2 Kōrinto 3:18 - Rapa Nui

¹⁸ Hora nei a tātou taꞌatoꞌa, te nuꞌu haka moe i te manaꞌu ꞌi ruŋa i a Ietū, kume o te meꞌe puru o te ꞌāriŋa, e haka takeꞌa ena i te pūai ꞌe i te nui-nui o te tātou Pūꞌoko Haka Tere, pa he ꞌata ꞌi roto i te hiꞌo, ꞌe a ia hai Vārua Maitai e aŋa e oho ena ꞌi roto i te tātou māhatu mo haka riro mo oho i te tātou huru pa he huru riva mau ꞌā ōꞌona.

2 Kōrinto 3:18 ပူးပေါင်းရင်းမြစ်များ

Iovani 1:14

Tū Vānaŋa era i riro rō he taŋata ꞌe i noho rō ꞌi muri i a tātou. Ko takeꞌa ꞌana e tātou tōꞌona pūai, pūai vaꞌai e te ꞌAtua Matuꞌa ki tāꞌana Poki era e tahi mau nō. Te haŋa o te ꞌAtua mo tātou ꞌe te parautiꞌa o ruŋa ōꞌona i haka takeꞌa mai ai ꞌi ruŋa i a ia.

Iovani 12:41

I kī ai a ꞌItaia i te vānaŋa nei ꞌi te meꞌe era ko haka takeꞌa era ꞌā e te ꞌAtua ki a ia ꞌi muꞌa ꞌā i te pūai o Ietū; ꞌo ira i vānaŋa ai o ruŋa.

Iovani 17:22

»Te nuꞌu vaꞌai mai era e koe ko haka nui-nui ꞌana e au pa he haka nui-nui iŋa mai era ōꞌou i a au, mo riro o rāua e tahi mau nō pē tātou.

Iovani 17:24

»E Koro, ꞌāꞌau a rāua i vaꞌai mai, ꞌe e haŋa rō ꞌana a au mo noho atu o rāua ꞌi te kona ꞌi ira a au ka noho nei, ki takeꞌa ai i te pūai ꞌe i te nui-nui vaꞌai mai e koe, he haŋa mai ōꞌou mai te hora era ꞌā kai aŋa ꞌana i te ao.

Rōmano 12:2

ꞌIna kōrua ko noho haka ꞌou hai manaꞌu taꞌe tano o te taŋata. E haka rē ki te ꞌAtua mo huri i te kōrua manaꞌu, ki huri ai te kōrua noho iŋa, ꞌe ki ꞌite ai e kōrua he aha te meꞌe haŋa o te ꞌAtua, te auraꞌa, he aha te meꞌe tano ki a ia, he aha te meꞌe mo koa ōꞌona, ꞌe he aha te meꞌe hopeꞌa o te riva-riva ki tōꞌona mata.

Rōmano 13:14

Te meꞌe mau nō mo aŋa e kōrua he haka rē ki a Ietū Kiritō mo haka tere i a kōrua, mo tano o te kōrua noho iŋa pa he noho iŋa mau ꞌana ōꞌona, ꞌo tano rō te kōrua noho iŋa ki te meꞌe pohe nō o te hakari.

Rōmano 8:29

Te manaꞌu, paꞌi, ōꞌona mo rāua mai muꞌa ꞌā: mo ai o te māhatu pa he māhatu o tāꞌana Poki, ki ai ai rā Poki he ꞌatariki o te meꞌe rahi nō atu taina.

Rōmano 8:4

I aŋa ai i te meꞌe nei ki tano ai a tātou, te nuꞌu taꞌe haka tere haka ꞌou hai manaꞌu taŋata, haka tere hai Vārua Maitai, mo haꞌatura ki te meꞌe kī ꞌi ruŋa i te haka tere iŋa ꞌa Mōtē.

Rōmano 8:7

Te nuꞌu haka tere i a rāua hai manaꞌu taŋata, he nuꞌu riri mo te ꞌAtua. Te nuꞌu nei ꞌina he haŋa mo haꞌatura ki te ⌊haka tere iŋa o te ꞌAtua haka pāpaꞌi ki a Mōtē⌋, ꞌe, takoꞌa, ꞌina mau ꞌā e ko ravaꞌa e rāua mo haꞌatura.

