2 Kōrinto 13:5 - Rapa Nui

⁵ E uꞌi kōrua hoki e haka moe parautiꞌa mau rō ꞌana kōrua i te manaꞌu ꞌi ruŋa i a Ietū. Mo ŋaroꞌa e kōrua nā a Ietū Kiritō ꞌi roto i a kōrua, e haka moe parautiꞌa rō ꞌā ia kōrua i te manaꞌu ꞌi ruŋa i a ia ꞌe, takoꞌa, e tano rō ꞌana kōrua ki te mata o te ꞌAtua.

2 Kōrinto 13:5 ပူးပေါင်းရင်းမြစ်များ

Iovani 14:23

He pāhono e Ietū: —Te kope haŋa mai ki a au he haka roŋo ꞌe he haꞌatura ki tāꞌaku vānaŋa. He haŋa e tōꞌoku Matuꞌa ꞌe he oho a māua ko te Matuꞌa he noho tahi mātou.

Iovani 15:4

»ꞌIna kōrua ko haka topa mai muri i a au, pa he taꞌe haka topa iŋa nei ōꞌoku i a au mai muri i a kōrua. Te maŋa vino e tahi e ko hua mo ko-koti mo haka topa mai te tumu. Pē ira ꞌana kōrua, mo topa mai muri i a au e ko hua, te auraꞌa, e ko riva kōrua mo aŋa i te meꞌe haŋa e te ꞌAtua.

Iovani 17:23

A au i a rāua, ꞌe a koe i a au, pē ira tātou taꞌatoꞌa e tahi mau nō, ki ꞌite ai te taŋata o te ao nei taꞌe haka moe i te manaꞌu ꞌi ruŋa i a au: ꞌāꞌau a au i uŋa mai, ꞌe e haŋa rō ꞌana koe ki te nuꞌu vaꞌai mai e koe, pa he haŋa iŋa mai ena ꞌā ōꞌou ki a au.

Iovani 17:26

Ko haka ꞌite ꞌana e au ko ai koe, ꞌe ko te haka ꞌite ko te oho iŋa ꞌana a au, ki ai ai te haŋa ai i a koe mōꞌoku i a rāua takoꞌa, ꞌe ki ai ai a au ꞌi roto i a rāua».

Iovani 6:56

Te kope kai i tōꞌoku hakari ꞌe unu i tōꞌoku toto e ko haka rē i a au, ꞌe a au i a ia.

Iovani 6:6

I ꞌui ai e Ietū mo uꞌi pē hē a Feripe ka pāhono era, ka ai atu ko ꞌite riva-riva ꞌana a Ietū i tāꞌana meꞌe mo aŋa.

Rōmano 1:28

ꞌI te haka rehu e te nuꞌu nei i te ꞌAtua, he haka rē mau rō ꞌai e te ꞌAtua ki te rāua manaꞌu taꞌe au mo aŋa mo oho nō i te meꞌe taꞌe tano.

Rōmano 8:10

ꞌE, mo ai rō o te Kiritō ꞌi roto i a kōrua, he ora te kōrua vārua. Ko haka tano ꞌana, paꞌi, e te ꞌAtua i a kōrua ki tōꞌona mata, ka ai atu e mate rō te kōrua hakari, he ūtuꞌa o te hara.

1 Kōrinto 11:28

ꞌO ira, ꞌi raꞌe ki te kai ꞌe ki te unu i rā meꞌe, e haka topa te manaꞌu hoki e tano mau rō ꞌana tuꞌu māhatu ki te ꞌAtua.

1 Kōrinto 11:31

Mo haka topa riva-riva i te tātou manaꞌu ꞌi raꞌe ki te kai i rā kai, e ko haka ūtuꞌa mai e te ꞌAtua.

1 Kōrinto 3:16

¿ꞌIna hō kōrua he ꞌite: pa he ⌊Kona Haꞌamuri ꞌAtua⌋ ꞌā a kōrua, ꞌi te meꞌe era ꞌi roto i a kōrua e noho ena te Vārua Maitai?

