ꞌEvereo 11:1 - Rapa Nui

¹ ¿Pē hē e ꞌite ena ko haka moe mau ꞌana a tātou i te manaꞌu ꞌi ruŋa i te ꞌAtua? Hai ꞌite e tātou pē nei ē: he parautiꞌa mau ꞌā e ai rō i a tātou te meꞌe e tiaki nei, ꞌe he parautiꞌa takoꞌa mo tātou e ai mau rō ꞌā te ŋā meꞌe ena ꞌina e tātou he takeꞌa.

ꞌEvereo 11:1 ပူးပေါင်းရင်းမြစ်များ

2 Kōrinto 5:7

E haka tere nei a mātou ꞌi te ao nei hai ⌊haka moe i te manaꞌu⌋ ꞌi ruŋa i a ia ꞌe ꞌi ruŋa i tāꞌana meꞌe hōrea mai era, ka ai atu ꞌina he takeꞌa mai.

2 Kōrinto 4:18

ꞌO ira, te meꞌe manaꞌu o mātou taꞌe he meꞌe o te ao nei, pa he ꞌati topa mai. Te mātou manaꞌu e haka noho nei ꞌi ruŋa i te meꞌe o te raŋi. Te meꞌe takeꞌa, paꞌi, o te ao nei e ko roa he ŋaro, ꞌe te meꞌe taꞌe takeꞌa vaꞌai mai e te ꞌAtua e ko ŋaro ki te hora hopeꞌa.

ꞌEvereo 11:7

He haka moe o Nōē i te manaꞌu ꞌi ruŋa i te ꞌAtua i aŋa ai i te pahī ꞌo mate tāꞌana huaꞌai hora kī era e te ꞌAtua e topa rō te meꞌe kai takeꞌa hia ꞌā e te mata o te taŋata. ꞌE ꞌi tōꞌona haꞌatura ki te ꞌAtua i takeꞌa ai: te taŋata taꞌatoꞌa o rā hora e aŋa rō ꞌana i te meꞌe taꞌe tano, ꞌe e tano rō ꞌana mo haka ūtuꞌa e te ꞌAtua. ꞌE a Nōē i tano ai ki te mata o te ꞌAtua ꞌo te haka moe i tōꞌona manaꞌu ꞌi ruŋa i a ia.

ꞌEvereo 10:22

ꞌO ira, e haka hāhine tātou ki te ꞌAtua hai māhatu, hai haka moe iŋa i te manaꞌu ꞌina he ꞌaka-ꞌaka ꞌi ruŋa i a ia, hai manaꞌu maꞌitaki pa he meꞌe ena: ko pī-pī ꞌā e te toto era o Ietū ꞌe hai hakari maꞌitaki pa he meꞌe ena: ko hopu ꞌā hai vai maꞌitaki.

ꞌEvereo 11:27

He haka moe o Mōtē i te manaꞌu ꞌi ruŋa i te ꞌAtua i eꞌa i oho ai mai te henua era ko Ehipto ꞌina kai riꞌa-riꞌa ꞌo riri te ꞌariki. He oho mau rō ꞌai ꞌe ꞌina kai hārui haka ꞌou a tuꞌa; e tuꞌu rō ꞌā pa he meꞌe ena ē: tōꞌona mata ꞌi ruŋa i te ꞌAtua ꞌā.

ꞌEvereo 6:12

ꞌE ꞌina a mātou he haŋa mo hupe-hupe o kōrua. Ka aŋa ka oho nō, pa he meꞌe aŋa e te nuꞌu ⌊haka moe i te manaꞌu⌋ ꞌi ruŋa i a Ietū taꞌe haka rē i a ia ki te hora hopeꞌa. I a rāua te meꞌe hōrea e te ꞌAtua.

ꞌEvereo 10:39

Taꞌe a tātou o roto i te nuꞌu haka tapa i te manaꞌu mai ruŋa i te ꞌAtua, nuꞌu te rāua hopeꞌa raꞌa he ūtuꞌa. A tātou o roto i te nuꞌu eꞌa mai roto i te ūtuꞌa o te hara ꞌe ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua ꞌo te haka moe i te tātou manaꞌu ꞌi ruŋa i a ia.

1 Kōrinto 13:13

E toru meꞌe ꞌina e ko kore ki te hora hopeꞌa: he haka moe iŋa i te manaꞌu ꞌi ruŋa i te ꞌAtua, he ŋatu o te haŋu ꞌi ruŋa i tāꞌana meꞌe hōrea mai era, ꞌe he haŋa ki te rua. ꞌE te meꞌe hopeꞌa o te hauhaꞌa o te ŋā meꞌe nei e toru he haŋa ki te rua.

ꞌEvereo 11:13

Te nuꞌu taꞌatoꞌa nei i mā-mate ai e haka moe nō ꞌana i te manaꞌu ꞌi ruŋa i te ꞌAtua, ka ai atu ꞌina kai ai hia ꞌā i a rāua te meꞌe hōrea era e te ꞌAtua. A rāua, paꞌi, e ꞌite rō ꞌana: pe muꞌa ka oho ena i a rāua rā ŋā meꞌe taꞌatoꞌa, ꞌe e koa rō ꞌā o ruŋa. ꞌE e aŋi-aŋi rō ꞌana ꞌe e kī rō ꞌana: te ao nei taꞌe he kāiŋa mau o rāua.

ꞌEvereo 3:14

E te taina, mo haka moe mo oho nō tātou i te manaꞌu ꞌi ruŋa i a Ietū ki te hora hopeꞌa pa he hora raꞌe era ꞌā, mo tātou takoꞌa te meꞌe taꞌatoꞌa ꞌa Ietū Kiritō.

