ꞌEvereo 11:7 - Rapa Nui

⁷ He haka moe o Nōē i te manaꞌu ꞌi ruŋa i te ꞌAtua i aŋa ai i te pahī ꞌo mate tāꞌana huaꞌai hora kī era e te ꞌAtua e topa rō te meꞌe kai takeꞌa hia ꞌā e te mata o te taŋata. ꞌE ꞌi tōꞌona haꞌatura ki te ꞌAtua i takeꞌa ai: te taŋata taꞌatoꞌa o rā hora e aŋa rō ꞌana i te meꞌe taꞌe tano, ꞌe e tano rō ꞌana mo haka ūtuꞌa e te ꞌAtua. ꞌE a Nōē i tano ai ki te mata o te ꞌAtua ꞌo te haka moe i tōꞌona manaꞌu ꞌi ruŋa i a ia.

ꞌEvereo 11:7 ပူးပေါင်းရင်းမြစ်များ

Māteo 2:12

I oti era he hoki ananake ki te rāua henua a te ara kē ꞌo te ai ko haka ꞌite ꞌā e te ꞌAtua, ꞌi roto i te moe vārua, mo taꞌe hipa ki a ꞌErore.

Māteo 24:15

»Te perofeta era ko Taniera ko pāpaꞌi ꞌana o ruŋa o te kope ko ia te meꞌe ka hano-hano ꞌe ka ꞌenemī ena e te ꞌAtua. Ka takeꞌa ena e kōrua te māroa iŋa o rā kope ꞌi te kona moꞌa, te auraꞌa, ꞌi te Kona Haꞌamuri ꞌAtua (te kope taiꞌo, ¡e aŋi-aŋi!),

Māteo 24:25

E uꞌi e hāpaꞌo kōrua. Nā ko haka ꞌite atu ꞌana e au ꞌi raꞌe ki te topa iŋa mai o rā ŋā meꞌe.

Māteo 24:38

ꞌI te ŋā mahana era kai topa ꞌā te ꞌati o te ꞌua ꞌātā ki te mahana eke o Nōē ki ruŋa i te pahī, te taŋata e kai nō ꞌana, e unu nō ꞌā ꞌe e ⌊hāipo-ipo⌋ nō ꞌā.

Māteo 3:7

I takeꞌa era e Iovani meꞌe rahi te ⌊fariseo⌋ ꞌe te ⌊saruseo⌋ i tuꞌu mo papatito, he kī: «¡E te huaꞌai o te kōreha veneno ē! ¿ꞌA ꞌai i kī atu he eꞌa kōrua mai roto i te ūtuꞌa nui-nui ena ko hāhine mai ꞌā?

Ruka 17:26

»ꞌE te noho iŋa o te taŋata ꞌi te ŋā mahana era ko hāhine ꞌā mo hoki mai o te Poki o te taŋata, pa he noho iŋa ꞌā o te nuꞌu ꞌi te hora o Nōē.

Rōmano 1:17

Hai roŋo nei te ꞌAtua e haka ꞌite ena pē hē te taŋata haŋa mo haka hāhine ki a ia e tano ena ki tōꞌona mata: hai haka moe i te manaꞌu ꞌi ruŋa i a Ietū, he oti mau ꞌā. E hāꞌaki ena, paꞌi, ꞌi ruŋa i te Pāpaꞌi Moꞌa: «Te taŋata tano ki te mata o te ꞌAtua ꞌi te haka moe i te manaꞌu ꞌi ruŋa i a ia he ravaꞌa i te ora ꞌāpī ꞌina he hopeꞌa raꞌa».

Rōmano 10:6

ꞌE e ai takoꞌa rō ꞌana te meꞌe i haka pāpaꞌi e te ꞌAtua o ruŋa i te meꞌe he tano o te taŋata ki tōꞌona mata hai haka moe i te manaꞌu ꞌi ruŋa i te ⌊Kiritō⌋, ꞌe o rā meꞌe te haka ꞌite mai: meꞌe taꞌe aŋarahi te ai ōꞌou e tano rō ꞌā ki te mata o te ꞌAtua hai haka moe i te manaꞌu ꞌi ruŋa i te Kiritō. Pē nei i pāpaꞌi ai: «ꞌIna koe ko kī ꞌi roto i a koe: “Mo haka moe ōꞌou i tuꞌu manaꞌu ꞌi ruŋa i te Kiritō, e iri ꞌi raꞌe e tahi kope ki te raŋi mo haka topa mai o te Kiritō mo haka ꞌite atu i tāꞌana roŋo”.

Rōmano 3:22

hai ⌊haka moe i te manaꞌu⌋ ꞌi ruŋa i a Ietū Kiritō. Mo te ꞌAtua taꞌatoꞌa taŋata haka moe i te manaꞌu ꞌi ruŋa i a Ietū he taŋata tano ki tōꞌona mata. Mōꞌona te nuꞌu, ka hūrio ka taꞌe hūrio, ko tū meꞌe ꞌā:

Rōmano 4:11

Te parautiꞌa, ko kī era ꞌā te ꞌAtua i rā meꞌe i hore iho ai te kiri o te kinoŋa o ꞌAparahama, pa he tāpaꞌo o tū meꞌe kī era e te ꞌAtua o ruŋa i a ia. Pē ira a ꞌAparahama i ai ai he matuꞌa o te nuꞌu taꞌatoꞌa haka moe i te manaꞌu ꞌi ruŋa i te ꞌAtua, nuꞌu e tano takoꞌa rō ꞌā ki te mata o te ꞌAtua, ka ai atu kai hore te kiri o te kinoŋa.

