ꞌEvereo 10:10 - Rapa Nui

¹⁰ ꞌO te aŋa e Ietū Kiritō i te meꞌe haŋa o te ꞌAtua hora vaꞌai era, e tahi vaꞌai iŋa mau nō mo te hora taꞌatoꞌa, i tōꞌona hakari mau era ꞌā pa he tūtia, i haka kore ai e te ꞌAtua i te tātou hara ꞌe i haꞌataꞌa ai i a tātou māꞌana pa he nuꞌu ꞌina e tahi hara.

ꞌEvereo 10:10 ပူးပေါင်းရင်းမြစ်များ

Iovani 17:19

Mo te riva-riva o rāua, he haꞌataꞌa a au i a au mo tāvini atu ki a koe, ki haꞌataꞌa parautiꞌa atu ai a rāua mo tāvini atu ki a koe.

Iovani 19:34

Ka ai atu pē ira, i ꞌo-ꞌoka nō hai ransa e te vaꞌehau e tahi a te rehe-rehe o Ietū ꞌe, ꞌi tū hora ꞌā, i tehe ai te toto koia ko te vai.

Iovani 6:51

Ko au mau ꞌana te haraoa ora topa mai era mai te raŋi; te kope kai i te haraoa nei he ravaꞌa i te ora ꞌāpī ꞌina he hopeꞌa raꞌa. ꞌE nei haraoa he hakari mau nei ꞌā ōꞌoku. He vaꞌai e au mo ravaꞌa e te taŋata o te henua taꞌatoꞌa i te ora ꞌāpī».

1 Kōrinto 1:30

Hai ia, paꞌi, e ai nei tātou ꞌa Ietū Kiritō. ꞌE hai Ietū Kiritō e haka tere nei a tātou hai manaꞌu ꞌAtua ꞌe e tano nei ki tōꞌona mata. Hai ia takoꞌa e ai nei tātou he nuꞌu haꞌataꞌa māꞌana ꞌina e tahi hara ꞌe he nuꞌu eꞌa mai roto i te pūai o te hara.

1 Kōrinto 6:11

Tētahi o kōrua i aŋa rō i te ŋā meꞌe nei ꞌi muꞌa ꞌā. ꞌE, hora nei, ꞌi te ai o te tātou Pūꞌoko Haka Tere ko Ietū Kiritō hai haka moe i te manaꞌu ꞌi ruŋa i a ia, te ꞌAtua ko haka kore ꞌana i te kōrua hara, ko haꞌataꞌa ꞌana i a kōrua māꞌana, ꞌe ko haka riro ꞌana he nuꞌu tano ki tōꞌona mata ꞌi te ai o te ⌊Vārua Maitai⌋ ꞌi roto i a kōrua.

Ēfeto 5:2

E haka rē mo te haŋa e haka tika atu, pa he meꞌe aŋa e Ietū hora vaꞌai era i a ia ki te mate mo tātou. ꞌE tōꞌona mate era, mo te ꞌAtua, pa he tūtia ꞌeo.

Ēfeto 5:26

I aŋa ai a Ietū i te meꞌe nei mo haka riro i a tātou i te nuꞌu taꞌatoꞌa haka moe i te manaꞌu ꞌi ruŋa i a ia he nuꞌu ꞌina e tahi hape ki te mata o te ꞌAtua hai ⌊papatito⌋ ꞌe hai vānaŋa era ꞌāꞌana,

ꞌEvereo 10:12

ꞌE a Ietū Kiritō i vaꞌai ai i a ia pa he tūtia mo haka kore o te hara, e tahi nō tūtia iŋa mo te hora taꞌatoꞌa, ꞌe i oti era he noho ꞌi te pāꞌiŋa mataꞌu o te ꞌAtua.

ꞌEvereo 10:14

Hai tūtia mau nō era ōꞌona e tahi i haka riro ai i te nuꞌu haꞌataꞌa e te ꞌAtua māꞌana he nuꞌu ꞌina e tahi hara ki te hora hopeꞌa.

