1 Timoteo 6:12 - Rapa Nui

¹² E vaꞌai tahi koe i a koe mo hio-hio mo oho nō o tuꞌu manaꞌu ꞌi ruŋa i te ꞌAtua ꞌe mo aŋa ki a ia, pa he vaꞌai iŋa ena o te vaꞌehau i a ia ki te mate ꞌi te hora o te tamaꞌi. ꞌIna ko haka pakoꞌo mai tuꞌu rima te ora ꞌāpī ꞌina he hopeꞌa raꞌa vaꞌai atu e te ꞌAtua. Mo ravaꞌa i rā meꞌe i toꞌo ai i a koe e te ꞌAtua ꞌi te hora kī ōꞌou, ꞌi muꞌa i te rahi o te mataꞌite, i tuꞌu haka moe i te manaꞌu ꞌi ruŋa i a Ietū.

1 Timoteo 6:12 ပူးပေါင်းရင်းမြစ်များ

2 Kōrinto 6:7

hai hāpī i te roŋo parautiꞌa, ꞌe hai pūai o te ꞌAtua ꞌi roto i a mātou. Te noho iŋa tano nei o mātou ki te mata o ꞌAtua, ꞌi te hora taꞌatoꞌa, pa he meꞌe e rua maꞌu e te vaꞌehau ꞌi te rima ꞌi te hora o te tamaꞌi, e tahi o rā meꞌe mo moto ꞌe te rua mo puru i a ia ꞌo pū.

2 Kōrinto 9:13

Hai hāꞌūꞌū ena o kōrua he haꞌahana-hana te taina o Hērutarema ki te ꞌAtua ꞌi te ꞌite e maꞌu ꞌe e haꞌatura rō ꞌana kōrua ki te ⌊roŋo riva-riva o te ꞌAtua⌋ o ruŋa i a Ietū Kiritō, ꞌe ꞌi te rahi o te kōrua hāꞌūꞌū iŋa ki a rāua ꞌe ki te taŋata taꞌatoꞌa.

Fīripo 1:30

he ꞌati nā e kōrua e ꞌamo mai ena ꞌo te haka ꞌite i te roŋo riva-riva o ruŋa i a Ietū ꞌi muꞌa o te nuꞌu e riri rō ꞌana mo te vānaŋa o te ꞌAtua. A kōrua, paꞌi, he mataꞌite pē hē a au i ꞌamo ai ꞌi rā ꞌati ꞌi muꞌa ꞌā, ꞌe ko ꞌite ꞌana ko te ꞌamo iŋa ꞌana a au ꞌātā ki ꞌaŋarīnā.

Kōrosa 3:15

ꞌE mo te haumārū vaꞌai e Ietū Kiritō e hāꞌūꞌū atu mo ꞌite o kōrua he aha te meꞌe tano mo aŋa. Te ꞌAtua ko haꞌataꞌa ꞌana i a kōrua i te nuꞌu haka moe i te manaꞌu ꞌi ruŋa i a Ietū mo riro e tahi mau nō hakari ꞌe mo noho o kōrua taꞌatoꞌa ꞌi roto i te haumārū. ꞌE, e ꞌite kōrua mo māuru-uru mo oho ki te ꞌAtua.

2 Tētārōnika 2:14

Hai hāpī haka ꞌite atu era e mātou, te ꞌAtua i aŋa ai mo haka moe mo oho nō kōrua i te manaꞌu ꞌi ruŋa i a Ietū, ki oꞌo ai kōrua ki roto i te nui-nui ōꞌona, te auraꞌa, ki ai takoꞌa ai i a kōrua tōꞌona huru riva.

1 Timoteo 1:18

E Timoteo, e te poki ꞌāꞌaku ē, ꞌī a au he haka rē atu i te roŋo nei: pa he vaꞌai iŋa o te vaꞌehau i a ia ꞌi te hora o te tamaꞌi, ana vaꞌai takoꞌa koe i a koe mo haka ꞌite mo oho o ruŋa i te roŋo parautiꞌa o te ꞌAtua hai pūai o tuꞌu haka moe iŋa i te manaꞌu ꞌi ruŋa i a ia ꞌe hai manaꞌu riva-riva takoꞌa ōꞌou tano ki te meꞌe kī era e te perofeta o ruŋa i a koe ꞌi muꞌa ꞌā. ꞌE nā tētahi nuꞌu, ꞌi te taꞌe haka roŋo ki te rāua manaꞌu riva-riva, ko oho kē ꞌana mai roto i te ara o te ꞌAtua.

1 Timoteo 4:14

E Timoteo, e haka hio-hio e oho koe ꞌi te aŋa o te ꞌAtua hai meꞌe hauhaꞌa vaꞌai atu era e ia ꞌi te hora haka topa atu era i te rima a ruŋa i tuꞌu pūꞌoko e te ŋā kope pūꞌoko haka tere era koia ko kī atu i tāꞌana roŋo hai Vārua Maitai.

1 Timoteo 6:13

E Timoteo, he kī atu au ꞌi muꞌa i te ꞌAtua, i a ia te ora o te meꞌe taꞌatoꞌa, ꞌe ꞌi muꞌa i a Ietū Kiritō, kī i te parautiꞌa ꞌi muꞌa o Pontio Pirato:

1 Timoteo 6:19

Pē ira he haꞌaputu ꞌi ruŋa i te raŋi te hauhaꞌa parautiꞌa mo te rāua noho iŋa pe muꞌa ka oho ena, ꞌe te rāua noho iŋa ꞌi te ao nei he tano ki te noho iŋa haŋa e te ꞌAtua.