Karatia 5:6

ꞌE, ꞌi te ai o tātou ꞌa Ietū Kiritō, te ꞌAtua e taꞌe tapa haka ꞌou ena hoki ko hore ꞌā te kiri o te hua ꞌo ꞌina kai hore. Te meꞌe hauhaꞌa mau he haka moe i te manaꞌu ꞌi ruŋa i a Ietū, he meꞌe e takeꞌa ena hai haŋa ki te rua.

2 Kōrinto 5:17

Kope nō era o te Kiritō ꞌi te haka moe i te manaꞌu ꞌi ruŋa i a ia, he kope ꞌāpī e tahi; te manaꞌu ꞌe te noho iŋa raꞌe ōꞌona ko ŋaro ꞌā, ꞌe ko haꞌamata ꞌana tōꞌona noho iŋa ꞌāpī.

2 Pētero 1:1

A au, a Pētero, kī takoꞌa ko Tīmona, tāvini ꞌe ⌊ꞌāpōtoro⌋ ꞌa Ietū Kiritō, he ꞌaroha atu ki a kōrua ki te nuꞌu i a rāua takoꞌa te hauhaꞌa he ⌊haka moe i te manaꞌu⌋ ꞌi ruŋa i a Ietū, pa he haka moe iŋa nei o te mātou manaꞌu, he meꞌe ravaꞌa hai riva rahi o te ꞌAtua ꞌe o Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.

Aŋa o te ꞌĀpōtoro 20:21

Ki te hūrio ꞌe ki te nuꞌu taꞌe he hūrio e kī era e au mo huri o te manaꞌu ki te ꞌAtua ꞌe mo haka moe i te manaꞌu ꞌi ruŋa i te tātou Pūꞌoko Haka Tere ko Ietū.

Tito 1:1

A au, a Pauro, he ꞌaroha atu ki a koe, e Tito ē. A koe pa he poki mau ꞌā ꞌāꞌaku ꞌo tuꞌu ⌊haka moe i te manaꞌu⌋ ꞌi ruŋa i a Ietū pē au. Ka ai ꞌi ruŋa i a koe te riva rahi ꞌe te haumārū o te ꞌAtua, he Matuꞌa o tātou, ꞌe o Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa. E Tito, ko ꞌite riva-riva ꞌana e koe: a au he tāvini o te ꞌAtua, ꞌe he ⌊ꞌāpōtoro⌋ ꞌa Ietū Kiritō, kope uŋa mai i a au ki te nuꞌu haꞌataꞌa e te ꞌAtua māꞌana, mo haka pūai i te rāua haka moe iŋa i te manaꞌu ꞌi ruŋa i a ia, ꞌe mo ꞌata haka aŋi-aŋi ki a rāua i te roŋo parautiꞌa o ruŋa i te ⌊Kiritō⌋, he roŋo hāꞌūꞌū i te taŋata mo riro o te rāua noho iŋa noho iŋa tano ki te mata o te ꞌAtua, ki aŋi-aŋi riva-riva ai pē nei ē: e ai rō i a rāua te ora ꞌāpī ꞌina he hopeꞌa raꞌa vaꞌai e te ꞌAtua. ꞌI raꞌe, paꞌi, ki te aŋa i te ao, i hōrea rō ai e te ꞌAtua i te ora ꞌāpī nei, ꞌe a ia ꞌAtua haka tano i tāꞌana meꞌe kī. ꞌI te hora tano kī e te ꞌAtua i haka ꞌite ai ki te taŋata o ruŋa i te ora ꞌāpī nei hai ⌊roŋo riva-riva o ruŋa i a Ietū Kiritō⌋, he roŋo haka ꞌite oho e au uŋa mai e te ꞌAtua, kope toꞌo i a tātou mai roto i te ūtuꞌa o te hara.

ꞌEvereo 2:3

Mo ai pē ira, ¿pē hē ia ana taꞌe haka ūtuꞌa i a tātou ana hārui hai tuaꞌivi i te rāveꞌa vaꞌai mai e te ꞌAtua mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa? Te meꞌe nei o te Pūꞌoko Haka Tere mau nei ꞌā o tātou i haka ꞌite raꞌe mai. I oho era he haka ꞌite takoꞌa mai he parautiꞌa mau ꞌā e te nuꞌu ŋaroꞌa era i rā meꞌe mai i a ia.

2 Kōrinto 11:17

ka ai atu te teꞌo-teꞌo nei he meꞌe maꞌa-maꞌa e tahi ꞌe taꞌe ꞌō he meꞌe mo koa o te ꞌAtua.

2 Kōrinto 9:4

ꞌo oho tāꞌue atu te nuꞌu o Mātērōnia ꞌi muri i a au he takeꞌa kai taka-taka ꞌā i a kōrua, ꞌe he haꞌamā a au. ꞌE, ¡¿mo aha atu ꞌā ana kī atu pē hē kōrua ka haꞌamā takoꞌa ena?! E ꞌaꞌamu rō ꞌana, paꞌi, mātou: a kōrua e haka tano tahi rō ꞌana i te kōrua meꞌe kī.

ꞌEvereo 3:6

Pē ira ꞌā te ⌊Kiritō⌋, ꞌina e ko taꞌe aŋa i te meꞌe taꞌatoꞌa kī e te ꞌAtua mo aŋa. Te meꞌe topa kē ōꞌona, a ia he Poki o te ꞌAtua, ꞌe pa he Poki o te ꞌAtua e haka tere ꞌe e hāpaꞌo ena i te nuꞌu taꞌatoꞌa o te ꞌAtua, ꞌe rā nuꞌu ko tātou ana maꞌu hio-hio ana oho nō tātou i te manaꞌu ꞌi ruŋa i a ia, ꞌe ana tiaki hai koa i te meꞌe taꞌatoꞌa hōrea mai e ia.