Fīripo 2:16 - Rapa Nui

¹⁶ koia ko haka ꞌite ko oho i te vānaŋa o te ꞌAtua ki a rāua, vānaŋa vaꞌai i te ora ꞌāpī ꞌina he hopeꞌa raꞌa. Mo aŋa o kōrua pē ira, he koa a au mo kōrua ꞌi te hora o Ietū ka hoki mai ena ꞌo te ꞌite ōꞌoku pē nei ē: tāꞌaku aŋa aŋa atu ꞌi roto i a kōrua kai māuꞌa.

Fīripo 2:16 ပူးပေါင်းရင်းမြစ်များ

Māteo 10:27

ꞌO ira, te meꞌe kī atu e au ki a kōrua nō ka ꞌaꞌamu ki te nuꞌu taꞌatoꞌa; ꞌe te meꞌe kī koroꞌiti atu e au ka tātara ka haka ꞌite ki te nuꞌu taꞌatoꞌa.

Ruka 12:8

»ꞌĪ a au he kī atu: te kope kī ꞌi muꞌa i te taŋata e haŋa rō mai ꞌana ki a au, pē ira takoꞌa ꞌana a au, te ⌊Poki o te taŋata⌋, ka kī ena mōꞌona ꞌi muꞌa o te merahi o te ꞌAtua.

Iovani 6:63

ꞌĪ a au he kī atu: o te ⌊Vārua Maitai⌋ te vaꞌai i te ora ꞌāpī; taꞌe hai haŋu taŋata ana ravaꞌa. Te meꞌe vānaŋa atu era e au o te Vārua Maitai, ꞌe hai rā vānaŋa e vaꞌai ena e ia i te ora ꞌāpī ki te taŋata.

Iovani 6:68

He pāhono e Tīmona, kī takoꞌa ko Pētero: —E Ietū, ¿ki a ai era a mātou ana oho? I a koe mau nō, paꞌi, te vānaŋa mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.

Aŋa o te ꞌĀpōtoro 13:26

»E tōꞌoku taina haka ara takoꞌa mai i a ⌊ꞌAparahama⌋ ꞌe e te taŋata o te rua henua moꞌa i te ꞌAtua ē: te roŋo riva-riva o te eꞌa iŋa o te taŋata mai roto i te ūtuꞌa o te hara ꞌe te ravaꞌa iŋa i te ora ꞌāpī ꞌina he hopeꞌa raꞌa mo tātou taꞌatoꞌa.

1 Kōrinto 1:8

Mo te ꞌAtua e haka pūai i te kōrua haka moe iŋa i te manaꞌu ꞌi ruŋa i a Ietū ꞌātā ki te hopeꞌa, ꞌo ai te hape mo tuhi iŋa atu ꞌi te hora o tōꞌona hoki iŋa mai.

1 Kōrinto 9:26

ꞌO ira a au e aŋa nei i tāꞌaku aŋa pa he kope ꞌāꞌati te meꞌe manaꞌu mau nō he tuꞌu ki te kona haka mao o te ꞌāꞌati, ꞌe, takoꞌa, pa he kope moto ꞌina he haka māuꞌa i tōꞌona rima ana ava ki te rua.

2 Kōrinto 1:14

i te mātou māhatu ꞌe i te mātou meꞌe aŋa, ki koa ai kōrua mo mātou, ꞌe pē ira takoꞌa ꞌana a mātou mo kōrua ꞌi te hora o te hoki iŋa mai o te tātou Pūꞌoko Haka Tere ko Ietū.

Karatia 2:2

I oho ai a au ꞌo te ai ko kī mai ꞌana e te ꞌAtua mo oho ōꞌoku. ꞌI ira i haka ꞌite ai a au ki te nuꞌu mau nō era ko rāua te pūꞌoko haka tere o te taina o Hērutarema o ruŋa i tāꞌaku roŋo hāpī ki te nuꞌu taꞌe he hūrio, mo aŋi-aŋi riva-riva e rāua: te meꞌe hāpī ꞌāꞌaku he parautiꞌa, ꞌo taꞌe hauhaꞌa rō tāꞌaku aŋa ka hopeꞌa ena.

Karatia 4:11

¿Ka kī ꞌō tū aŋa taꞌatoꞌa era ꞌāꞌaku ꞌi roto i a kōrua ko māuꞌa tahi ꞌā?

