ꞌEvereo 10:12 - Rapa Nui

¹² ꞌE a Ietū Kiritō i vaꞌai ai i a ia pa he tūtia mo haka kore o te hara, e tahi nō tūtia iŋa mo te hora taꞌatoꞌa, ꞌe i oti era he noho ꞌi te pāꞌiŋa mataꞌu o te ꞌAtua.

ꞌEvereo 10:12 ပူးပေါင်းရင်းမြစ်များ

Marko 16:19

I oti era a Ietū te vānaŋa, he maꞌu he iri e te ꞌAtua ki te raŋi. He noho ia a Ietū ꞌi te pāꞌiŋa mataꞌu o te ꞌAtua.

Rōmano 8:34

¿Mā ꞌai e kī i te ūtuꞌa mo rāua? Ko Ietū Kiritō, paꞌi, te meꞌe i mate mo rāua koia ko ora mai te mate ꞌe ꞌai te pāꞌiŋa mataꞌu o te ꞌAtua e noho ena e ani ꞌana mo tātou.

Ēfeto 5:2

E haka rē mo te haŋa e haka tika atu, pa he meꞌe aŋa e Ietū hora vaꞌai era i a ia ki te mate mo tātou. ꞌE tōꞌona mate era, mo te ꞌAtua, pa he tūtia ꞌeo.

Kōrosa 3:1

E te taina, ꞌi te meꞌe era ko haka ora ꞌana e te ꞌAtua i a kōrua ꞌi muri i a Ietū, te auraꞌa, ko vaꞌai atu ꞌana i te noho iŋa ꞌāpī, e haŋa kōrua ki te meꞌe o te raŋi, he kona ꞌi ira a Ietū e noho ena ꞌi te pāꞌiŋa mataꞌu o te ꞌAtua.

ꞌEvereo 1:3

Te ꞌana-ꞌana ꞌe te pūai nui-nui o te ꞌAtua e takeꞌa ena ꞌi ruŋa i tāꞌana Poki; a ia he ꞌāriŋa mau ꞌā o te ꞌAtua, ꞌe ꞌāꞌana te haka noho i te meꞌe taꞌatoꞌa o te ao ꞌi tōꞌona kona hai kī mau nō e ia. I tuꞌu mai era ki te ao nei, he aŋa tahi i tāꞌana meꞌe taꞌatoꞌa mo aŋa mo haka kore e te ꞌAtua i te tātou hara. I oti tahi era nei aŋa, he hoki ki te raŋi ꞌe he noho ꞌi te pāꞌiŋa mataꞌu o te ꞌAtua.

ꞌEvereo 10:10

ꞌO te aŋa e Ietū Kiritō i te meꞌe haŋa o te ꞌAtua hora vaꞌai era, e tahi vaꞌai iŋa mau nō mo te hora taꞌatoꞌa, i tōꞌona hakari mau era ꞌā pa he tūtia, i haka kore ai e te ꞌAtua i te tātou hara ꞌe i haꞌataꞌa ai i a tātou māꞌana pa he nuꞌu ꞌina e tahi hara.

ꞌEvereo 10:14

Hai tūtia mau nō era ōꞌona e tahi i haka riro ai i te nuꞌu haꞌataꞌa e te ꞌAtua māꞌana he nuꞌu ꞌina e tahi hara ki te hora hopeꞌa.

ꞌEvereo 5:1

Te ⌊oromatuꞌa hopeꞌa o te ra-rahi⌋ e toꞌo ena mo vānaŋa ki te ꞌAtua mo te taꞌatoꞌa, mo vaꞌai ki te ꞌAtua i te meꞌe haꞌataꞌa e rāua māꞌana ꞌe mo aŋa i te tūtia mo te rāua hara.

ꞌEvereo 5:3

ꞌE ꞌo ira takoꞌa, ꞌi te hora aŋa i te tūtia mo te hara o te taŋata, e aŋa ena i te tūtia mo te rāua hara.

ꞌEvereo 7:27

A ia taꞌe pe he tētahi ŋā oromatuꞌa ra-rahi ena, tiŋaꞌi i te ꞌanimare paurō te mahana mo tūtia ki te ꞌAtua mo haka maꞌitaki i tōꞌona hara ꞌi raꞌe, ki tano iho ai mo tūtia i te ꞌanimare ki te ꞌAtua mo te hara o te taꞌatoꞌa. Taꞌe pē ira a Ietū. E tahi mau nō tūtia i aŋa e ia hora vaꞌai era i a ia mo mate ꞌi ruŋa i te tātaurō, ꞌe rā tūtia mo te hora taꞌatoꞌa.

ꞌEvereo 8:1

Te meꞌe haŋa ꞌāꞌaku mo aŋi-aŋi e kōrua: te tātou oromatuꞌa hopeꞌa o te ra-rahi ko Ietū Kiritō, ꞌai te raŋi e noho rō ꞌā ꞌi te pāꞌiŋa mataꞌu o te ꞌAtua, kona mo te kope hopeꞌa o te hōnui.

ꞌEvereo 9:12

E tahi mau nō oꞌo iŋa o Ietū ki te Kona ꞌAta Moꞌa parautiꞌa ꞌi te raŋi mo te hora taꞌatoꞌa, ꞌe kai maꞌu i te toto o te vato-vato ꞌe o te puaꞌa mo tūtia ki te ꞌAtua. I tūtia ai hai toto mau era ꞌā ōꞌona, ꞌe hai toto era ōꞌona i ravaꞌa ai mo haka eꞌa mau rō ꞌai i a tātou mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa.

ꞌEvereo 9:14

ꞌE mo ai o te pūai o te ŋā meꞌe era mo haka maꞌitaki i te taŋata, ¡ka manaꞌu atu ia kōrua pē hē te pūai o te toto o Ietū Kiritō! Hai Vārua Maitai, paꞌi, i vaꞌai ai e Ietū i a ia ki te ꞌAtua pa he tūtia ꞌina e tahi hape. ꞌE te meꞌe haka maꞌitaki hai toto ōꞌona he manaꞌu taꞌe tano o tātou o te taŋata maꞌu i a tātou ki te mate, ki riva ai tātou mo tāvini ki te ꞌAtua, tōꞌona ora ꞌina he hopeꞌa raꞌa.