Kōrosa 2:18 - Rapa Nui

¹⁸ ꞌIna takoꞌa ko tapa atu i te nuꞌu taꞌe haka au atu i a kōrua ꞌi te taꞌe haꞌamuri pē rāua ki te merahi. E haka tuꞌu rō ꞌana i a rāua pa he nuꞌu haumārū, taꞌe manaꞌu i hau rō atu ki te rua, ꞌe te parautiꞌa mau, he teꞌo-teꞌo nō te aŋa ꞌo te ai, ki te rāua kī, ko takeꞌa ꞌana i te meꞌe i haka takeꞌa e te ꞌAtua. ꞌE te meꞌe aŋa he haka paka ꞌi te manaꞌu taŋata nō.

Kōrosa 2:18 ပူးပေါင်းရင်းမြစ်များ

Māteo 24:24

Nā e tuꞌu rō mai te kiritō ꞌe te perofeta taꞌe parautiꞌa; e aŋa rō i te mana mo haka maꞌa-maꞌa i te manaꞌu o te taŋata, ꞌātā i te manaꞌu o te nuꞌu haꞌataꞌa e te ꞌAtua māꞌana, ana ravaꞌa e rāua.

Rōmano 1:25

Te nuꞌu nei ꞌina he haŋa ki te parautiꞌa o te ꞌAtua; he reo-reo te meꞌe haŋa. E haꞌamuri ꞌe e haꞌahana-hana ena ki te meꞌe o te ao aŋa e te ꞌAtua, taꞌe ki te ꞌAtua, kope aŋa i rā ŋā meꞌe, kope ki a ia ana haꞌamuri ꞌe ana haꞌahana-hana e te taꞌatoꞌa ꞌātā ki te hopeꞌa raꞌa.

Rōmano 16:18

A rāua, paꞌi, taꞌe he tāvini o te tātou Pūꞌoko Haka Tere he Kiritō; he tāvini o te meꞌe pohe ꞌe haŋa nō o rāua. Hai vānaŋa koroꞌiti ꞌe reka e reo-reo ena ki te nuꞌu māhatu rehe-rehe taꞌe manaꞌu e aŋa rō ꞌō e te rua i te meꞌe taꞌe tano ki a rāua.

1 Kōrinto 13:4

Te kope haka tere i a ia hai haŋa parautiꞌa e ꞌite rō ꞌā i te haꞌaoromaꞌi. A ia he taŋata riva, taꞌe fiꞌiꞌi, taꞌe teꞌo-teꞌo, taꞌe manaꞌu i hau rō atu a ia ki te rua,

1 Kōrinto 3:3

Ko te manaꞌu iŋa ꞌana kōrua pa he taŋata o te ao taꞌe ⌊haka moe i te manaꞌu⌋ ꞌi ruŋa i a Ietū. Hai mākota ꞌe hai tātake e takeꞌa ena ko te manaꞌu iŋa ꞌana kōrua hai manaꞌu taŋata, ꞌe o rā manaꞌu te haka tere i a kōrua.

1 Kōrinto 4:18

Ko ꞌite ꞌana a au: tētahi o roto i a kōrua nā e haka paka ꞌana i a rāua ꞌi te meꞌe era e manaꞌu ena e ko hoki atu au e ko uꞌi i a kōrua.

1 Kōrinto 4:6

E te taina, mo te kōrua riva-riva i vānaŋa i haꞌaauraꞌa atu ai au o ruŋa i a māua ko ꞌĀporo mo ꞌite o kōrua mo haka tere nō i a kōrua hai meꞌe hāꞌaki ꞌi ruŋa i te ⌊Pāpaꞌi Moꞌa⌋, ꞌo haka paka kōrua i te kope e tahi ꞌe ꞌo taꞌe haka au i te rua.

1 Kōrinto 8:1

ꞌĪ a au he vānaŋa atu o ruŋa i te ꞌui era o kōrua o te kai tūtia ki te ꞌītoro. Taꞌatoꞌa o tātou e ꞌite rō ꞌā ꞌina e tahi pūai o te ꞌītoro ꞌi ruŋa i a tātou. Ka ai atu pē ira, ka haka topa te manaꞌu: mo haka tere o tātou hai ꞌite, he manaꞌu tātou i hau rō atu tātou ki te rua. ꞌE, mo haka tere hai haŋa, he aŋa tātou i te meꞌe riva-riva mo te rua.