ꞌEvereo 10:20

ꞌE pa he puru iŋa era e te korotina i te Kona ꞌAta Moꞌa, pē ira te hara e puru era i a tātou ꞌo hāhine ki te ꞌAtua. ꞌE hora nei, hai vaꞌai o Ietū i tōꞌona hakari pa he tūtia mo ꞌamo i te ūtuꞌa o te hara mo tātou, i mātaki ai i te ara ꞌāpī mo hāhine o tātou ki te ꞌAtua, ꞌe rā ara ko ia.

ꞌEvereo 10:29

Mo ai pē ira e haka ūtuꞌa era i te nuꞌu taꞌe haꞌatura ki te haka tere iŋa ꞌa Mōtē, ka manaꞌu atu kōrua i te ūtuꞌa mo te nuꞌu taꞌe haŋa ꞌe hārui i te Poki o te ꞌAtua hai tuaꞌivi, ꞌe taꞌe haka hauhaꞌa i tōꞌona toto, toto tāpaꞌo i te ⌊haka tere iŋa ꞌāpī o te ꞌAtua ananake ko te taŋata⌋, haka maꞌitaki i a rāua mai te hara ꞌe haꞌataꞌa i a rāua mo te ꞌAtua. Te nuꞌu aŋa i te meꞌe pē ira, e parauꞌino ꞌā ki te Vārua Maitai, kope haka takeꞌa i te riva rahi o te ꞌAtua.

ꞌEvereo 10:5

ꞌO ira, hora tuꞌu mai era o Ietū ki te ao nei i kī ai ki te ꞌAtua: «ꞌIna ꞌō koe he koa ki te tūtia o te ꞌanimare ꞌe ki te tētahi atu meꞌe haka ꞌou mo vaꞌai atu; he hakari ōꞌoku taꞌa meꞌe i vaꞌai mai mo tūtia atu.

ꞌEvereo 13:12

ꞌI te ⌊haka tere iŋa ꞌāpī o te ꞌAtua ananake ko te taŋata⌋ e ai rō ꞌā te meꞌe tuꞌu pē ira. A Ietū, paꞌi, i mate ai ꞌi haho o Hērutarema, ꞌi ruŋa i a ia te ūtuꞌa o te ꞌAtua mo te hara o te taŋata, mo haka riro i a rāua he nuꞌu haꞌataꞌa ꞌe ꞌina e tahi hara mo te ꞌAtua hai toto mau era ꞌā ōꞌona.

ꞌEvereo 2:11

Te kope ꞌāꞌana te haka tano i te taŋata ki te mata o te ꞌAtua ꞌe te nuꞌu haka kore e ia i te hape o tū Matuꞌa tahi ꞌana a rāua. ꞌO ira te Poki o te ꞌAtua e taꞌe haꞌamā ena mo kī he taina rāua ōꞌona.

ꞌEvereo 2:14

ꞌI te ai o te ŋā poki o te ꞌAtua he taŋata e mate nō i haka riro ai a Ietū i a ia he taŋata, ki mate takoꞌa ai ꞌe ki haka kore ai, hai mate era ōꞌona, i te pūai o te kope i a ia te mate, te auraꞌa, ko Rukifero.

ꞌEvereo 5:7

Hora era o Ietū ꞌi te ao nei, ꞌi te ꞌite e ai rō ꞌā i te ꞌAtua te pūai mo haka eꞌa i a ia mai te mate, he pure he ani nō te aŋa hai reꞌo pūai koia ko taŋi; ꞌe ꞌi tōꞌona haꞌatura, he haka roŋo e te ꞌAtua.

ꞌEvereo 7:27

A ia taꞌe pe he tētahi ŋā oromatuꞌa ra-rahi ena, tiŋaꞌi i te ꞌanimare paurō te mahana mo tūtia ki te ꞌAtua mo haka maꞌitaki i tōꞌona hara ꞌi raꞌe, ki tano iho ai mo tūtia i te ꞌanimare ki te ꞌAtua mo te hara o te taꞌatoꞌa. Taꞌe pē ira a Ietū. E tahi mau nō tūtia i aŋa e ia hora vaꞌai era i a ia mo mate ꞌi ruŋa i te tātaurō, ꞌe rā tūtia mo te hora taꞌatoꞌa.