1 Kōrinto 13:12

Te meꞌe ꞌite o tātou ꞌi te hora nei o ruŋa i te ꞌAtua pa he meꞌe ꞌehu-ꞌehu e tahi ꞌi roto i te hiꞌo; ꞌe, ka tano ena te mahana, he takeꞌa riva-riva mai. Hora nei e ai rō ꞌā te meꞌe taꞌe aŋi-aŋi e au o ruŋa i a ia; ꞌe, e tano rō te mahana, he māhani a au i a ia, pa he māhani iŋa mai ōꞌona i a au.

1 Kōrinto 15:49

ꞌE pa he tuꞌu iŋa nei o tātou pa he taŋata aŋa era hai ꞌōꞌone, pē ira takoꞌa ꞌana ka tuꞌu ena a tātou pa he kope era o te raŋi.

2 Kōrinto 3:17

Te tātou Pūꞌoko Haka Tere e haka tika ena i te tātou māhatu hai Vārua Maitai. ꞌE te kope haka tika e te Vārua Maitai ko eꞌa ꞌā mai te pūai o te hara ꞌe ko eꞌa takoꞌa ꞌā mai te manaꞌu pē nei ē: hai haꞌatura ki te haka tere iŋa ꞌa Mōtē he tano ki te mata o te ꞌAtua.

2 Kōrinto 4:4

Te nuꞌu nei, ꞌi te taꞌe haka moe i te rāua manaꞌu ꞌi ruŋa i a Ietū, ko haka pōhāhā ꞌā i te rāua manaꞌu e Rukifero, ꞌatua o te ao nei, ꞌo aŋi-aŋi, ꞌo takeꞌa i te māꞌeha o te mōrī o te roŋo riva-riva o ruŋa i te pūai ꞌe i te nui-nui o te ⌊Kiritō⌋, ꞌāriŋa ora o te ꞌAtua.

2 Kōrinto 4:6

O te ꞌAtua kī era pē nei ē: «Ka ai te mōrī ꞌi roto i te pōhāhā», te haka māꞌeha i te mātou manaꞌu mo haka māꞌeha takoꞌa e mātou i te manaꞌu o te tētahi nuꞌu hai haka ꞌite i te pūai ꞌe i te nui-nui o te ꞌAtua takeꞌa ꞌi ruŋa i a Ietū Kiritō.

2 Kōrinto 5:17

Kope nō era o te Kiritō ꞌi te haka moe i te manaꞌu ꞌi ruŋa i a ia, he kope ꞌāpī e tahi; te manaꞌu ꞌe te noho iŋa raꞌe ōꞌona ko ŋaro ꞌā, ꞌe ko haꞌamata ꞌana tōꞌona noho iŋa ꞌāpī.

Karatia 6:15

ꞌE, ki te mata o te ꞌAtua, ꞌina e tahi hauhaꞌa o te meꞌe he hore ꞌo he taꞌe hore o te kiri o te kinoŋa. Te meꞌe hauhaꞌa mōꞌona he haka ꞌāpī atu i a koe e te Vārua Maitai.

Kōrosa 3:10

Te ꞌAtua ko vaꞌai atu ꞌana i te huru ꞌāpī, ꞌe ꞌāꞌana te aŋa te oho atu ꞌi roto i te kōrua māhatu mo riro o kōrua pē ia, ki ꞌata māhani ai kōrua i a ia.

1 Timoteo 1:11

He hāpī nā o te roŋo riva-riva hopeꞌa o te nui-nui mo haka ꞌite e au, uŋa mai e te ꞌAtua, ki a ia ana haꞌahana-hana.

Tito 3:5

ꞌE, ka ai atu ꞌina e tahi meꞌe riva-riva o tātou i aŋa, te ꞌAtua, ꞌi tōꞌona haka ꞌaroha, ko haka eꞌa ꞌā i a tātou mai roto i te ūtuꞌa o te hara hai haka maꞌitaki i te tātou māhatu ꞌe hai vaꞌai mai i te ora ꞌe ꞌi te noho iŋa ꞌāpī hai ⌊Vārua Maitai⌋.

Tanatiako 1:23

Te kope haka roŋo nō i rā roŋo ꞌe ꞌina he aŋa i tāꞌana meꞌe kī, pa he taŋata uꞌi a roto i te hiꞌo:

1 Iovani 3:2

E te taina, he ŋā poki tātou o te ꞌAtua. Ka ai atu ꞌina a tātou kai takeꞌa vave ꞌā pē hē te tātou huru pe muꞌa ka oho ena, a tātou e ꞌite rō ꞌana pē nei ē: ka tuꞌu haka ꞌou mai ena a Ietū Kiritō, te tātou huru pē ia ꞌā ꞌi te meꞌe era he takeꞌa iho mau e tātou i a ia.