Ēfeto 2:12 - Rapa Nui

¹² ka haka topa te kōrua manaꞌu: ꞌi muꞌa ꞌana, ꞌi te hora kai haka moe ꞌana a kōrua i te manaꞌu ꞌi ruŋa i a Ietū, taꞌe kōrua ꞌa Ietū Kiritō, ꞌe e topa kē rō ꞌana mai te itaraera. Te ⌊haka tere iŋa o te ꞌAtua ananake ko te taŋata⌋ ꞌe te meꞌe taꞌatoꞌa hōrea e ia mo te itaraera kai ai ꞌana, ꞌi rā hora, mo kōrua. E noho era kōrua ꞌina he ꞌite ko ai te ꞌAtua parautiꞌa, ꞌe ꞌina he manaꞌu pē nei ē: e ai rō ꞌō te meꞌe riva-riva mo kōrua pe muꞌa ka oho ena.

Ēfeto 2:12 ပူးပေါင်းရင်းမြစ်များ

Ruka 1:72

e haka ꞌaroha rō i te tātou tupuna, ꞌe e ko rehu i a ia ki te hora hopeꞌa tāꞌana hōrea moꞌa

Iovani 10:16

»E ai takoꞌa rō ꞌana tāꞌaku māmoe taꞌe o roto o te ꞌāua nei; e haka taka-taka takoꞌa a au i a rāua. E haka roŋo rō a rāua ki tōꞌoku reꞌo ꞌe he riro mau rō ꞌāvai e tahi nō nūnaꞌa māmoe, ꞌe e tahi nō taŋata hāpaꞌo māmoe.

Iovani 15:5

»Ko au te tumu vino, ko kōrua te maŋa. Mo raꞌu nō mai o kōrua ꞌi ruŋa i a au ꞌe a au ki a kōrua, he ꞌata rahi te hua iŋa; ꞌe mo kore ōꞌoku, e ko ravaꞌa e kōrua mo aŋa i te meꞌe tano ki te mata o te ꞌAtua.

Iovani 4:22

A kōrua, te nuꞌu o Tāmāria, ꞌina he ꞌite ki a ai e haꞌamuri ena. ꞌE, a mātou e ꞌite rō ꞌana ki a ai; mai i a mātou, paꞌi, mai te hūrio, ka ai ena te rāveꞌa mo te taŋata mo eꞌa mai roto i te ūtuꞌa o te hara ꞌe mo ravaꞌa i te ora ꞌāpī ꞌina he hopeꞌa raꞌa vaꞌai e te ꞌAtua.

Aŋa o te ꞌĀpōtoro 2:39

Te hōrea era o ruŋa o te Vārua Maitai mo kōrua, mo te kōrua ŋā poki, ꞌe mo te nuꞌu e roa rō ꞌana, te auraꞌa, mo te nuꞌu taꞌatoꞌa kī e te ꞌAtua mo oho ki a ia.

Aŋa o te ꞌĀpōtoro 28:20

I uŋa atu ena a au mo oho mai o kōrua mo vānaŋa-naŋa o tātou ꞌe mo haka ꞌite atu: i here-here nei a au hai vivi ꞌo te ai he parautiꞌa mōꞌoku te ⌊Kiritō⌋ tiaki e tātou e te itaraera i tuꞌu rō mai.

Aŋa o te ꞌĀpōtoro 3:25

A kōrua he hakaara o rā ŋā perofeta, ꞌe mo kōrua rā hōrea kī era e te ꞌAtua ki te tātou tupuna ko ꞌAparahama pē nei ē: “E haꞌamaitai rō e au te hau taꞌatoꞌa o te ao hai hakaara ōꞌou”.

Rōmano 9:8

Pē ira ꞌana te ŋā poki o te ꞌAtua. Taꞌe taꞌatoꞌa taŋata he ŋā poki parautiꞌa ꞌāꞌana. Te ŋā poki parautiꞌa mau o te ꞌAtua he ŋā poki poreko mai tāꞌana hōrea, he nuꞌu haka moe i te manaꞌu ꞌi ruŋa i te meꞌe hōrea e ia, pa he poreko iŋa o Itaꞌata he haka moe o ⌊ꞌAparahama⌋ i tōꞌona manaꞌu ꞌi ruŋa i te hōrea kī e te ꞌAtua.