1 Kōrinto 9:24

Ko ꞌite ꞌana a kōrua: ꞌi te ꞌāꞌati tahuti, taꞌatoꞌa e tahuti ena, ꞌe ki te kope mau nō e tahi e topa ena te meꞌe vaꞌai ꞌo te tuꞌu raꞌe. Pē ira kōrua ana meꞌe ꞌi te ara o te ꞌAtua: e haka ꞌuhu e oho mo aŋa i te meꞌe haŋa o te ꞌAtua, pa he kope haka ꞌuhu mo rē i te ꞌāꞌati, ki topa atu ai ki a kōrua te meꞌe vaꞌai e ia.

2 Kōrinto 11:3

ꞌE, e riꞌa-riꞌa rō ꞌā a au ꞌo kore te kōrua haŋa parautiꞌa ki te Kiritō, pa he meꞌe topa ki a ⌊Eva⌋ ꞌi te hora haka roŋo ki te reo-reo o tū kōreha era ko Rukifero.

2 Kōrinto 12:20

E riꞌa-riꞌa rō ꞌana a au, ka oho atu ena a au uꞌi i a kōrua, te kōrua noho iŋa taꞌe pa he meꞌe haŋa ꞌāꞌaku. ꞌE, mo ai pē ira, taꞌe ia toe tōꞌoku huru pa he meꞌe haŋa e kōrua. Tōꞌoku riꞌa-riꞌa ꞌo ai te tātake ꞌi roto i a kōrua, te mākota, te riri, te ꞌino, te haꞌaꞌino, te vānaŋa taꞌe tano mo te tētahi, te manaꞌu i hau rō atu ki te rua, ꞌe te hihi-hihi o te kōrua noho iŋa.

Ēfeto 4:17

Te meꞌe haŋa ꞌa Ietū Kiritō mo kī atu e au ko te meꞌe nei: ꞌina kōrua ko noho haka ꞌou pa he nuꞌu taꞌe ꞌite ko ai te ꞌAtua parautiꞌa. Te noho iŋa, paꞌi, o rā nuꞌu e haka tano ena ki te manaꞌu taꞌe hauhaꞌa ꞌe taꞌe hāꞌūꞌū i a rāua.

Ēfeto 5:6

E uꞌi kōrua ꞌo haka roŋo ki te reo-reo ana kī atu: te nuꞌu aŋa i te ŋā meꞌe ena ꞌina he hape. Te ꞌAtua e ko taꞌe haka ūtuꞌa i te nuꞌu taꞌe haꞌatura ki a ia aŋa i te ŋā meꞌe nei.

Fīripo 3:14

mo tuꞌu ki te roa hopeꞌa ꞌe mo ravaꞌa e au i te meꞌe mo vaꞌai mai e te ꞌAtua ꞌi te raŋi ꞌo te ai ōꞌoku ꞌa Ietū Kiritō, pa he kope ꞌāꞌati e tahuti ena mo ravaꞌa i te meꞌe mo haka koa i a ia ka tuꞌu ena ki te roa hopeꞌa.

Kōrosa 2:23

Ki te manaꞌu taŋata, nei roŋo roŋo mārama-rama ꞌo te hāpī pē nei ē: mo koa o te ꞌAtua e aŋa meꞌe rahi meꞌe aŋarahi mo aŋa, mo haka takeꞌa i tuꞌu haŋa ki a ia, e ko manaꞌu, ki te hora hopeꞌa, i hau rō atu koe ki te rua, ꞌe e tōtōā koe i tuꞌu hakari. Ka ai atu pē ira, te ŋā meꞌe nei ꞌina he hāꞌūꞌū ki te taŋata mo haka noho i te meꞌe taꞌe tano pohe e te hakari.

Kōrosa 2:4

E kī atu ena a au i te meꞌe nei ꞌo reo-reo atu kōrua e te nuꞌu hai vānaŋa nehe-nehe.