1 Kōrinto 6:15

A kōrua ko ꞌite ꞌana: te kōrua hakari he ŋā kona ena o te hakari o Ietū. Iā. ¿E toꞌo mau rō ia a kōrua i te kona e tahi o te hakari o te ⌊Kiritō⌋ ꞌe he haka riro he kona o te hakari o te viꞌe taiꞌo? ¡ꞌIna!

1 Kōrinto 6:19

ꞌIna ko rehu, te tātou hakari pa he Kona Haꞌamuri o te Vārua Maitai vaꞌai mai e te ꞌAtua, ꞌe ꞌi roto e noho ena a ia. A tātou taꞌe o tātou ꞌā, o te ꞌAtua.

1 Kōrinto 6:2

¿Kai ꞌite ꞌana ꞌō kōrua: pe muꞌa ka oho ena, mo tātou mo te nuꞌu haꞌataꞌa e te ꞌAtua e ture i te nuꞌu o te ao nei? ꞌE, mo ai pē ira, ¿e ko ravaꞌa mau ꞌō e kōrua ꞌi te hora nei mo haka riva-riva i te ture ꞌiti-ꞌiti e tahi?

1 Kōrinto 9:24

Ko ꞌite ꞌana a kōrua: ꞌi te ꞌāꞌati tahuti, taꞌatoꞌa e tahuti ena, ꞌe ki te kope mau nō e tahi e topa ena te meꞌe vaꞌai ꞌo te tuꞌu raꞌe. Pē ira kōrua ana meꞌe ꞌi te ara o te ꞌAtua: e haka ꞌuhu e oho mo aŋa i te meꞌe haŋa o te ꞌAtua, pa he kope haka ꞌuhu mo rē i te ꞌāꞌati, ki topa atu ai ki a kōrua te meꞌe vaꞌai e ia.

1 Kōrinto 9:27

ꞌIna a au he haꞌatiꞌa mo haka tere mai i a au e tōꞌoku hakari; ꞌāꞌaku te haka tere ꞌo viri a au ki roto i te meꞌe taꞌe tano pohe e tōꞌoku hakari ꞌe ꞌo taꞌe ravaꞌa e au, e te kope hāpī i te rua, i te meꞌe vaꞌai e te ꞌAtua.

2 Kōrinto 6:16

ꞌE te ꞌītoro, ¿e tano mau rō ꞌi te kona haꞌamuri ꞌAtua? E kī atu ena a au i te meꞌe nei ꞌo te ai a tātou pa he kona haꞌamuri ꞌAtua. ꞌI ruŋa i te Pāpaꞌi Moꞌa e kī ena, paꞌi, e te ꞌAtua: «Ka noho nei a au ꞌi roto i a rāua, a au mo ꞌAtua o rāua, ꞌe a rāua mo taŋata ꞌāꞌaku».

Karatia 2:20

ꞌE hora nei, taꞌe ko au toe te meꞌe e ora atu ena, ko Ietū Kiritō te meꞌe e ora nei ꞌi roto i a au ꞌe e haka tere nei i a au ꞌi te ao nei. Te meꞌe nei e ai ena hai haka moe ōꞌoku i te manaꞌu ꞌi ruŋa i te Poki o te ꞌAtua haŋa mai ki a au ꞌe vaꞌai i a ia ki te mate mōꞌoku.

Karatia 4:19

E te ŋā poki haŋa rahi ꞌāꞌaku ē, pa he māui-ui ŋaroꞌa e te viꞌe aꞌu i te poki te māui-ui ŋaroꞌa e au mo kōrua ꞌātā ka ai rō te kōrua huru taꞌatoꞌa pē Ietū Kiritō ꞌā.

