Fīripo 3:19 - Rapa Nui

¹⁹ Te meꞌe hopeꞌa ka topa era ki te nuꞌu era he ūtuꞌa o te ꞌAtua. He meꞌe pohe nō o te hakari te rāua ꞌatua. Te meꞌe haꞌamā he meꞌe teꞌo-teꞌo e tahi o rāua, ꞌe te rāua manaꞌu ꞌi ruŋa i te meꞌe o te ao mau nō nei.

Fīripo 3:19 ပူးပေါင်းရင်းမြစ်များ

Māteo 16:23

He rori e Ietū he kī ki a Pētero: —¡Ka haka tapa koe mai muri i a au! ¡E haka ꞌaka-ꞌaka ꞌā koe i tōꞌoku manaꞌu pē Rukifero ꞌā! ꞌIna koe he manaꞌu pa he manaꞌu o te ꞌAtua, a koe e manaꞌu ena hai manaꞌu taŋata.

Māteo 25:41

»Ki oti ka kī era e te ꞌAriki ki te nuꞌu o tōꞌona pāꞌiŋa maui: “Ka haka tapa kōrua mai muri i a au ꞌe ka oho, e te nuꞌu tohu e te ꞌAtua ē, ki roto i te ahi ꞌina he mate ki te hora hopeꞌa aŋa mo Rukifero koia ko tāꞌana tātane.

Ruka 12:19

Ki oti ka kī nei a au ki a au ꞌā: E hoa, meꞌe rahi taꞌa meꞌe hāpaꞌo ena mo te rahi o te matahiti. Ka haka ora ꞌi te hora ena, ka kai, ka unu ꞌe ka koa”.

Ruka 16:19

»E ai rō ꞌā e tahi taŋata ꞌono; e uru era hai kahu hopeꞌa o te riva-riva. Paurō te mahana e aŋa era i te ŋoŋoro nui-nui.

Ruka 18:4

»Meꞌe rahi te mahana o rā viꞌe i oho mo vānaŋa ki rā taŋata, ꞌe ꞌina he haŋa mo haka roŋo i tāꞌana ture. He manaꞌu ia e rā taŋata: “Kope taꞌe moꞌa a au i te ꞌAtua ꞌe taꞌe haŋa ki te taŋata.

Rōmano 16:18

A rāua, paꞌi, taꞌe he tāvini o te tātou Pūꞌoko Haka Tere he Kiritō; he tāvini o te meꞌe pohe ꞌe haŋa nō o rāua. Hai vānaŋa koroꞌiti ꞌe reka e reo-reo ena ki te nuꞌu māhatu rehe-rehe taꞌe manaꞌu e aŋa rō ꞌō e te rua i te meꞌe taꞌe tano ki a rāua.

Rōmano 6:21

ꞌI rā hora, ¿i ravaꞌa rō hō e kōrua i te meꞌe riva-riva o te hara, meꞌe haka haꞌamā i a kōrua ꞌi te hora nei ꞌe maꞌu i a kōrua ki te mate?

1 Kōrinto 3:3

Ko te manaꞌu iŋa ꞌana kōrua pa he taŋata o te ao taꞌe ⌊haka moe i te manaꞌu⌋ ꞌi ruŋa i a Ietū. Hai mākota ꞌe hai tātake e takeꞌa ena ko te manaꞌu iŋa ꞌana kōrua hai manaꞌu taŋata, ꞌe o rā manaꞌu te haka tere i a kōrua.

1 Kōrinto 5:2

Ka ai atu pē ira, ko te teꞌo-teꞌo iŋa ꞌā a kōrua pē nei ē: ko ꞌite riva-riva ꞌana a kōrua i te meꞌe o te ꞌAtua. Te tano mau: e māui-ui te kōrua māhatu ꞌi te meꞌe tuꞌu pē nā. Te taŋata aŋa i te meꞌe tuꞌu pē nei e haka eꞌa mai roto i a kōrua.

