Fīripo 4:8 - Rapa Nui

⁸ ꞌE tāꞌaku vānaŋa hopeꞌa mo kōrua, e te taina ē: e manaꞌu ki te meꞌe parautiꞌa, ki te meꞌe taꞌatoꞌa tano mo moꞌa, ki te meꞌe tano ki te mata o te ꞌAtua, ki te meꞌe ꞌina he hara, ki te meꞌe nehe-nehe, ki te taꞌatoꞌa meꞌe riva-riva. Te kī: e manaꞌu ki te meꞌe taꞌatoꞌa tī-tika ꞌe tano mo haꞌahana-hana.

Fīripo 4:8 ပူးပေါင်းရင်းမြစ်များ

Māteo 22:16

He uŋa ki a Ietū i te rāua nuꞌu hāpī ananake ko te nuꞌu peꞌe ki a ⌊ꞌErore⌋ kī: —E te Maꞌori, ko ꞌite ꞌana a mātou: taꞌa meꞌe vānaŋa he parautiꞌa, e hāpī rō ꞌana koe i te ara parautiꞌa o te ꞌAtua, ꞌe ꞌina koe he haka tano i taꞌa vānaŋa ki te manaꞌu o te taŋata; taꞌe, paꞌi, mo haka koa i a rāua koe e vānaŋa ena.

Marko 6:20

A ꞌErore e riꞌa-riꞌa rō ꞌana i a Iovani. Ko ꞌite ꞌana he taŋata moꞌa ꞌe aŋa i te meꞌe tī-tika ki te mata o te ꞌAtua. ꞌO ira e hāpaꞌo era. He mira-mira nō te manaꞌu o ꞌErore e ŋaroꞌa era i te vānaŋa ꞌa Iovani. ꞌE, ka ai atu pē ira, ko te haka roŋo iŋa ꞌā hai māhatu.

Ruka 16:15

He kī e Ietū ki rā nuꞌu: «A kōrua e haka takeꞌa ena ki te taŋata he nuꞌu aŋa i te meꞌe tī-tika. Ka ai atu pē ira, te ꞌAtua ko ꞌite riva-riva ꞌā i te huru o te kōrua manaꞌu. E rahi rō ꞌā, paꞌi, te meꞌe, ki te manaꞌu taŋata, he meꞌe hopeꞌa o te riva-riva, ꞌe ki te mata o te ꞌAtua, he meꞌe hopeꞌa o te rake-rake.

Ruka 2:25

ꞌI rā noho iŋa e ai rō ꞌana e tahi taŋata noho ꞌi Hērutarema te ꞌīŋoa ko Timione, taŋata tano ki te mata o te ꞌAtua, haꞌamuri ꞌe moꞌa ki a ia; he tiaki nō te aŋa ki te mahana mo haka koa e te ꞌAtua i te itaraera hai uŋa i te Kiritō. ꞌI ruŋa i a Timione te ⌊Vārua Maitai⌋ ꞌe

Ruka 23:50

E ai rō ꞌana e tahi taŋata riva aŋa i te meꞌe tī-tika te ꞌīŋoa ko ⌊Kōsē⌋ o te kona ko Ārimatea, he kona o Hūrea. A ia o roto o te ⌊nūnaꞌa taŋata i a rāua te kī iŋa hopeꞌa o te haka tere hūrio⌋. A Kōsē e tiaki ꞌā ki te tuꞌu iŋa mai o te haka tere iŋa ꞌāpī o te ꞌAtua, ꞌe ꞌina kai peꞌe ki tū meꞌe aŋa era ki a Ietū e tū nūnaꞌa taŋata era.

Iovani 7:18

Te kope vānaŋa hai meꞌe ꞌāꞌana mau ꞌā e haŋa ꞌana mo haka nui-nui i a ia; ꞌe te kope haŋa mo haka nui-nui i te kope uŋa i a ia, ko rā kope te meꞌe kī i te parautiꞌa ꞌe ꞌina he haꞌavare.