Karatia 6:4

Mo tātou mau ꞌā, hoko tahi hoko tahi, e uꞌi hoki e riva-riva rō ꞌā te tātou haka tere iŋa, ꞌe, mo ai pē ira, e koa tātou. ꞌIna e tahi o tātou mo manaꞌu e haka tano ꞌō te tātou haka tere iŋa ki te haka tere haŋa o te rua ana koa iho o tātou.

Ēfeto 3:17

He ani takoꞌa a au mo noho mo oho nō atu a Ietū Kiritō ꞌi roto i a kōrua hai haka moe i te manaꞌu ꞌi ruŋa i a ia, ꞌe mo haka pūai mo oho nō i te kōrua haŋa ki a ia ꞌe ki te rua.

Kōrosa 1:23

Te meꞌe nō, e haka hio-hio e oho te kōrua manaꞌu ꞌi ruŋa i a Ietū ꞌe e tiaki e oho ki te meꞌe taꞌatoꞌa hōrea e te ꞌAtua mo te nuꞌu ꞌāꞌana, meꞌe i ꞌite e kōrua ꞌi te hora ŋaroꞌa era i te ⌊roŋo riva-riva o ruŋa i a Ietū⌋, roŋo haka ꞌite oho a te kona taꞌatoꞌa o te ao, ꞌe roŋo hāꞌūꞌū e au, e Pauro, mo haka ꞌite.

Kōrosa 1:27

nuꞌu ki a rāua te ꞌAtua i haŋa ai mo haka ꞌite pē nei ē: te hauhaꞌa taꞌatoꞌa o rā parautiꞌa mo te nuꞌu taꞌe hūrio takoꞌa. ꞌE rā parautiꞌa ko te meꞌe nei: a Ietū Kiritō e noho takoꞌa rō ꞌana, hai Vārua Maitai, ꞌi roto i a kōrua i te nuꞌu taꞌe hūrio. ꞌE hai noho atu ōꞌona ꞌi roto i a kōrua he ꞌite kōrua pē nei ē: pe muꞌa ka oho ena a kōrua takoꞌa ꞌi roto i tōꞌona nui-nui, te auraꞌa: i a kōrua takoꞌa tōꞌona huru riva.

Kōrosa 2:19

Ko haka topa kē ꞌana te nuꞌu nei i a rāua mai i a Ietū Kiritō, Pūꞌoko Haka Tere o tātou. ꞌĀꞌana te haka pūai te oho i te tātou manaꞌu ꞌi ruŋa i a ia, ꞌe te haka riro i a tātou e tahi mau nō manaꞌu, pa he meꞌe haŋa e te ꞌAtua, pa he ua-ua haka piri hakari e haka piri e haka hio-hio ena i te kona taꞌatoꞌa o te hakari.

Kōrosa 2:7

Pa he meꞌe hāpī atu ki a kōrua, e ꞌata hāpī e oho kōrua o ruŋa i a Ietū koia ko haꞌatura ki a ia, mo ꞌata hio-hio o te kōrua manaꞌu ꞌi ruŋa i a ia, pa he hio-hio iŋa ena o te tumu ꞌi te aka e nui-nui e oho ena a raro. ꞌE e māuru-uru e oho kōrua ki te ꞌAtua ꞌi tōꞌona riva rahi mo kōrua.

1 Timoteo 2:15

Te tano mau: e haka tere te ŋā viꞌe hai manaꞌu o te ꞌAtua ki moꞌa ai e te taŋata. E noho e hāpaꞌo i te rāua ŋā poki, e haka moe e oho i te rāua manaꞌu ꞌi ruŋa i a Ietū, e haŋa e oho ki te rua, ꞌe e haꞌatura e oho ki te ꞌAtua. Pē ira he haka eꞌa e te ꞌAtua mai roto i te ūtuꞌa o te hara.