1 Kōrinto 5:6

E ko tano kōrua mo teꞌo-teꞌo. E kī rō ꞌana, paꞌi: «E tahi ꞌapa ꞌiti-ꞌiti o te revaura he ahu tahi te haraoa». Pē ira takoꞌa ꞌana hai taŋata mau nō e tahi e hara nō meꞌe rahi nō atu nuꞌu.

2 Kōrinto 11:12

ꞌE, e ko haka kore a au i tōꞌoku haka tere iŋa nei he taꞌe no-noꞌi atu hai moni, ꞌo teꞌo-teꞌo tū nuꞌu tuꞌu atu ena ki a kōrua pē nei ē: e aŋa rō ꞌana a rāua pa he aŋa iŋa nei ꞌā o mātou.

2 Kōrinto 11:15

ꞌE mo aŋa o Rukifero i te meꞌe tuꞌu pē ira, taꞌe ia he meꞌe mo māere te haka tuꞌu o te nuꞌu aŋa ki a ia pa he nuꞌu tano aŋa ki te ꞌAtua. Te meꞌe ka topa ena ki te nuꞌu pē nei he ūtuꞌa tano ki te rāua meꞌe aŋa.

Karatia 6:13

Te parautiꞌa, ꞌina e tahi nuꞌu haꞌatura ki te roŋo taꞌatoꞌa o te ⌊haka tere iŋa ꞌa Mōtē⌋, ꞌātā te nuꞌu hore i te kiri o te kinoŋa. E haŋa ena a rāua mo hore o kōrua i te kiri o te kinoŋa mo teꞌo-teꞌo pē nei ē: ko ravaꞌa ꞌana ꞌō e rāua mo maꞌu e kōrua i te tāpaꞌo ena ꞌi ruŋa i te kōrua hakari.

Fīripo 2:21

Te tētahi te meꞌe manaꞌu raꞌe he riva-riva o rāua, taꞌe ꞌō he aha te meꞌe haŋa ꞌa Ietū.

Kōrosa 3:2

Te kī: e haŋa mo riro o te kōrua noho iŋa, noho iŋa tano o te taŋata ka noho ena ꞌi te raŋi, taꞌe ꞌō pa he noho iŋa o te nuꞌu o te ao nei taꞌe haŋa ki te ꞌAtua.

2 Tētārōnika 1:9

Te ūtuꞌa mo te nuꞌu era he ūtuꞌa ꞌina he hopeꞌa raꞌa. ꞌI te mahana ka tuꞌu mai ena mai te raŋi te tātou Pūꞌoko Haka Tere e toꞌo rō i rā nuꞌu e haka ꞌava-ꞌava rō, ꞌo oꞌo ki roto i tōꞌona pūai nui-nui ꞌana-ꞌana. ꞌE a tātou, te nuꞌu haꞌataꞌa taꞌatoꞌa e te ꞌAtua māꞌana, nuꞌu haka moe i te manaꞌu ꞌi ruŋa i a Ietū, e haꞌahana-hana tahi rō ki a ia ꞌe e māere rō ꞌi te meꞌe taꞌatoꞌa aŋa e ia mo tātou. ꞌE, ꞌi te haka moe o kōrua i te manaꞌu ꞌi ruŋa i te meꞌe hāpī atu era e mātou, a tātou taꞌatoꞌa o roto o te nuꞌu haꞌahana-hana ki a ia.

2 Tētārōnika 2:12

ki haka ūtuꞌa ai e te ꞌAtua i te nuꞌu taꞌatoꞌa taꞌe haŋa mo ⌊haka moe i te manaꞌu⌋ ꞌi ruŋa i te roŋo parautiꞌa, nuꞌu haŋa mau nō mo aŋa i te meꞌe taꞌe tano.

2 Tētārōnika 2:8

Ki toꞌo, ka takeꞌa iho ena e te nuꞌu i rā taŋata riri taparahi-taꞌata era mo te ꞌAtua, kope ka haka kore ena e te tātou Pūꞌoko Haka Tere hai reꞌo ōꞌona ꞌe hai ꞌana-ꞌana o tōꞌona mana ꞌi te hora ka hoki mai ena.