ꞌEvereo 9:12

E tahi mau nō oꞌo iŋa o Ietū ki te Kona ꞌAta Moꞌa parautiꞌa ꞌi te raŋi mo te hora taꞌatoꞌa, ꞌe kai maꞌu i te toto o te vato-vato ꞌe o te puaꞌa mo tūtia ki te ꞌAtua. I tūtia ai hai toto mau era ꞌā ōꞌona, ꞌe hai toto era ōꞌona i ravaꞌa ai mo haka eꞌa mau rō ꞌai i a tātou mai roto i te ūtuꞌa o te hara ꞌe mo vaꞌai mai i te ora ꞌāpī ꞌina he hopeꞌa raꞌa.

ꞌEvereo 9:14

ꞌE mo ai o te pūai o te ŋā meꞌe era mo haka maꞌitaki i te taŋata, ¡ka manaꞌu atu ia kōrua pē hē te pūai o te toto o Ietū Kiritō! Hai Vārua Maitai, paꞌi, i vaꞌai ai e Ietū i a ia ki te ꞌAtua pa he tūtia ꞌina e tahi hape. ꞌE te meꞌe haka maꞌitaki hai toto ōꞌona he manaꞌu taꞌe tano o tātou o te taŋata maꞌu i a tātou ki te mate, ki riva ai tātou mo tāvini ki te ꞌAtua, tōꞌona ora ꞌina he hopeꞌa raꞌa.

ꞌEvereo 9:26

ꞌĀhani, paꞌi, i ai pē ira, ko ai ꞌana meꞌe rahi nō atu mate iŋa o Ietū mai te hora aŋa era e te ꞌAtua i te ao. ꞌE te parautiꞌa mau, hora nei, he hora hopeꞌa, ko tuꞌu mai ꞌā a ia ki te ao nei ꞌe ko vaꞌai ꞌā i a ia, mo te hora taꞌatoꞌa, pa he tūtia mo haka kore mau rō ꞌai i te pūai o te hara mai ruŋa i a tātou.

ꞌEvereo 9:28

Pē ira takoꞌa a Ietū Kiritō: e tahi mau nō vaꞌai iŋa i a ia mo mate pa he tūtia mo haka kore i te hara o te nuꞌu. ꞌE pe muꞌa ka oho ena he tuꞌu haka ꞌou mai a Ietū taꞌe ꞌō mo vaꞌai haka ꞌou i a ia pa he tūtia mo te hara o te taŋata, mo vaꞌai ki te nuꞌu tiaki ki a ia i te ora ꞌāpī ꞌina he hopeꞌa raꞌa.

1 Pētero 2:24

A Ietū i ꞌamo ai i te tātou hara ꞌi ruŋa i te tātaurō, ki haka rē ai a tātou i te aŋa i te meꞌe taꞌe tano, ꞌe ki tano ai te tātou noho iŋa ki te mata o te ꞌAtua. Hai ꞌamo e ia i te ꞌati i ora ai tātou.

1 Pētero 3:18

ꞌI te hara, paꞌi, o tātou i mate ai te Kiritō, ꞌe tōꞌona mate era mo te hora taꞌatoꞌa. ꞌIna e tahi ꞌāꞌana meꞌe taꞌe tano i aŋa ꞌe, mo haka riva-riva i a tātou ki te ꞌAtua, i ꞌamo ai i te ūtuꞌa o te mate mo tātou, nuꞌu aŋa i te meꞌe taꞌe tano. Ka ai atu i mate rō tōꞌona hakari taŋata, he vārua ōꞌona te meꞌe i taꞌe mate.

1 Iovani 5:6

Te ꞌAtua i haka takeꞌa ai pē nei ē: a Ietū Kiritō he Poki ꞌāꞌana, ꞌi te hora ⌊papatito⌋ hai vai, ꞌe ꞌi te hora pariŋi o tōꞌona toto ꞌi ruŋa i te tātaurō. Te ⌊Vārua Maitai⌋ he mataꞌite o te meꞌe nei, ꞌe tāꞌana meꞌe kī he parautiꞌa.