Ēfeto 1:17 - Rapa Nui

¹⁷ He ani nō tāꞌaku aŋa ki te ꞌAtua o te tātou Pūꞌoko Haka Tere ko Ietū Kiritō, ki te tātou Matuꞌa o te raŋi, i a ia te pūai ꞌe te nui-nui taꞌatoꞌa, mo vaꞌai atu, hai Vārua Maitai, i te mārama-rama mo aŋi-aŋi e kōrua i te parautiꞌa o ruŋa ōꞌona, ki māhani riva-riva ai kōrua ki a ia.

Ēfeto 1:17 ပူးပေါင်းရင်းမြစ်များ

Māteo 11:25

ꞌI rā hora i pure i kī ai e Ietū: «He haꞌahana-hana atu a au ki a koe, e Koro, e te ꞌAtua o te raŋi ꞌe o te henua ē, ꞌo te taꞌe haka takeꞌa ōꞌou i taꞌa meꞌe naꞌa ki te nuꞌu manaꞌu ko rāua mau nō te nuꞌu ꞌite ꞌe mārama-rama, ꞌe ki te nuꞌu pa he ŋā poki a koe i haka takeꞌa ai.

Māteo 11:27

He kī ia e Ietū ki te nuꞌu: «Ko vaꞌai tahi mai ꞌana te meꞌe taꞌatoꞌa e tōꞌoku Matuꞌa. ꞌIna e tahi taŋata i ꞌite ko ai te Poki, he Matuꞌa mau nō; ꞌe ꞌina e tahi taŋata i ꞌite ko ai te Matuꞌa, he Poki ꞌe he nuꞌu haŋa mau nō e te Poki mo haka ꞌite.

Māteo 16:17

He kī e Ietū: —¡Ko te koa i a koe, e Tīmona, poki ꞌa Hōnā ē! Te meꞌe ꞌite ena e koe taꞌe o te taŋata i haka ꞌite atu, o tōꞌoku Matuꞌa o te raŋi.

Māteo 20:33

He pāhono e tū ŋā kope era: —He ora o te māua mata.

Māteo 6:13

ꞌE, ꞌi te hora o te haka ꞌatu mai, ꞌina koe ko haka rē i a mātou mo viri ki roto i te hara; e haka eꞌa koe i a mātou mai roto i te rima o Rukifero”.

Ruka 12:12

Ka tuꞌu ena te hora mo vānaŋa o kōrua, mo te Vārua Maitai e kī atu pē hē ana kī».

Ruka 2:14

«¡Ko te nui-nui ꞌe ko te pūai i a koe, e te ꞌAtua ē! ¡Ka ai te haumārū ꞌi roto i te taŋata taꞌatoꞌa o te ao ꞌi ruŋa i a rāua te koa o te ꞌAtua!».

Ruka 21:15

Māꞌaku e vaꞌai atu i te vānaŋa mārama-rama mo pāhono ki rā nuꞌu ꞌo ravaꞌa e tahi meꞌe mo kī i te kōrua reo-reo e te nuꞌu te rāua manaꞌu mau nō he tōtōā i a kōrua.

Iovani 14:26

ꞌE, ki oho mai te kope hāꞌūꞌū era, he Vārua Maitai uŋa mai e te Matuꞌa hai ꞌīŋoa ōꞌoku, he hāpī atu i te meꞌe taꞌatoꞌa ꞌe he haka manaꞌu tahi atu i tāꞌaku vānaŋa kī atu era.

Iovani 16:3

Te ŋā meꞌe nei ka aŋa atu ena ki a kōrua ꞌo te taꞌe ꞌite ko ai a au ꞌe ko ai te Matuꞌa.

Iovani 17:3

Te meꞌe he ora ꞌāpī ꞌina he hopeꞌa raꞌa ko te meꞌe nei: he ꞌite e rāua ko ai mau a koe, he ꞌAtua parautiꞌa e tahi mau nō, ꞌe ko ai a au a Ietū Kiritō, he kope uŋa mai e koe.

Iovani 20:17

He kī e Ietū: —Ē, ꞌina koe ko haka noho mai i a au. Kai iri ꞌana, paꞌi, a au ki tōꞌoku Matuꞌa. Ka oho ka kī ki te tētahi nuꞌu ꞌāꞌaku: «He iri a au ki tōꞌoku Matuꞌa, Matuꞌa takoꞌa o kōrua, ki tōꞌoku ꞌAtua, ꞌAtua takoꞌa o kōrua».

Aŋa o te ꞌĀpōtoro 6:10

ꞌE, ꞌina he ravaꞌa i a ia; e vānaŋa era, paꞌi, hai mārama-rama o te Vārua Maitai.

