2 Kōrinto 11:26 - Rapa Nui

²⁶ ꞌI tōꞌoku ara taꞌatoꞌa i piri rō mai meꞌe rahi nō atu ꞌati: he rio ko ꞌata rahi ꞌā e te vai, he toke-toke, he haŋa o tōꞌoku taŋata he hūrio ꞌe o te nuꞌu o te rua henua mo tōtōā mai. I piri mai ai te ꞌati nei ꞌi te kona noho taŋata, ꞌi ꞌuta, ꞌi roto i te vaikava, ꞌe ꞌi muri i te nuꞌu kī e haka moe rō ꞌana a rāua i te manaꞌu ꞌi ruŋa i a Ietū ꞌe, te parautiꞌa, taꞌe pē ira.

2 Kōrinto 11:26 ပူးပေါင်းရင်းမြစ်များ

Aŋa o te ꞌĀpōtoro 13:45

I takeꞌa era e te hūrio ra-rahi i te rahi o te taŋata, he mākota. He haꞌamata ia he vā-vā ꞌe he kī he reo-reo te vānaŋa ꞌa Pauro.

Aŋa o te ꞌĀpōtoro 13:50

ꞌE, tū ŋā hūrio ra-rahi era i vānaŋa taꞌe tano rō mo kuā Pauro ki te ŋā viꞌe hōnui ꞌe haꞌatura ki te haka tere iŋa ꞌa Mōtē, ꞌe ki te ŋāŋata hōnui takoꞌa o rā kona mo riri mo kuā Pauro, ꞌe he tute mai ira.

Aŋa o te ꞌĀpōtoro 14:19

He tuꞌu ia te nuꞌu hūrio mai Antiokia o Pitiria ꞌe mai Īkōnio, ꞌe hai vānaŋa o rāua, i haka riri ai i te nuꞌu o ira mo kuā Pauro. ꞌO ira i tamaꞌi ai i a Pauro hai māꞌea ꞌe, ꞌi te manaꞌu ko mate ꞌā, he to-toi he oho ki haho o tū kona era ko Rītara.

Aŋa o te ꞌĀpōtoro 14:5

Te tētahi nuꞌu hūrio ꞌe taꞌe hūrio ananake ko te nuꞌu ra-rahi he haꞌaꞌau mo tōtōā ꞌe mo tamaꞌi hai māꞌea i tū ŋā ꞌāpōtoro era.

Aŋa o te ꞌĀpōtoro 15:40

He toꞌo ia a Pauro i a Tira mo hokorua i a ia. ꞌE te taina o Antiokia he pure ki te ꞌAtua mo hāpaꞌo i a rāua ararua ꞌi te kona taꞌatoꞌa ka oho era.

Aŋa o te ꞌĀpōtoro 17:13

I ꞌite era e te nuꞌu hūrio ra-rahi o Tētārōnika e haka ꞌite ꞌā a kuā Pauro i te ⌊roŋo riva-riva o te ꞌAtua⌋ ꞌi Vērea, he oho ki ira he haka tumu i te ture ꞌe he haka riri i te taŋata mo kuā Pauro.

Aŋa o te ꞌĀpōtoro 17:5

Hai meꞌe nei i mākota ai te hūrio taꞌe haka moe i te manaꞌu ꞌi ruŋa i a Ietū. He haka taka-taka ia i te nuꞌu hupe-hupe o te ara aŋa i te meꞌe taꞌe tano, ꞌe hai rā nuꞌu i haka riri ai i te nuꞌu o Tētārōnika mo kuā Pauro. Te nuꞌu hupe-hupe nei i tuꞌu i uru nō ki roto i te hare o Hātō kimi i a Pauro ararua ko Tira mo ꞌa-ꞌaru mo vaꞌai ki tū nuꞌu riri era.

Aŋa o te ꞌĀpōtoro 18:12

ꞌI te hora ko Karione te suerekao o Ākāia, he ꞌa-ꞌaru i a Pauro e te nuꞌu hūrio taꞌe haka moe i te manaꞌu ꞌi ruŋa i a Ietū ꞌe he maꞌu ki te hare ture pa he meꞌe haꞌaꞌau e rāua.

Aŋa o te ꞌĀpōtoro 19:1

ꞌI te hora o ꞌĀporo ꞌi Kōrinto ꞌā, he kona o Ākāia, ꞌai a Pauro e oho era a te kona maꞌuŋa ꞌātā ka tuꞌu rō ki Ēfeto. ꞌI ira i piri ai ki te tētahi nuꞌu ⌊haka moe i te manaꞌu⌋ ꞌi ruŋa i te ꞌAtua.