2 Timoteo 1:9

Te ꞌAtua ko haka eꞌa ꞌā i a tātou mai roto i te ūtuꞌa o te hara mo riro o tātou he nuꞌu ꞌāꞌana. I aŋa ai pē ira, taꞌe he huru riva o tātou, he haŋa mau ꞌā ōꞌona, ꞌe mai te hora era ꞌā kai aŋa ꞌana i te ao i haŋa rō ai mo haka takeꞌa mai i tōꞌona riva rahi hai Ietū Kiritō.

2 Timoteo 2:2

E kimi koe hai ŋāŋata haka tano i te rāua meꞌe kī, ŋāŋata ꞌite takoꞌa mo hāpī i te rua. Ki a rāua koe ana haka ꞌite mo hāpī e rāua ki te tētahi i te hāpī parautiꞌa o ruŋa i a Ietū Kiritō haka ꞌite atu era e au ꞌi te hora hāpī ōꞌoku i te nuꞌu.

2 Timoteo 4:7

Ko vaꞌai tahi ꞌana a au i a au mo tāvini ki te ꞌAtua, pa he vaꞌai iŋa o te vaꞌehau i a ia ki te mate ꞌi te hora o te tamaꞌi, ꞌe pa he kope ꞌāꞌati, ko tuꞌu ꞌana a au ki te hopeꞌa. ꞌIna kai haka tapa, ki te hora hopeꞌa, mai te hāpī parautiꞌa o te ꞌAtua.

ꞌEvereo 13:23

Mo ꞌite o kōrua: te tātou taina ko Timoteo ko eꞌa ꞌana mai roto i te hare maꞌuꞌaurī. Mo hōrou ōꞌona mo tuꞌu mai, he maꞌu atu e au ꞌi te hora ōꞌoku ka oho atu ena uꞌi i a kōrua.

ꞌEvereo 3:14

E te taina, mo haka moe mo oho nō tātou i te manaꞌu ꞌi ruŋa i a Ietū ki te hora hopeꞌa pa he hora raꞌe era ꞌā, mo tātou takoꞌa te meꞌe taꞌatoꞌa ꞌa Ietū Kiritō.

ꞌEvereo 6:18

Te meꞌe kī ꞌe te meꞌe hōrea e te ꞌAtua e ko taꞌe haka tano; taꞌe, paꞌi, a ia he reo-reo. Mo tātou mo te nuꞌu haka hāhine ki te ꞌAtua mo hāpaꞌo e ia, te parautiꞌa nei he meꞌe haka pūai i te tātou manaꞌu ꞌi ruŋa i a ia, mo tiaki mo oho nō o tātou ki te haka tano iŋa ōꞌona i tāꞌana meꞌe hōrea mai era.

1 Pētero 3:9

ꞌIna ko aŋa hai meꞌe rake-rake ki te nuꞌu aŋa atu i te meꞌe rake-rake, ꞌe ꞌina ko parauꞌino ki te nuꞌu parauꞌino atu. Te meꞌe o kōrua mo aŋa he ani ki te ꞌAtua mo haꞌamaitai i rā nuꞌu. Te ꞌAtua, paꞌi, i haꞌataꞌa ai i a kōrua māꞌana mo haꞌamaitai atu e ia.

1 Pētero 5:10

ꞌE ki oti i te haꞌaoromaꞌi tahi i te ꞌati topa atu ꞌi ruŋa i a kōrua, he meꞌe e ko roa rahi, he haka riro e te ꞌAtua i a kōrua he nuꞌu ꞌina e tahi hape, e hio-hio rō ꞌana te manaꞌu ꞌi ruŋa i a ia, nuꞌu pūai mo haꞌaoromaꞌi, ꞌe nuꞌu noho, ki te hora hopeꞌa, ꞌi te ara o te ꞌAtua. A ia, paꞌi, he ꞌAtua kī mai, ꞌi tōꞌona riva rahi, mo noho o tātou ꞌi muri i a ia ꞌina he hopeꞌa raꞌa ꞌi roto i tōꞌona nui-nui ꞌana-ꞌana hai haka moe o tātou i te manaꞌu ꞌi ruŋa i a Ietū Kiritō,

1 Iovani 2:25

ꞌE te meꞌe hōrea mai era e Ietū Kiritō ko te meꞌe nei: he ora ꞌāpī ꞌina he hopeꞌa raꞌa.

Hura 1:3

E te taina, ko haŋa ꞌana a au mo pāpaꞌi atu o ruŋa i te eꞌa iŋa mai roto i te ūtuꞌa o te hara ꞌe te ravaꞌa iŋa i te ora ꞌāpī ꞌina he hopeꞌa raꞌa, he meꞌe ai i a kōrua ꞌe i a au. ꞌE, ko uꞌi ꞌana e au ꞌi te hora nei, te meꞌe ꞌāꞌaku mo hōrou mo pāpaꞌi atu: e maꞌu hio-hio ꞌi roto i te kōrua māhatu te hāpī parautiꞌa vaꞌai mai e te ꞌAtua ki a tātou ki te nuꞌu haꞌataꞌa e ia māꞌana ꞌe e hāpaꞌo ꞌo huri hai manaꞌu taŋata.

Meꞌe Haka Takeꞌa 3:3

Ka manaꞌu koe ki te hāpī vaꞌai atu era koia ko hārui haka ꞌou i tuꞌu manaꞌu ki te ꞌAtua ꞌe ꞌai ka haꞌatura ka oho rō ki rā hāpī. Mo taꞌe aŋa ōꞌou pē ira, he tuꞌu atu a au pa he toke-toke haka ūtuꞌa i a koe ꞌi te hora ꞌina kai ꞌite hia e koe.