Ēfeto 2:17 - Rapa Nui

¹⁷ A Ietū i oho mai ai ki te ao nei mo haka ꞌite mai pē hē te taŋata ana riva-riva ki te ꞌAtua. I haka ꞌite ai i te meꞌe nei ki a kōrua ki te nuꞌu taꞌe hūrio, nuꞌu ꞌava-ꞌava mai muri i a ia, ꞌe, takoꞌa, ki te hūrio, nuꞌu hāhine ki a ia.

Ēfeto 2:17 ပူးပေါင်းရင်းမြစ်များ

Māteo 10:13

Mo hāpaꞌo riva-riva atu te nuꞌu o rā hare, he tano te kōrua ꞌaroha; ꞌe mo taꞌe ai pē ira, e ko ai ꞌi ruŋa i a rāua te haumārū o te ꞌAtua.

Ruka 15:8

»E tahi ꞌaꞌamu haka ꞌou nei. Mo ai e tahi viꞌe e ai rō ꞌā e hoꞌe ꞌahuru tara ꞌaurī ꞌe he ŋaro e tahi, ¿e ko taꞌe haka pura hō i te hakariꞌi mo haka māꞌeha ꞌe ꞌai ka purumu ꞌi te kona taꞌatoꞌa o roto i te hare ꞌātā ka ravaꞌa rō rā tara?

Ruka 2:14

«¡Ko te nui-nui ꞌe ko te pūai i a koe, e te ꞌAtua ē! ¡Ka ai te haumārū ꞌi roto i te taŋata taꞌatoꞌa o te ao ꞌi ruŋa i a rāua te koa o te ꞌAtua!».

Aŋa o te ꞌĀpōtoro 10:36

»Te ꞌAtua i haka ꞌite rō mai ki a mātou ki te itaraera o ruŋa i te rāveꞌa pē hē ana riva-riva haka ꞌou te taŋata ki a ia hai Ietū Kiritō, he Pūꞌoko Haka Tere o te taꞌatoꞌa nō taŋata.

Aŋa o te ꞌĀpōtoro 2:39

Te hōrea era o ruŋa o te Vārua Maitai mo kōrua, mo te kōrua ŋā poki, ꞌe mo te nuꞌu e roa rō ꞌana, te auraꞌa, mo te nuꞌu taꞌatoꞌa kī e te ꞌAtua mo oho ki a ia.

Rōmano 10:14

Te meꞌe nō, ¿pē hē ia ana ani te nuꞌu mo ai ꞌina he haka moe i te rāua manaꞌu ꞌi ruŋa i a Ietū? ꞌE ¿pē hē ana haka moe i te rāua manaꞌu ꞌi ruŋa mo ai ꞌina he ꞌite e tahi meꞌe o ruŋa i a ia? ꞌE ¿pē hē ana ꞌite o ruŋa i a ia, mo ai ꞌina he taŋata haka ꞌite o ruŋa?

Rōmano 5:1

ꞌI te ai o tātou ꞌi te hora nei he taŋata tano ki te mata o te ꞌAtua ꞌo te ⌊haka moe i te manaꞌu⌋ ꞌi ruŋa i a Ietū, e riva-riva nei a tātou ko te ꞌAtua hai meꞌe aŋa era e te tātou Pūꞌoko Haka Tere ko Ietū Kiritō.

2 Kōrinto 5:20

He nuꞌu vānaŋa mātou hai ꞌīŋoa o te Kiritō, ꞌe hai mātou te ꞌAtua e vānaŋa atu ena ki a kōrua. ꞌO ira, hai ꞌīŋoa o te Kiritō he ani atu mātou: e haka moe kōrua i te manaꞌu ꞌi ruŋa i te roŋo parautiꞌa o ruŋa i te Kiritō mo riva-riva o kōrua ki te ꞌAtua.

Ēfeto 4:21

ꞌI te ꞌite ōꞌoku e haka moe rō ꞌana kōrua i te manaꞌu ꞌi ruŋa i a Ietū, e ꞌite takoꞌa nei a au ko hāpī atu ꞌana i te parautiꞌa o ruŋa i a ia ꞌe o ruŋa i te noho iŋa tano haŋa e ia mo kōrua.