2 Timoteo 4:8 - Rapa Nui

⁸ Te meꞌe toe nō he vaꞌai mai i tōꞌoku hei, hei vaꞌai ki te nuꞌu aŋa i te meꞌe tī-tika ki te mata o te ꞌAtua ka vaꞌai mai ena ꞌi te mahana o te ture hopeꞌa e Ietū Kiritō, kope ture hai parautiꞌa i te hape o te taŋata. ꞌE taꞌe ki a au nō ka vaꞌai mai ena, ki te nuꞌu taꞌatoꞌa tiaki hai māhatu ki tōꞌona hoki iŋa mai.

2 Timoteo 4:8 ပူးပေါင်းရင်းမြစ်များ

Māteo 24:36

»Te mahana ꞌe te hora o tōꞌona hoki iŋa mai ꞌina e tahi taŋata i ꞌite. Kai ꞌite e te merahi o te raŋi, ꞌe pē ira takoꞌa ꞌā e te Poki; he Matuꞌa mau nō te meꞌe i ꞌite.

Māteo 7:22

ꞌI te mahana o tāꞌana ture hopeꞌa, nuꞌu rahi te nuꞌu ka kī mai ena: “E te mātou Pūꞌoko Haka Tere ē, i haka ꞌite i oho rō mātou hai ꞌīŋoa ōꞌou i te vānaŋa haka ꞌite mai e te ꞌAtua, i haka eꞌa rō i te tātane mai roto i te taŋata ꞌe i aŋa takoꞌa rō meꞌe rahi nō atu mana hai ꞌīŋoa ōꞌou”.

Ruka 10:12

ꞌĪ a au he kī atu: te ūtuꞌa mo rā nuꞌu, ꞌi te mahana o te haka ūtuꞌa, ꞌata hau rō atu ki te ūtuꞌa mo te nuꞌu taꞌe tano o ⌊Tōroma⌋.

Rōmano 2:5

ꞌE, ꞌi tuꞌu pūꞌoko hio-hio, ꞌina koe he huri i tuꞌu manaꞌu ki te ꞌAtua. Nā koe e haꞌaputu e oho ꞌana i te riri o te ꞌAtua mōꞌou mo te mahana o te haka ūtuꞌa, he mahana mo tuꞌu mai ōꞌona mo kī i te ūtuꞌa tano mo te taŋata hara taꞌatoꞌa.

Rōmano 8:23

ꞌE taꞌe ko rāua nō te meꞌe māui-ui pē ira, ko tātou takoꞌa, he nuꞌu haka moe i te manaꞌu ꞌi ruŋa i a Ietū, ka ai atu i a tātou te Vārua Maitai, he meꞌe raꞌe i vaꞌai mai o te meꞌe mo vaꞌai mai e te ꞌAtua. ꞌI roto i a tātou e taŋi nei ki te hora mo haka takeꞌa e te ꞌAtua: he ŋā poki mau ꞌā ꞌāꞌana ꞌe he haka eꞌa e ia i te tātou hakari mai roto i te ꞌati.

1 Kōrinto 2:9

E kī rō ꞌana, paꞌi, ꞌi ruŋa i te ⌊Pāpaꞌi Moꞌa⌋: «Te ꞌAtua ko haka riva-riva ꞌā mo te nuꞌu haŋa ki a ia i te meꞌe ꞌina he kope raꞌe i takeꞌa, i ŋaroꞌa ꞌe korohaŋa i manaꞌu».

1 Kōrinto 3:13

Te huru o te aŋa o te taꞌatoꞌa ka takeꞌa riva-riva ena ꞌi te mahana o te ture hopeꞌa, mahana ka uꞌi era e Ietū hai ahi hoki i aŋa riva-riva rō ꞌo ꞌina.

1 Kōrinto 9:25

Te nuꞌu ꞌāꞌati e hāpaꞌo rō ꞌana i a rāua mo te hora o te ꞌāꞌati. E aŋa ena pē ira mo rē i te hei, ꞌe rā hei e hopeꞌa era he mae-mae. ꞌE, a tātou e aŋa nei mo ravaꞌa i te meꞌe te hauhaꞌa e ko kore ki te hora hopeꞌa.

2 Kōrinto 5:2

E noho nei tātou hai hakari nei he ꞌu-ꞌū nō te aŋa ꞌi te ꞌati ꞌamo e tātou. Te meꞌe haŋa he tuꞌu hōrou mai te hora mo kamiare o te hakari nei ki te hakari ꞌāpī o te raŋi.

Fīripo 3:11

Te tumu e haŋa nei a au ki te ŋā meꞌe nei: mo haka ora i a au e te ꞌAtua mai te mate pe muꞌa ka oho ena.