Karatia 4:8

ꞌI muꞌa ꞌā, hora era kai haka moe ꞌana kōrua i te manaꞌu ꞌi ruŋa i te ꞌAtua parautiꞌa, he ꞌekaravo kōrua o te meꞌe kī e kōrua he ꞌatua.

Ēfeto 2:19

ꞌO ira, a kōrua, te nuꞌu taꞌe hūrio ⌊haka moe i te manaꞌu⌋ ꞌi ruŋa i a Ietū, taꞌe toe kōrua he hau kē mo te ꞌAtua, he taŋata henua ananake ko te tētahi atu nuꞌu haꞌataꞌa e te ꞌAtua māꞌana, ꞌe he ŋā poki ꞌāꞌana takoꞌa ananake ko rā ŋā nuꞌu.

Ēfeto 4:18

ꞌE, ꞌi te pūꞌoko hio-hio, ꞌina he haŋa mo ꞌite ꞌe mo aŋi-aŋi o ruŋa i te meꞌe o te ꞌAtua. E pōhāhā nō ꞌā te manaꞌu, ꞌe ꞌina i a rāua te ora ꞌāpī ꞌina he hopeꞌa raꞌa vaꞌai e te ꞌAtua.

Kōrosa 1:21

E te taina, ꞌi muꞌa ꞌā e ꞌava-ꞌava rō ꞌana a kōrua mai te ꞌAtua, ꞌe hai meꞌe taꞌe tano aŋa e kōrua, e takeꞌa era e hārui rō ꞌana a kōrua i a ia hai tuaꞌivi.

Kōrosa 1:27

nuꞌu ki a rāua te ꞌAtua i haŋa ai mo haka ꞌite pē nei ē: te hauhaꞌa taꞌatoꞌa o rā parautiꞌa mo te nuꞌu taꞌe hūrio takoꞌa. ꞌE rā parautiꞌa ko te meꞌe nei: a Ietū Kiritō e noho takoꞌa rō ꞌana, hai Vārua Maitai, ꞌi roto i a kōrua i te nuꞌu taꞌe hūrio. ꞌE hai noho atu ōꞌona ꞌi roto i a kōrua he ꞌite kōrua pē nei ē: pe muꞌa ka oho ena a kōrua takoꞌa ꞌi roto i tōꞌona nui-nui, te auraꞌa: i a kōrua takoꞌa tōꞌona huru riva.

Kōrosa 1:5

ꞌo te ai e tiaki takoꞌa rō ꞌana kōrua ki te meꞌe hōrea mai e ia mo tātou ꞌi te raŋi. A kōrua ko ŋaroꞌa era ꞌana o ruŋa i te meꞌe nei hora haka ꞌite atu era i te roŋo parautiꞌa o te ꞌAtua

1 Tētārōnika 4:13

E te taina, e haŋa rō ꞌana a mātou mo ꞌite o kōrua o ruŋa i te meꞌe topa ki te nuꞌu mate, ꞌo māui-ui rahi rō te kōrua māhatu, pa he nuꞌu taꞌe haka moe i te manaꞌu ꞌi ruŋa i a Ietū taꞌe ꞌite: te nuꞌu mate e ora haka ꞌou rō.

1 Tētārōnika 4:5

Taꞌe mo te meꞌe taꞌe tano pohe e te hakari e haka tere atu i a kōrua, pa he meꞌe aŋa o te nuꞌu ꞌina kai ꞌite ko ai te ꞌAtua parautiꞌa.