Aŋa o te ꞌĀpōtoro 10:22

He pāhono e tū nuꞌu era: —A mātou o te kape vaꞌehau ko Koronerio i uŋa mai. A ia he taŋata aŋa i te meꞌe tī-tika, haꞌamuri ki te ꞌAtua ꞌe te hūrio e haŋa rahi rō ꞌā ki a ia. O te merahi e tahi i kī mo uŋa mai ki a koe, mo oho ōꞌou ki tōꞌona hare mo haka roŋo atu ōꞌona i taꞌa meꞌe ka kī ena.

Aŋa o te ꞌĀpōtoro 22:12

ꞌI ira e tahi taŋata te ꞌīŋoa ko ꞌĀnānia, taŋata moꞌa ꞌe haꞌatura ki te ⌊haka tere iŋa ꞌa Mōtē⌋. Te hūrio taꞌatoꞌa o rā kona e vānaŋa riva-riva rō ꞌā o ruŋa i a ia.

Aŋa o te ꞌĀpōtoro 6:3

ꞌO ira, e te ŋā taina ē, ka uꞌi a roto o kōrua e hitu taŋata riva-riva ꞌī e te pūai o te ⌊Vārua Maitai⌋ mo maꞌu i te aŋa ena.

Rōmano 13:13

E noho tātou pa he nuꞌu haꞌere ꞌi roto i te māꞌeha. E haka rē te meꞌe taꞌe tano aŋa ꞌi te pō pa he ŋoŋoro taꞌe hāito i te meꞌe aŋa, pa he taꞌero ꞌava, pa he taiꞌata ꞌe he tētahi haka ꞌou atu meꞌe tuꞌu pē ira, pa he tātake ꞌe pa he pohe ki te meꞌe o te rua.

Rōmano 13:3

Te nuꞌu aŋa i te meꞌe tano ꞌina he riꞌa-riꞌa ꞌi te nuꞌu pūꞌoko haka tere henua. He nuꞌu aŋa i te meꞌe taꞌe tano te nuꞌu riꞌa-riꞌa. ¿E haŋa rō ꞌana koe mo taꞌe riꞌa-riꞌa ꞌi te nuꞌu pūꞌoko haka tere henua? ꞌIna ia ko aŋa i te meꞌe taꞌe tano. Pē ira he tano koe ki te rāua mata.

Rōmano 14:18

Te nuꞌu tāvini pē nei ki te ⌊Kiritō⌋ he koa te ꞌAtua, ꞌe ki te mata o te taŋata e tano rō ꞌā.

Rōmano 2:29

Te auraꞌa: te ai ōꞌou he taŋata haꞌataꞌa parautiꞌa e te ꞌAtua māꞌana he meꞌe o te māhatu, ꞌe pē ira ꞌā te hore i te kiri o te kinoŋa. Te hore parautiꞌa o te kinoŋa he haka kore i te meꞌe taꞌe tano mai roto i te māhatu, he meꞌe aŋa e te ⌊Vārua Maitai⌋ mau nō, ꞌe taꞌe he meꞌe ravaꞌa hai maꞌu ꞌe hai haꞌatura ki te haka tere iŋa ꞌa Mōtē. Te kope pē nei e haꞌahana-hana rō ꞌā e te ꞌAtua ka ai atu ꞌina he haꞌahana-hana e te taŋata.

1 Kōrinto 4:5

ꞌO ira, e haka kore te kōrua kī i te tano ꞌe i te taꞌe tano o te meꞌe aŋa e te rua. Ki tiaki tātou ki te hoki iŋa mai o te Kiritō. Māꞌana e haka ꞌite mai i te manaꞌu o te taŋata taꞌe ꞌite e te rua ꞌe he haka aŋi-aŋi mai he aha i manaꞌu ai pē ira. ꞌI rā hora e ture rō ꞌe e haꞌahana-hana rō e te ꞌAtua i te taꞌatoꞌa tano ki te rāua meꞌe i aŋa.

2 Kōrinto 13:7

E ani rō ꞌana a mātou ki te ꞌAtua ꞌo aŋa a kōrua i te meꞌe taꞌe tano. Te tumu o mātou e ani nei mo aŋa o kōrua i te meꞌe riva-riva taꞌe ꞌō pē nei ē: mo takeꞌa e te nuꞌu e tano rō ꞌana ꞌō te mātou aŋa pa he ꞌāpōtoro. E ani nei mo aŋa o kōrua i te meꞌe riva-riva ka ai atu mo te nuꞌu taꞌe a mātou he ꞌāpōtoro parautiꞌa o te Kiritō.