Aŋa o te ꞌĀpōtoro 19:23

ꞌI rā ŋā mahana i ai rō te ture nui-nui ꞌi Ēfeto o ruŋa o te Ara ꞌĀpī hāpī e Ietū,

Aŋa o te ꞌĀpōtoro 20:19

Te mahana te mahana i noho atu ai a au ꞌi roto i a kōrua e aŋa ꞌā i te aŋa o te ꞌAtua pa he kope taꞌe manaꞌu i hau rō atu ki te rua koia ko pariŋi tōꞌoku matavai. I haꞌaoromaꞌi rō au i te rahi o te ꞌati topa mai, he rava aŋa mai o te hūrio ra-rahi i te meꞌe rake-rake.

Aŋa o te ꞌĀpōtoro 20:3

ꞌe ꞌi ira i noho ai e toru ꞌāvaꞌe. E oho ꞌā ia a Pauro mo eke ki ruŋa i te pahī mo oho ki Tīria i ꞌite ai e haŋa rō ꞌā te tētahi nuꞌu ⌊hūrio⌋ ra-rahi mo aŋa i te meꞌe rake-rake ki a ia. ꞌO ira i manaꞌu ai mo oho a ruŋa i te henua ꞌā, ꞌe a Mātērōnia i vari ai.

Aŋa o te ꞌĀpōtoro 23:10

I ꞌata pūai era te ture, he riꞌa-riꞌa te kōmana ꞌo tiŋaꞌi e te nuꞌu i a Pauro ki te piꞌi-piꞌi. ꞌO ira i kī ai ki te vaꞌehau mo toꞌo i a Pauro ꞌe mo maꞌu haka ꞌou ki tū kona hare era o rāua.

Aŋa o te ꞌĀpōtoro 25:3

He ani e rā nuꞌu mo haka maꞌu i a Pauro ki Hērutarema. Te manaꞌu mo ravaꞌa e rāua ꞌi te ara mo tiŋaꞌi mo haka mate.

Aŋa o te ꞌĀpōtoro 27:42

ꞌO tē-tere te nuꞌu puru, he haŋa te vaꞌehau mo tiŋaꞌi mo haka mate.

Rōmano 15:19

ꞌe, takoꞌa, hai mana aŋa e au hai pūai vaꞌai mai e te Vārua o te ꞌAtua. Pē ira i haka mao riva-riva ai a au i te aŋa vaꞌai mai he haka ꞌite he oho i te roŋo riva-riva o ruŋa i te Kiritō mai Hērutarema ki te kona taꞌatoꞌa, ꞌātā ka tuꞌu rō ki Iriria.

Rōmano 8:35

I ai era pē ira, ¿he aha te meꞌe mo haka kore i te haŋa o Ietū Kiritō mai ruŋa i a tātou? ¿He mamae? ¿He ꞌati? ¿He tōtōā e te nuꞌu? ¿He maruaki? ¿He oŋe o te kahu? ¿He topa o te meꞌe rake-rake ꞌo he mate ꞌi te rima o te rua?

1 Kōrinto 15:30

ꞌE a mātou mau nei ꞌā, ¿he aha e haꞌaoromaꞌi e oho nei, paurō te mahana, i te ꞌati mo taꞌe ai he ora haka ꞌou te taŋata mai te mate?

1 Kōrinto 15:32

ꞌE mo ai he parautiꞌa ꞌina he nuꞌu he ora haka ꞌou mai te mate, ¿e ai rō hō te manaꞌu o te ao nei tano mo haka moto i a au ki te nuꞌu o Ēfeto tuꞌu pa he ꞌanimare taehae pa he meꞌe aŋa e au? Mo taꞌe ora ia o te nuꞌu mai te mate, i hau ꞌi te riva mo aŋa o tātou pa he meꞌe kī e te nuꞌu: «¡Ki kai, ki unu; āpō, he mate ꞌe he oti mau rō ꞌai!».

2 Kōrinto 11:32

¡ꞌĀ! ꞌI te hora era ōꞌoku ꞌi Rāmako, te suerekao aŋa ki te ꞌariki ko ꞌĀreta i haka ꞌauario rō i te ꞌōpani o ira mo ꞌa-ꞌaru i a au.

Karatia 2:4

Ka ai atu pē ira, i ai rō ꞌi ira te nuꞌu haka tuꞌu i a rāua pa he nuꞌu ⌊haka moe i te manaꞌu⌋ ꞌi ruŋa i a Ietū, te haŋa mo uꞌi hoki ko te maꞌu iŋa ꞌana a mātou i te ⌊haka tere iŋa ꞌa Mōtē⌋ ꞌe, mo taꞌe ai pē ira, mo haka ꞌamo haka ꞌou mai i rā haka tere iŋa. ꞌE te parautiꞌa, ꞌina he pūai toe o te haka tere iŋa ꞌa Mōtē ꞌi ruŋa i a tātou ꞌo te ai o tātou ꞌa Ietū Kiritō.