Iovani 6:51 - Rapa Nui

⁵¹ Ko au mau ꞌana te haraoa ora topa mai era mai te raŋi; te kope kai i te haraoa nei he ravaꞌa i te ora ꞌāpī ꞌina he hopeꞌa raꞌa. ꞌE nei haraoa he hakari mau nei ꞌā ōꞌoku. He vaꞌai e au mo ravaꞌa e te taŋata o te henua taꞌatoꞌa i te ora ꞌāpī».

Iovani 6:51 ပူးပေါင်းရင်းမြစ်များ

Ruka 22:19

He toꞌo ia i te haraoa. I oti era te māuru-uru ki te ꞌAtua, he more-more he tuhaꞌa ki tū nuꞌu era koia ko kī: «Te haraoa ena he hakari ōꞌoku vaꞌai ki te mate mo te riva-riva o kōrua. E aŋa te meꞌe nei mo manaꞌu o kōrua ki a au».

Iovani 6:33

Te haraoa parautiꞌa vaꞌai e te ꞌAtua he kope topa mai mai te raŋi vaꞌai i te ora ꞌāpī ꞌina he hopeꞌa raꞌa ki te taŋata.

Iovani 3:13

»ꞌIna ꞌā he kope raꞌe i iri ki te raŋi, he kope topa nō mai era mai ruŋa, he ⌊Poki o te taŋata⌋.

Tito 2:14

A Ietū, paꞌi, ko vaꞌai ꞌā i a ia ki te mate mo kore o te pūai o te hara mai ruŋa i a tātou, ki ai ai tātou he nuꞌu haꞌataꞌa māꞌana, ꞌina e tahi hara, ꞌe haŋa mo aŋa i te meꞌe riva-riva ki tōꞌona mata.

Māteo 20:28

Te Poki o te taŋata, paꞌi, taꞌe mo tāvini ki a ia e te rua i oho mai ai, mo tāvini ōꞌona ki te rua ꞌe mo vaꞌai i a ia ki te mate, he ꞌauhau iŋa mo haka eꞌa meꞌe rahi taŋata mai roto i te ūtuꞌa o te hara».

ꞌEvereo 10:20

ꞌE pa he puru iŋa era e te korotina i te Kona ꞌAta Moꞌa, pē ira te hara e puru era i a tātou ꞌo hāhine ki te ꞌAtua. ꞌE hora nei, hai vaꞌai o Ietū i tōꞌona hakari pa he tūtia mo ꞌamo i te ūtuꞌa o te hara mo tātou, i mātaki ai i te ara ꞌāpī mo hāhine o tātou ki te ꞌAtua, ꞌe rā ara ko ia.

2 Kōrinto 5:21

Te Kiritō ꞌina e tahi meꞌe taꞌe tano i aŋa, ꞌe, ka ai atu pē ira, te ꞌAtua i haka ūtuꞌa rō i a ia mo te tātou hara, ki tano ai mo kī: a tātou, te nuꞌu haka moe i te manaꞌu ꞌi ruŋa i a Ietū, he nuꞌu tano ki tōꞌona mata.

1 Pētero 2:4

E haka hāhine kōrua ki a ia, he māꞌea ora taꞌe haŋa era e te taŋata, māꞌea haꞌataꞌa e te ꞌAtua, ꞌe māꞌea hauhaꞌa rahi.

Ēfeto 5:2

E haka rē mo te haŋa e haka tika atu, pa he meꞌe aŋa e Ietū hora vaꞌai era i a ia ki te mate mo tātou. ꞌE tōꞌona mate era, mo te ꞌAtua, pa he tūtia ꞌeo.

Iovani 3:16

»ꞌI te haŋa rahi o te ꞌAtua ki te taŋata taꞌatoꞌa o te ao, he vaꞌai i tāꞌana Poki mau nō era e tahi mo mate, ꞌe nuꞌu nō era mo haka moe i te manaꞌu ꞌi ruŋa, e ko haka tapa e te ꞌAtua mai muri i a ia ꞌe e ko haka ūtuꞌa; he vaꞌai i te ora ꞌāpī ꞌina he hopeꞌa raꞌa.

Iovani 1:29

ꞌI te rua mahana, he takeꞌa e Iovani i a Ietū ka pū e oho atu era. He kī ki te nuꞌu o ira: «¡Ka uꞌi rā kōrua i te taŋata era ai! ¡A ia he Māmoe o te ꞌAtua, he tūtia mo haka kore i te hara o te taŋata!

1 Iovani 4:14

ꞌE o mātou mau ꞌana i takeꞌa ꞌe i haka ꞌite pē nei ē: te Matuꞌa ko uŋa mai ꞌana i tāꞌana Poki mo eꞌa o te taŋata o te ao mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa hai ia.