1 Timoteo 6:5

ꞌe te rava ture ꞌi roto i te nuꞌu ꞌina he manaꞌu riva-riva toe ꞌe ꞌina he aŋi-aŋi haka ꞌou he aha te meꞌe he parautiꞌa ꞌe he aha te meꞌe he reo-reo. Mo rāua te hāpī o ruŋa i te ꞌAtua he rāveꞌa e tahi mo ꞌono.

2 Timoteo 3:4

E riro takoꞌa rō a rāua he taŋata hoꞌo i te rua, aŋa i te meꞌe ꞌina he manaꞌu hia, ꞌe haka paka i a rāua. ꞌE te meꞌe mau nō ka kimi era he reka, taꞌe he ꞌAtua.

Tanatiako 4:16

ꞌE a kōrua ko te haka paka iŋa ꞌana ꞌi te kōrua meꞌe aŋa. Te vānaŋa iŋa pē nā vānaŋa iŋa taꞌe tano.

2 Pētero 2:1

I ai rō te perofeta reo-reo ꞌi roto i te itaraera. Pē ira takoꞌa ꞌana ka ai ena te maꞌori reo-reo ꞌi roto i a kōrua. ꞌĒ-ē, e oꞌo rō atu ki roto i a kōrua, mā te taꞌe ꞌite e kōrua, ꞌe e hāpī e oho rō i te hāpī taꞌe parautiꞌa maꞌu i te taina mo haka tapa mai te ara parautiꞌa o te ꞌAtua. ꞌE te ŋā maꞌori reo-reo nei ꞌātā e hārui rō hai tuaꞌivi i te tātou Pūꞌoko Haka Tere ko Ietū Kiritō, kope ꞌauhau hai toto era ōꞌona mo haka eꞌa i a tātou mai roto i te hara. ꞌE, ꞌi te aŋa pē ira, e ko roa hia ka ravaꞌa ena e rāua i te ūtuꞌa o te ꞌAtua.

2 Pētero 2:13

koia ko ꞌamo i te ꞌati, he ꞌauhau o te meꞌe taꞌe tano i aŋa ki te tētahi. E koa rō ꞌana i te vaꞌai i a rāua ki te noho iŋa taꞌe tano ꞌātā ꞌi te ꞌōtea, ꞌe ꞌina he haꞌamā haka ꞌou. A rāua, ꞌi te hora hokorua atu ꞌi te kōrua ŋoŋoro, he ꞌati ꞌe he haꞌamā e tahi ꞌi te meꞌe taꞌe tano ꞌe reo-reo aŋa oho e rāua mo reka.

2 Pētero 2:3

ꞌI te nou-nou o te ŋā maꞌori reo-reo era, he uꞌi i te rāveꞌa mo ꞌata toꞌo i te moni mai i a kōrua hai hāpī reo-reo o rāua, hāpī poreko ꞌi roto i te rāua manaꞌu mau nō era. ꞌE mo te nuꞌu ena, ko ai era ꞌana te ūtuꞌa o te ꞌAtua mai muꞌa ꞌā, ꞌe a ia e ko taꞌe haka ūtuꞌa i a rāua.

Hura 1:10

ꞌE nā ia te nuꞌu oꞌo atu ena ki roto i a kōrua e vānaŋa taꞌe tano ꞌā mo te meꞌe ꞌina e rāua kai ꞌite. Te meꞌe ꞌite mau nō o rāua he meꞌe kī e te hakari, pa he oho iŋa o te ꞌanimare, ꞌe hai nei meꞌe e tiŋaꞌi e oho ena i a rāua.

Hura 1:16

Te nuꞌu ena he riri-riri nō te aŋa mo te meꞌe taꞌatoꞌa, ꞌina e tahi meꞌe tano mo rāua, te meꞌe haŋa mau nō he haka koa i a rāua. Te vānaŋa iŋa e haka tuꞌu rō ꞌana pa he meꞌe ena ē: i a rāua mau nō te tano, ꞌe te aŋa he haka paka i te tētahi mo ravaꞌa nō i te meꞌe mai i a rāua.

