌE te meꞌe no-noꞌi e kōrua hai ꞌīŋoa ōꞌoku he vaꞌai atu e te Matuꞌa.

Iovani 15:2

Mo taꞌe hua e tahi maŋa ōꞌoku, he ko-koti; ꞌe mo hua, he to-tope mo ꞌata hua.

Rōmano 7:4

Pē ira takoꞌa a kōrua, e te taina ōꞌoku ē. ꞌIna he pūai toe o te haka tere iŋa ꞌa Mōtē ꞌi ruŋa i a kōrua. I mate era a Ietū mo tātou, ko mate takoꞌa ꞌā a tātou ꞌi muri. Pē ira i kore ai te pūai o rā haka tere iŋa mai ruŋa i a tātou, ꞌe ꞌi te hora nei te meꞌe i a tātou he pūai o te kope ora haka ꞌou mai era mai te mate mo aŋa o tātou i te meꞌe haŋa o te ꞌAtua.

Fīripo 1:11

ꞌE pē ira takoꞌa he poreko mai roto i a kōrua meꞌe rahi te meꞌe riva-riva hai pūai o Ietū Kiritō, ꞌe he haꞌahana-hana ia te taŋata i te ꞌAtua.

Kōrosa 1:10

Pē ira te kōrua noho iŋa ka ai ena noho iŋa tano o te nuꞌu ꞌa Ietū Kiritō, ꞌe ka aŋa ka oho mau nō ena kōrua i te meꞌe mo koa ōꞌona ꞌe i te meꞌe riva-riva mo hāꞌūꞌū ki te rua. ꞌE pē ira takoꞌa ka ꞌata māhani ka oho ena kōrua i te ꞌAtua.

1 Tētārōnika 4:1

E te taina, ko haka ꞌite atu era ꞌā e mātou pē hē ana tano te kōrua noho iŋa ki te mata o te ꞌAtua, ꞌe ko ꞌite ꞌā e mātou, nā kōrua e noho mai ena pē ira. Ka ai atu pē ira, he ani atu a mātou hai ꞌīŋoa o te tātou Pūꞌoko Haka Tere ko Ietū: ka ꞌata haka tano ka oho nō te kōrua noho iŋa pē ira mo koa o te ꞌAtua.

2 Pētero 1:8

ꞌE mo ai nā i a kōrua te ŋā meꞌe nei ꞌe e haka pūai e oho rō ꞌana, ꞌina ia te kōrua noho iŋa e ko māuꞌa, ꞌe te māhani o kōrua ki te tātou Pūꞌoko Haka Tere ko Ietū Kiritō e ko māuꞌa takoꞌa.