2 Timoteo 3:8

Te nuꞌu hāpī era i te ŋā viꞌe hai reo-reo he nuꞌu manaꞌu taꞌe tano, haka tapa i te rāua manaꞌu mai ruŋa i te ꞌAtua. Pa he taꞌe haka roŋo iŋa era ꞌā o Hane ararua ko Hampere ki a ⌊Mōtē⌋ te taꞌe haka roŋo o rā nuꞌu i te hāpī parautiꞌa o te ꞌAtua.

Tito 1:13

ꞌE he parautiꞌa. ꞌO ira, e haka pūai koe ana ture, ki tano ai te rāua haka moe iŋa i te manaꞌu ꞌi ruŋa i te ꞌAtua,

Tito 1:16

Pē nei e kī ena: e māhani rō ꞌā a rāua ki te ꞌAtua, ꞌe hai meꞌe aŋa e takeꞌa ena ꞌina kai māhani. A rāua, paꞌi, he nuꞌu taparahi-taꞌata, taꞌe haka roŋo ki te ꞌAtua. ꞌO ira e ko tano mo aŋa i te meꞌe riva-riva ki te mata o te ꞌAtua.

Tito 2:2

E hāpī ki te ŋāŋata paꞌari mo hāito i te rāua meꞌe kī ꞌe i te rāua meꞌe aŋa, mo haka tere i a rāua hai meꞌe tano ki moꞌa ai i a rāua e te taŋata, mo haka topa riva-riva i te manaꞌu, mo haŋa ki te rua hai māhatu, mo haka hio-hio i te rāua manaꞌu ki te roŋo parautiꞌa o te ꞌAtua, ꞌe mo haꞌaoromaꞌi i te ꞌati hai pūai.

ꞌEvereo 12:15

E uꞌi takoꞌa ꞌo hārui e tahi o kōrua i te riva rahi o te ꞌAtua hai tuaꞌivi, ꞌo tuꞌu rō pa he tumu hua o te meꞌe maŋeo. Te kope pē ira he haka tupu i te manaꞌu taꞌe tano ꞌi roto i te tētahi nuꞌu.

ꞌEvereo 4:1

ꞌE hora nei, hora e ai nō ꞌā mo tātou te meꞌe hōrea mai e te ꞌAtua pē nei ē: he oꞌo ki te kona haka riva-riva e ia mo haka ora, e uꞌi ꞌo taꞌe ravaꞌa rō mo oꞌo e tahi o tātou.

ꞌEvereo 6:8

ꞌE mo tupu o te mauku pū-pū ꞌe te tētahi atu mauku rake-rake, ꞌina ia e tahi hauhaꞌa. He tohu e te ꞌAtua ꞌe, ka hopeꞌa era, he toꞌo mai he tutu.

Tanatiako 4:4

¡E te nuꞌu haka rehu i te ꞌAtua ē! ¿Kai ꞌite ꞌana ꞌō kōrua: te taŋata haŋa ki te haka tere iŋa o te ao nei he taŋata taꞌe haŋa ki te ꞌAtua? Te kope he repahoa o te ao nei he taŋata riri mo te ꞌAtua.

1 Pētero 5:9

ꞌIna ko haꞌatiꞌa mo haka tere atu i a kōrua. E haka hio-hio e oho te kōrua haka moe iŋa i te manaꞌu ꞌi ruŋa i te ꞌAtua ꞌi te ꞌite pē nei ē: ꞌi te kona taꞌatoꞌa o te ao, e topa takoꞌa rō ꞌana te ꞌati tuꞌu pē ira ki te kōrua taina.

Meꞌe Haka Takeꞌa 2:5

E manaꞌu koe pē hē te rahi o tuꞌu haŋa ꞌi rā hora, ꞌe ꞌai ka huri haka ꞌou rō tuꞌu manaꞌu. Te meꞌe aŋa era e koe ꞌi muꞌa ꞌā ka aŋa haka ꞌou, ꞌo oho rō atu a au he toꞌo i taꞌa hakariꞌi ena mai tōꞌona kona.