1 Iovani 4:10

Ko te meꞌe nei te meꞌe he haŋa parautiꞌa: he uŋa mai o te ꞌAtua i tāꞌana Poki pa he tūtia mo haka kore o te tātou hara, taꞌe ꞌō ko te haŋa nei o tātou ki a ia.

1 Iovani 2:2

A Ietū i vaꞌai rō i a ia pa he tūtia mo tātou, ki haka kore ai e te ꞌAtua i te tātou hara, ꞌe taꞌe nō i te hara o tātou, i te hara takoꞌa o te nuꞌu taꞌatoꞌa o te ao.

Iovani 1:14

Tū Vānaŋa era i riro rō he taŋata ꞌe i noho rō ꞌi muri i a tātou. Ko takeꞌa ꞌana e tātou tōꞌona pūai, pūai vaꞌai e te ꞌAtua Matuꞌa ki tāꞌana Poki era e tahi mau nō. Te haŋa o te ꞌAtua mo tātou ꞌe te parautiꞌa o ruŋa ōꞌona i haka takeꞌa mai ai ꞌi ruŋa i a ia.

Ēfeto 5:25

E te kenu, e haŋa ki te kōrua ŋā viꞌe, pa he haŋa iŋa ena ꞌā o Ietū ki a tātou, ki te nuꞌu taꞌatoꞌa haka moe i te manaꞌu ꞌi ruŋa i a ia, haka takeꞌa hai vaꞌai iŋa era i a ia ki te mate mo tātou.

2 Kōrinto 5:19

Hai mate era, paꞌi, o Ietū Kiritō ꞌi ruŋa i te tātaurō i aŋa ai e te ꞌAtua i te rāveꞌa mo haka riva-riva i te taŋata ki a ia ꞌe mo taꞌe tapa atu i te rāua hara. ꞌE ki a mātou i vaꞌai mai ai i te aŋa he haka ꞌite he oho i te roŋo nei.

Iovani 3:14

Pa he haka tuꞌu iŋa e ⌊Mōtē⌋ i te pou ꞌi ruŋa te kōreha ꞌi te kona ꞌone taꞌe noho taŋata, pē ira takoꞌa ꞌana ka haka tuꞌu ena i te tātaurō ꞌi ruŋa te Poki o te taŋata,

Iovani 3:36

Te kope haka moe i te manaꞌu ꞌi ruŋa i te Poki o te ꞌAtua he ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua. ꞌE te kope taꞌe haka moe i te manaꞌu ꞌi ruŋa i a ia e ko ravaꞌa i rā ora; te meꞌe mo ravaꞌa he ūtuꞌa ꞌina he hopeꞌa raꞌa.

Iovani 5:24

»ꞌĪ a au he kī atu: te kope haka roŋo i tāꞌaku vānaŋa ꞌe haka moe i tōꞌona manaꞌu ꞌi ruŋa i te kope uŋa mai i a au, i a ia te ora ꞌāpī ꞌina he hopeꞌa raꞌa, ꞌe ꞌina he ūtuꞌa mōꞌona. Ko haka eꞌa ꞌana, paꞌi, e te ꞌAtua mai te ara o te mate ꞌe ko haka noho ꞌana ꞌi roto i te ara o te ora.

Iovani 6:35

He kī e Ietū: —Ko au te haraoa vaꞌai i te ora. Te kope oho mai ki a au e ko maruaki haka ꞌou; ꞌe te kope haka moe i tōꞌona manaꞌu ꞌi ruŋa i a au e ko pohe haka ꞌou ki te vai.

Iovani 6:41

He haꞌamata ia te hūrio ra-rahi he hēŋuꞌi-ŋuꞌi o ruŋa o Ietū ꞌo te kī ko ia te haraoa topa mai era mai te raŋi.

Iovani 6:47

ꞌĪ a au he kī atu: te nuꞌu haka moe i te manaꞌu ꞌi ruŋa i a au i a rāua te ora ꞌāpī ꞌina he hopeꞌa raꞌa vaꞌai e te ꞌAtua.

Iovani 6:48

»ꞌE te haraoa vaꞌai i te ora ꞌāpī ꞌina he hopeꞌa raꞌa ko au.

Iovani 6:50

ꞌE, a au e vānaŋa atu ena o ruŋa o te haraoa parautiꞌa topa mai era mai te raŋi; te nuꞌu kai i nei haraoa i a rāua te ora ꞌāpī ꞌina he hopeꞌa raꞌa vaꞌai e te ꞌAtua.

Iovani 11:26

ꞌE te taŋata ora haka moe i te manaꞌu ꞌi ruŋa i a au, ki te hora hopeꞌa e ko haka tapa mai muri i te ꞌAtua. ¿E haka moe rō ꞌana koe i tuꞌu manaꞌu ꞌi ruŋa i te meꞌe nei?