Fīripo 1:10

ki aŋa ki oho ai kōrua i te meꞌe riva-riva mau nō. Pē ira he tano te kōrua noho iŋa ki te mata o te ꞌAtua, ꞌe he oho mau rō ꞌai kōrua pē ira ꞌina e tahi hape ꞌātā ki te hoki iŋa mai o Ietū.

Fīripo 1:6

O te ꞌAtua, paꞌi, i haꞌamata i aŋa i te meꞌe riva-riva ꞌi roto i a kōrua ꞌi te hora haka moe o kōrua i te manaꞌu ꞌi ruŋa i a Ietū. ꞌE, ko ꞌite riva-riva ꞌana e au he aŋa he oho rō ꞌai i nei aŋa ꞌātā ka oti rō ꞌi te mahana o te hoki iŋa mai o Ietū Kiritō.

1 Tētārōnika 2:19

Ka ai atu pē ira, ko te haŋa iŋa ꞌana a mātou mo hoki atu, he ꞌite o mātou he haka moe he oho mau rō ꞌai kōrua i te manaꞌu ꞌi ruŋa i a Ietū. Te meꞌe nei he koa e tahi mo mātou. ꞌE ꞌi te hora o tātou ka tuꞌu ena ki muꞌa o te tātou Pūꞌoko Haka Tere ko Ietū Kiritō, ꞌi te mahana o tōꞌona hoki iŋa mai, he koa a mātou mo kōrua ꞌe mo te hauhaꞌa o te mātou aŋa ꞌi roto i a kōrua.

1 Tētārōnika 3:5

ꞌO ira, ꞌi te niva-niva o mātou ꞌo te taꞌe ꞌite mai hoki e haka moe e oho nō ꞌana kōrua i te manaꞌu ꞌi ruŋa i a Ietū, i uŋa atu ai au i a Timoteo mo ꞌite mai o ruŋa i a kōrua. Tōꞌoku riꞌa-riꞌa: ꞌo hoa kōrua i te kōrua haka moe iŋa i te manaꞌu ꞌi ruŋa i a Ietū ka haka ꞌatu atu ena i a kōrua e Rukifero, ꞌe ꞌo māuꞌa te mātou aŋa ꞌi roto i a kōrua.

ꞌEvereo 4:12

Te vānaŋa o te ꞌAtua vānaŋa ora ꞌe vānaŋa pūai. ꞌAta hau rō atu ꞌi te kaꞌi-kaꞌi ki te hoe kaꞌi-kaꞌi ararua pāꞌiŋa. E oꞌo ena ki roto nui atu era o te māhatu ꞌe o te vārua, ꞌe ꞌātā ki te kona hopeꞌa mau era o te manaꞌu taŋata, ꞌe ꞌāꞌana te haka ꞌite i te manaꞌu ꞌe i te meꞌe haŋa mau o te māhatu.

1 Pētero 1:23

A kōrua, paꞌi, ko poreko haka ꞌou mai ꞌana, ꞌe taꞌe mai roto i te taŋata, he meꞌe e mate nō, mai roto i te vānaŋa o te ꞌAtua, he meꞌe ora ꞌe ꞌina e ko mate ki te hora hopeꞌa.

1 Iovani 1:1

ꞌĪ a au he pāpaꞌi atu o ruŋa i te Vānaŋa i a ia te ora ꞌāpī ꞌina he hopeꞌa raꞌa. A ia ko ai era ꞌā ꞌi raꞌe ki te haꞌamata iŋa o te ao, ꞌe, ka ai atu pē ira, i takeꞌa rō ꞌe i ŋaroꞌa rō e mātou i a ia. He aŋi ꞌā, ko takeꞌa ꞌā ꞌe ko haka puā ꞌā e mātou.

Meꞌe Haka Takeꞌa 22:17

Te ⌊Vārua Maitai⌋ ꞌe te viꞌe hāipo-ipo o te Māmoe pē nei e kī ena: «¡Ka oho mai!». ꞌE te kope ŋaroꞌa i te meꞌe nei, ka kī: «¡Ka oho mai!». ꞌE te kope pohe ki te vai ꞌe haŋa mo unu, ka oho mai ka unu i te vai taꞌe e ꞌauhau vaꞌai i te ora ꞌāpī ꞌina he hopeꞌa raꞌa.