2 Kōrinto 12:15 - Rapa Nui

¹⁵ ꞌE hai koa a au ka haka pau tahi atu ena i tāꞌaku meꞌe mo kōrua, ꞌe ꞌātā i a au mau nei ꞌā mo te kōrua riva-riva. Mo ꞌata haŋa atu ia ōꞌoku ki a kōrua, ¿he rehe he oho hō te kōrua haŋa iŋa mai?

2 Kōrinto 12:15 ပူးပေါင်းရင်းမြစ်များ

Rōmano 9:3

mo tōꞌoku taina he itaraera. ꞌĀhani hai vaꞌai ōꞌoku i a au mo haka ūtuꞌa e te ꞌAtua, ꞌe hai haꞌataꞌa ōꞌoku i a au mai te ⌊Kiritō⌋ he riva a au mo hāꞌūꞌū ki a rāua mo ⌊haka moe i te manaꞌu⌋ ꞌi ruŋa i a Ietū, ko meꞌe era ꞌana e au.

2 Kōrinto 1:14

i te mātou māhatu ꞌe i te mātou meꞌe aŋa, ki koa ai kōrua mo mātou, ꞌe pē ira takoꞌa ꞌana a mātou mo kōrua ꞌi te hora o te hoki iŋa mai o te tātou Pūꞌoko Haka Tere ko Ietū.

2 Kōrinto 1:6

Hora ena o mātou o te ꞌāpōtoro e ꞌamo ena i te ꞌati, he meꞌe mo te kōrua riva-riva, ꞌe, takoꞌa, mo ravaꞌa e kōrua i te ora ꞌāpī ꞌina he hopeꞌa raꞌa. ꞌE, hora ena o te ꞌAtua e haka koa e haka pūai mai ena i a mātou, he meꞌe mo kōrua takoꞌa. Pē ira mātou e ꞌite nei mo haka koa ꞌe mo haka pūai atu i a kōrua, mo haꞌaoromaꞌi o kōrua hai pūai i te ꞌati ꞌamo e tātou ꞌo te ai o tātou o te Kiritō.

2 Kōrinto 11:11

Te taꞌe no-noꞌi atu ōꞌoku mo hāꞌūꞌū mai, ¿e taꞌe haŋa atu ꞌana a au ki a kōrua? ¡He ꞌAtua te meꞌe i ꞌite e haŋa rō atu ꞌana a au!

2 Kōrinto 12:14

Hora nei ko rito ꞌana a au mo oho atu i tōꞌoku toru ara uꞌi i a kōrua, ꞌe, ki tuꞌu atu a au, e ko haŋa a au mo riro he meꞌe paŋahaꞌa e tahi mo kōrua. Taꞌe he meꞌe o kōrua tāꞌaku meꞌe haŋa, ko kōrua mau ꞌā. He matuꞌa, paꞌi, te meꞌe mo haꞌaputu i te moni mo tāꞌana poki, taꞌe ꞌō he poki mo te matuꞌa.

2 Kōrinto 12:9

ꞌE pē nei i kī mai ai: «ꞌIna. Ko haꞌatiꞌa ꞌana, paꞌi, e au mo māui-ui ōꞌou, mo aŋi-aŋi e koe pē nei ē: hai riva rahi nei ōꞌoku ꞌina aꞌu meꞌe haŋa toe mo haꞌaoromaꞌi i te ꞌati taꞌatoꞌa piri atu, ꞌe mo aŋi-aŋi takoꞌa ōꞌou: te pūai ōꞌoku e ꞌata takeꞌa ena ꞌi te hora hāꞌūꞌū ōꞌoku ki te nuꞌu pūai kore». Pē ira a Ietū i kī mai ai. ꞌO ira e koa rō ꞌana a au ꞌe e teꞌo-teꞌo rō ꞌana o tōꞌoku taꞌe pūai, mo ꞌite e te nuꞌu pē nei ē: hai pūai mau nō o te Kiritō a au e tāvini nei ki a ia.

2 Kōrinto 2:3

Te meꞌe pāpaꞌi atu era e au ꞌi ruŋa i te parau raꞌe era i pāpaꞌi atu ai ꞌo tuꞌu atu a au ꞌe he māui-ui tōꞌoku māhatu ꞌi te takeꞌa i a kōrua, nuꞌu i a rāua a au ana koa, e aŋa ꞌana i te meꞌe taꞌe tano. Ko ꞌite ꞌana, paꞌi, e kōrua: mo koa o kōrua he koa takoꞌa a au.