Kōrosa 1:5

ꞌo te ai e tiaki takoꞌa rō ꞌana kōrua ki te meꞌe hōrea mai e ia mo tātou ꞌi te raŋi. A kōrua ko ŋaroꞌa era ꞌana o ruŋa i te meꞌe nei hora haka ꞌite atu era i te roŋo parautiꞌa o te ꞌAtua

1 Tētārōnika 1:10

ꞌE e ꞌaꞌamu takoꞌa rō ꞌana rā nuꞌu pē hē kōrua e tiaki ena ki te hoki iŋa mai mai te raŋi o tāꞌana Poki ko Ietū, kope haka ora e te ꞌAtua mai te mate, ꞌe kope haka eꞌa i a tātou mai te ūtuꞌa taparahi-taꞌata, ūtuꞌa nā e tuꞌu rō mai.

1 Tētārōnika 5:4

ꞌE a kōrua, e te taina ē, taꞌe ꞌi roto i te pōhāhā o te ao nei e noho ena, ki maꞌurima ai i a kōrua pa he toke-toke e te mahana o tōꞌona hoki iŋa mai.

2 Tētārōnika 2:8

Ki toꞌo, ka takeꞌa iho ena e te nuꞌu i rā taŋata riri taparahi-taꞌata era mo te ꞌAtua, kope ka haka kore ena e te tātou Pūꞌoko Haka Tere hai reꞌo ōꞌona ꞌe hai ꞌana-ꞌana o tōꞌona mana ꞌi te hora ka hoki mai ena.

1 Timoteo 6:19

Pē ira he haꞌaputu ꞌi ruŋa i te raŋi te hauhaꞌa parautiꞌa mo te rāua noho iŋa pe muꞌa ka oho ena, ꞌe te rāua noho iŋa ꞌi te ao nei he tano ki te noho iŋa haŋa e te ꞌAtua.

2 Timoteo 1:10

ꞌE, ko haka takeꞌa mai ꞌā e te ꞌAtua hai tuꞌu mai era o Ietū Kiritō, kope haka eꞌa i a tātou mai roto i te ūtuꞌa o te hara. Ko haka kore ꞌā, paꞌi, e Ietū i te pūai o te mate, ꞌe ko haka ꞌite ꞌā ki te nuꞌu: mo haka noho o rāua i te manaꞌu ꞌi ruŋa i te ⌊roŋo riva-riva o te ꞌAtua⌋ he ravaꞌa i te ora ꞌāpī ꞌina he hopeꞌa raꞌa.

2 Timoteo 1:12

ꞌO ira te ꞌati e topa mai nei ki a au. Ka ai atu pē ira, ꞌina a au he riꞌa-riꞌa. Ko ꞌite ꞌana, paꞌi, e au ꞌi ruŋa i a ai a au e haka noho nei i tōꞌoku manaꞌu, ꞌe ko aŋi-aŋi riva-riva ꞌana e au e ai rō ꞌana tōꞌona pūai mo hāpaꞌo ꞌe mo hāꞌūꞌū mai i te aŋa vaꞌai mai e ia ꞌātā ki te mahana o tōꞌona hoki iŋa mai.

2 Timoteo 1:18

ꞌO ira a au e pure nei mo haka ꞌaroha o te ꞌAtua i a ia ꞌi te mahana o te ture hopeꞌa. Ko ꞌite riva-riva ꞌana, hoꞌi, koe, e Timoteo ē, pē hē a ia i hāꞌūꞌū mai ai ꞌi Ēfeto.

2 Timoteo 2:5

Pē ira takoꞌa ꞌā te kope ꞌāꞌati, ꞌina e ko haka hei mo taꞌe haꞌatura ki te haka tere iŋa era o rā ꞌāꞌati.

2 Timoteo 4:1

ꞌI muꞌa o te ꞌAtua ꞌe o Ietū Kiritō, kope ka oho mai ena pa he ꞌAriki nui-nui mo haka ūtuꞌa i te nuꞌu ora ꞌe i te nuꞌu mate, ka kī atu ena a au:

Tito 2:13

ꞌātā ka tuꞌu rō mai te meꞌe nui-nui tiaki e tātou: he hoki iŋa haka ꞌou mai o te tātou ꞌAtua pūai ko Ietū Kiritō, kope haka eꞌa i te taŋata mai roto i te ūtuꞌa o te hara ꞌe vaꞌai mai i te ora ꞌāpī ꞌina he hopeꞌa raꞌa.

ꞌEvereo 12:11

ꞌIna e tahi ūtuꞌa au ꞌi te hora o te haka ūtuꞌa; te meꞌe mo ŋaroꞌa e koe he mamae. Ka ai atu pē ira, mo ravaꞌa ōꞌou mo haka tī-tika i tuꞌu haka tere iŋa hai rā ūtuꞌa, he ravaꞌa ia e koe te noho iŋa tano ꞌi roto i te haumārū.