2 Tētārōnika 2:16

ꞌE mā Ietū Kiritō mau ꞌā, Pūꞌoko Haka Tere o tātou, ꞌe mo te ꞌAtua, Matuꞌa o tātou, haŋa mai ꞌe vaꞌai mai hai riva rahi ōꞌona i te koa ꞌina he hopeꞌa raꞌa ꞌe i te ꞌite pē nei ē: pe muꞌa ka oho ena e vaꞌai rō mai i te meꞌe hōrea mai era e ia,

1 Timoteo 1:1

A au, a Pauro, ⌊ꞌāpōtoro⌋ ꞌa Ietū Kiritō, uŋa e te ꞌAtua, kope toꞌo i a tātou mai roto i te ūtuꞌa o te hara, ꞌe e Ietū Kiritō, kope ꞌi ruŋa i a ia e ŋatu ena te tātou haŋu,

ꞌEvereo 11:34

i tiŋaꞌi ai i te ahi taparahi-taꞌata, i taꞌe mate ai ꞌi te hoe, i ai ai te pūai ka ai atu ꞌina he haŋu o rāua, i riro ai he ꞌaito o te tamaꞌi ꞌe i rē ai ki te vaꞌehau o te rua henua.

ꞌEvereo 6:18

Te meꞌe kī ꞌe te meꞌe hōrea e te ꞌAtua e ko taꞌe haka tano; taꞌe, paꞌi, a ia he reo-reo. Mo tātou mo te nuꞌu haka hāhine ki te ꞌAtua mo hāpaꞌo e ia, te parautiꞌa nei he meꞌe haka pūai i te tātou manaꞌu ꞌi ruŋa i a ia, mo tiaki mo oho nō o tātou ki te haka tano iŋa ōꞌona i tāꞌana meꞌe hōrea mai era.

ꞌEvereo 8:6

Te aŋa vaꞌai era e te ꞌAtua ki te tātou Oromatuꞌa hopeꞌa o te ra-rahi i hau rō atu ki te aŋa o te tētahi oromatuꞌa, ꞌe pē ira ꞌana te ⌊haka tere iŋa ꞌāpī o te ꞌAtua ananake ko te taŋata⌋ haka riva-riva e Ietū, ki te haka tere iŋa raꞌe era ꞌo te ai hora aŋa era i te haka tere iŋa ꞌāpī, te meꞌe hōrea mai e te ꞌAtua meꞌe ꞌata nui-nui ki te meꞌe hōrea mai e ia hora aŋa era i te haka tere iŋa raꞌe era.

1 Pētero 1:21

Hai Kiritō kōrua e haka moe ena i te manaꞌu ꞌi ruŋa i te ꞌAtua. ꞌE, ꞌo te haka ora e te ꞌAtua i te Kiritō mai te mate ꞌe ꞌo te haka nui-nui, e taꞌe haka tapa ena te kōrua manaꞌu mai ruŋa i te ꞌAtua ꞌe e ꞌite ena e kōrua e aŋa tahi rō e ia i tāꞌana meꞌe hōrea era.

1 Pētero 1:3

Ki haꞌahana-hana tātou i te ꞌAtua, Matuꞌa o te tātou Pūꞌoko Haka Tere ko Ietū Kiritō. A ia, paꞌi, ko vaꞌai mai ꞌana i te ora ꞌe i te noho iŋa ꞌāpī, he rahi o tōꞌona haka ꞌaroha mo tātou. ꞌE, ꞌi te ai ko haka ora ꞌana e ia i a Ietū mai te mate, e ꞌite nei a tātou e haka ora takoꞌa rō mai i a tātou mai te mate pe muꞌa ka oho ena,

1 Pētero 3:15

Te meꞌe o kōrua mo aŋa: he haꞌamuri ki a Ietū Kiritō ꞌi roto i te māhatu pa he Pūꞌoko Haka Tere o kōrua i a ia te kī iŋa hopeꞌa o te meꞌe mo topa atu ki a kōrua. ꞌE ꞌi te hora taꞌatoꞌa e ꞌite pē hē kōrua ka pāhono ena ki te nuꞌu ꞌui atu he aha kōrua e haka moe ena i te manaꞌu ꞌi ruŋa i a Ietū.

1 Iovani 3:3

ꞌE taꞌatoꞌa nuꞌu tiaki ki te hoki iŋa mai o Ietū Kiritō, e haka tapa rō ꞌana mai roto i te hara, mo riro o rāua pē Ietū Kiritō, he taŋata hara kore.