Kōrosa 1:6 - Rapa Nui

⁶ tuꞌu atu era ki a kōrua. Te roŋo riva-riva nei o ruŋa i a Ietū nā ko ꞌite ko oho ꞌana ꞌi te kona taꞌatoꞌa o te ao koia ko te haka ꞌāpī ko te oho i te noho iŋa o te nuꞌu haka moe i te manaꞌu ꞌi ruŋa i a ia, pa he meꞌe topa atu ki a kōrua hora aŋi-aŋi era he parautiꞌa mau ꞌā te vānaŋa ŋaroꞌa e kōrua o ruŋa i te riva rahi o te ꞌAtua mo te taŋata.

Kōrosa 1:6 ပူးပေါင်းရင်းမြစ်များ

Māteo 24:14

Te roŋo riva-riva o te ⌊haka tere iŋa ꞌāpī o te ꞌAtua⌋ e haka ꞌite rō ꞌi te kona taꞌatoꞌa mo ꞌite tahi o te taŋata o te ao; ki oti ka tuꞌu iho mai ena te hopeꞌa o te ao.

Māteo 28:19

Ka oho kōrua ka haka ꞌite ki te nuꞌu o te kona taꞌatoꞌa o ruŋa i a au, ki riro ai a rāua he nuꞌu hāpī ꞌāꞌaku, ꞌe ꞌai ka ⌊papatito⌋ rō hai ꞌīŋoa o te Matuꞌa, o te Poki ꞌe o te ⌊Vārua Maitai⌋.

Marko 16:15

I oho era he kī: «E oho kōrua e haka ꞌite i te ⌊roŋo riva-riva o te ꞌAtua⌋ a te henua taꞌatoꞌa.

Marko 4:8

»Kē rō atu te karu i marere a te kona ꞌōꞌone riva-riva. I tupu era he taiko. Mai rā ŋā karu i hua ꞌe i puŋa ai e toru ꞌahuru, e ono ꞌahuru, ꞌe ꞌātā e hoꞌe hānere karu mai te karu nō e tahi».

Iovani 15:16

»Taꞌe hai haŋa o kōrua i ai ena he nuꞌu hāpī ꞌāꞌaku. ꞌĀꞌaku kōrua i haꞌataꞌa ꞌe ko uŋa ꞌā mo ꞌata rahi te kōrua hua iŋa, te auraꞌa, mo ꞌata rahi te kōrua meꞌe riva-riva aŋa, ꞌe mo taꞌe ŋaro nā meꞌe ki te hora hopeꞌa. ꞌE te meꞌe no-noꞌi e kōrua hai ꞌīŋoa ōꞌoku he vaꞌai atu e te Matuꞌa.

Iovani 17:19

Mo te riva-riva o rāua, he haꞌataꞌa a au i a au mo tāvini atu ki a koe, ki haꞌataꞌa parautiꞌa atu ai a rāua mo tāvini atu ki a koe.

Iovani 4:23

E tuꞌu rō te hora, ko te hora mau nei ꞌā, te nuꞌu haꞌamuri parautiꞌa ki te ꞌAtua e haꞌamuri rō hai māhatu ꞌe hai hāꞌūꞌū o te ⌊Vārua Maitai⌋. Pē ira te haꞌamuri haŋa mau o te ꞌAtua Matuꞌa.

Aŋa o te ꞌĀpōtoro 11:18

I ŋaroꞌa era e te taina taꞌatoꞌa o Hērutarema i te ŋā meꞌe nei, ꞌina kai ai haka ꞌou te vānaŋa mo kī ꞌe he haꞌamata he haka nui-nui i te ꞌAtua e kī era: «¡Ko te riva i te ꞌAtua i vaꞌai takoꞌa ai ki te nuꞌu taꞌe he hūrio i te rāveꞌa mo huri o te manaꞌu ki a ia ꞌe mo ravaꞌa e rāua i te ora ꞌāpī ꞌina he hopeꞌa raꞌa!».

Aŋa o te ꞌĀpōtoro 12:24

ꞌE te roŋo riva-riva ia o te ꞌAtua pe te ꞌata rahi nō e haka ꞌite e oho era ki te kona taꞌatoꞌa.

Aŋa o te ꞌĀpōtoro 16:14

E tahi o rā ŋā viꞌe te ꞌīŋoa ko Riria o te kona ko Tiatira; tāꞌana aŋa he hoꞌo kahu hopeꞌa o te riva-riva kōrore moana ꞌapa mea. Te viꞌe nei viꞌe haꞌamuri ki te ꞌAtua. E haka roŋo nō ꞌā rā viꞌe ki a Pauro, i haka māꞌeha ai e te ꞌAtua i tōꞌona manaꞌu mo aŋi-aŋi i te auraꞌa o rā vānaŋa ꞌe mo haka moe i te manaꞌu ꞌi ruŋa i a Ietū.