Rōmano 4:13

Hora hōrea era e te ꞌAtua ki a ꞌAparahama ꞌe ki tōꞌona hakaara: pe muꞌa ka oho ena mo rāua te ao nei, i hōrea ai taꞌe ꞌo te haꞌatura o ꞌAparahama ki te ⌊haka tere iŋa ꞌa Mōtē⌋, ꞌo te tano ōꞌona ki te mata o te ꞌAtua, he haka moe i tōꞌona manaꞌu ꞌi ruŋa.

Rōmano 9:30

¿He aha ia te tātou meꞌe mo kī o ruŋa i te ŋā meꞌe taꞌatoꞌa nei? Hai haka moe i te manaꞌu ꞌi ruŋa i a Ietū, te ꞌAtua i haka tano ai ki tōꞌona mata i te nuꞌu taꞌe he hūrio, nuꞌu taꞌe kimi i te rāveꞌa mo tano o rāua ki tōꞌona mata.

Karatia 5:5

ꞌE a tātou, te nuꞌu ꞌa Ietū Kiritō, hai ⌊Vārua Maitai⌋ e ꞌite nei: te ꞌAtua e kī rō: he nuꞌu tano a tātou ki tōꞌona mata ꞌo te ⌊haka moe i te manaꞌu⌋ ꞌi ruŋa i a Ietū.

Fīripo 3:9

ꞌe he ai ōꞌoku ꞌāꞌana. Hai ia, paꞌi, a au e tano nei ki te mata o te ꞌAtua, taꞌe ꞌō hai haꞌatura ki te ⌊haka tere iŋa ꞌa Mōtē⌋. He haka moe ōꞌoku i te manaꞌu ꞌi ruŋa i a Ietū i kī ai e te ꞌAtua e tano rō ꞌana a au ki tōꞌona mata.

ꞌEvereo 11:1

¿Pē hē e ꞌite ena ko haka moe mau ꞌana a tātou i te manaꞌu ꞌi ruŋa i te ꞌAtua? Hai ꞌite e tātou pē nei ē: he parautiꞌa mau ꞌā e ai rō i a tātou te meꞌe e tiaki nei, ꞌe he parautiꞌa takoꞌa mo tātou e ai mau rō ꞌā te ŋā meꞌe ena ꞌina e tātou he takeꞌa.

ꞌEvereo 12:25

E te taina, e uꞌi kōrua ꞌo taꞌe haka roŋo rō ki te vānaŋa o te ꞌAtua. Te nuꞌu o muꞌa ꞌā hārui hai tuaꞌivi ki tāꞌana vānaŋa haka ꞌite e Mōtē ꞌi te ao nei ꞌina kai taꞌe haka ūtuꞌa e te ꞌAtua. Pē ira ka topa ena ki a tātou mo taꞌe haka roŋo ki te kope ꞌāꞌana te vānaŋa mai mai te raŋi.

ꞌEvereo 5:7

Hora era o Ietū ꞌi te ao nei, ꞌi te ꞌite e ai rō ꞌā i te ꞌAtua te pūai mo haka eꞌa i a ia mai te mate, he pure he ani nō te aŋa hai reꞌo pūai koia ko taŋi; ꞌe ꞌi tōꞌona haꞌatura, he haka roŋo e te ꞌAtua.

ꞌEvereo 8:5

Te ŋā oromatuꞌa nei e aŋa ena ꞌi te kona tuꞌu pa he kona parautiꞌa mau era ꞌi te raŋi. A tātou e ꞌite ena i te meꞌe nei ꞌo te ai hora oho era o Mōtē mo aŋa i te ⌊Karapā Moꞌa⌋ mo haꞌamuri ki te ꞌAtua he kī e te ꞌAtua: «E uꞌi e aŋa tahi pa he meꞌe haka takeꞌa mau atu era ꞌā e au ꞌi ruŋa i te maꞌuŋa».

1 Pētero 3:20

vārua o te nuꞌu o te noho iŋa era o Nōē taꞌe haꞌatura ki te ꞌAtua, nuꞌu tiaki ꞌe haꞌaoromaꞌi e te ꞌAtua, ꞌi te matahiti taꞌatoꞌa aŋa era e Nōē i te pahī, mo hārui o te rāua manaꞌu ki ruŋa i a ia. ꞌE ꞌi rā hora, hoko vaꞌu nō i uru ai ki roto i te pahī ꞌe i ora ai ꞌi te ꞌati era o te vai.

2 Pētero 1:1

A au, a Pētero, kī takoꞌa ko Tīmona, tāvini ꞌe ⌊ꞌāpōtoro⌋ ꞌa Ietū Kiritō, he ꞌaroha atu ki a kōrua ki te nuꞌu i a rāua takoꞌa te hauhaꞌa he ⌊haka moe i te manaꞌu⌋ ꞌi ruŋa i a Ietū, pa he haka moe iŋa nei o te mātou manaꞌu, he meꞌe ravaꞌa hai riva rahi o te ꞌAtua ꞌe o Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.

2 Pētero 2:5

ꞌE ꞌina kai haka rehu takoꞌa i te hara o te nuꞌu aŋa i te meꞌe taꞌe tano o muꞌa ꞌā. Te meꞌe i aŋa: he uŋa mai ki ruŋa i te ao nei i te ꞌua taꞌe mo mahana haka ꞌou ꞌātā ki te roa mo emu o te meꞌe taꞌatoꞌa, ꞌe te taŋata i haka ora ko Nōē, he kope haka ꞌite o ruŋa i te noho iŋa tī-tika ki te mata o te ꞌAtua, ꞌe he nuꞌu haka ꞌou hoko hitu.

2 Pētero 3:6

ꞌE hai vai i haka kore ai e te ꞌAtua i te henua o muꞌa ꞌā.