2 Kōrinto 12:20 - Rapa Nui

²⁰ E riꞌa-riꞌa rō ꞌana a au, ka oho atu ena a au uꞌi i a kōrua, te kōrua noho iŋa taꞌe pa he meꞌe haŋa ꞌāꞌaku. ꞌE, mo ai pē ira, taꞌe ia toe tōꞌoku huru pa he meꞌe haŋa e kōrua. Tōꞌoku riꞌa-riꞌa ꞌo ai te tātake ꞌi roto i a kōrua, te mākota, te riri, te ꞌino, te haꞌaꞌino, te vānaŋa taꞌe tano mo te tētahi, te manaꞌu i hau rō atu ki te rua, ꞌe te hihi-hihi o te kōrua noho iŋa.

2 Kōrinto 12:20 ပူးပေါင်းရင်းမြစ်များ

Rōmano 1:29

Te meꞌe aŋa mau nō he meꞌe rake-rake pa he nou-nou, tōtōā i te rua taŋata, pohe ki te meꞌe o te rua, tiŋaꞌi haka mate i te rua taŋata, haka tumu i te ture, reo-reo, mura-mura

Rōmano 1:30

ꞌe rava haꞌaꞌino. Te nuꞌu nei nuꞌu taꞌe haŋa ki te ꞌAtua, nuꞌu haka ꞌāriŋa, haka paka ꞌe teꞌo-teꞌo, kimi i te meꞌe taꞌe tano mo aŋa ki te rua, taꞌe haꞌatura ki te rāua matuꞌa,

Rōmano 2:8

ꞌE ki te nuꞌu haka tere hai manaꞌu o rāua mau nō, taꞌe haŋa ki te parautiꞌa, aŋa i te meꞌe taꞌe tano, te ūtuꞌa o te ꞌAtua mo rāua e paŋahaꞌa rō.

1 Kōrinto 1:11

E kī atu ena a au i te meꞌe nei, e te taina ē, he ꞌite ōꞌoku, mai te huaꞌai o Kōroe, e tātake rō ꞌana kōrua ꞌi roto i a kōrua ꞌā.

1 Kōrinto 14:33

Te ꞌAtua, paꞌi, taꞌe he ꞌAtua o te meꞌe mira-mira; tāꞌana meꞌe haŋa he meꞌe tī-tika ꞌe he haumārū. ꞌI te hora taka-taka mo haꞌamuri ki te ꞌAtua, ꞌina ko haꞌatiꞌa i te ŋā viꞌe mo vānaŋa. Pē ira te haka tere iŋa o te nūnaꞌa taŋata taꞌatoꞌa haka moe i te manaꞌu ꞌi ruŋa i a Ietū. Te ŋā viꞌe e haꞌatura ki te rāua kenu, pa he meꞌe hāꞌaki ꞌi ruŋa i te ⌊haka tere iŋa ꞌa Mōtē⌋.

1 Kōrinto 5:2

Ka ai atu pē ira, ko te teꞌo-teꞌo iŋa ꞌā a kōrua pē nei ē: ko ꞌite riva-riva ꞌana a kōrua i te meꞌe o te ꞌAtua. Te tano mau: e māui-ui te kōrua māhatu ꞌi te meꞌe tuꞌu pē nā. Te taŋata aŋa i te meꞌe tuꞌu pē nei e haka eꞌa mai roto i a kōrua.

2 Kōrinto 1:23

He ꞌAtua te meꞌe i ꞌite, e te taina ē, pē nei ē: a au i taꞌe tuꞌu atu ai mo uꞌi i a kōrua ꞌo ture atu a au o ruŋa i te meꞌe taꞌe tano aŋa e kōrua ꞌo mamae te kōrua māhatu ꞌi tāꞌaku vānaŋa.

2 Kōrinto 10:2

Ka uꞌi ka haka tī-tika rō ꞌai te ŋā nuꞌu ena, nuꞌu manaꞌu: a mātou e haka tere nei hai manaꞌu taŋata mau nō, ꞌo tuꞌu atu au, he ture atu ki a kōrua ananake ko nā ŋā nuꞌu.

2 Kōrinto 10:6

ꞌE ki takeꞌa ia e mātou i te rahi raꞌa o kōrua e haꞌatura parautiꞌa mau rō ꞌā ki te meꞌe taꞌatoꞌa haŋa o te Kiritō, ꞌi rā hora he uꞌi mātou he haka ūtuꞌa i te nuꞌu o roto i a kōrua taꞌe haꞌatura ki a ia.