Kōrosa 2:8

E uꞌi kōrua e te nuꞌu ꞌo reo-reo atu hai hāpī taꞌe parautiꞌa, he haka tere iŋa poreko mai te manaꞌu taŋata nō, ꞌo he meꞌe haka manaꞌu e te tātane haka tere i te ao nei. Te hāpī nei taꞌe ꞌa Ietū Kiritō.

1 Timoteo 1:7

E haŋa rō ꞌā a rāua mo riro he maꞌori hāpī o te ⌊haka tere iŋa ꞌa Mōtē⌋, ka ai atu ꞌina he aŋi-aŋi riva-riva o ruŋa i te meꞌe kī ꞌe hāpī e rāua pa he nuꞌu ꞌite.

1 Timoteo 4:1

Ko haka ꞌite riva-riva ꞌā e te ⌊Vārua Maitai⌋ pē nei ē: ka hāhine ena te ŋā mahana hopeꞌa era, tētahi taŋata e ko haŋa haka ꞌou mo haka roŋo ki te hāpī parautiꞌa o te ꞌAtua. Ka haka roŋo ena ki te hāpī reo-reo o te tātane

2 Pētero 2:14

ꞌIna e tahi viꞌe taꞌe pohe e rāua mo moe; e ko rohi-rohi mo hara. Te aŋa nō he reo-reo ki te nuꞌu māhatu rehe-rehe; he ꞌaito mo te meꞌe he nou-nou; e ko taꞌe haka ūtuꞌa rāua e te ꞌAtua.

1 Iovani 2:26

E pāpaꞌi atu ena a au i te ŋā meꞌe nei, ꞌo haka roŋo kōrua ki te nuꞌu reo-reo atu ꞌe ꞌo haka tapa kōrua mai te hāpī parautiꞌa.

Meꞌe Haka Takeꞌa 12:9

He ava i rā manuꞌino ananake ko tāꞌana vaꞌehau ki ruŋa i te henua. Rā manuꞌino ko te kōreha era o te noho iŋa tuai era ko Rukifero, he kope reo-reo ki te taŋata o te henua taꞌatoꞌa.

Meꞌe Haka Takeꞌa 13:14

Hai ŋā mana nei, mana haꞌatiꞌa era mo aŋa e ia hai ꞌīŋoa o tū manuꞌino eꞌa era mai roto i te vaikava, i reo-reo ai ki te taŋata. He uŋa ia i te nuꞌu nei he haka aŋa i te ꞌītoro pē rā manuꞌino mau ꞌā, manuꞌino taꞌe mate era ka ai atu i more rō ꞌi te more taparahi-taꞌata ꞌi te hoe.

Meꞌe Haka Takeꞌa 13:8

He haꞌamuri ia ki rā manuꞌino te taŋata taꞌatoꞌa te rāua ꞌīŋoa ꞌina o ruŋa i te puka pāpaꞌi o te ꞌīŋoa o te nuꞌu i a rāua te ora ꞌāpī ꞌina he hopeꞌa raꞌa. Te puka nei o te Māmoe tūtia era, ꞌe tōꞌona tūtia era ko haka tano era ꞌā mai te haꞌamata iŋa o te ao.

Meꞌe Haka Takeꞌa 19:10

He tū-turi ia a au a te vaꞌe o rā merahi mo haꞌamuri, ꞌe tē rā ia ka kī mai: «ꞌIna koe ko aŋa i te meꞌe ena; ki te ꞌAtua koe ana haꞌamuri. He tāvini nō, paꞌi, a au o te ꞌAtua pē koe ꞌe pē tuꞌu ŋā taina era, nuꞌu taꞌe haka tapa mai te hāpī parautiꞌa haka ꞌite e Ietū». Te hāpī nei ꞌa Ietū he meꞌe i haka ꞌite e te perofeta hai ⌊Vārua Maitai⌋.

Meꞌe Haka Takeꞌa 3:11

E ko roa tōꞌoku hoki iŋa mai. ꞌO ira, ka haka moe ka oho nō i te kōrua manaꞌu ꞌi ruŋa i a au, ꞌo toꞌo e te rua i tuꞌu hei.