Aŋa o te ꞌĀpōtoro 7:2

He pāhono e ꞌĒteva: —E te taina ē, e kuā koro ē, ka haka roŋo mai rā: Te tātou ꞌAtua, i a ia te ꞌana-ꞌana o te pūai taꞌatoꞌa, ko haka takeꞌa ꞌana i a ia ki te tātou tupuna ko ⌊ꞌAparahama⌋ ꞌi Mētōpōtāmia, ꞌi te hora kai oho kai noho ꞌā a ꞌAparahama ꞌi Hārana,

Rōmano 1:28

ꞌI te haka rehu e te nuꞌu nei i te ꞌAtua, he haka rē mau rō ꞌai e te ꞌAtua ki te rāua manaꞌu taꞌe au mo aŋa mo oho nō i te meꞌe taꞌe tano.

Rōmano 15:6

mo haꞌahana-hana tahi o kōrua i te ꞌAtua, he Matuꞌa o te tātou Pūꞌoko Haka Tere ko Ietū Kiritō hai manaꞌu mau nō e tahi.

1 Kōrinto 12:8

O te Vārua Maitai te vaꞌai ki te tētahi taŋata i te pūai mo vānaŋa i te vānaŋa mārama-rama; ꞌe o te Vārua Maitai takoꞌa ꞌā te vaꞌai ki te rua i te pūai mo haka ꞌite i te meꞌe hōhonu o te ꞌAtua haka ꞌite e ia mau ꞌā ki rā taŋata.

1 Kōrinto 14:6

E te taina: ꞌina, paꞌi, e tahi hauhaꞌa mo oho atu ōꞌoku mo uꞌi i a kōrua ꞌe he vānaŋa atu hai ꞌarero kē taꞌe ꞌite e au ꞌe taꞌe aŋi-aŋi e kōrua. I hau rō atu, paꞌi, i te tano mo vānaŋa atu i te meꞌe haka aŋi-aŋi mai e te ꞌAtua, i te parautiꞌa ōꞌona, i te vānaŋa haka ꞌite mai e ia, ꞌe i te hāpī mo te kōrua riva-riva hai ꞌarero aŋi-aŋi e kōrua.

1 Kōrinto 2:10

Rā meꞌe taꞌe haka ꞌite mai era ꞌi muꞌa ꞌā ko haka aŋi-aŋi mai ꞌā e te ꞌAtua hai Vārua Maitai ꞌi te hora nei; a ia, paꞌi, e ꞌite rō ꞌā i te meꞌe taꞌatoꞌa, ꞌātā i te manaꞌu hopeꞌa o te ꞌAtua.

1 Kōrinto 2:8

Rā meꞌe manaꞌu era e te ꞌAtua mo aŋa ꞌina kai aŋi-aŋi e te nuꞌu pūꞌoko haka tere o te ao nei. ꞌĀhani, paꞌi, a rāua i aŋi-aŋi, e ko veo ꞌi ruŋa i te tātaurō i te tātou Pūꞌoko Haka Tere, kope i a ia te parau o te meꞌe taꞌatoꞌa.

2 Kōrinto 12:1

ꞌIna e tahi meꞌe mo ravaꞌa e te kope e tahi mo teꞌo-teꞌo o ruŋa i a ia mau ꞌā. ꞌE, ka ai atu pē ira, ꞌī a au he vānaŋa atu o ruŋa i te meꞌe haka takeꞌa ꞌe haka ꞌite mai e te tātou Pūꞌoko Haka Tere.

Ēfeto 1:3

Ki haꞌahana-hana tātou ki te ꞌAtua, he Matuꞌa o te tātou Pūꞌoko Haka Tere ko Ietū Kiritō, ꞌi te meꞌe era ko haꞌamaitai mai ꞌana i a tātou hai vaꞌai mai i te meꞌe riva-riva ai ꞌi ruŋa i te raŋi mo hāꞌūꞌū mai ꞌi te tātou haꞌere iŋa a tōꞌona ara ꞌo te ai o tātou ꞌa Ietū Kiritō.

Ēfeto 3:5

he meꞌe taꞌe haka ꞌite era ki te taŋata ꞌi muꞌa ꞌā, ꞌe, ꞌi te hora nei, ko haka ꞌite ꞌana e te ꞌAtua ki tāꞌana ⌊ꞌāpōtoro⌋ ꞌe ki te perofeta hai ⌊Vārua Maitai⌋.

Ēfeto 4:13

ꞌātā ka ai rō e tahi mau nō manaꞌu ꞌo te māhani ꞌe ꞌo te haka moe i te manaꞌu ꞌi ruŋa i te Poki o te ꞌAtua. ꞌE pē ira takoꞌa ka paꞌari ka oho ena te tātou manaꞌu o ruŋa i te meꞌe o te ꞌAtua, ꞌātā ka ai rō te tātou huru, huru riva, pa he huru riva o Ietū Kiritō, ꞌina e tahi hape.