2 Kōrinto 4:12

A mātou e oho mau rō ꞌā mo mate ꞌo te haka ꞌite i te roŋo riva-riva o ruŋa i a Ietū, ꞌe a kōrua, hai nei meꞌe mau ꞌā, e ravaꞌa ena i te ora ꞌāpī ꞌina he hopeꞌa raꞌa.

2 Kōrinto 7:2

¡E mātaki mai te kōrua māhatu! ꞌIna, paꞌi, a mātou kai aŋa atu e tahi meꞌe taꞌe tano, kai aŋa atu e tahi meꞌe mo haka tapa e tahi o kōrua mai te ara parautiꞌa o te ꞌAtua, ꞌe kai reo-reo atu mātou mo ravaꞌa moni.

2 Kōrinto 7:3

Taꞌe he riri mo kōrua e kī atu ena i te ŋā meꞌe nei. ꞌI muꞌa ꞌā, paꞌi, i kī rō atu au e maꞌu rō ꞌana a au i a kōrua ꞌi roto i tōꞌoku māhatu; ka ora ꞌo ka mate a au, e ko kore kōrua mai roto.

Karatia 4:10

¿E manaꞌu ena ꞌō kōrua: hai aŋa o kōrua i te ŋoŋoro mo te ꞌAtua ꞌi te tētahi mahana, ꞌi te tētahi ꞌāvaꞌe ꞌe ꞌi te tētahi matahiti, he tano kōrua ki tōꞌona mata?

Fīripo 2:17

Pa he tūtia vaꞌai e kōrua ki te ꞌAtua mo koa ōꞌona te ꞌati e ꞌamo ena e kōrua ꞌo te ⌊haka moe i te manaꞌu⌋ ꞌi ruŋa i a Ietū ꞌe ꞌo te aŋa o kōrua ki a ia. ꞌE mo haŋa o te ꞌAtua mo ꞌāmui i tōꞌoku mate ki te tūtia vaꞌai e kōrua ki a ia, pa he huri iŋa i te manu tūtia hai vino, e koa nō a au, pa he koa iŋa nei ōꞌoku mo kōrua.

Kōrosa 1:24

E koa rō ꞌana a au ꞌi te meꞌe era ko ꞌite ꞌana e au: te ꞌati nei e ꞌamo atu ena mo te kōrua riva-riva. Ko vaꞌai tahi ꞌana, paꞌi, a au i a au mo ꞌamo i te ꞌati taꞌatoꞌa haŋa e te Kiritō mo ꞌamo e au, mo te riva-riva o te nuꞌu taꞌatoꞌa haka moe i te manaꞌu ꞌi ruŋa i a ia.

1 Tētārōnika 2:8

Pē ira te haŋa o mātou ki a kōrua. ꞌO ira te meꞌe i aŋa o mātou ꞌi roto i a kōrua taꞌe nō he haka ꞌite atu i te ⌊roŋo riva-riva o te ꞌAtua⌋, i aŋa takoꞌa rō i te meꞌe nō era mo hāꞌūꞌū atu, ꞌi te rahi o te mātou haŋa mo kōrua.

2 Timoteo 2:10

ꞌO ira a au e haꞌaoromaꞌi nei i te taꞌatoꞌa nō ꞌati mo te riva-riva o te nuꞌu haꞌataꞌa e te ꞌAtua māꞌana, mo eꞌa takoꞌa o rāua mai roto i te ūtuꞌa o te hara hai Ietū Kiritō ꞌe mo ravaꞌa mo noho ꞌi muri i a ia ꞌina he hopeꞌa raꞌa pe muꞌa ka oho ena.

ꞌEvereo 13:17

E haꞌatura ki te pūꞌoko haka tere o kōrua o te nuꞌu haka moe i te manaꞌu ꞌi ruŋa i a Ietū. E haka rē mo rāua e haka tere atu. O rāua, paꞌi, te hāpaꞌo i a kōrua pa he nuꞌu ꞌite: pe muꞌa ka oho ena he haka ꞌite e rāua ki te ꞌAtua pē hē i aŋa ai i te rāua aŋa. Mo haka rē o kōrua i a rāua mo haka tere atu, he koa ꞌi te rāua aŋa ꞌe e ko ai he meꞌe paŋahaꞌa e tahi mo ꞌamo. ꞌE mo taꞌe aŋa o kōrua pē ira, e ko ai ia mo te kōrua riva-riva.