2 Kōrinto 12:21

E riꞌa-riꞌa takoꞌa rō ꞌana a au ꞌo haꞌamā a au i a kōrua ꞌi muꞌa i te ꞌAtua ꞌi tōꞌoku ara oho uꞌi atu i a kōrua, ꞌe he taŋi a au ꞌi te rahi o kōrua mai muꞌa ꞌā e hara e oho mai ena ꞌina he haka rē i te meꞌe taꞌe tano pa he moe i te viꞌe ꞌe i te taŋata taꞌe he kenu ꞌe he viꞌe ꞌāꞌana, ꞌe he tētahi atu meꞌe taꞌe tano pohe e te hakari.

2 Kōrinto 13:2

ꞌI tōꞌoku rua oho iŋa atu era, i kī rō au ki te nuꞌu o roto i a kōrua noho ꞌi roto i te hara ꞌe ki te taꞌatoꞌa pē nei ē: e uꞌi e eꞌa mai roto i te meꞌe taꞌe tano ꞌo haka ūtuꞌa. ꞌE hora nei, ꞌi raꞌe ki tōꞌoku tuꞌu iŋa haka ꞌou atu, he haka ꞌite atu a au: ka tuꞌu atu ena a au, ꞌina a au e ko taꞌe haka ūtuꞌa i te nuꞌu ko te noho iŋa ꞌana ꞌi roto i te hara.

2 Kōrinto 2:1

ꞌO ira a au i taꞌe oho atu ai mo uꞌi i a kōrua ꞌo ture atu a au ꞌe he mamae te kōrua māhatu, pa he meꞌe topa era ꞌi te hora tuꞌu raꞌe atu era ōꞌoku.

Karatia 5:15

ꞌE, mo moto ꞌe mo tātake ꞌi roto i a kōrua, e uꞌi ꞌo kore rō te kōrua haŋa pa he taina ꞌe ꞌo haka tapa rō te kōrua manaꞌu mai ruŋa i a Ietū.

Karatia 5:26

ꞌI roto i a tātou, ꞌina ko manaꞌu i hau rō atu tātou ki te rua, ꞌina ko haka tātake i te kope e tahi ki te rua ꞌe ꞌina ko mākota.

Tanatiako 4:11

E te taina, ꞌina ko vānaŋa ꞌino mo te rua. Te kope vānaŋa ꞌino mo te rua e vānaŋa ꞌino takoꞌa ꞌā mo te haka tere iŋa o te ꞌAtua. Pē nei te auraꞌa: te kope vānaŋa ꞌino mo te rua e haꞌariro ꞌā i a ia he pūꞌoko haka tere o te hare ture mo kī i te hape ꞌe i te taꞌe hape o te tētahi ꞌe, takoꞌa, o te haka tere iŋa o te ꞌAtua haka ꞌite mai pē nei ē: e haŋa tātou ki te rua. ꞌE ꞌi te vānaŋa ꞌino e takeꞌa ena: kope taꞌe haꞌatura ki te haka tere iŋa o te ꞌAtua.

1 Pētero 2:1

ꞌE hora nei, ꞌi te ai i a kōrua te ora ꞌāpī, e haka kore mai ruŋa i a kōrua te meꞌe taꞌatoꞌa taꞌe tano: te reo-reo, te haka tuꞌu i a kōrua pa he nuꞌu riva ꞌe rā riva a te haho ꞌā, te nou-nou ki te meꞌe o te rua, ꞌe te haꞌaꞌino.

2 Pētero 2:18

He teꞌo-teꞌo te aŋa o ruŋa i a rāua hai vānaŋa ꞌina e tahi auraꞌa. Hai meꞌe rake-rake mo te hakari ꞌe hai meꞌe taꞌe tano pohe nō o te hakari e aŋa ena mo haka huri i te manaꞌu o te nuꞌu aŋa riꞌa-riꞌa i eꞌa ai mai roto i te meꞌe taꞌe tano.

Hura 1:16

Te nuꞌu ena he riri-riri nō te aŋa mo te meꞌe taꞌatoꞌa, ꞌina e tahi meꞌe tano mo rāua, te meꞌe haŋa mau nō he haka koa i a rāua. Te vānaŋa iŋa e haka tuꞌu rō ꞌana pa he meꞌe ena ē: i a rāua mau nō te tano, ꞌe te aŋa he haka paka i te tētahi mo ravaꞌa nō i te meꞌe mai i a rāua.