Fīripo 3:15

Pē nei a tātou, te nuꞌu manaꞌu paꞌari o ruŋa i te meꞌe o te ꞌAtua, ana manaꞌu. ꞌE mo ai tāꞌue e manaꞌu kē rō ꞌana kōrua o ruŋa i te ŋā meꞌe nei, he haka aŋi-aŋi atu e te ꞌAtua he aha te meꞌe tano.

2 Timoteo 2:25

E ꞌite takoꞌa i te kī, hai māhatu maꞌitaki, i te hape o te nuꞌu taꞌe haka roŋo, koiꞌite ꞌi te riva rahi o te ꞌAtua, he huri i te rāua manaꞌu ki a ia, ꞌe he ꞌite i te parautiꞌa o ruŋa i a Ietū Kiritō,

Tito 1:1

A au, a Pauro, he ꞌaroha atu ki a koe, e Tito ē. A koe pa he poki mau ꞌā ꞌāꞌaku ꞌo tuꞌu ⌊haka moe i te manaꞌu⌋ ꞌi ruŋa i a Ietū pē au. Ka ai ꞌi ruŋa i a koe te riva rahi ꞌe te haumārū o te ꞌAtua, he Matuꞌa o tātou, ꞌe o Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa. E Tito, ko ꞌite riva-riva ꞌana e koe: a au he tāvini o te ꞌAtua, ꞌe he ⌊ꞌāpōtoro⌋ ꞌa Ietū Kiritō, kope uŋa mai i a au ki te nuꞌu haꞌataꞌa e te ꞌAtua māꞌana, mo haka pūai i te rāua haka moe iŋa i te manaꞌu ꞌi ruŋa i a ia, ꞌe mo ꞌata haka aŋi-aŋi ki a rāua i te roŋo parautiꞌa o ruŋa i te ⌊Kiritō⌋, he roŋo hāꞌūꞌū i te taŋata mo riro o te rāua noho iŋa noho iŋa tano ki te mata o te ꞌAtua, ki aŋi-aŋi riva-riva ai pē nei ē: e ai rō i a rāua te ora ꞌāpī ꞌina he hopeꞌa raꞌa vaꞌai e te ꞌAtua. ꞌI raꞌe, paꞌi, ki te aŋa i te ao, i hōrea rō ai e te ꞌAtua i te ora ꞌāpī nei, ꞌe a ia ꞌAtua haka tano i tāꞌana meꞌe kī. ꞌI te hora tano kī e te ꞌAtua i haka ꞌite ai ki te taŋata o ruŋa i te ora ꞌāpī nei hai ⌊roŋo riva-riva o ruŋa i a Ietū Kiritō⌋, he roŋo haka ꞌite oho e au uŋa mai e te ꞌAtua, kope toꞌo i a tātou mai roto i te ūtuꞌa o te hara.

Tanatiako 2:1

E te taina ōꞌoku ē, a kōrua, te nuꞌu ⌊haka moe i te manaꞌu⌋ ꞌi ruŋa i te tātou Pūꞌoko Haka Tere hōnui ko Ietū Kiritō, e uꞌi ꞌo haꞌataꞌa rō i te taŋata hai manaꞌu taŋata.

2 Pētero 1:3

Te ꞌAtua, hai pūai ōꞌona, e hāꞌūꞌū mai ena hai rauhuru rāveꞌa mo riva o tātou mo haꞌatura ki a ia ꞌe mo tano o te tātou noho iŋa ki tōꞌona mata. Te meꞌe nei e ravaꞌa ena hai māhani o tātou ki a ia, kope haꞌataꞌa i a tātou mo huaꞌai ꞌāꞌana hai haka ꞌite mai i tōꞌona huru riva ꞌe i tōꞌona pūai nui-nui.

2 Pētero 3:18

Te meꞌe mau o kōrua mo aŋa he uꞌi mo māhani riva-riva ki te tātou Pūꞌoko Haka Tere ko Ietū Kiritō, kope haka eꞌa i a tātou mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa, ꞌe ꞌai kōrua ka noho ka oho rō ꞌi roto i tōꞌona haŋa. ¡Ki haꞌahana-hana tātou ki a ia ꞌi te hora nei ꞌe ꞌi te hora taꞌatoꞌa! Ka ai pē ira.

Meꞌe Haka Takeꞌa 7:12

ꞌe he kī pē nei ē: «¡He aŋi ꞌana! Te meꞌe mo te tātou ꞌAtua: he haꞌahana-hana, he haka nui-nui, he moꞌa ꞌe he māuru-uru o te taꞌatoꞌa ꞌo te ꞌite ōꞌona i te meꞌe taꞌatoꞌa, ꞌo te ai i a ia te pūai ꞌe te mana. Ki haꞌahana-hana tātou ki a ia ꞌātā ki te hopeꞌa raꞌa. ¡⌊ꞌĀmene⌋!».