2 Kōrinto 11:2 - Rapa Nui

² ꞌIna kōrua ko rehu: e haŋa rō atu ꞌana a au ki a kōrua pa he haŋa iŋa ena ꞌā o te ꞌAtua ki tōꞌona taŋata. A kōrua ko haka haꞌamoꞌa-moꞌa era ꞌana e au mo hāipo-ipo ki te kenu mau nō e tahi, he ⌊Kiritō⌋, ꞌe ko haŋa ꞌana a au mo maꞌu i a kōrua ki muꞌa i a ia pa he viꞌe ꞌina kai noho ꞌā ki te taŋata ꞌe hāpaꞌo i a ia mo tāꞌana kenu mau nō.

2 Kōrinto 11:2 ပူးပေါင်းရင်းမြစ်များ

Iovani 3:29

»ꞌI te ŋoŋoro hāipo-ipo, paꞌi, te taŋata i a ia te viꞌe mo hāipo-ipo ko ia te meꞌe ka hāipo-ipo era. ꞌE te repahoa o muri, ka ŋaroꞌa era i te reꞌo o rā kope e hāipo-ipo ꞌana, he toꞌo te koa. Pē ira takoꞌa tōꞌoku koa mo rahi o te taŋata oho ki a ia.

Rōmano 7:4

Pē ira takoꞌa a kōrua, e te taina ōꞌoku ē. ꞌIna he pūai toe o te haka tere iŋa ꞌa Mōtē ꞌi ruŋa i a kōrua. I mate era a Ietū mo tātou, ko mate takoꞌa ꞌā a tātou ꞌi muri. Pē ira i kore ai te pūai o rā haka tere iŋa mai ruŋa i a tātou, ꞌe ꞌi te hora nei te meꞌe i a tātou he pūai o te kope ora haka ꞌou mai era mai te mate mo aŋa o tātou i te meꞌe haŋa o te ꞌAtua.

1 Kōrinto 4:15

Ka rahi atu te nuꞌu hāpaꞌo ꞌe hāpī i a kōrua pa he ⌊kiritiano⌋, e tahi mau nō kope pa he matuꞌa tane o kōrua ko au. ꞌĀꞌaku, paꞌi, i haka ꞌite raꞌe atu i te ⌊roŋo riva-riva o ruŋa i a Ietū Kiritō⌋, ꞌe i kī atu mo ⌊haka moe i te manaꞌu⌋ ꞌi ruŋa i a ia mo ai o kōrua ꞌāꞌana.

2 Kōrinto 4:14

E ꞌite rō ꞌana, paꞌi, a mātou: te ꞌAtua haka ora era i a Ietū mai te mate, pe muꞌa ka oho ena he haka ora takoꞌa i a mātou, ꞌe pē ira ꞌana i a kōrua, ꞌo te ai o tātou ꞌāꞌana. ꞌE ananake tātou ka maꞌu ena e te ꞌAtua ki muri i a ia.

Karatia 4:11

¿Ka kī ꞌō tū aŋa taꞌatoꞌa era ꞌāꞌaku ꞌi roto i a kōrua ko māuꞌa tahi ꞌā?

Fīripo 1:8

He ꞌAtua te meꞌe i ꞌite i te rahi o tōꞌoku manaꞌu mo kōrua taꞌatoꞌa; tōꞌoku haŋa ki a kōrua pa he haŋa iŋa atu ena ꞌā o Ietū Kiritō.

Kōrosa 1:28

ꞌI te kona taꞌatoꞌa, e hāpī e oho nei mātou o ruŋa i a Ietū Kiritō, ꞌe hai mārama-rama vaꞌai mai e te ꞌAtua, e hatu e hāpī nei ki te nuꞌu mo haka moe i te rāua manaꞌu ꞌi ruŋa i a Ietū. Te meꞌe haŋa, paꞌi, o mātou he maꞌu i te nuꞌu taꞌatoꞌa ꞌa Ietū Kiritō ki muꞌa o te ꞌAtua ko paꞌari ꞌana ꞌi te meꞌe o te ꞌAtua ꞌe ꞌina e tahi hape.

1 Tētārōnika 2:11

Ko ꞌite takoꞌa ꞌana a kōrua pē hē a mātou i haka haŋu ꞌe i haka koa atu ai i a kōrua pa he meꞌe aŋa e te matuꞌa tane ki tāꞌana ŋā poki. Ko hatu atu ꞌā e mātou mo ai o te kōrua noho iŋa, noho iŋa tano o te nuꞌu o te ꞌAtua, kope kī mai ꞌi roto i te tātou māhatu mo oꞌo ki roto o te nūnaꞌa taŋata haka tere e ia, ꞌe ki roto i tōꞌona nui-nui.

Meꞌe Haka Takeꞌa 14:4

Te nuꞌu nei he nuꞌu kai haꞌamuri ki te ꞌītoro, he nuꞌu kai haka rē i te ꞌAtua ki te hora hopeꞌa, ꞌe he nuꞌu i oho ꞌi muri i te Māmoe ki te kona nō era o te Māmoe i oho. A rāua ko haꞌataꞌa ꞌā mai roto i te taŋata taꞌatoꞌa o te ao pa he meꞌe raꞌe mo mahia ki te ꞌAtua ꞌe ki te Māmoe.