Aŋa o te ꞌĀpōtoro 26:18

Taꞌa meꞌe ka aŋa ena he haka ꞌara i te rāua mata, ki eꞌa ai mai roto i te pōhāhā ki roto i te māꞌeha, ꞌe mai te rima o Rukifero ki te rima o te ꞌAtua, ki haka moe ai i te rāua manaꞌu ꞌi ruŋa i a au. Pē ira te ꞌAtua ana haka kore i te rāua hara, ꞌe he oꞌo a rāua ki roto i te nūnaꞌa taŋata haꞌataꞌa e te ꞌAtua māꞌana”.

Rōmano 1:13

E te taina, e haŋa rō ꞌana a au mo ꞌite o kōrua e rahi rō ꞌā te mahana pohe ōꞌoku mo oho atu mo uꞌi i a kōrua, ꞌe ꞌātā ki te hora nei, ꞌī e piri nō mai ꞌā te meꞌe mo taꞌe tuꞌu atu ōꞌoku. Te meꞌe haŋa ꞌāꞌaku he takeꞌa mai ꞌi roto i a kōrua meꞌe rahi nuꞌu e pūai rō ꞌā te manaꞌu ꞌi ruŋa i te hāpī parautiꞌa o te ꞌAtua, ꞌe, takoꞌa, he ꞌata rahi o te nuꞌu haka ꞌou haka moe i te manaꞌu ꞌi ruŋa i a Ietū, pa he meꞌe topa ꞌi te tētahi atu kona o te nuꞌu taꞌe hūrio tuꞌu hāpī e au.

Rōmano 15:19

ꞌe, takoꞌa, hai mana aŋa e au hai pūai vaꞌai mai e te Vārua o te ꞌAtua. Pē ira i haka mao riva-riva ai a au i te aŋa vaꞌai mai he haka ꞌite he oho i te roŋo riva-riva o ruŋa i te Kiritō mai Hērutarema ki te kona taꞌatoꞌa, ꞌātā ka tuꞌu rō ki Iriria.

Rōmano 15:28

Ki vaꞌai ki oti a au i tū meꞌe vaꞌai mai era e rā nuꞌu, he oho au ki Paniora ꞌe, ꞌi tōꞌoku ara ki ira, ka hipa atu ena a au ki a kōrua ꞌi Roma.

Rōmano 16:26

ꞌe, hora nei, ko haka ꞌite ꞌana ꞌi ruŋa i te meꞌe pāpaꞌi e te perofeta. Nei parautiꞌa ko haka ꞌite ꞌana ki te taŋata o te henua taꞌatoꞌa mo haka moe o rāua i te manaꞌu ꞌi ruŋa i a Ietū ꞌe mo haꞌatura ki a ia. O te ꞌAtua, ꞌina ōꞌona haꞌamata ꞌe ꞌina ōꞌona hopeꞌa, i kī mo aŋa pē ira.

2 Kōrinto 10:14

ꞌO ira ꞌina a mātou he eꞌa mai te meꞌe haꞌatiꞌa mai e te ꞌAtua ꞌi te hora kī atu: i a mātou te parau mo haka tere i a kōrua a te ara o te ꞌAtua. ꞌĀhani mātou i taꞌe ai ꞌi roto i a kōrua ꞌi muꞌa ꞌā, ko eꞌa era ꞌā ia a mātou mai rā roa haꞌatiꞌa mai era e te ꞌAtua. ꞌE te parautiꞌa, ko mātou te nuꞌu raꞌe i haka ꞌite atu i te ⌊roŋo riva-riva o ruŋa i a Ietū Kiritō⌋.

2 Kōrinto 6:1

Hora nei, pa he nuꞌu hokorua mātou ꞌi te aŋa o te ꞌAtua, he ani atu: ꞌina kōrua ko haka māuꞌa i te riva rahi o te ꞌAtua vaꞌai atu era e ia.

Ēfeto 3:2

Ko ꞌite ꞌana a kōrua: o te ꞌAtua i vaꞌai mai i te aŋa nei he haka ꞌite he oho atu i te nui-nui o tōꞌona riva rahi mo kōrua.

Ēfeto 4:21

ꞌI te ꞌite ōꞌoku e haka moe rō ꞌana kōrua i te manaꞌu ꞌi ruŋa i a Ietū, e ꞌite takoꞌa nei a au ko hāpī atu ꞌana i te parautiꞌa o ruŋa i a ia ꞌe o ruŋa i te noho iŋa tano haŋa e ia mo kōrua.

Ēfeto 4:23

E haka rē mo te Vārua Maitai e haka ꞌāpī atu i te kōrua manaꞌu.

Ēfeto 5:9

ꞌE te meꞌe poreko mai te nuꞌu noho ꞌi roto i te māꞌeha he meꞌe riva-riva, tī-tika ꞌe parautiꞌa.

