Karatia 2:4 - Rapa Nui

⁴ Ka ai atu pē ira, i ai rō ꞌi ira te nuꞌu haka tuꞌu i a rāua pa he nuꞌu ⌊haka moe i te manaꞌu⌋ ꞌi ruŋa i a Ietū, te haŋa mo uꞌi hoki ko te maꞌu iŋa ꞌana a mātou i te ⌊haka tere iŋa ꞌa Mōtē⌋ ꞌe, mo taꞌe ai pē ira, mo haka ꞌamo haka ꞌou mai i rā haka tere iŋa. ꞌE te parautiꞌa, ꞌina he pūai toe o te haka tere iŋa ꞌa Mōtē ꞌi ruŋa i a tātou ꞌo te ai o tātou ꞌa Ietū Kiritō.

Karatia 2:4 ပူးပေါင်းရင်းမြစ်များ

Ruka 5:38

ꞌO ira te ꞌava ꞌāpī e haꞌaꞌī ki roto i te ipu kiri ꞌāpī.

Aŋa o te ꞌĀpōtoro 15:1

ꞌI rā ŋā mahana, te tētahi nuꞌu ⌊haka moe i te manaꞌu⌋ ꞌi ruŋa i a Ietū he oho mai Hūrea ki Antiokia o Tīria, he haꞌamata he hāpī ki te taina o ira e ko eꞌa a rāua mai roto i te ūtuꞌa o te hara ꞌe e ko ravaꞌa i te ora ꞌāpī ꞌina he hopeꞌa raꞌa mo taꞌe hore o te kiri o te kinoŋa mo haka tano ki te meꞌe kī e Mōtē.

Aŋa o te ꞌĀpōtoro 15:24

Ko ꞌite ꞌana a mātou i tuꞌu rō atu te tētahi nuꞌu mai nei, taꞌe o mātou i uŋa atu, ꞌe ko haka mira-mira ꞌā i te kōrua manaꞌu hai vānaŋa o rāua.

Aŋa o te ꞌĀpōtoro 20:30

Mai roto i a kōrua mau ꞌā ka eꞌa takoꞌa mai ena tētahi nuꞌu he hāpī i te meꞌe reo-reo, mo oho o te nuꞌu haka moe i te manaꞌu ꞌi ruŋa i a Ietū ꞌi muri i a rāua.

Rōmano 8:15

Te Vārua vaꞌai mai e te ꞌAtua taꞌe he vārua haka riro i a tātou he ꞌekaravo riꞌa-riꞌa ꞌi te kope haka aŋa i a ia, he Vārua haka riro i a tātou he ŋā poki o te ꞌAtua. Hai ia e kī ena a tātou ki te ꞌAtua: «¡E koro ōꞌoku ē!».

2 Kōrinto 11:13

A rāua he ꞌāpōtoro reo-reo e haka tuꞌu rō ꞌana i a rāua pa he ꞌāpōtoro o te Kiritō.

2 Kōrinto 11:17

ka ai atu te teꞌo-teꞌo nei he meꞌe maꞌa-maꞌa e tahi ꞌe taꞌe ꞌō he meꞌe mo koa o te ꞌAtua.

2 Kōrinto 11:20

Mo tuꞌu atu, paꞌi, o te nuꞌu haꞌariro i a kōrua he ꞌekaravo o rāua, te nuꞌu toꞌo i te kōrua meꞌe, te nuꞌu reo-reo atu, te nuꞌu taꞌe haka au atu, ꞌe te nuꞌu vā-vā atu he haꞌaoromaꞌi e kōrua.

2 Kōrinto 11:26

ꞌI tōꞌoku ara taꞌatoꞌa i piri rō mai meꞌe rahi nō atu ꞌati: he rio ko ꞌata rahi ꞌā e te vai, he toke-toke, he haŋa o tōꞌoku taŋata he hūrio ꞌe o te nuꞌu o te rua henua mo tōtōā mai. I piri mai ai te ꞌati nei ꞌi te kona noho taŋata, ꞌi ꞌuta, ꞌi roto i te vaikava, ꞌe ꞌi muri i te nuꞌu kī e haka moe rō ꞌana a rāua i te manaꞌu ꞌi ruŋa i a Ietū ꞌe, te parautiꞌa, taꞌe pē ira.

2 Kōrinto 3:17

Te tātou Pūꞌoko Haka Tere e haka tika ena i te tātou māhatu hai Vārua Maitai. ꞌE te kope haka tika e te Vārua Maitai ko eꞌa ꞌā mai te pūai o te hara ꞌe ko eꞌa takoꞌa ꞌā mai te manaꞌu pē nei ē: hai haꞌatura ki te haka tere iŋa ꞌa Mōtē he tano ki te mata o te ꞌAtua.

Karatia 1:7

ꞌE te parautiꞌa, ꞌina he rua roŋo riva-riva o te ꞌAtua. Te meꞌe nō, e ai rō ꞌana te nuꞌu nā e haka mira-mira ꞌana i te kōrua manaꞌu. E haŋa ꞌā mo haka poteko i te ⌊roŋo riva-riva o ruŋa i a Ietū⌋.