ꞌEvereo 9:28

Pē ira takoꞌa a Ietū Kiritō: e tahi mau nō vaꞌai iŋa i a ia mo mate pa he tūtia mo haka kore i te hara o te nuꞌu. ꞌE pe muꞌa ka oho ena he tuꞌu haka ꞌou mai a Ietū taꞌe ꞌō mo vaꞌai haka ꞌou i a ia pa he tūtia mo te hara o te taŋata, mo vaꞌai ki te nuꞌu tiaki ki a ia i te ora ꞌāpī ꞌina he hopeꞌa raꞌa.

Tanatiako 1:12

Ko te koa i te taŋata haꞌaoromaꞌi hai pūai i te ꞌati taꞌatoꞌa topa ꞌi ruŋa i a ia. ꞌI te haka moe nō i te manaꞌu ꞌi ruŋa i a Ietū ꞌi roto i te ꞌati, he tano rā taŋata ki te mata o te ꞌAtua, ꞌe he vaꞌai ki a ia i te ora ꞌāpī ꞌina he hopeꞌa raꞌa, he hei kī e te ꞌAtua mo vaꞌai ki te nuꞌu haŋa ki a ia.

1 Pētero 1:4

ꞌe e vaꞌai rō mai i te meꞌe hāpaꞌo mo tātou ꞌi ruŋa i te raŋi, he meꞌe e ko kore, e ko tāpau ꞌe e ko mae-mae ki te hora hopeꞌa.

1 Pētero 5:4

Pē ira, ꞌi te hora o te tuꞌu iŋa haka ꞌou mai o te Pūꞌoko Haka Tere o te ŋāŋata hāpaꞌo māmoe taꞌatoꞌa, he haka hei atu i a kōrua hai meꞌe ꞌina e ko ŋaro ki te hora hopeꞌa, ko te meꞌe ena: he noho mau rō ꞌai kōrua ꞌi muri i a ia ꞌi roto i tōꞌona nui-nui ꞌana-ꞌana.

Meꞌe Haka Takeꞌa 1:7

ꞌIna ko rehu: ¡ꞌI ruŋa i te raŋi tea-tea ka oho mai ena a Ietū! Taꞌatoꞌa nō ka takeꞌa ena, ꞌātā te nuꞌu ꞌo-ꞌoka era i a ia. Te taŋata taꞌatoꞌa o te ao taꞌe haka moe i te manaꞌu ꞌi ruŋa i a ia e ŋaroꞌa rō i te māui-ui ki roto i te ivi o ruŋa i a ia. He aŋi mau ꞌā, pē ira ka topa ena.

Meꞌe Haka Takeꞌa 19:11

He uꞌi atu a au e ha-hata rō ꞌā te raŋi ꞌe he takeꞌa mai te hoi tea-tea e tahi. Te ꞌīŋoa o te kope o ruŋa: «He Kope Aŋa i Tāꞌana Meꞌe Kī» ꞌe «He Kope Parautiꞌa»; hai tī-tika, paꞌi, e haka tere ena i a ia ꞌi te hora kī i te tano ꞌe i te taꞌe tano o te taŋata ꞌe pē ira ꞌā ꞌi te hora o te tamaꞌi.

Meꞌe Haka Takeꞌa 2:10

’ꞌIna koe ko riꞌa-riꞌa ꞌi te ꞌati ka topa ena. Tētahi o kōrua e puru rō ꞌi roto i te hare maꞌuꞌaurī hai Rukifero, he rāveꞌa e tahi mo haka ꞌatu atu i a kōrua taꞌatoꞌa. E hoꞌe ꞌahuru mahana ka ꞌamo ena kōrua i rā ꞌati. E haka noho e oho nō koe i tuꞌu manaꞌu ꞌi ruŋa i a au ka ai atu he mate koe ꞌo te aŋa pē ira, ꞌe he vaꞌai atu e au i te ora ꞌāpī ꞌina he hopeꞌa raꞌa mo haka koa i a koe.

Meꞌe Haka Takeꞌa 22:20

Te kope haka ꞌite he parautiꞌa te ŋā meꞌe nei e kī rō ꞌā: «He aŋi ꞌā, e ko roa hia a au ka tuꞌu atu ena». ꞌE te kī ꞌāꞌaku: «¡Ka ai pē ira! ¡Ka oho mai koe, e Ietū ē, e te mātou Pūꞌoko Haka Tere ē!».

Meꞌe Haka Takeꞌa 4:10

he tū-turi te piti ꞌahuru mā maha ŋāŋata ra-rahi era ꞌi muꞌa o rā kope he haꞌamuri, ꞌai ka ava i te rāua hei a muꞌa i rā pepe koia ko kī:

Meꞌe Haka Takeꞌa 4:4

ꞌe e haka vari takoꞌa rō ꞌana e te pepe ꞌariki haka ꞌou e piti ꞌahuru mā maha ꞌi ruŋa e noho rō ꞌana e piti ꞌahuru mā maha ŋāŋata ra-rahi e uru rō ꞌana i te kahu tea-tea ꞌe e puꞌa rō ꞌana i te hei aŋa hai piru.