Hura 1:4

Nā, paꞌi, hai reo-reo ko oꞌo ꞌana ki roto i te nūnaꞌa taŋata ⌊haka moe i te manaꞌu⌋ ꞌi ruŋa i a Ietū te nuꞌu haka ꞌite mai era ꞌi ruŋa i te ⌊Pāpaꞌi Moꞌa⌋ e ai rō ꞌā te ūtuꞌa mo rāua. Te nuꞌu nei he nuꞌu taparahi-taꞌata toꞌo i te riva rahi o te tātou ꞌAtua pa he ꞌōtohe mo aŋa i te meꞌe haŋa nō e te rāua hakari, ꞌe ꞌina he haŋa ki te tātou Pūꞌoko Haka Tere ko Ietū Kiritō.

Meꞌe Haka Takeꞌa 18:7

Ka vaꞌai hai ꞌati ꞌe hai māui-ui ki roto i te ivi, pa he rahi o te teꞌo-teꞌo iŋa ōꞌona, ꞌe pa he rahi o te reka ꞌe o te koa ŋaroꞌa e ia ꞌi tōꞌona noho iŋa era ꞌina he meꞌe haŋa toe. Te viꞌe era he kī nō te aŋa ꞌi roto i tōꞌona māhatu: “A au e noho nei ꞌi te kona nei pa he ꞌariki; taꞌe a au he hove, ꞌe e ko topa mai te ꞌati ki a au”.

Meꞌe Haka Takeꞌa 19:20

Te manuꞌino nei ko ꞌa-ꞌaru ꞌā, ꞌe ko ꞌa-ꞌaru takoꞌa ꞌā tū perofeta reo-reo aŋa era ꞌi muꞌa i rā manuꞌino i te mana ꞌe i te tētahi atu meꞌe mo māere o te taŋata. Hai ŋā meꞌe nei i haka rē ai te nuꞌu i a rāua mo tāpaꞌo hai tāpaꞌo o te manuꞌino, ꞌe i haꞌamuri ai i te ꞌītoro aŋa pē ia. I oho era he toꞌo mai he hoa ora i rā manuꞌino ꞌe i rā perofeta reo-reo era ki roto i te pōꞌauahi, kona ꞌi ira e ura ena te azufre.

Meꞌe Haka Takeꞌa 21:8

ꞌE te nuꞌu riꞌa-riꞌa mo kī ꞌāꞌaku a rāua, te nuꞌu taꞌe haka moe oho i te rāua manaꞌu ꞌi ruŋa i a au, te nuꞌu aŋa i te meꞌe taꞌe tano hano-hano, te nuꞌu tiŋaꞌi haka mate i te rua, te nuꞌu moe i te viꞌe i te taŋata taꞌe he viꞌe he kenu o rāua, te nuꞌu aŋa i te tahu-tahu, te nuꞌu haꞌamuri ki te ꞌītoro ꞌe te nuꞌu reo-reo taꞌatoꞌa, he hoa ki te kona ꞌi ira e ura ena te azufre mo noho mau rō ꞌāvai ꞌi ira e ꞌava-ꞌava rō ꞌana mai i a au. Ko te meꞌe nei te rua mate iŋa».

Meꞌe Haka Takeꞌa 22:15

ꞌE te nuꞌu aŋa i te meꞌe taꞌe tano hano-hano, te nuꞌu aŋa i te tahu-tahu, te nuꞌu moe i te viꞌe i te taŋata taꞌe he viꞌe he kenu o rāua, te nuꞌu tiŋaꞌi haka mate i te rua, te nuꞌu haꞌamuri ki te ꞌītoro, ꞌe te nuꞌu taꞌatoꞌa te rāua meꞌe aŋa mau nō he reo-reo ꞌi haho ka noho ena.