2 Kōrinto 6:8

E ai rō ꞌā te nuꞌu haka nui-nui i a mātou, ꞌe te nuꞌu parauꞌino mai. E ai rō ꞌā te nuꞌu vānaŋa riva-riva ꞌe te nuꞌu vānaŋa rake-rake o ruŋa i a mātou. A rāua he kī nō mai te aŋa i te mātou reo-reo, ka ai atu he parautiꞌa te mātou meꞌe kī.

2 Kōrinto 8:18

ꞌI muri i a Tito i uŋa atu ai a au i te taina e tahi. E vānaŋa riva-riva rō ꞌā o ruŋa i a ia te taina taꞌatoꞌa o Mātērōnia, he tano o tāꞌana aŋa he haka ꞌite i te ⌊roŋo riva-riva o te ꞌAtua⌋.

2 Kōrinto 8:21

Te meꞌe haŋa o mātou he aŋa riva-riva i te aŋa nei ki te mata o te ꞌAtua, ꞌe pē ira takoꞌa ꞌana ki te mata o te taŋata.

Karatia 5:22

ꞌE te meꞌe poreko ꞌi roto i te nuꞌu haka tere e te Vārua Maitai ko te ŋā meꞌe nei: he haŋa, he koa, he haumārū, he ꞌite mo haꞌaoromaꞌi, he huru riva, he māhatu ꞌaroha, he haka tano iŋa i te meꞌe kī,

Ēfeto 4:25

ꞌO ira, ꞌina ko reo-reo haka ꞌou; e kī te parautiꞌa ki te rua. Taꞌatoꞌa nō, paꞌi, a tātou o tū hakari ꞌā.

Ēfeto 5:9

ꞌE te meꞌe poreko mai te nuꞌu noho ꞌi roto i te māꞌeha he meꞌe riva-riva, tī-tika ꞌe parautiꞌa.

Ēfeto 6:14

E maꞌu hio-hio te parautiꞌa o te ꞌAtua pa he vaꞌehau e haratuꞌa ena i te pena mo haka noho i tōꞌona kahu ꞌi te hora oho ki te tamaꞌi. E tano te kōrua noho iŋa ki te mata o te ꞌAtua, ki riro ai rā noho iŋa he meꞌe mo hāpaꞌo atu i a kōrua pa he kahu aŋa hai ꞌaurī e hāpaꞌo ena i te uma o te vaꞌehau.

Fīripo 3:1

Te meꞌe hopeꞌa, e te taina ē, e koa ꞌo te ai o kōrua ꞌa Ietū Kiritō. Te kī te oho nō atu i te meꞌe ko kī atu era ꞌana e au taꞌe he ꞌati mōꞌoku; ko ꞌite ꞌana, paꞌi, e au he meꞌe mo hāꞌūꞌū atu i a kōrua.

Kōrosa 4:5

ꞌE ꞌi te hora taꞌatoꞌa e hāpaꞌo te kōrua noho iŋa ꞌi muꞌa o te nuꞌu taꞌe ⌊haka moe i te manaꞌu⌋ ꞌi ruŋa i a Ietū, ꞌo taꞌe haka au rō atu ꞌi te hora haŋa o kōrua mo vānaŋa ki a rāua o ruŋa i a Ietū.

1 Tētārōnika 4:12

Mo haka tere o kōrua i a kōrua hai ŋā meꞌe nei, he moꞌa atu te nuꞌu taꞌe haka moe i te manaꞌu ꞌi ruŋa i a Ietū ꞌi te takeꞌa i te kōrua noho iŋa tano, ꞌe ꞌina ia e ko ai kōrua pa he meꞌe paŋahaꞌa mo ꞌamo e te rua, he taꞌe hape o te kōrua meꞌe.

1 Timoteo 2:2

E pure mo te nuꞌu haka tere i te henua ꞌe mo te nuꞌu ra-rahi taꞌatoꞌa, ki noho riva-riva ai a tātou ꞌina e tahi ture, ki moꞌa ai ꞌe ki haꞌatura ai ki te ꞌAtua.

