ꞌEvereo 7:27 - Rapa Nui

²⁷ A ia taꞌe pe he tētahi ŋā oromatuꞌa ra-rahi ena, tiŋaꞌi i te ꞌanimare paurō te mahana mo tūtia ki te ꞌAtua mo haka maꞌitaki i tōꞌona hara ꞌi raꞌe, ki tano iho ai mo tūtia i te ꞌanimare ki te ꞌAtua mo te hara o te taꞌatoꞌa. Taꞌe pē ira a Ietū. E tahi mau nō tūtia i aŋa e ia hora vaꞌai era i a ia mo mate ꞌi ruŋa i te tātaurō, ꞌe rā tūtia mo te hora taꞌatoꞌa.

ꞌEvereo 7:27 ပူးပေါင်းရင်းမြစ်များ

Rōmano 6:10

I mate ai, paꞌi, te Kiritō mo rē mau rō ꞌāvai ki te pūai o te hara, ꞌe, hora nei, tōꞌona ora iŋa ꞌāpī mo haka nui-nui mau nō i te ꞌAtua.

Ēfeto 2:22

ꞌE a kōrua, ꞌo te ai ꞌa Ietū Kiritō takoꞌa, e toꞌo ena i a kōrua e te ꞌAtua ꞌe e titi ena ki ruŋa i rā hare, he kona ꞌi ira a ia e noho ena hai Vārua Maitai.

Ēfeto 5:2

E haka rē mo te haŋa e haka tika atu, pa he meꞌe aŋa e Ietū hora vaꞌai era i a ia ki te mate mo tātou. ꞌE tōꞌona mate era, mo te ꞌAtua, pa he tūtia ꞌeo.

Tito 2:14

A Ietū, paꞌi, ko vaꞌai ꞌā i a ia ki te mate mo kore o te pūai o te hara mai ruŋa i a tātou, ki ai ai tātou he nuꞌu haꞌataꞌa māꞌana, ꞌina e tahi hara, ꞌe haŋa mo aŋa i te meꞌe riva-riva ki tōꞌona mata.

ꞌEvereo 5:1

Te ⌊oromatuꞌa hopeꞌa o te ra-rahi⌋ e toꞌo ena mo vānaŋa ki te ꞌAtua mo te taꞌatoꞌa, mo vaꞌai ki te ꞌAtua i te meꞌe haꞌataꞌa e rāua māꞌana ꞌe mo aŋa i te tūtia mo te rāua hara.

ꞌEvereo 5:3

ꞌE ꞌo ira takoꞌa, ꞌi te hora aŋa i te tūtia mo te hara o te taŋata, e aŋa ena i te tūtia mo te rāua hara.

ꞌEvereo 8:4

ꞌĀhani a ia ꞌi te ao nei, e ko oromatuꞌa; e ai rō ꞌana, paꞌi, te oromatuꞌa o te ao nei vaꞌai i te meꞌe mo te ꞌAtua, pa he meꞌe kī e te ⌊haka tere iŋa ꞌa Mōtē⌋.

ꞌEvereo 9:12

E tahi mau nō oꞌo iŋa o Ietū ki te Kona ꞌAta Moꞌa parautiꞌa ꞌi te raŋi mo te hora taꞌatoꞌa, ꞌe kai maꞌu i te toto o te vato-vato ꞌe o te puaꞌa mo tūtia ki te ꞌAtua. I tūtia ai hai toto mau era ꞌā ōꞌona, ꞌe hai toto era ōꞌona i ravaꞌa ai mo haka eꞌa mau rō ꞌai i a tātou mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa.

ꞌEvereo 9:14

ꞌE mo ai o te pūai o te ŋā meꞌe era mo haka maꞌitaki i te taŋata, ¡ka manaꞌu atu ia kōrua pē hē te pūai o te toto o Ietū Kiritō! Hai Vārua Maitai, paꞌi, i vaꞌai ai e Ietū i a ia ki te ꞌAtua pa he tūtia ꞌina e tahi hape. ꞌE te meꞌe haka maꞌitaki hai toto ōꞌona he manaꞌu taꞌe tano o tātou o te taŋata maꞌu i a tātou ki te mate, ki riva ai tātou mo tāvini ki te ꞌAtua, tōꞌona ora ꞌina he hopeꞌa raꞌa.

ꞌEvereo 9:25

ꞌE taꞌe i oꞌo ai mo vaꞌai mo oho i a ia pa he tūtia te matahiti te matahiti, pa he meꞌe aŋa e te oromatuꞌa hopeꞌa o te ra-rahi hora uru o rāua ki te Kona ꞌAta Moꞌa tūtia i te toto o te ꞌanimare.

ꞌEvereo 9:26

ꞌĀhani, paꞌi, i ai pē ira, ko ai ꞌana meꞌe rahi nō atu mate iŋa o Ietū mai te hora aŋa era e te ꞌAtua i te ao. ꞌE te parautiꞌa mau, hora nei, he hora hopeꞌa, ko tuꞌu mai ꞌā a ia ki te ao nei ꞌe ko vaꞌai ꞌā i a ia, mo te hora taꞌatoꞌa, pa he tūtia mo haka kore mau rō ꞌai i te pūai o te hara mai ruŋa i a tātou.

ꞌEvereo 9:28

Pē ira takoꞌa a Ietū Kiritō: e tahi mau nō vaꞌai iŋa i a ia mo mate pa he tūtia mo haka kore i te hara o te nuꞌu. ꞌE pe muꞌa ka oho ena he tuꞌu haka ꞌou mai a Ietū taꞌe ꞌō mo vaꞌai haka ꞌou i a ia pa he tūtia mo te hara o te taŋata, mo vaꞌai ki te nuꞌu tiaki ki a ia i te ora ꞌāpī ꞌina he hopeꞌa raꞌa.

ꞌEvereo 9:7

ꞌE, ꞌi te rua piha, he Kona ꞌAta Moꞌa, he oromatuꞌa hopeꞌa o te ra-rahi mau nō te meꞌe mo uru ki roto e tahi nō mahana ꞌi te matahiti. E uru era, e maꞌu rō ꞌā i te toto ꞌanimare mo tūtia ki te ꞌAtua mo tōꞌona hara ꞌe mo te hara aŋa e te taŋata mā te taꞌe ꞌite e rāua.