Karatia 4:25

Te viꞌe nei ko ꞌĀkara pa he tāpaꞌo o te maꞌuŋa era ko Tinaī ꞌi te henua era ko Aravia, he kona ꞌi ira i poreko ai te haka tere iŋa ꞌa Mōtē. ꞌE he tāpaꞌo takoꞌa o Hērutarema o te hora nei, he kona ko te maꞌu ko te oho iŋa ꞌā e te taŋata i te haka tere iŋa ꞌa Mōtē pa he nuꞌu ꞌekaravo o rā haka tere iŋa.

Karatia 4:3

Te meꞌe nei pa he oho iŋa era ꞌā o tātou ꞌi muꞌa ꞌā: ꞌi te hora era kai aŋi-aŋi ꞌā i te hāpī parautiꞌa o te ꞌAtua, ꞌe kai haka moe ꞌā i te manaꞌu ꞌi ruŋa i a Ietū, o te hāpī taꞌe hauhaꞌa o te ao nei te haka tere mai i a tātou.

Karatia 5:1

A Ietū Kiritō i haka eꞌa i a tātou mai te meꞌe ena he ꞌamo i te haka tere iŋa ꞌa Mōtē mo tano ki te mata o te ꞌAtua. ꞌO ira, e uꞌi kōrua ꞌo haka ꞌamo haka ꞌou rō atu i te haka tere iŋa era, ꞌo ꞌekaravo haka ꞌou kōrua o rā haka tere iŋa.

Karatia 5:10

ꞌE, ꞌi te ai o kōrua ꞌa Ietū Kiritō takoꞌa, ko ꞌite riva-riva ꞌana e au he maꞌu kōrua i te hāpī haka ꞌite atu era e au ꞌe taꞌe ꞌō i te hāpī kē. ꞌE te ꞌAtua he haka ūtuꞌa i te kope haka huri i te kōrua manaꞌu, nōatu ko ai rā kope.

2 Timoteo 3:6

O rāua, paꞌi, te nuꞌu oho ki hare era ki hare era ꞌe hai reo-reo e ravaꞌa ena mo haka tere i te ŋā viꞌe ꞌina he pūai o te manaꞌu, ꞌamo meꞌe rahi hara, ꞌe pohe ki te meꞌe taꞌe tano.

Tanatiako 1:25

ꞌE te kope taꞌe rehu te meꞌe ŋaroꞌa, hāpī mo ꞌata ꞌite ōꞌona o ruŋa i te haka tere iŋa hopeꞌa o te tī-tika haka eꞌa i te taŋata mai roto i te hara, haka tano tahi i te meꞌe aŋa ki te meꞌe kī e rā roŋo, he haꞌamaitai e te ꞌAtua ꞌi tāꞌana meꞌe taꞌatoꞌa aŋa.

1 Pētero 2:16

E noho kōrua pa he nuꞌu taꞌe haka tere e te meꞌe o te ao nei; te ꞌAtua, paꞌi, ko haka eꞌa ꞌana i a kōrua mai rā haka tere iŋa. ꞌE, ka ai atu pē ira, e uꞌi ꞌo riro te parautiꞌa nei he ꞌōtohe e tahi mo aŋa o kōrua i te meꞌe taꞌe tano. Te meꞌe haŋa mau: e noho kōrua pa he tāvini o te ꞌAtua.

2 Pētero 2:19

He kī nō te aŋa e tū ŋā maꞌori reo-reo ena: «Te nuꞌu oho mai a te ara o mātou ꞌina he kope mo kī pē hē a rāua ana haka tere». ꞌE te parautiꞌa, te ŋā maꞌori reo-reo nei he ꞌekaravo o te meꞌe taꞌe tano aŋa e rāua. Te taŋata taꞌatoꞌa, paꞌi, he ꞌekaravo o te meꞌe taꞌatoꞌa haka tere i a rāua.

1 Iovani 4:1

E te taina, ꞌina kōrua ko manaꞌu he parautiꞌa te vānaŋa o te nuꞌu taꞌatoꞌa kī e vānaŋa ꞌana a rāua i te meꞌe haka vānaŋa e te ꞌAtua. Te meꞌe o kōrua mo aŋa he haka ꞌatu ana ai te vārua era ꞌi roto i a rāua o te ꞌAtua mau ꞌā; e rahi rō ꞌana, paꞌi, te perofeta reo-reo ꞌi te ao.

Hura 1:4

Nā, paꞌi, hai reo-reo ko oꞌo ꞌana ki roto i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū te nuꞌu haka ꞌite mai era ꞌi ruŋa i te ⌊Pāpaꞌi Moꞌa⌋ e ai rō ꞌā te ūtuꞌa mo rāua. Te nuꞌu nei he nuꞌu taparahi-taꞌata toꞌo i te riva rahi o te tātou ꞌAtua pa he ꞌōtohe mo aŋa i te meꞌe haŋa nō e te rāua hakari, ꞌe ꞌina he haŋa ki te tātou Pūꞌoko Haka Tere ko Ietū Kiritō.