2 Kōrinto 2:14 - Rapa Nui

¹⁴ He māuru-uru a au ki te ꞌAtua. ꞌĀꞌana, paꞌi, te vaꞌai mai i te pūai mo rē ki te meꞌe taꞌatoꞌa ꞌo te ai o mātou o te Kiritō. ꞌE ꞌāꞌana takoꞌa te hāꞌūꞌū mai mo haka ꞌite i te ⌊roŋo riva-riva o ruŋa i a Ietū⌋, roŋo pa he manoꞌi ꞌeo tuꞌu ki te kona taꞌatoꞌa.

2 Kōrinto 2:14 ပူးပေါင်းရင်းမြစ်များ

Iovani 16:33

E kī atu ena au i te meꞌe taꞌatoꞌa nei mo noho kōrua ꞌi roto i te haumārū ꞌo te ai o kōrua ꞌāꞌaku. ꞌI te ao nei e ꞌamo rō kōrua i te ꞌati. Kiahio kōrua; ko rē ꞌana, paꞌi, a au ki te kope ꞌāꞌana te haka tere i te ao.

Rōmano 1:8

Te meꞌe raꞌe, he māuru-uru a au ki te ꞌAtua hai Ietū Kiritō mo kōrua taꞌatoꞌa ꞌo te ai te haka moe iŋa o kōrua i te manaꞌu ꞌi ruŋa i a Ietū e ꞌite rō ꞌana ꞌi te kona taꞌatoꞌa.

Rōmano 15:19

ꞌe, takoꞌa, hai mana aŋa e au hai pūai vaꞌai mai e te Vārua o te ꞌAtua. Pē ira i haka mao riva-riva ai a au i te aŋa vaꞌai mai he haka ꞌite he oho i te roŋo riva-riva o ruŋa i te Kiritō mai Hērutarema ki te kona taꞌatoꞌa, ꞌātā ka tuꞌu rō ki Iriria.

Rōmano 6:17

ꞌI muꞌa ꞌā, a kōrua he ꞌekaravo o te hara. ꞌE, māuru-uru ki te ꞌAtua, hora nei, e haꞌatura rō ꞌana hai māhatu ki te hāpī parautiꞌa haka ꞌite atu.

Rōmano 8:37

Ka ai atu e topa rō mai ꞌana te ŋā ꞌati taꞌatoꞌa nei, ꞌina he rē mai ki a tātou; e eꞌa nei, paꞌi, a tātou hai koa mai roto i te ꞌati hai pūai o te kope haŋa rahi mai.

1 Kōrinto 12:8

O te Vārua Maitai te vaꞌai ki te tētahi taŋata i te pūai mo vānaŋa i te vānaŋa mārama-rama; ꞌe o te Vārua Maitai takoꞌa ꞌā te vaꞌai ki te rua i te pūai mo haka ꞌite i te meꞌe hōhonu o te ꞌAtua haka ꞌite e ia mau ꞌā ki rā taŋata.

1 Kōrinto 15:37

Te karu, ka ai atu he karu tariko ꞌo he tētahi atu karu, e ai rō ꞌā tōꞌona huru, ꞌe te meꞌe tupu mai roto i te karu taꞌe he huru karu toe.

1 Kōrinto 15:57

E te taina, ¡ki māuru-uru tātou ki te ꞌAtua ꞌo te vaꞌai mai i te pūai mo rē ki te hara ꞌe ki te mate hai meꞌe aŋa era e Ietū Kiritō, he Pūꞌoko Haka Tere o tātou!

2 Kōrinto 1:11

Te meꞌe haŋa he hāꞌūꞌū he pure mai o kōrua mo te mātou aŋa. ꞌE mo rahi o te nuꞌu pure mo mātou, he rahi takoꞌa ia te nuꞌu māuru-uru ki te ꞌAtua o tōꞌona haꞌamaitai mai i a mātou.

2 Kōrinto 8:16

Māuru-uru ki te ꞌAtua ꞌo te haka poreko ꞌi roto i te manaꞌu o Tito te haŋa mo hāꞌūꞌū atu ki a kōrua pē au.

2 Kōrinto 9:15

¡Ki māuru-uru tahi tātou ki te ꞌAtua ꞌo te vaꞌai mai i te hauhaꞌa hopeꞌa o te nui-nui, hauhaꞌa ꞌina he vānaŋa mo haꞌaauraꞌa, he Poki ena ꞌāꞌana!

Ēfeto 5:2

E haka rē mo te haŋa e haka tika atu, pa he meꞌe aŋa e Ietū hora vaꞌai era i a ia ki te mate mo tātou. ꞌE tōꞌona mate era, mo te ꞌAtua, pa he tūtia ꞌeo.