Fīripo 1:11

ꞌE pē ira takoꞌa he poreko mai roto i a kōrua meꞌe rahi te meꞌe riva-riva hai pūai o Ietū Kiritō, ꞌe he haꞌahana-hana ia te taŋata i te ꞌAtua.

Fīripo 4:17

Te meꞌe nei e au e kī atu ena taꞌe ꞌō he haŋa ōꞌoku mo hāꞌūꞌū mai; tōꞌoku haŋa mo ꞌata haꞌamaitai atu e te ꞌAtua ꞌo te hāꞌūꞌū mai o kōrua i a au.

Kōrosa 1:10

Pē ira te kōrua noho iŋa ka ai ena noho iŋa tano o te nuꞌu ꞌa Ietū Kiritō, ꞌe ka aŋa ka oho mau nō ena kōrua i te meꞌe mo koa ōꞌona ꞌe i te meꞌe riva-riva mo hāꞌūꞌū ki te rua. ꞌE pē ira takoꞌa ka ꞌata māhani ka oho ena kōrua i te ꞌAtua.

Kōrosa 1:23

Te meꞌe nō, e haka hio-hio e oho te kōrua manaꞌu ꞌi ruŋa i a Ietū ꞌe e tiaki e oho ki te meꞌe taꞌatoꞌa hōrea e te ꞌAtua mo te nuꞌu ꞌāꞌana, meꞌe i ꞌite e kōrua ꞌi te hora ŋaroꞌa era i te ⌊roŋo riva-riva o ruŋa i a Ietū⌋, roŋo haka ꞌite oho a te kona taꞌatoꞌa o te ao, ꞌe roŋo hāꞌūꞌū e au, e Pauro, mo haka ꞌite.

1 Tētārōnika 1:5

I haka ꞌite atu era, paꞌi, mātou i te ⌊roŋo riva-riva o ruŋa i a Ietū Kiritō⌋, he haka moe rō ꞌai kōrua i te manaꞌu ꞌi ruŋa i a ia, ꞌe taꞌe nō ꞌo te ŋaroꞌa e kōrua i te mātou vānaŋa, ꞌo te takeꞌa takoꞌa, hai meꞌe aŋa e mātou hai pūai o te ⌊Vārua Maitai⌋, te pūai o te ꞌAtua ꞌi ruŋa i a mātou, ꞌe ꞌo te ꞌite e kōrua: mo mātou te meꞌe vānaŋa atu era he parautiꞌa mau ꞌā, he takeꞌa e kōrua pē hē mātou e noho era ꞌi roto i a kōrua mo hāꞌūꞌū atu.

1 Tētārōnika 2:13

E māuru-uru rō ꞌā a mātou ki te ꞌAtua ꞌo te ai hora ŋaroꞌa era e kōrua i te roŋo haka ꞌite atu e mātou o ruŋa i a ia, he ꞌite e kōrua pē nei ē: he roŋo ꞌāꞌana, taꞌe ꞌō he roŋo o te taŋata. ꞌE he roŋo parautiꞌa mau ꞌā o te ꞌAtua, roŋo aŋa i te meꞌe haŋa e ia ꞌi roto i a kōrua i te nuꞌu haka moe i te manaꞌu ꞌi ruŋa i a Ietū.

2 Tētārōnika 2:13

Te meꞌe tano mau o mātou mo aŋa he māuru-uru he oho ki te ꞌAtua mo kōrua, e te taina haŋa rahi o te tātou Pūꞌoko Haka Tere ē. Te ꞌAtua, paꞌi, ko haꞌataꞌa era ꞌana i a kōrua, ꞌi raꞌe ki te aŋa iŋa o te ao, ki ai ai kōrua he nuꞌu haka eꞌa e ia mai roto i te ūtuꞌa o te hara ꞌe vaꞌai i te ora ꞌāpī ꞌina he hopeꞌa raꞌa ꞌi te haka moe o kōrua i te manaꞌu ꞌi ruŋa i te roŋo parautiꞌa o ruŋa i a Ietū Kiritō, ꞌe ꞌi te aŋa o te Vārua Maitai ꞌi roto i a kōrua mo riro o kōrua he taŋata ꞌina e tahi hara.

1 Pētero 5:12

A Tirivano i hāꞌūꞌū mai mo pāpaꞌi atu i te parau nei. Mōꞌoku a ia he taina taꞌe haka rē i te ꞌAtua ki te hora hopeꞌa. Tāꞌaku meꞌe ꞌiti-ꞌiti haka pāpaꞌi atu ena he meꞌe mo hatu ꞌe mo haka aŋi-aŋi atu pē nei ē: te riva rahi ꞌe te haŋa o te ꞌAtua ꞌi ruŋa i a kōrua. ꞌO ira, e uꞌi ꞌo hārui rō hai tuaꞌivi i tōꞌona haŋa mo kōrua.