1 Timoteo 3:11

ꞌE te rāua ŋā viꞌe, e ai e moꞌa takoꞌa rō ꞌana e te taŋata, he ŋā viꞌe taꞌe haꞌaꞌino, hāito i te rāua meꞌe kī ꞌe i te rāua meꞌe aŋa, ꞌe he ŋā viꞌe haka tano i te rāua meꞌe kī.

1 Timoteo 3:4

ꞌite mo haka tere riva-riva i tōꞌona hare, ki haꞌatura ai ꞌe ki moꞌa ai e tāꞌana ŋā poki, ꞌe rā ŋā poki ꞌina ko ai e tahi hape.

1 Timoteo 4:12

E uꞌi ꞌo taꞌe haka au rō atu ꞌo te ai ōꞌou he taŋata ꞌāpī. Hai huru o tuꞌu vānaŋa ꞌe o tuꞌu noho iŋa, hai haŋa ōꞌou ki te rua, hai huru o tuꞌu haka moe iŋa i te manaꞌu ꞌi ruŋa i te ꞌAtua ꞌe hai noho iŋa hara kore ana haka takeꞌa ki te tētahi nuꞌu haka moe i te manaꞌu ꞌi ruŋa i a Ietū pē hē takoꞌa a rāua ana ai.

1 Timoteo 5:10

Te viꞌe nei he viꞌe ko ꞌite tahi ꞌana e te taŋata i tōꞌona huru riva, hāpaꞌo riva-riva i tāꞌana ŋā poki, hāpaꞌo i te nuꞌu tuꞌu ki tōꞌona hare, haka hopu i te vaꞌe o te nuꞌu haka moe i te manaꞌu ꞌi ruŋa i a Ietū, ꞌe hāꞌūꞌū ki te nuꞌu taꞌatoꞌa ai o te ꞌati. He viꞌe aŋa mau ꞌā a ia i te meꞌe haŋa o te ꞌAtua.

1 Timoteo 5:2

Ki te ŋā viꞌe paꞌari e moꞌa koe pa he matuꞌa vahine ōꞌou; ꞌe ki te ŋā viꞌe ꞌāpī e moꞌa ꞌe e haŋa pa he taina vahine ōꞌou.

Tito 1:8

E ai he taŋata haŋa mo toꞌo ꞌe mo hāpaꞌo i te nuꞌu tuꞌu ki tōꞌona hare, he taŋata aŋa i te meꞌe riva-riva mo te rua, haka topa riva-riva i te manaꞌu ꞌe aŋa i te meꞌe tī-tika, he taŋata māhatu maꞌitaki, ꞌite mo hāito i tāꞌana meꞌe kī ꞌe i tāꞌana meꞌe aŋa.

Tito 2:14

A Ietū, paꞌi, ko vaꞌai ꞌā i a ia ki te mate mo kore o te pūai o te hara mai ruŋa i a tātou, ki ai ai tātou he nuꞌu haꞌataꞌa māꞌana, ꞌina e tahi hara, ꞌe haŋa mo aŋa i te meꞌe riva-riva ki tōꞌona mata.

Tito 2:2

E hāpī ki te ŋāŋata paꞌari mo hāito i te rāua meꞌe kī ꞌe i te rāua meꞌe aŋa, mo haka tere i a rāua hai meꞌe tano ki moꞌa ai i a rāua e te taŋata, mo haka topa riva-riva i te manaꞌu, mo haŋa ki te rua hai māhatu, mo haka hio-hio i te rāua manaꞌu ki te roŋo parautiꞌa o te ꞌAtua, ꞌe mo haꞌaoromaꞌi i te ꞌati hai pūai.

Tito 2:7

ꞌE a koe, e Tito ē, e haka tere koe ꞌi te hora taꞌatoꞌa hai meꞌe tano, ki takeꞌa ai e te nuꞌu pē hē a rāua ana haka tere. E hāpī koe ki te taina hai parautiꞌa, hai pūai o tuꞌu māhatu,

Tito 3:14

Te nuꞌu o tātou e ꞌite mo aŋa i te meꞌe riva-riva ꞌe mo hāꞌūꞌū i te rua, ki hauhaꞌa ai te rāua noho iŋa ꞌi te ao nei.