Ēfeto 5:20

ꞌO te ai o kōrua ꞌa Ietū Kiritō, Pūꞌoko Haka Tere o tātou, e māuru-uru e oho ki te ꞌAtua Matuꞌa mo te meꞌe taꞌatoꞌa.

Fīripo 4:18

He haka ꞌite atu a au: te meꞌe taꞌatoꞌa haka maꞌu mai era e kōrua ki a Epafororito ko tuꞌu mai ꞌana; rahi riꞌa-riꞌa ꞌe ꞌina he meꞌe hape toe ꞌāꞌaku. Te meꞌe nei pa he tūtia ꞌeo vaꞌai ki te ꞌAtua, ꞌe he meꞌe koa ꞌāꞌana.

Kōrosa 1:23

Te meꞌe nō, e haka hio-hio e oho te kōrua manaꞌu ꞌi ruŋa i a Ietū ꞌe e tiaki e oho ki te meꞌe taꞌatoꞌa hōrea e te ꞌAtua mo te nuꞌu ꞌāꞌana, meꞌe i ꞌite e kōrua ꞌi te hora ŋaroꞌa era i te ⌊roŋo riva-riva o ruŋa i a Ietū⌋, roŋo haka ꞌite oho a te kona taꞌatoꞌa o te ao, ꞌe roŋo hāꞌūꞌū e au, e Pauro, mo haka ꞌite.

Kōrosa 1:6

tuꞌu atu era ki a kōrua. Te roŋo riva-riva nei o ruŋa i a Ietū nā ko ꞌite ko oho ꞌana ꞌi te kona taꞌatoꞌa o te ao koia ko te haka ꞌāpī ko te oho i te noho iŋa o te nuꞌu haka moe i te manaꞌu ꞌi ruŋa i a ia, pa he meꞌe topa atu ki a kōrua hora aŋi-aŋi era he parautiꞌa mau ꞌā te vānaŋa ŋaroꞌa e kōrua o ruŋa i te riva rahi o te ꞌAtua mo te taŋata.

Kōrosa 2:15

ꞌI rā hora i haka kore takoꞌa ai e te ꞌAtua i te pūai ꞌe i te tōroꞌa mai ruŋa i te ŋā kope ena ꞌina he takeꞌa mai haka tere i te ao nei ꞌe he haka takeꞌa mai ꞌina rāua pūai toe.

1 Tētārōnika 1:8

Hai kōrua te roŋo riva-riva o ruŋa i a Ietū Kiritō i ꞌite i oho ai a te kona taꞌatoꞌa o Mātērōnia ꞌe o Ākāia, ꞌe taꞌe nō a te ŋā kona nei, a te kona taꞌatoꞌa. Te nuꞌu o te ŋā kona nei e ꞌite rō ꞌana pē nei ē: e haka moe rō ꞌana kōrua i te manaꞌu ꞌi ruŋa i te ꞌAtua. ¿Mo aha ia a mātou ana vānaŋa haka ꞌou o ruŋa i a kōrua ki a rāua? Taꞌe he parau ꞌāpī mo te nuꞌu era.

1 Tētārōnika 3:9

E ko pau te māuru-uru o mātou ki te ꞌAtua, ꞌi roto i te mātou pure, mo te rahi o te koa ŋaroꞌa e mātou hai kōrua.

1 Timoteo 2:8

Te meꞌe haŋa ꞌāꞌaku: e pure te ŋāŋata ꞌi te kona taꞌatoꞌa, e maꞌu te rima a ruŋa mo pure ki te ꞌAtua hai māhatu maꞌitaki, taꞌe hai riri ꞌe taꞌe hai ꞌaka-ꞌaka o te manaꞌu.

2 Timoteo 2:2

E kimi koe hai ŋāŋata haka tano i te rāua meꞌe kī, ŋāŋata ꞌite takoꞌa mo hāpī i te rua. Ki a rāua koe ana haka ꞌite mo hāpī e rāua ki te tētahi i te hāpī parautiꞌa o ruŋa i a Ietū Kiritō haka ꞌite atu era e au ꞌi te hora hāpī ōꞌoku i te nuꞌu.

Meꞌe Haka Takeꞌa 7:12

ꞌe he kī pē nei ē: «¡He aŋi ꞌana! Te meꞌe mo te tātou ꞌAtua: he haꞌahana-hana, he haka nui-nui, he moꞌa ꞌe he māuru-uru o te taꞌatoꞌa ꞌo te ꞌite ōꞌona i te meꞌe taꞌatoꞌa, ꞌo te ai i a ia te pūai ꞌe te mana. Ki haꞌahana-hana tātou ki a ia ꞌātā ki te hopeꞌa raꞌa. ¡⌊ꞌĀmene⌋!».