ꞌEvereo 11:2

He haka moe o te tātou tupuna i te rāua manaꞌu ꞌi ruŋa i te ꞌAtua i tano ai ki tōꞌona mata.

ꞌEvereo 13:18

E te taina, e pure kōrua mo mātou. E ꞌite riva-riva rō ꞌana a mātou ꞌina e tahi mātou meꞌe taꞌe tano i aŋa ꞌo te ai te meꞌe haŋa nō o mātou mo aŋa he meꞌe riva-riva.

Tanatiako 1:27

Te haꞌamuri iŋa parautiꞌa ꞌe tano ki te mata o te ꞌAtua Matuꞌa ko te meꞌe ena: he hāꞌūꞌū ki te ŋā poki matuꞌa kore ꞌe ki te ŋā viꞌe hove ai o te rāua ꞌati, ꞌe, takoꞌa, he taꞌe hara hai meꞌe o te ao nei.

Tanatiako 3:17

ꞌE te nuꞌu mai te ꞌAtua te rāua ꞌite, te meꞌe raꞌe he noho iŋa taꞌe hara, ꞌe te rāua huru: haumārū, riva ꞌe ꞌite i te moꞌa. A rāua takoꞌa nuꞌu māhatu ꞌaroha, uꞌi i te taꞌatoꞌa pē tū huru tahi ꞌā, kī i te parautiꞌa, ꞌe aŋa i te meꞌe riva-riva.

1 Pētero 1:22

ꞌI te haꞌatura o kōrua ki te roŋo parautiꞌa i haka kore ai e te ꞌAtua i te kōrua hara, ki haŋa parautiꞌa ai kōrua ki te kōrua taina. ꞌO ira, e haŋa e oho ꞌi roto i a kōrua hai māhatu ꞌe hai pūai.

1 Pētero 2:12

E noho kōrua ꞌina e tahi hape ꞌi roto i te nuꞌu taꞌe haŋa ki te ꞌAtua. Mo noho o kōrua pē ira, he takeꞌa e rā nuꞌu i te meꞌe riva-riva aŋa e kōrua ꞌe he haꞌahana-hana ki te ꞌAtua ꞌi te mahana ka kī era e ia i te meꞌe tano ꞌe i te meꞌe taꞌe tano aŋa e te taŋata, ka ai atu ꞌi te hora nei e kī rō ꞌana e rāua pē nei ē: a kōrua he nuꞌu aŋa i te meꞌe taꞌe tano.

1 Pētero 4:8

ꞌI roto i a kōrua te meꞌe mo raꞌe he here he haŋa ki te rua. Mo haŋa, paꞌi, o tātou ki te rua hai māhatu, meꞌe taꞌe aŋarahi ia te meꞌe ena he haka rehu i te meꞌe taꞌe tano aŋa mai e te rua, ka ai atu meꞌe rahi.

2 Pētero 3:1

E te taina, he rua parau nei ꞌāꞌaku e pāpaꞌi atu ena. ꞌE hai ŋā parau nei i haŋa ai a au mo haka tī-tika atu i te kōrua manaꞌu.

1 Iovani 3:18

E te ŋā poki ꞌāꞌaku ē, ꞌina ko ai te tātou haŋa ki te rua hai haha nō; te tātou haŋa e haka takeꞌa hai meꞌe riva-riva aŋa e tātou.

1 Iovani 3:3

ꞌE taꞌatoꞌa nuꞌu tiaki ki te hoki iŋa mai o Ietū Kiritō, e haka tapa rō ꞌana mai roto i te hara, mo riro o rāua pē Ietū Kiritō, he taŋata hara kore.

1 Iovani 4:1

E te taina, ꞌina kōrua ko manaꞌu he parautiꞌa te vānaŋa o te nuꞌu taꞌatoꞌa kī e vānaŋa ꞌana a rāua i te meꞌe haka vānaŋa e te ꞌAtua. Te meꞌe o kōrua mo aŋa he haka ꞌatu ana ai te vārua era ꞌi roto i a rāua o te ꞌAtua mau ꞌā; e rahi rō ꞌana, paꞌi, te perofeta reo-reo ꞌi te ao.